Глава 66
1
Та́ко глаго́летъ Госпо́дь: небо престо́лъ мо́й, земля́ же подно́жіє ногу́ моє́ю: кі́й до́мъ сози́ждете ми́, и ко́є мѣ́сто поко́ища моєго́?
2
Вся́ бо сія́ сотвори́ рука́ моя́, и сія́ су́ть вся́ моя́, глаго́летъ Госпо́дь. И на кого́ воззрю́, то́кмо на кро́ткаго и молчали́ваго и трепе́щущаго слове́съ мои́хъ?
3
Беззако́нникъ же жря́й ми́ телца́, я́ко убива́яй пса́: и принося́й семіда́лъ, я́ко кро́вь свину́ю: дая́й Ліва́нъ въ па́мять, а́ки ху́лникъ. И ті́и избра́ша пути́ своя́, и ме́рзости и́хъ, я́же душа́ и́хъ изво́ли.
4
И а́зъ изберу́ поруга́нія и́хъ и грѣхи́ и́хъ возда́мъ и́мъ: я́ко зва́хъ и́хъ, и не послу́шаша мене́, глаго́лахъ, и преслу́шаша и сотвори́ша зло́є предо мно́ю, и я́же не хотѣ́хъ, избра́ша.
5
Услы́шите глаго́лъ Госпо́день, трепе́щущіи словесе́ єго́: рцы́те, бра́тія, ненави́дящымъ ва́съ и гнуша́ющымся, да и́мя Госпо́дне просла́вится и яви́тся во весе́ліи и́хъ, и они́ посра́мятся.
6
Гла́съ во́пля от гра́да, гла́съ от хра́ма, гла́съ Го́спода воздаю́щаго воздая́ніє сопроти́вящымся.
7
Пре́жде не́же чревоболѣ́ти є́й, роди́, пре́жде не́же пріити́ труду́ чревоболѣ́нія, избѣже́ и породи́ му́жескъ по́лъ.
8
Кто́ слы́ша сицево́є, и кто́ ви́дѣ си́це? а́ще родила́ земля́ съ болѣ́знію во єди́нъ де́нь? или́ и роди́ся язы́къ ве́сь ку́пно, я́ко поболѣ́ и роди́ Сіо́нъ дѣ́ти своя́?
9
А́зъ же да́хъ ча́яніє сіє́, и не помяну́лъ єси́ мене́, рече́ Госпо́дь. Не се́ ли, а́зъ родя́щую и непло́дную сотвори́хъ? рече́ Бо́гъ тво́й.
10
Весели́ся, Ієрусали́ме, и торжеству́йте въ не́мъ, вси́ лю́бящіи єго́ и живу́щіи въ не́мъ: ра́дуйтеся вку́пѣ съ ни́мъ ра́достію, вси́ єли́цы пла́касте о не́мъ,
11
да ссе́те и насы́титеся от сосца́ утѣше́нія єго́, да сса́вше насладите́ся от вхо́да сла́вы єго́.
12
Я́ко сія́ глаго́летъ Госпо́дь: се́, а́зъ укланя́ю на ня́ а́ки рѣку́ ми́ра, и а́ки пото́къ наводня́ємый сла́ву язы́ковъ: дѣ́ти и́хъ на ра́мена взя́ты бу́дутъ и на колѣ́ну утѣ́шатся.
13
Я́коже а́ще кого́ ма́ти утѣша́єтъ, та́ко и а́зъ утѣ́шу вы́, и во Ієрусали́мѣ утѣ́шитеся
14
и у́зрите, и возра́дуєтся се́рдце ва́ше, и ко́сти ва́шя я́ко трава́ прозя́бнутъ: и позна́єтся рука́ Госпо́дня боя́щымся єго́, и запрети́тъ непокаря́ющымся.
15
Се́ бо, Госпо́дь я́ко о́гнь пріи́детъ, и я́ко бу́ря колесни́цы єго́, возда́ти я́ростію отмще́ніє своє́ и преще́ніє во пла́мени о́гненнѣ:
16
огне́мъ бо Госпо́днимъ суди́тися бу́детъ вся́ земля́, и мече́мъ єго́ вся́ка пло́ть: мно́зи я́звени бу́дутъ от Го́спода.
17
Очища́ющіися и освяща́ющіися во вертогра́дѣхъ и въ преддве́ріихъ яду́щіи мя́со свино́є и ме́рзости и мы́шы вку́пѣ поги́бнутъ, рече́ Госпо́дь.
18
И а́зъ дѣла́ и́хъ и помышле́ніє и́хъ вѣ́мъ, и гряду́ собра́ти вся́ наро́ды и язы́ки, и пріи́дутъ и у́зрятъ сла́ву мою́:
19
и оста́влю на ни́хъ зна́меніє, и послю́ от ни́хъ спасе́ныхъ во язы́ки, во Ѳарсі́съ и въ Фу́дъ, и въ Лу́дъ и въ Мосо́хъ, и въ Ѳове́ль и во Єлла́ду, и во о́стровы да́льнія, и́же не слы́шаша и́мене моєго́, ниже́ ви́дѣша сла́ву мою́: и возвѣстя́тъ сла́ву мою́ во язы́цѣхъ,
20
и приведу́тъ бра́тію ва́шу от всѣ́хъ язы́къ да́ръ Го́сподеви, съ ко́ньми и колесни́цами и съ носи́лами мско́въ, подъ сѣ́ньми во святы́й гра́дъ Ієрусали́мъ, рече́ Госпо́дь, а́ки бы принесли́ сы́нове Ізра́илевы же́ртвы своя́ мнѣ́ со псалмы́ въ до́мъ Госпо́день:
21
и от тѣ́хъ поиму́ себѣ́ жерцы́ и леві́ты, рече́ Госпо́дь.
22
Я́коже бо не́бо но́во и земля́ нова́, я́же а́зъ творю́, пребыва́ютъ предо мно́ю, глаго́летъ Госпо́дь, та́ко ста́нетъ сѣ́мя ва́ше и и́мя ва́ше:
23
и бу́детъ ме́сяцъ от ме́сяца, и суббо́та от суббо́ты, пріи́детъ вся́ка пло́ть поклони́тися предо мно́ю во Ієрусали́мъ, рече́ Госпо́дь:
24
и изы́дутъ и у́зрятъ тру́пы человѣ́ковъ преступи́вшихъ мнѣ́: че́рвь бо и́хъ не сконча́єтся, и о́гнь и́хъ не уга́снетъ, и бу́дутъ въ позо́ръ вся́цѣй пло́ти. Коне́цъ кни́зѣ проро́ка Иса́іи: и́мать въ себѣ́ гла́въ 66.
