У вибраній версії цього розділу немає
Глава 12
1
И собра́шася му́жіє Єфре́мли и пріидо́ша въ сефі́ну, и рѣ́ша Ієфѳа́ю: почто́ ходи́лъ єси́ ополчи́тися на сы́ны Аммо́ни, и на́съ не позва́лъ єси́ ити́ съ тобо́ю? до́мъ тво́й съ тобо́ю сожже́мъ огне́мъ.
2
И рече́ къ ни́мъ Ієфѳа́й: имѣ́хъ прю́ а́зъ и лю́діє мои́, и сы́нове Аммо́ни оскорби́ша мене́ зѣло́: и воззва́хъ ва́съ, и не изба́висте мене́ от руки́ и́хъ:
3
и ви́дѣхъ, я́ко не бя́ше спаса́ющаго, и положи́хъ ду́шу мою́ въ ру́ку мою́, и пріидо́хъ къ сыно́мъ Аммо́нимъ, и предаде́ я́ Госпо́дь въ ру́ку мою́: и вску́ю пріидо́сте ко мнѣ́ дне́сь, ополчи́ти ли ся на мя́?
4
И собра́ Ієфѳа́й вся́ му́жы Галаа́дски и ополчи́ся на Єфре́ма: и изби́ша му́жіє Галаа́дстіи Єфре́ма, поне́же глаго́лаху: уцѣлѣ́вшіи от Єфре́ма, вы́ Галаа́дъ средѣ́ Єфре́ма и средѣ́ Манассі́и.
5
И зася́де Галаа́дъ прохо́ды у Іорда́на Єфре́мовы. И бы́сть єгда́ рѣ́ша уцѣлѣ́вшіи от Єфре́ма: пре́йдемъ: и реко́ша и́мъ му́жіє Галаа́дстіи: єда́ ли от Єфре́ма вы́? И рѣ́ша: нѣ́смы.
6
И рѣ́ша и́мъ: рцы́те, кла́съ. И не упра́виша рещи́ та́ко: и има́ху и́хъ, и закала́ху у прехо́довъ Іорда́нихъ: и падо́ша въ то́ вре́мя от Єфре́ма четы́редесять и двѣ́ ты́сящы.
7
И суди́ Ієфѳа́й Ізра́илеви лѣ́тъ ше́сть: и у́мре Ієфѳа́й Галааді́тинъ, и погребе́нъ бы́сть во гра́дѣ своє́мъ въ Галаа́дѣ.
8
И суди́ по не́мъ Ізра́илеви єсево́нъ от Виѳлеє́ма:
9
и бы́ша єму́ три́десять сы́ны и три́десять дще́ри, я́же отдаде́ во́нъ [муже́мъ], и три́десять же́нъ приведе́ сыно́мъ свои́мъ отвнѣ́: и суди́ Ізра́илеви се́дмь лѣ́тъ:
10
и у́мре єсево́нъ, и погребе́нъ бы́сть въ Виѳлеє́мѣ.
11
И суди́ по не́мъ Ізра́илеви Єло́нъ Завуло́нянинъ де́сять лѣ́тъ:
12
и у́мре Єло́нъ Завуло́нянинъ, и погребе́нъ бы́сть во Єлі́мѣ въ земли́ Завуло́ни.
13
И суди́ по не́мъ Ізра́илеви Авдо́нъ сы́нъ Єлли́ховъ фараѳоні́тинъ:
14
и бы́ша єму́ четы́редесять сы́нове и три́десять вну́цы, ѣ́здящіи на седми́десяти ослѣ́хъ: и суди́ Ізра́илеви о́смь лѣ́тъ:
15
и у́мре Авдо́нъ сы́нъ Єлли́ховъ фараѳоні́тинъ, и погребе́нъ бы́сть въ фараѳо́нѣ, въ земли́ Єфре́мли, въ горѣ́ Амали́ковѣ.
