Глава 10
1
И воста́ по Авімеле́сѣ спасти́ Ізра́иля Ѳола́ сы́нъ Фуи́, сы́нъ бра́та отца́ єго́, му́жъ от Іссаха́ра: и се́й живя́ше въ самі́рѣ въ горѣ́ Єфре́мовѣ,
2
и суди́ Ізра́иля лѣ́тъ два́десять три́, и у́мре, и погребе́нъ бы́сть въ самі́рѣ.
3
И воста́ по не́мъ Іаі́ръ Галааді́тинъ, и суди́ Ізра́иля лѣ́тъ два́десять два́:
4
и бы́ша єму́ сы́нове три́десять два́ ѣ́здящіи на три́десяти дву́хъ ослѣ́хъ: и гра́ды и́мъ три́десять два́: и прозыва́ху и́хъ гра́ды Іаі́ровы, да́же до дне́сь, и́же су́ть въ земли́ Галаа́довѣ:
5
и у́мре Іаі́ръ, и погребе́нъ бы́сть въ камо́нѣ.
6
И приложи́ша сы́нове Ізра́илевы твори́ти зло́є предъ Го́сподемъ и послужи́ша Ваалі́мамъ и Астаро́ѳамъ и бого́мъ си́рскимъ и бого́мъ Сідо́нскимъ и бого́мъ Моа́влскимъ и бого́мъ сыно́въ Аммо́нихъ и бого́мъ иноплеме́нниковъ: и оста́виша Го́спода и не рабо́таша єму́.
7
И разгнѣ́вася Госпо́дь я́ростію на Ізра́иля и предаде́ и́хъ въ ру́ку Филісті́мску и въ ру́ку сыно́въ Аммо́нихъ.
8
И озло́биша, и сокруши́ша сыно́въ Ізра́илевыхъ въ то́ вре́мя осмьна́десять лѣ́тъ, всѣ́хъ сыно́въ Ізра́илевыхъ, и́же объ ону́ страну́ Іорда́на въ земли́ Аморре́а и́же въ Галаа́дѣ.
9
И преидо́ша сы́нове Аммо́ни Іорда́нъ воєва́ти на Іу́ду и Веніамі́на и на до́мъ Єфре́мовъ: и оскорбле́ни бы́ша сы́нове Ізра́илевы зѣло́.
10
И возопи́ша сы́нове Ізра́илевы ко Го́споду, глаго́люще: согрѣши́хомъ тебѣ́, я́ко оста́вихомъ Бо́га на́шего и рабо́тахомъ Ваалі́му.
11
И рече́ Госпо́дь къ сыно́мъ Ізра́илевымъ: не от Єги́пта ли и от Аморре́а и от сыно́въ Аммо́нихъ и от Филісті́ма
12
и от Сідо́нянъ и от Амали́ка и от Мадіа́ма, и́же стужи́ша ва́мъ, и возопи́сте ко мнѣ́, и спасо́хъ вы́ от руки́ и́хъ?
13
вы́ же оста́висте мене́ и рабо́тасте бого́мъ ины́мъ: сего́ ра́ди не приложу́ спасти́ ва́съ:
14
иди́те и возопі́йте къ бого́мъ, и́хже избра́сте себѣ́, и ті́и да спасу́тъ вы́ во вре́мя ско́рби ва́шея.
15
И рѣ́ша сы́нове Ізра́илевы ко Го́споду: согрѣши́хомъ, сотвори́ ты́ на́мъ по всему́, єли́ко уго́дно предъ очи́ма твои́ма: то́чію изба́ви на́съ въ се́й де́нь.
16
И изверго́ша бо́ги чужды́я от среды́ себе́ и послужи́ша Го́сподеви єди́ному: и сжалѣ́ся душа́ єго́ о утружде́ніи Ізра́илевѣ.
17
И взыдо́ша сы́нове Аммо́ни, и ополчи́шася въ Галаа́дѣ: и собра́шася и сы́нове Ізра́илевы, и ополчи́шася въ Массифѣ́.
18
И рѣ́ша лю́діє кня́зи Галаа́дстіи кі́йждо ко бли́жнему своєму́: му́жъ, и́же на́чнетъ би́тися съ сынми́ Аммо́новыми, то́й бу́детъ кня́зь всѣ́мъ живу́щымъ въ Галаа́дѣ.
