Глава 32
1
И бы́сть во второєна́десять лѣ́то, во вторыйна́десять ме́сяцъ, во єди́нъ де́нь ме́сяца,
2
бы́сть сло́во Госпо́дне ко мнѣ́ глаго́ля: сы́не человѣ́чь, возми́ пла́чь на фарао́на царя́ Єги́петска и рече́ши єму́: льву́ язы́ковъ уподо́бился єси́ ты́, и я́ко змі́й вели́кій, и́же въ мо́ри, и би́лъ єси́ рога́ми въ рѣка́хъ твои́хъ, и возмуща́лъ єси́ во́ду нога́ма твои́ма, и попира́лъ єси́ рѣ́ки твоя́.
3
Сія́ глаго́летъ Адонаі́ Госпо́дь: и возложу́ на тя́ сѣ́ти моя́ въ собра́ніи люді́й мно́гихъ,
4
и изведу́ тя у́дою моє́ю, и простру́ тя на земли́: поля́ напо́лнятся тебе́, и посажду́ на тебѣ́ вся́ пти́цы небе́сныя, и насы́щу тобо́ю вся́ звѣ́ри всея́ земли́:
5
и пове́ргу пло́ти твоя́ на гора́хъ, и напо́лню кро́вію твоє́ю всю́ зе́млю,
6
и напіє́тся земля́ от гно́я твоєго́, от мно́жества твоєго́ на гора́хъ: и де́бри напо́лню от тебе́,
7
и покры́ю не́бо, єгда́ уга́снеши, и помрачу́ звѣ́зды єго́, со́лнце во о́блацѣ сокры́ю, и луна́ не яви́тъ свѣ́та своєго́:
8
вся́ свѣти́ла небе́сная помрачу́ на тя́ и да́мъ тму́ на зе́млю твою́, глаго́летъ Адонаі́ Госпо́дь.
9
И разгнѣ́ваю сердца́ люді́й мно́гихъ, єгда́ изведу́ плѣ́нники твоя́ во язы́ки, въ зе́млю, єя́же не зна́лъ єси́.
10
И уны́ютъ о тебѣ́ язы́цы мно́зи, и ца́ріє и́хъ у́жасомъ ужа́снутся о тебѣ́, єгда́ налети́тъ ме́чь мо́й на ли́ца и́хъ, ча́юще паде́нія своєго́ от дне́ паде́нія твоєго́.
11
Я́ко сія́ глаго́летъ Адонаі́ Госпо́дь: ме́чь царя́ Вавило́нска пріи́детъ тебѣ́, мечьми́ исполи́новъ, и поражу́ крѣ́пость твою́:
12
губи́теліє от язы́къ вси́, и погубя́тъ укори́зну Єги́петску, и сокруши́тся вся́ крѣ́пость єго́.
13
И погублю́ вся́ скоты́ єго́ от воды́ мно́ги, и не возмути́тъ єя́ нога́ человѣ́ческа ктому́, и стопа́ ско́тія не сту́питъ на ню́.
14
Та́ко тогда́ умо́лкнутъ во́ды и́хъ, и рѣ́ки и́хъ я́ко єле́й потеку́тъ, глаго́летъ Адонаі́ Госпо́дь,
15
єгда́ да́мъ Єги́пта въ па́губу, и опустѣ́єтъ земля́ съ полното́ю своє́ю, єгда́ разсѣ́ю вся́ живу́щыя на не́й, и увѣ́дятъ, я́ко а́зъ є́смь Госпо́дь.
16
Пла́чь є́сть, и воспла́чешися о не́мъ, и дще́ри язы́ческія воспла́чутся о не́мъ, надъ Єги́птомъ и надъ все́ю си́лою єго́ воспла́чутся, глаго́летъ Адонаі́ Госпо́дь.
17
И бы́сть во второєна́десять лѣ́то, пе́рваго ме́сяца въ пятыйна́десять де́нь, бы́сть сло́во Госпо́дне ко мнѣ́ глаго́ля:
18
сы́не человѣ́чь, воспла́чися о крѣ́пости Єги́петстѣй [прекланя́я преведи́ єго́]: и сведу́тъ дще́рей єго́ ме́ртвыхъ язы́цы во глубину́ земну́ю ко низходя́щымъ въ про́пасть.
19
От во́дъ благолѣ́пно сни́ди и поспи́ съ необрѣ́заными.
20
Средѣ́ я́звеныхъ мече́мъ паду́тъ съ ни́мъ, и у́спнетъ вся́ крѣ́пость єго́.
21
И реку́тъ ти́ исполи́ни: во глубинѣ́ про́пасти бу́ди, кого́ лу́чши єси́ ты́? сни́ди и ля́зи съ необрѣ́заными средѣ́ я́звеныхъ мече́мъ.
22
Та́мо Ассу́ръ и ве́сь со́нмъ єго́, и вси́ я́звеніи та́мо да́шася, и гро́бъ и́хъ во глубинѣ́ про́пасти, и бы́сть со́нмъ єго́ о́крестъ гро́ба єго́, вси́ я́звеніи па́дшіи мече́мъ,
23
и́же да́ша гро́бы єго́ во сте́гнѣхъ рва́, и бы́сть со́нмъ єго́ о́крестъ гро́ба єго́, вси́ ті́и я́звеніи па́дающіи мече́мъ, и́же да́ша стра́хъ сво́й на земли́ живы́хъ.
24
Та́мо Єла́мъ и вся́ си́ла єго́ о́крестъ гро́ба єго́, вси́ я́звеніи па́дшіи мече́мъ и низходя́щіи необрѣ́зани во глубину́ земну́ю, да́вшіи стра́хъ сво́й на земли́ живы́хъ:
25
и прія́ша муче́ніє своє́ съ низходя́щими въ про́пасть, средѣ́ я́звеныхъ.
26
Та́мо да́шася Мосо́хъ, и Ѳове́ль, и вся́ си́ла єго́, о́крестъ гро́ба єго́, вси́ необрѣ́занніи я́звеніи от меча́, да́вшіи стра́хъ сво́й на земли́ жи́зни.
27
И успо́ша со исполи́ны па́дшими от вѣ́ка, и́же снидо́ша во а́дъ во ору́жіи во́инстѣмъ и положи́ша мечы́ своя́ подъ главы́ своя́, и бы́ша беззако́нія и́хъ на косте́хъ и́хъ, я́ко устраши́ша всѣ́хъ во житіи́ своє́мъ, и стра́хъ си́льнымъ бы́ша на земли́ живу́щымъ.
28
И ты́ посредѣ́ необрѣ́занныхъ сокруши́шися и поспи́ши со я́звеными мече́мъ.
29
Та́мо Єдо́мъ и ца́ріє єго́ и вси́ кня́зи Ассу́ровы, да́вшіи крѣ́пость свою́ на я́зву ме́чную: сі́и со я́звеными успо́ша, съ низходя́щими въ ро́въ.
30
Та́мо кня́зи сѣ́верстіи вси́, та́мо вси́ воєво́ды Ассу́ровы, и́же сведе́ни бы́ша со я́звеными со стра́хомъ свои́мъ и со крѣ́постію своє́ю стыдя́щеся, успо́ша необрѣ́занніи со я́звеными мече́мъ, и прія́ша муче́ніє своє́ съ низходя́щими въ про́пасть.
31
Тѣ́хъ у́зритъ ца́рь фарао́нъ и утѣ́шится о все́й крѣ́пости и́хъ: фарао́нъ и я́звеніи мече́мъ и вся́ си́ла єго́, глаго́летъ Адонаі́ Госпо́дь.
32
Я́ко да́хъ стра́хъ мо́й на земли́ жи́зни, и у́спнетъ средѣ́ необрѣ́занныхъ со я́звеными мече́мъ фарао́нъ, и все́ мно́жество єго́ съ ни́мъ, глаго́летъ Адонаі́ Госпо́дь.
