|
Глава 11
|
Глава́ а҃і
|
|
1
|
1
|
|
И бя́ше Ієфѳа́й Галааді́тянинъ си́ленъ крѣ́постію: и то́й бы́сть сы́нъ жены́ блудни́цы, я́же роди́ Галаа́ду Ієфѳа́я.
|
И҆ бѧ́ше і҆ефѳа́й галааді́тѧнинъ си́ленъ крѣ́постїю: и҆ то́й бы́сть сы́нъ жены̀ блꙋдни́цы, ꙗ҆́же родѝ галаа́дꙋ і҆ефѳа́ѧ.
|
|
2
|
2
|
|
И роди́ жена́ Галаа́дова сыно́въ єму́: и возмужа́ша сы́нове жены́ и изгна́ша Ієфѳа́я, и реко́ша єму́: не наслѣ́диши въ дому́ отца́ на́шего, я́ко сы́нъ жены́ блу́дныя єси́ ты́.
|
И҆ родѝ жена̀ галаа́дова сынѡ́въ є҆мꙋ̀: и҆ возмꙋжа́ша сы́нове жены̀ и҆ и҆згна́ша і҆ефѳа́ѧ, и҆ реко́ша є҆мꙋ̀: не наслѣ́диши въ домꙋ̀ ѻ҆тца̀ на́шегѡ, ꙗ҆́кѡ сы́нъ жены̀ блꙋ́дныѧ є҆сѝ ты̀.
|
|
3
|
3
|
|
И отбѣже́ Ієфѳа́й от лица́ бра́тіи своєя́ и всели́ся въ земли́ то́въ: и собира́хуся ко Ієфѳа́ю му́жіє пра́здни, и хожда́ху съ ни́мъ.
|
И҆ ѿбѣжѐ і҆ефѳа́й ѿ лица̀ бра́тїи своеѧ̀ и҆ всели́сѧ въ землѝ тѡ́въ: и҆ собира́хꙋсѧ ко і҆ефѳа́ю мꙋ́жїе пра́здни, и҆ хожда́хꙋ съ ни́мъ.
|
|
4
|
4
|
|
И бы́сть по дне́хъ си́хъ, и воєва́ша сы́нове Аммо́ни на Ізра́иля.
|
И҆ бы́сть по дне́хъ си́хъ, и҆ воева́ша сы́нове а҆ммѡ̑ни на і҆и҃лѧ.
|
|
5
|
5
|
|
И єгда́ воєва́ша сы́нове Аммо́ни на Ізра́иля, и поидо́ша старѣ́йшины Галаа́довы поя́ти Ієфѳа́я от земли́ то́въ,
|
И҆ є҆гда̀ воева́ша сы́нове а҆ммѡ̑ни на і҆и҃лѧ, и҆ поидо́ша старѣ̑йшины галаа́дѡвы поѧ́ти і҆ефѳа́ѧ ѿ землѝ тѡ́въ,
|
|
6
|
6
|
|
и реко́ша ко Ієфѳа́ю: пріиди́ и бу́ди на́мъ нача́лникъ, и ополчи́мся на сы́ны Аммо́ни.
|
и҆ реко́ша ко і҆ефѳа́ю: прїидѝ и҆ бꙋ́ди на́мъ нача́лникъ, и҆ ѡ҆полчи́мсѧ на сы́ны а҆ммѡ̑ни.
|
|
7
|
7
|
|
И рече́ Ієфѳа́й старѣ́йшинамъ Галаа́дскимъ: не вы́ ли возненави́дѣсте мя́, и изгна́сте мя́ изъ до́му отца́ моєго́, и отпусти́сте мя́ от себе́? и почто́ пріидо́сте ко мнѣ́ ны́нѣ, єгда́ ну́жду возъимѣ́сте?
|
И҆ речѐ і҆ефѳа́й старѣ́йшинамъ галаа̑дскимъ: не вы́ ли возненави́дѣсте мѧ̀, и҆ и҆згна́сте мѧ̀ и҆з̾ до́мꙋ ѻ҆тца̀ моегѡ̀, и҆ ѿпꙋсти́сте мѧ̀ ѿ себє̀; и҆ почто̀ прїидо́сте ко мнѣ̀ нн҃ѣ, є҆гда̀ нꙋ́ждꙋ воз̾имѣ́сте;
|
|
8
|
8
|
|
И реко́ша старѣ́йшины Галаа́дстіи ко Ієфѳа́ю: сего́ ра́ди ны́нѣ пріидо́хомъ къ тебѣ́, да по́йдеши съ на́ми, и ополчи́мся на сы́ны Аммо́ни: и бу́деши на́мъ кня́зь всѣ́мъ живу́щымъ въ Галаа́дѣ.
|
И҆ реко́ша старѣ̑йшины галаа́дстїи ко і҆ефѳа́ю: сегѡ̀ ра́ди нн҃ѣ прїидо́хомъ къ тебѣ̀, да по́йдеши съ на́ми, и҆ ѡ҆полчи́мсѧ на сы́ны а҆ммѡ̑ни: и҆ бꙋ́деши на́мъ кнѧ́зь всѣ̑мъ живꙋ́щымъ въ галаа́дѣ.
|
|
9
|
9
|
|
И рече́ Ієфѳа́й ко старѣ́йшинамъ Галаа́довымъ: а́ще возвраща́єте мя́ ополчи́тися на сы́ны Аммо́ни, и преда́стъ и́хъ Госпо́дь предо мно́ю, и а́зъ ва́мъ бу́ду ли кня́зь?
|
И҆ речѐ і҆ефѳа́й ко старѣ́йшинамъ галаа́дѡвымъ: а҆́ще возвраща́ете мѧ̀ ѡ҆полчи́тисѧ на сы́ны а҆ммѡ̑ни, и҆ преда́стъ и҆̀хъ гдⷭ҇ь предо мно́ю, и҆ а҆́зъ ва́мъ бꙋ́дꙋ ли кнѧ́зь;
|
|
10
|
10
|
|
И реко́ша старѣ́йшины Галаа́дстіи ко Ієфѳа́ю: Госпо́дь да бу́детъ по́слухъ между́ на́ми, а́ще по сло́ву твоєму́ та́ко не сотвори́мъ.
|
И҆ реко́ша старѣ̑йшины галаа́дстїи ко і҆ефѳа́ю: гдⷭ҇ь да бꙋ́детъ по́слꙋхъ междꙋ̀ на́ми, а҆́ще по сло́вꙋ твоемꙋ̀ та́кѡ не сотвори́мъ.
|
|
11
|
11
|
|
И по́йде Ієфѳа́й со старѣ́йшинами Галаа́дскими, и поста́виша єго́ лю́діє надъ собо́ю главу́ и кня́зя: и глаго́ла Ієфѳа́й вся́ словеса́ своя́ предъ Го́сподемъ въ Массифѣ́.
|
И҆ по́йде і҆ефѳа́й со старѣ́йшинами галаа́дскими, и҆ поста́виша є҆го̀ лю́дїе над̾ собо́ю главꙋ̀ и҆ кнѧ́зѧ: и҆ глаго́ла і҆ефѳа́й всѧ̑ словеса̀ своѧ̑ пред̾ гдⷭ҇емъ въ массифѣ̀.
|
|
12
|
12
|
|
И посла́ Ієфѳа́й послы́ къ царю́ сыно́въ Аммо́нихъ, глаго́ля: что́ мнѣ́ и тебѣ́, я́ко прише́лъ єси́ ко мнѣ́ воєва́ти на земли́ моє́й?
|
И҆ посла̀ і҆ефѳа́й послы̀ къ царю̀ сынѡ́въ а҆ммѡ́нихъ, глаго́лѧ: что̀ мнѣ̀ и҆ тебѣ̀, ꙗ҆́кѡ прише́лъ є҆сѝ ко мнѣ̀ воева́ти на землѝ мое́й;
|
|
13
|
13
|
|
И рече́ ца́рь сыно́въ Аммо́нихъ къ посло́мъ Ієфѳа́євымъ: я́ко взя́ Ізра́иль зе́млю мою́, єгда́ изы́де изъ Єги́пта, от Арно́на да́же до Іаво́ка и до Іорда́на: и ны́нѣ возврати́ ю́ съ ми́ромъ, и отиду́.
|
И҆ речѐ ца́рь сынѡ́въ а҆ммѡ́нихъ къ послѡ́мъ і҆ефѳа́євымъ: ꙗ҆́кѡ взѧ̀ і҆и҃ль зе́млю мою̀, є҆гда̀ и҆зы́де и҆з̾ є҆гѵ́пта, ѿ а҆рнѡ́на да́же до і҆аво́ка и҆ до і҆ѻрда́на: и҆ нн҃ѣ возвратѝ ю҆̀ съ ми́ромъ, и҆ ѿидꙋ̀.
|
|
14
|
14
|
|
И возврати́шася послы́ ко Ієфѳа́ю. И приложи́ єще́ Ієфѳа́й, и посла́ послы́ къ царю́ сыно́въ Аммо́нихъ, и реко́ша єму́:
|
И҆ возврати́шасѧ послы̀ ко і҆ефѳа́ю. И҆ приложѝ є҆щѐ і҆ефѳа́й, и҆ посла̀ послы̀ къ царю̀ сынѡ́въ а҆ммѡ́нихъ, и҆ реко́ша є҆мꙋ̀:
|
|
15
|
15
|
|
та́ко глаго́летъ Ієфѳа́й: не взя́ Ізра́иль земли́ Моа́вли и земли́ сыно́въ Аммо́нихъ,
|
та́кѡ глаго́летъ і҆ефѳа́й: не взѧ̀ і҆и҃ль землѝ мѡа́вли и҆ землѝ сынѡ́въ а҆ммѡ́нихъ,
|
|
16
|
16
|
|
поне́же єгда́ исхожда́ше изъ Єги́пта, по́йде Ізра́иль по пусты́ни до мо́ря чермна́го, и пріи́де до Ка́диса:
|
поне́же є҆гда̀ и҆схожда́ше и҆з̾ є҆гѵ́пта, по́йде і҆и҃ль по пꙋсты́ни до мо́рѧ чермна́гѡ, и҆ прїи́де до ка́диса:
|
|
17
|
17
|
|
и посла́ Ізра́иль послы́ къ царю́ Єдо́мску, глаго́ля: да прейду́ сквозѣ́ зе́млю твою́: и не послу́ша ца́рь Єдо́мскъ: та́кожде посыла́ и къ царю́ Моа́вску, и не восхотѣ́: и сѣ́де Ізра́иль въ Ка́дисѣ:
|
и҆ посла̀ і҆и҃ль послы̀ къ царю̀ є҆дѡ́мскꙋ, глаго́лѧ: да прейдꙋ̀ сквозѣ̀ зе́млю твою̀: и҆ не послꙋ́ша ца́рь є҆дѡ́мскъ: та́кожде посыла̀ и҆ къ царю̀ мѡа́вскꙋ, и҆ не восхотѣ̀: и҆ сѣ́де і҆и҃ль въ ка́дисѣ:
|
|
18
|
18
|
|
и и́де пусты́нею, и обы́де зе́млю Єдо́млю и зе́млю Моа́влю, и пріи́де на восто́ки со́лнца земли́ Моа́вли, и ополчи́ся объ ону́ страну́ Арно́на, и не вни́де въ предѣ́лы Моа́вли, я́ко Арно́нъ бя́ше предѣ́лъ Моа́вль:
|
и҆ и҆́де пꙋсты́нею, и҆ ѡ҆бы́де зе́млю є҆дѡ́млю и҆ зе́млю мѡа́влю, и҆ прїи́де на восто́ки со́лнца землѝ мѡа́вли, и҆ ѡ҆полчи́сѧ ѡ҆б̾ ѻ҆нꙋ̀ странꙋ̀ а҆рнѡ́на, и҆ не вни́де въ предѣ́лы мѡа̑вли, ꙗ҆́кѡ а҆рнѡ́нъ бѧ́ше предѣ́лъ мѡа́вль:
|
|
19
|
19
|
|
и посла́ Ізра́иль послы́ къ сио́ну царю́ Аморре́йску, царю́ єсево́нску, и рече́ къ нему́ Ізра́иль: да пре́йдемъ по земли́ твоє́й до мѣ́ста на́шего:
|
и҆ посла̀ і҆и҃ль послы̀ къ сиѡ́нꙋ царю̀ а҆морре́йскꙋ, царю̀ є҆севѡ́нскꙋ, и҆ речѐ къ немꙋ̀ і҆и҃ль: да пре́йдемъ по землѝ твое́й до мѣ́ста на́шегѡ:
|
|
20
|
20
|
|
и не восхотѣ́ сио́нъ Ізра́илю преити́ по предѣ́ломъ свои́мъ, и собра́ сио́нъ вся́ лю́ди своя́, и ополчи́ся во Іа́сѣ, и воєва́ на Ізра́иля:
|
и҆ не восхотѣ̀ сиѡ́нъ і҆и҃лю преитѝ по предѣ́лѡмъ свои̑мъ, и҆ собра̀ сиѡ́нъ всѧ̑ лю́ди своѧ̑, и҆ ѡ҆полчи́сѧ во і҆а́сѣ, и҆ воева̀ на і҆и҃лѧ:
|
|
21
|
21
|
|
и предаде́ Госпо́дь Бо́гъ Ізра́илевъ сио́на и вся́ лю́ди єго́ въ ру́ки Ізра́иля, и изби́ и́хъ:
|
и҆ предадѐ гдⷭ҇ь бг҃ъ і҆и҃левъ сиѡ́на и҆ всѧ̑ лю́ди є҆гѡ̀ въ рꙋ́ки і҆и҃лѧ, и҆ и҆збѝ и҆̀хъ:
|
|
22
|
22
|
|
и наслѣ́дова Ізра́иль всю́ зе́млю Аморре́а живу́щаго на земли́ то́й: и взя́ ве́сь предѣ́лъ Аморре́йскъ от Арно́на да́же до Іаво́ка, и от пусты́ни до Іорда́на:
|
и҆ наслѣ́дова і҆и҃ль всю̀ зе́млю а҆морре́а живꙋ́щагѡ на землѝ то́й: и҆ взѧ̀ ве́сь предѣ́лъ а҆морре́йскъ ѿ а҆рнѡ́на да́же до і҆аво́ка, и҆ ѿ пꙋсты́ни до і҆ѻрда́на:
|
|
23
|
23
|
|
и ны́нѣ Госпо́дь Бо́гъ Ізра́илевъ изгна́ Аморре́а от лица́ люді́й свои́хъ Ізра́иля, и ты́ ли хо́щеши наслѣ́дити єго́?
|
и҆ нн҃ѣ гдⷭ҇ь бг҃ъ і҆и҃левъ и҆згна̀ а҆морре́а ѿ лица̀ люді́й свои́хъ і҆и҃лѧ, и҆ ты́ ли хо́щеши наслѣ́дити є҆го̀;
|
|
24
|
24
|
|
ни́, но єли́ко даде́ въ наслѣ́діє тебѣ́ хамо́съ бо́гъ тво́й, сія́ да наслѣ́диши: а всѣ́хъ, и́хже изгна́ Госпо́дь Бо́гъ на́шъ от лица́ на́шего, сія́ мы́ наслѣ́димъ:
|
нѝ, но є҆ли́кѡ дадѐ въ наслѣ́дїе тебѣ̀ хамѡ́съ бо́гъ тво́й, сїѧ̑ да наслѣ́диши: а҆ всѣ́хъ, и҆̀хже и҆згна̀ гдⷭ҇ь бг҃ъ на́шъ ѿ лица̀ на́шегѡ, сїѧ̑ мы̀ наслѣ́димъ:
|
|
25
|
25
|
|
и ны́нѣ єда́ лу́чшій єси́ ты́ Вала́ка сы́на Сепфо́рова, царя́ Моа́вля? не бра́нію ли боря́шеся со Ізра́илемъ, или́ вою́я воєва́ єго́?
|
и҆ нн҃ѣ є҆да̀ лꙋ́чшїй є҆сѝ ты̀ вала́ка сы́на сепфѡ́рова, царѧ̀ мѡа́влѧ; не бра́нїю ли борѧ́шесѧ со і҆и҃лемъ, и҆лѝ вою́ѧ воева̀ є҆го̀;
|
|
26
|
26
|
|
єгда́ всели́ся Ізра́иль во єсево́нѣ и въ предѣ́лѣхъ єго́, и во Арои́рѣ и въ предѣ́лѣхъ єго́, и во всѣ́хъ градѣ́хъ, и́же у Іорда́на, три́ста лѣ́тъ, и почто́ не изба́вилъ єси́ и́хъ во вре́мя о́но?
|
є҆гда̀ всели́сѧ і҆и҃ль во є҆севѡ́нѣ и҆ въ предѣ́лѣхъ є҆гѡ̀, и҆ во а҆рои́рѣ и҆ въ предѣ́лѣхъ є҆гѡ̀, и҆ во всѣ́хъ градѣ́хъ, и҆̀же оу҆ і҆ѻрда́на, три́ста лѣ́тъ, и҆ почто̀ не и҆зба́вилъ є҆сѝ и҆́хъ во вре́мѧ ѻ҆́но;
|
|
27
|
27
|
|
а́зъ же не согрѣши́хъ тебѣ́, и ты́ твори́ши со мно́ю зло́, вою́я на мя́: да су́дитъ Госпо́дь судя́й дне́сь между́ сы́ны Ізра́илевыми и между́ сы́ны Аммо́ни.
|
а҆́зъ же не согрѣши́хъ тебѣ̀, и҆ ты̀ твори́ши со мно́ю ѕло̀, вою́ѧ на мѧ̀: да сꙋ́дитъ гдⷭ҇ь сꙋдѧ́й дне́сь междꙋ̀ сы̑ны і҆и҃левыми и҆ междꙋ̀ сы̑ны а҆ммѡ̑ни.
|
|
28
|
28
|
|
И не послу́ша ца́рь сыно́въ Аммо́нихъ слове́съ Ієфѳа́євыхъ, я́же посыла́ше къ нему́.
|
И҆ не послꙋ́ша ца́рь сынѡ́въ а҆ммѡ́нихъ слове́съ і҆ефѳа́евыхъ, ꙗ҆̀же посыла́ше къ немꙋ̀.
|
|
29
|
29
|
|
И бы́сть на Ієфѳа́и Ду́хъ Госпо́день, и пре́йде Галаа́да и Манассі́ю, и пре́йде стражбу́ Галаа́дову, и от стражбы́ Галаа́довы и́де на о́ну страну́ сыно́въ Аммо́нихъ.
|
И҆ бы́сть на і҆ефѳа́и дх҃ъ гдⷭ҇ень, и҆ пре́йде галаа́да и҆ манассі́ю, и҆ пре́йде стражбꙋ̀ галаа́довꙋ, и҆ ѿ стражбы̀ галаа́довы и҆́де на ѻ҆́нꙋ странꙋ̀ сынѡ́въ а҆ммѡ́нихъ.
|
|
30
|
30
|
|
И обѣща́ Ієфѳа́й обѣ́тъ Го́сподеви и рече́: а́ще преда́ніємъ преда́си сы́ны Аммо́ни въ ру́ку мою́,
|
И҆ ѡ҆бѣща̀ і҆ефѳа́й ѡ҆бѣ́тъ гдⷭ҇еви и҆ речѐ: а҆́ще преда́нїемъ преда́си сы́ны а҆ммѡ̑ни въ рꙋ́кꙋ мою̀,
|
|
31
|
31
|
|
и бу́детъ исходя́й, и́же а́ще изы́детъ изъ вра́тъ до́му моєго́ во срѣ́теніє мнѣ́, єгда́ возвращу́ся съ ми́ромъ от сыно́въ Аммо́нихъ, и бу́детъ Го́сподеви, и вознесу́ єго́ во всесожже́ніє.
|
и҆ бꙋ́детъ и҆сходѧ́й, и҆́же а҆́ще и҆зы́детъ и҆з̾ вра́тъ до́мꙋ моегѡ̀ во срѣ́тенїе мнѣ̀, є҆гда̀ возвращꙋ́сѧ съ ми́ромъ ѿ сынѡ́въ а҆ммѡ́нихъ, и҆ бꙋ́детъ гдⷭ҇еви, и҆ вознесꙋ̀ є҆го̀ во всесожже́нїе.
|
|
32
|
32
|
|
И пріи́де Ієфѳа́й къ сыно́мъ Аммо́нимъ воєва́ти на ня́: и предаде́ я́ Госпо́дь въ ру́цѣ єго́
|
И҆ прїи́де і҆ефѳа́й къ сынѡ́мъ а҆ммѡ̑нимъ воева́ти на нѧ̀: и҆ предадѐ ѧ҆̀ гдⷭ҇ь въ рꙋ́цѣ є҆гѡ̀
|
|
33
|
33
|
|
и изби́ и́хъ от Арои́ра, до́ндеже пріити́ въ мені́ѳъ, два́десять градо́въ, и да́же до Аве́ля віногра́довъ, я́звою вели́кою зѣло́. И покоре́ни бы́ша сы́нове Аммо́ни предъ лице́мъ сыно́въ Ізра́илевыхъ.
|
и҆ и҆збѝ и҆̀хъ ѿ а҆рои́ра, до́ндеже прїитѝ въ мені́ѳъ, два́десѧть градѡ́въ, и҆ да́же до а҆ве́лѧ вїногра́дѡвъ, ꙗ҆́звою вели́кою ѕѣлѡ̀. И҆ покоре́ни бы́ша сы́нове а҆ммѡ̑ни пред̾ лице́мъ сынѡ́въ і҆и҃левыхъ.
|
|
34
|
34
|
|
И пріи́де Ієфѳа́й въ Массифу́ въ до́мъ сво́й: и се́, дще́рь єго́ исхожда́ше во срѣ́теніє єго́ съ тимпа́ны и ли́ки: и сія́ бя́ше єдиноро́дна єму́ возлю́бленна: и не бѣ́ єму́ сы́на, ни другі́я дще́ре, кромѣ́ єя́.
|
И҆ прїи́де і҆ефѳа́й въ массифꙋ̀ въ до́мъ сво́й: и҆ сѐ, дще́рь є҆гѡ̀ и҆схожда́ше во срѣ́тенїе є҆гѡ̀ съ тѷмпа̑ны и҆ ли̑ки: и҆ сїѧ̀ бѧ́ше є҆диноро́дна є҆мꙋ̀ возлю́бленна: и҆ не бѣ̀ є҆мꙋ̀ сы́на, ни дрꙋгі́ѧ дще́ре, кромѣ̀ є҆ѧ̀.
|
|
35
|
35
|
|
И бы́сть єгда́ уви́дѣ ю́ са́мъ, растерза́ ри́зы своя́ и рече́: о, дщи́ моя́, смуща́ющи смути́ла мя́ єси́: и ты́ ны́нѣ въ претыка́ніє была́ єси́ предъ очи́ма мои́ма: а́зъ бо отверзо́хъ уста́ моя́ на тя́ ко Го́споду и не возмогу́ вспя́ть возврати́ти.
|
И҆ бы́сть є҆гда̀ оу҆ви́дѣ ю҆̀ са́мъ, растерза̀ ри̑зы своѧ̑ и҆ речѐ: ѽ, дщѝ моѧ̀, смꙋща́ющи смꙋти́ла мѧ̀ є҆сѝ: и҆ ты̀ нн҃ѣ въ претыка́нїе была̀ є҆сѝ пред̾ ѻ҆чи́ма мои́ма: а҆́зъ бо ѿверзо́хъ оу҆ста̀ моѧ̑ на тѧ̀ ко гдⷭ҇ꙋ и҆ не возмогꙋ̀ вспѧ́ть возврати́ти.
|
|
36
|
36
|
|
И рече́ къ нему́: о́тче, а́ще отве́рзлъ єси́ уста́ твоя́ ко Го́споду, сотвори́ мнѣ́, я́коже изы́де изо у́стъ твои́хъ, зане́же сотвори́ тебѣ́ Госпо́дь ме́сть враго́мъ твои́мъ от сыно́въ Аммо́нихъ.
|
И҆ речѐ къ немꙋ̀: ѻ҆́тче, а҆́ще ѿве́рзлъ є҆сѝ оу҆ста̀ твоѧ̑ ко гдⷭ҇ꙋ, сотворѝ мнѣ̀, ꙗ҆́коже и҆зы́де и҆зо оу҆́стъ твои́хъ, зане́же сотворѝ тебѣ̀ гдⷭ҇ь ме́сть врагѡ́мъ твои̑мъ ѿ сынѡ́въ а҆ммѡ́нихъ.
|
|
37
|
37
|
|
И рече́ ко отцу́ своєму́: сотвори́, о́тче мо́й, сіє́ сло́во: оста́ви мя́ два́ мѣ́сяца, да пойду́ и взы́ду на го́ры и пла́чуся дѣ́вства моєго́ а́зъ и други́ни мои́.
|
И҆ речѐ ко ѻ҆тцꙋ̀ своемꙋ̀: сотворѝ, ѻ҆́тче мо́й, сїѐ сло́во: ѡ҆ста́ви мѧ̀ два̀ мѣ̑сѧца, да пойдꙋ̀ и҆ взы́дꙋ на го́ры и҆ пла́чꙋсѧ дѣ́вства моегѡ̀ а҆́зъ и҆ дрꙋги̑ни моѝ.
|
|
38
|
38
|
|
И рече́: иди́. И отпусти́ ю́ на два́ мѣ́сяца: и и́де сама́ и други́ни єя́, и пла́кася дѣ́вства своєго́ на гора́хъ.
|
И҆ речѐ: и҆дѝ. И҆ ѿпꙋстѝ ю҆̀ на два̀ мѣ̑сѧца: и҆ и҆́де сама̀ и҆ дрꙋги̑ни є҆ѧ̀, и҆ пла́касѧ дѣ́вства своегѡ̀ на гора́хъ.
|
|
39
|
39
|
|
И бы́сть въ концѣ́ двою́ мѣ́сяцу, и возврати́ся ко отцу́ своєму́: и сотвори́ на не́й обѣ́тъ сво́й, и́мже обѣща́ся: и сія́ не позна́ му́жа. И бы́сть въ повелѣ́ніє во Ізра́или:
|
И҆ бы́сть въ концѣ̀ двою̀ мѣ̑сѧцꙋ, и҆ возврати́сѧ ко ѻ҆тцꙋ̀ своемꙋ̀: и҆ сотворѝ на не́й ѡ҆бѣ́тъ сво́й, и҆́мже ѡ҆бѣща́сѧ: и҆ сїѧ̀ не позна̀ мꙋ́жа. И҆ бы́сть въ повелѣ́нїе во і҆и҃ли:
|
|
40
|
40
|
|
от дні́й до дні́й исхожда́ху дще́ри Ізра́илевы пла́кати о дще́ри Ієфѳа́я Галааді́тина четы́ри дни́ въ лѣ́тѣ.
|
ѿ дні́й до дні́й и҆схожда́хꙋ дщє́ри і҆и҃лєвы пла́кати ѡ҆ дще́ри і҆ефѳа́ѧ галааді́тина четы́ри дни̑ въ лѣ́тѣ.
|
