Глава 46
1
Паде́ ви́лъ, сокруши́ся даго́нъ, бы́ша вая́нія и́хъ во звѣ́ри и ско́ты: но́сите я́ свя́зана я́ко бре́мя тружда́ющемуся и разслабѣ́вшу,
2
и а́лчущу и не могу́щу вку́пѣ, и́же не возмо́гутъ спасти́ся от ра́ти, са́ми же плѣне́ни приведо́шася.
3
Послу́шайте мене́, до́ме Іа́ковль и ве́сь оста́нокъ Ізра́илевъ, носи́міи от чре́ва и наказу́єміи от дѣ́тска да́же до ста́рости:
4
а́зъ є́смь, и до́ндеже состарѣ́єтеся, а́зъ є́смь, а́зъ терплю́ ва́мъ, а́зъ сотвори́хъ и а́зъ понесу́, а́зъ подъиму́ и спасу́ вы.
5
Кому́ мя́ уподо́бисте? ви́дите, ухи́трите, заблужда́ющіи,
6
слага́ющіи зла́то изъ мѣ́ха, и сребро́ вѣ́сомъ поставля́ютъ въ мѣ́рилѣ, и нає́мше зла́таря сотвори́ша рукотворе́нная, и прекло́ншеся покланя́ются и́мъ:
7
воздви́жутъ я́ на ра́мѣхъ и хо́дятъ: а́ще же положа́тъ я́ на мѣ́стѣ своє́мъ, ту́ лежа́тъ, ниже́ подви́жутся: и и́же а́ще возопіє́тъ къ ни́мъ, не услы́шатъ, от бѣ́дъ не спасу́тъ єго́.
8
Помяни́те сія́ и возстени́те, пока́йтеся, прельсти́вшіися, обрати́теся се́рдцемъ
9
и помяни́те пе́рвая от вѣ́ка, я́ко а́зъ є́смь Бо́гъ, и нѣ́сть єще́ ра́звѣ мене́:
10
возвѣща́яй пе́рвѣє послѣ́дняя, пре́жде не́же бы́ти и́мъ, и а́біє сбы́шася: и реко́хъ: ве́сь совѣ́тъ мо́й ста́нетъ, и вся́, єли́ка совѣща́хъ, сотворю́.
11
Призыва́яй от восто́къ пти́цу, и от земли́ издале́ча, о ни́хже совѣща́хъ: реко́хъ и приведо́хъ, созда́хъ и сотвори́хъ, приведо́хъ и́ и благопоспѣши́хъ пу́ть єго́.
12
Послу́шайте мене́, погу́бльшіи се́рдце, су́щіи дале́че от пра́вды:
13
прибли́жихъ пра́вду мою́, и не удали́тся, и спасе́ніє, є́же от мене́, не уме́длю: да́хъ въ Сіо́нѣ спасе́ніє Ізра́илю во прославле́ніє.
