Глава 60
1
Свѣти́ся, свѣти́ся, Ієрусали́ме, пріи́де бо тво́й свѣ́тъ, и сла́ва Госпо́дня на тебѣ́ возсія́.
2
Се́, тма́ покры́єтъ зе́млю, и мра́къ на язы́ки, на тебѣ́ же яви́тся Госпо́дь, и сла́ва Єго́ на тебѣ́ у́зрится.
3
И по́йдутъ ца́ріє свѣ́томъ твои́мъ, и язы́цы свѣ́тлостію твоє́ю.
4
Возведи́ о́крестъ о́чи твои́ и ви́ждь собра́ная ча́да твоя́: се́, пріидо́ша вси́ сы́нове твои́ издале́ча, и дще́ри твоя́ на ра́мѣхъ во́змутся.
5
Тогда́ у́зриши и возра́дуєшися, и убои́шися и ужа́снешися се́рдцемъ, я́ко преложи́тся къ тебѣ́ бога́тство морско́є и язы́ковъ и люді́й:
6
и пріи́дутъ къ тебѣ́ стада́ велблю́дъ, и покры́ютъ тя́ велблю́ди Мадіа́мстіи и гефа́рстіи: вси́ от Савы́ пріи́дутъ, нося́ще зла́то, и Ліва́нъ принесу́тъ и ка́мень че́стенъ, и спасе́ніє Госпо́дне благовозвѣстя́тъ:
7
и вся́ о́вцы Кида́рскія соберу́тся тебѣ́, и овни́ Навео́ѳстіи пріи́дутъ къ тебѣ́, и вознесу́тся прія́тная на же́ртвенникъ Мо́й, и до́мъ моли́твы Моєя́ просла́вится.
8
Кі́и су́ть, и́же я́ко о́блацы летя́тъ, и я́ко го́лубіє со птенцы́ ко мнѣ́?
9
Мене́ о́строви жда́ша, и корабли́ Ѳарсі́йстіи во пе́рвыхъ, привести́ ча́да твоя́ издале́ча, и сребро́ и зла́то и́хъ съ ни́ми, и́мене ра́ди Госпо́дня свята́го, и за є́же свято́му Ізра́илеву сла́вну бы́ти.
10
И сози́ждутъ сы́нове иноро́дніи стѣ́ны твоя́, и ца́ріє и́хъ предстоя́ти бу́дутъ тебѣ́: за гнѣ́въ бо Мо́й порази́хъ тя́ и за ми́лость Мою́ возлюби́хъ тя́.
11
И отве́рзутся врата́ твоя́ при́сно, де́нь и но́щь не затворя́тся, ввести́ къ тебѣ́ си́лу язы́къ и цари́ и́хъ ведо́мыя.
12
Язы́цы бо и ца́ріє, и́же не порабо́таютъ ти́, поги́бнутъ, и язы́цы запустѣ́ніємъ запустѣ́ютъ.
13
И сла́ва Ліва́нова къ тебѣ́ пріи́детъ, кипарі́сомъ и пе́вгомъ и ке́дромъ вку́пѣ, просла́вити мѣ́сто свято́є Моє́, и мѣ́сто ногу́ Моє́ю просла́влю.
14
И по́йдутъ къ тебѣ́ боя́щеся сы́нове смири́вшихъ тя́ и раздражи́вшихъ тя́, и покло́нятся слѣда́мъ ногу́ твоє́ю вси́ прогнѣ́вавшіи тя́, и нарече́шися гра́дъ Госпо́день, Сіо́нъ свята́го Ізра́илева.
15
За сіє́, я́ко бы́лъ єси́ оста́вленъ и возненави́дѣнъ и не бѣ́ помага́ющаго ти́, положу́ тя́ въ ра́дость вѣ́чную, весе́ліє родо́мъ родо́въ.
16
И изссе́ши млеко́ язы́ковъ и бога́тство царе́й снѣ́си, и уразумѣ́єши, я́ко А́зъ Госпо́дь спаса́яй тя́ и избавля́яй тя́ Бо́гъ Ізра́илевъ.
17
И вмѣ́сто мѣ́ди принесу́ ти́ зла́то, и вмѣ́сто желѣ́за принесу́ ти́ сребро́, и вмѣ́сто древе́съ принесу́ ти́ мѣ́дь, и вмѣ́сто ка́менія желѣ́зо: и вда́мъ кня́зи твоя́ въ ми́ръ и надзира́тели твоя́ въ пра́вду.
18
И не услы́шится посе́мъ непра́вда въ земли́ твоє́й, ни сокруше́ніє, ни бѣ́дность во предѣ́лѣхъ твои́хъ, но прозове́тся спасе́ніє забра́ла твоя́ и врата́ твоя́ хвала́.
19
И не бу́детъ тебѣ́ ктому́ со́лнце во свѣ́тъ дне́, ниже́ восхо́дъ луны́ просвѣти́тъ твою́ но́щь, но бу́детъ тебѣ́ Госпо́дь свѣ́тъ вѣ́чный и Бо́гъ сла́ва твоя́.
20
Не за́йдетъ бо со́лнце тебѣ́, и луна́ не оскудѣ́єтъ тебѣ́: бу́детъ бо Госпо́дь тебѣ́ свѣ́тъ вѣ́чный, и испо́лнятся дні́є рыда́нія твоєго́.
21
И лю́діє твои́ вси́ пра́ведніи во вѣ́къ наслѣ́дятъ зе́млю, храня́ще са́дъ, дѣла́ руку́ Єго́ въ сла́ву.
22
Ма́лый бу́детъ въ ты́сящы, а малѣ́йшій во язы́къ вели́къ: А́зъ, Госпо́дь, по вре́мени соберу́ и́хъ.
