|
Глава́ в҃і
|
Глава 12
|
|
1
|
1
|
|
И҆ посла̀ гдⷭ҇ь наѳа́на прⷪ҇ро́ка къ даві́дꙋ. И҆ вни́де къ немꙋ̀ (и҆ речѐ є҆мꙋ̀: ѿвѣща́й мѝ, царю̀, нн҃ѣ сꙋ́дъ се́й:) и҆ речѐ є҆мꙋ̀: два̀ мꙋ̑жа бѣ́ста во є҆ди́нѣмъ гра́дѣ, є҆ди́нъ бога́тъ, а҆ дрꙋгі́й оу҆бо́гъ:
|
И посла́ Госпо́дь наѳа́на проро́ка къ даві́ду. И вни́де къ нему́ [и рече́ єму́: отвѣща́й ми́, царю́, ны́нѣ су́дъ се́й:] и рече́ єму́: два́ му́жа бѣ́ста во єди́нѣмъ гра́дѣ, єди́нъ бога́тъ, а другі́й убо́гъ:
|
|
2
|
2
|
|
и҆ оу҆ бога́тагѡ стада̀ бѧ́хꙋ и҆ бꙋ́йволи мно́зи ѕѣлѡ̀,
|
и у бога́таго стада́ бя́ху и бу́йволи мно́зи зѣло́,
|
|
3
|
3
|
|
оу҆ оу҆бо́гагѡ же ничто́же бѣ̀, но то́кмѡ а҆́гница є҆ди́на ма́ла, ю҆́же стѧжа̀ и҆ снабдѣ̀, и҆ вскормѝ ю҆̀, и҆ возрастѐ съ ни́мъ и҆ съ сына́ми є҆гѡ̀ вкꙋ́пѣ: ѿ хлѣ́ба є҆гѡ̀ ꙗ҆дѧ́ше и҆ ѿ ча́ши є҆гѡ̀ пїѧ́ше, и҆ на ло́нѣ є҆гѡ̀ почива́ше, и҆ бѣ̀ є҆мꙋ̀ ꙗ҆́кѡ дще́рь:
|
у убо́гаго же ничто́же бѣ́, но то́кмо а́гница єди́на ма́ла, ю́же стяжа́ и снабдѣ́, и вскорми́ ю́, и возрасте́ съ ни́мъ и съ сына́ми єго́ вку́пѣ: от хлѣ́ба єго́ ядя́ше и от ча́ши єго́ пія́ше, и на ло́нѣ єго́ почива́ше, и бѣ́ єму́ я́ко дще́рь:
|
|
4
|
4
|
|
и҆ прїи́де нѣ́кто съ пꙋтѝ къ мꙋ́жꙋ бога́томꙋ, и҆ не восхотѣ̀ взѧ́ти ѿ ста́дъ свои́хъ и҆ ѿ бꙋ́йволицъ свои́хъ на сотворе́нїе ѡ҆бѣ́да пꙋ́тникꙋ прише́дшꙋ къ немꙋ̀: но взѧ̀ а҆́гницꙋ оу҆бо́гагѡ, и҆ оу҆гото́ва ю҆̀ на ѡ҆бѣ́дъ мꙋ́жꙋ прише́дшꙋ къ немꙋ̀.
|
и пріи́де нѣ́кто съ пути́ къ му́жу бога́тому, и не восхотѣ́ взя́ти от ста́дъ свои́хъ и от бу́йволицъ свои́хъ на сотворе́ніє обѣ́да пу́тнику прише́дшу къ нему́: но взя́ а́гницу убо́гаго, и угото́ва ю́ на обѣ́дъ му́жу прише́дшу къ нему́.
|
|
5
|
5
|
|
И҆ разгнѣ́васѧ гнѣ́вомъ ѕѣлѡ̀ даві́дъ на мꙋ́жа (того̀), и҆ речѐ даві́дъ къ наѳа́нꙋ: жи́въ гдⷭ҇ь, ꙗ҆́кѡ сы́нъ сме́рти є҆́сть мꙋ́жъ сотвори́вый сїѐ:
|
И разгнѣ́вася гнѣ́вомъ зѣло́ даві́дъ на му́жа [того́], и рече́ даві́дъ къ наѳа́ну: жи́въ Госпо́дь, я́ко сы́нъ сме́рти є́сть му́жъ сотвори́вый сіє́:
|
|
6
|
6
|
|
и҆ а҆́гницꙋ возврати́тъ седмери́цею за сїѐ, ꙗ҆́кѡ сотвори́лъ глаго́лъ се́й, и҆ за сїѐ, ꙗ҆́кѡ не пощадѣ̀.
|
и а́гницу возврати́тъ седмери́цею за сіє́, я́ко сотвори́лъ глаго́лъ се́й, и за сіє́, я́ко не пощадѣ́.
|
|
7
|
7
|
|
И҆ речѐ наѳа́нъ къ даві́дꙋ: ты̀ є҆сѝ мꙋ́жъ сотвори́вый сїѐ: сїѧ̑ гл҃етъ гдⷭ҇ь бг҃ъ і҆и҃левъ: а҆́зъ є҆́смь пома́завый тѧ̀ въ царѧ̀ над̾ і҆и҃лемъ, и҆ а҆́зъ є҆́смь и҆зба́вивый тѧ̀ ѿ рꙋкѝ саꙋ́ловы:
|
И рече́ наѳа́нъ къ даві́ду: ты́ єси́ му́жъ сотвори́вый сіє́: сія́ глаго́летъ Госпо́дь Бо́гъ Ізра́илевъ: а́зъ є́смь пома́завый тя́ въ царя́ надъ Ізра́илемъ, и а́зъ є́смь изба́вивый тя́ от руки́ Сау́ловы:
|
|
8
|
8
|
|
и҆ да́хъ тѝ до́мъ господи́на твоегѡ̀ и҆ жєны̀ господи́на твоегѡ̀ на ло́но твоѐ, и҆ да́хъ тѝ до́мъ і҆и҃левъ и҆ і҆ꙋ́динъ: и҆ а҆́ще ма́ло тѝ є҆́сть, приложꙋ̀ тебѣ̀ къ си̑мъ:
|
и да́хъ ти́ до́мъ господи́на твоєго́ и жены́ господи́на твоєго́ на ло́но твоє́, и да́хъ ти́ до́мъ Ізра́илевъ и Іу́динъ: и а́ще ма́ло ти́ є́сть, приложу́ тебѣ́ къ си́мъ:
|
|
9
|
9
|
|
и҆ что̀ ꙗ҆́кѡ презрѣ́лъ є҆сѝ сло́во гдⷭ҇не, є҆́же сотвори́ти лꙋка́вое пред̾ ѻ҆чи́ма є҆гѡ̀; оу҆рі́ю хетте́анина оу҆би́лъ є҆сѝ мече́мъ, и҆ женꙋ̀ є҆гѡ̀ поѧ́лъ є҆сѝ себѣ̀ въ женꙋ̀, и҆ того̀ оу҆би́лъ є҆сѝ мече́мъ сынѡ́въ а҆ммѡ́нихъ:
|
и что́ я́ко презрѣ́лъ єси́ сло́во Госпо́дне, є́же сотвори́ти лука́воє предъ очи́ма єго́? урі́ю Хетте́анина уби́лъ єси́ мече́мъ, и жену́ єго́ поя́лъ єси́ себѣ́ въ жену́, и того́ уби́лъ єси́ мече́мъ сыно́въ Аммо́нихъ:
|
|
10
|
10
|
|
и҆ нн҃ѣ не ѿстꙋ́питъ ме́чь ѿ до́мꙋ твоегѡ̀ до вѣ́ка: занѐ оу҆ничижи́лъ мѧ̀ є҆сѝ и҆ поѧ́лъ є҆сѝ женꙋ̀ оу҆рі́и хетте́анина въ женꙋ̀ себѣ̀:
|
и ны́нѣ не отсту́питъ ме́чь от до́му твоєго́ до вѣ́ка: зане́ уничижи́лъ мя́ єси́ и поя́лъ єси́ жену́ урі́и Хетте́анина въ жену́ себѣ́:
|
|
11
|
11
|
|
сїѧ̑ гл҃етъ гдⷭ҇ь: сѐ, а҆́зъ воздви́гнꙋ на тѧ̀ ѕла̑ѧ ѿ до́мꙋ твоегѡ̀, и҆ возмꙋ̀ жєны̀ твоѧ̑ пред̾ ѻ҆чи́ма твои́ма и҆ да́мъ бли́жнемꙋ твоемꙋ̀, и҆ бꙋ́детъ спа́ти со жена́ми твои́ми пред̾ со́лнцемъ си́мъ:
|
сія́ глаго́летъ Госпо́дь: се́, а́зъ воздви́гну на тя́ зла́я от до́му твоєго́, и возму́ жены́ твоя́ предъ очи́ма твои́ма и да́мъ бли́жнему твоєму́, и бу́детъ спа́ти со жена́ми твои́ми предъ со́лнцемъ си́мъ:
|
|
12
|
12
|
|
ꙗ҆́кѡ ты̀ сотвори́лъ є҆сѝ вта́йнѣ, а҆́зъ же сотворю̀ гл҃го́лъ се́й пред̾ всѣ́мъ і҆и҃лемъ и҆ пред̾ со́лнцемъ си́мъ.
|
я́ко ты́ сотвори́лъ єси́ вта́йнѣ, а́зъ же сотворю́ глаго́лъ се́й предъ всѣ́мъ Ізра́илемъ и предъ со́лнцемъ си́мъ.
|
|
13
|
13
|
|
И҆ речѐ даві́дъ къ наѳа́нꙋ: согрѣши́хъ ко гдⷭ҇ꙋ. И҆ речѐ наѳа́нъ къ даві́дꙋ: и҆ гдⷭ҇ь ѿѧ̀ согрѣше́нїе твоѐ, не оу҆́мреши:
|
И рече́ даві́дъ къ наѳа́ну: согрѣши́хъ ко Го́споду. И рече́ наѳа́нъ къ даві́ду: и Госпо́дь отъя́ согрѣше́ніє твоє́, не у́мреши:
|
|
14
|
14
|
|
ѻ҆ба́че ꙗ҆́кѡ поѡщрѧ́ѧ и҆з̾ѡстри́лъ є҆сѝ врагѡ́въ гдⷭ҇нихъ глаго́ломъ си́мъ, и҆ сы́нъ тво́й роди́выйсѧ тебѣ̀ сме́ртїю оу҆́мретъ.
|
оба́че я́ко поощря́я изостри́лъ єси́ враго́въ Госпо́днихъ глаго́ломъ си́мъ, и сы́нъ тво́й роди́выйся тебѣ́ сме́ртію у́мретъ.
|
|
15
|
15
|
|
И҆ ѿи́де наѳа́нъ въ до́мъ сво́й. И҆ сокрꙋшѝ гдⷭ҇ь дѣ́тище, є҆́же родѝ жена̀ оу҆рі́ина даві́дꙋ, и҆ разболѣ́сѧ.
|
И отъи́де наѳа́нъ въ до́мъ сво́й. И сокруши́ Госпо́дь дѣ́тище, є́же роди́ жена́ урі́ина даві́ду, и разболѣ́ся.
|
|
16
|
16
|
|
И҆ взыска̀ даві́дъ бг҃а ѡ҆ дѣ́тищи, и҆ пости́сѧ даві́дъ посто́мъ, и҆ вни́де и҆ водвори́сѧ, и҆ лежа́ше на землѝ:
|
И взыска́ даві́дъ Бо́га о дѣ́тищи, и пости́ся даві́дъ посто́мъ, и вни́де и водвори́ся, и лежа́ше на земли́:
|
|
17
|
17
|
|
и҆ внидо́ша къ немꙋ̀ старѣ̑йшины до́мꙋ є҆гѡ̀ воздви́гнꙋти є҆го̀ ѿ землѝ, и҆ не восхотѣ̀, и҆ не ꙗ҆дѐ съ ни́ми хлѣ́ба.
|
и внидо́ша къ нему́ старѣ́йшины до́му єго́ воздви́гнути єго́ от земли́, и не восхотѣ́, и не яде́ съ ни́ми хлѣ́ба.
|
|
18
|
18
|
|
И҆ бы́сть въ де́нь седмы́й, и҆ оу҆́мре ѻ҆троча̀. И҆ оу҆боѧ́шасѧ рабѝ даві́дѡвы повѣ́дати є҆мꙋ̀, ꙗ҆́кѡ оу҆́мре ѻ҆троча̀, рѣ́ша бо: сѐ, є҆гда̀ ѻ҆троча̀ є҆щѐ жи́во бѧ́ше, глаго́лахомъ къ немꙋ̀, и҆ не послꙋ́ша гла́са на́шегѡ: и҆ ка́кѡ рече́мъ къ немꙋ̀, ꙗ҆́кѡ оу҆́мре ѻ҆троча̀, и҆ сотвори́тъ ѕла̑ѧ;
|
И бы́сть въ де́нь седмы́й, и у́мре отроча́. И убоя́шася раби́ даві́довы повѣ́дати єму́, я́ко у́мре отроча́, рѣ́ша бо: се́, єгда́ отроча́ єще́ жи́во бя́ше, глаго́лахомъ къ нему́, и не послу́ша гла́са на́шего: и ка́ко рече́мъ къ нему́, я́ко у́мре отроча́, и сотвори́тъ зла́я?
|
|
19
|
19
|
|
И҆ разꙋмѣ̀ даві́дъ, ꙗ҆́кѡ ѻ҆́троцы є҆гѡ̀ ше́пчꙋтъ, и҆ позна̀ даві́дъ, ꙗ҆́кѡ оу҆́мре ѻ҆троча̀. И҆ речѐ даві́дъ ѻ҆трокѡ́мъ свои̑мъ: оу҆́мре ли ѻ҆троча̀; и҆ рѣ́ша: оу҆́мре.
|
И разумѣ́ даві́дъ, я́ко о́троцы єго́ ше́пчутъ, и позна́ даві́дъ, я́ко у́мре отроча́. И рече́ даві́дъ отроко́мъ свои́мъ: у́мре ли отроча́? и рѣ́ша: у́мре.
|
|
20
|
20
|
|
И҆ воста̀ даві́дъ ѿ землѝ, и҆ оу҆мы́сѧ и҆ пома́засѧ, и҆ и҆змѣнѝ ри̑зы своѧ̑, и҆ вни́де въ до́мъ бж҃їй, и҆ поклони́сѧ є҆мꙋ̀, и҆ вни́де въ до́мъ сво́й, и҆ просѝ ꙗ҆́сти хлѣ́ба, и҆ предложи́ша є҆мꙋ̀ хлѣ́бъ, и҆ ꙗ҆дѐ.
|
И воста́ даві́дъ от земли́, и умы́ся и пома́зася, и измѣни́ ри́зы своя́, и вни́де въ до́мъ Бо́жій, и поклони́ся єму́, и вни́де въ до́мъ сво́й, и проси́ я́сти хлѣ́ба, и предложи́ша єму́ хлѣ́бъ, и яде́.
|
|
21
|
21
|
|
И҆ рѣ́ша ѻ҆́троцы є҆гѡ̀ къ немꙋ̀: что̀ глаго́лъ се́й, є҆го́же сотвори́лъ є҆сѝ ѻ҆троча́те ра́ди, ꙗ҆́кѡ є҆щѐ сꙋ́щꙋ ѻ҆троча́ти жи́вꙋ, пости́лсѧ є҆сѝ и҆ пла́калъ и҆ бдѣ́лъ є҆сѝ: є҆гда́ же оу҆́мре ѻ҆троча̀, воста́лъ, и҆ ꙗ҆́лъ є҆сѝ хлѣ́бъ, и҆ пи́лъ є҆сѝ;
|
И рѣ́ша о́троцы єго́ къ нему́: что́ глаго́лъ се́й, єго́же сотвори́лъ єси́ отроча́те ра́ди, я́ко єще́ су́щу отроча́ти жи́ву, пости́лся єси́ и пла́калъ и бдѣ́лъ єси́: єгда́ же у́мре отроча́, воста́лъ, и я́лъ єси́ хлѣ́бъ, и пи́лъ єси́?
|
|
22
|
22
|
|
И҆ речѐ даві́дъ: є҆гда̀ бѣ̀ ѻ҆троча̀ є҆щѐ жи́во, пости́хсѧ и҆ пла́кахъ, ꙗ҆́кѡ рѣ́хъ: кто̀ вѣ́сть, поми́лꙋетъ ли мѧ̀ гдⷭ҇ь и҆ жи́во бꙋ́детъ ѻ҆троча̀;
|
И рече́ даві́дъ: єгда́ бѣ́ отроча́ єще́ жи́во, пости́хся и пла́кахъ, я́ко рѣ́хъ: кто́ вѣ́сть, поми́луєтъ ли мя́ Госпо́дь и жи́во бу́детъ отроча́?
|
|
23
|
23
|
|
нн҃ѣ же оу҆́мре, почто̀ мнѣ̀ пости́тисѧ; є҆да̀ возмогꙋ̀ возврати́ти є҆̀ ктомꙋ̀; а҆́зъ и҆́мамъ и҆тѝ къ немꙋ̀, то́е же не возврати́тсѧ ко мнѣ̀.
|
ны́нѣ же у́мре, почто́ мнѣ́ пости́тися? єда́ возмогу́ возврати́ти є́ ктому́? а́зъ и́мамъ ити́ къ нему́, то́є же не возврати́тся ко мнѣ́.
|
|
24
|
24
|
|
И҆ оу҆тѣ́ши даві́дъ вирсаві́ю женꙋ̀ свою̀, и҆ вни́де къ не́й и҆ спа̀ съ не́ю, и҆ зача̀ и҆ родѝ сы́на, и҆ наречѐ и҆́мѧ є҆мꙋ̀ соломѡ́нъ: и҆ гдⷭ҇ь возлюбѝ є҆го̀.
|
И утѣ́ши даві́дъ вирсаві́ю жену́ свою́, и вни́де къ не́й и спа́ съ не́ю, и зача́ и роди́ сы́на, и нарече́ и́мя єму́ Соломо́нъ: и Госпо́дь возлюби́ єго́.
|
|
25
|
25
|
|
И҆ посла̀ рꙋко́ю наѳа́на прⷪ҇ро́ка, и҆ наречѐ и҆́мѧ є҆мꙋ̀ і҆еддеді̀ сло́вомъ гдⷭ҇нимъ.
|
И посла́ руко́ю наѳа́на проро́ка, и нарече́ и́мя єму́ Ієддеді́ сло́вомъ Госпо́днимъ.
|
|
26
|
26
|
|
І҆ѡа́въ же воева̀ въ равва́ѳѣ сынѡ́въ а҆ммѡ́нихъ и҆ взѧ̀ гра́дъ ца́рства.
|
Іоа́въ же воєва́ въ равва́ѳѣ сыно́въ Аммо́нихъ и взя́ гра́дъ ца́рства.
|
|
27
|
27
|
|
И҆ посла̀ і҆ѡа́въ вѣ́стники къ даві́дꙋ и҆ речѐ: воева́хъ на равва́ѳъ и҆ взѧ́хъ гра́дъ во́дъ:
|
И посла́ Іоа́въ вѣ́стники къ даві́ду и рече́: воєва́хъ на равва́ѳъ и взя́хъ гра́дъ во́дъ:
|
|
28
|
28
|
|
и҆ нн҃ѣ соберѝ ѡ҆ста́нокъ люді́й и҆ ѡ҆полчи́сѧ на гра́дъ, и҆ прїимѝ є҆го̀, да не а҆́зъ возмꙋ̀ гра́дъ, и҆ нарече́тсѧ и҆́мѧ моѐ на не́мъ.
|
и ны́нѣ собери́ оста́нокъ люді́й и ополчи́ся на гра́дъ, и пріими́ єго́, да не а́зъ возму́ гра́дъ, и нарече́тся и́мя моє́ на не́мъ.
|
|
29
|
29
|
|
И҆ собра̀ даві́дъ всѧ̑ лю́ди, и҆ по́йде въ равва́ѳъ, и҆ ѡ҆полчи́сѧ на́нь, и҆ взѧ̀ є҆го̀:
|
И собра́ даві́дъ вся́ лю́ди, и по́йде въ равва́ѳъ, и ополчи́ся на́нь, и взя́ єго́:
|
|
30
|
30
|
|
и҆ взѧ̀ вѣне́цъ молхо́ма царѧ̀ и҆́хъ съ главы̀ є҆гѡ̀, тала́нтъ зла́та вѣ́съ є҆гѡ̀, и҆ ѿ ка́менїѧ дра́га, и҆ бѣ̀ на главѣ̀ даві́довѣ, и҆ коры́сть и҆знесѐ и҆з̾ гра́да мно́гꙋ ѕѣлѡ̀:
|
и взя́ вѣне́цъ молхо́ма царя́ и́хъ съ главы́ єго́, тала́нтъ зла́та вѣ́съ єго́, и от ка́менія дра́га, и бѣ́ на главѣ́ даві́довѣ, и коры́сть изнесе́ изъ гра́да мно́гу зѣло́:
|
|
31
|
31
|
|
и҆ лю́ди сꙋ́щыѧ въ не́мъ и҆зведѐ, и҆ положѝ на пилы̑ и҆ на трезꙋ́бы желѣ̑зны и҆ сѣки̑ры жєлѣ́зны, и҆ превожда́ше и҆̀хъ сквозѣ̀ пе́щь плі́нѳѧнꙋ. И҆ та́кѡ сотворѝ всѣ̑мъ градѡ́мъ сынѡ́въ а҆ммѡ́нихъ. И҆ возврати́сѧ даві́дъ и҆ ве́сь і҆и҃ль во і҆ерⷭ҇ли́мъ.
|
и лю́ди су́щыя въ не́мъ изведе́, и положи́ на пилы́ и на трезу́бы желѣ́зны и сѣки́ры желѣ́зны, и превожда́ше и́хъ сквозѣ́ пе́щь плі́нѳяну. И та́ко сотвори́ всѣ́мъ градо́мъ сыно́въ Аммо́нихъ. И возврати́ся даві́дъ и ве́сь Ізра́иль во Ієрусали́мъ.
|
Категорії
Паперові видання
Старий Заповіт
• Бут. • Вих. • Лев. • Чис. • Втор.
• Нав. • Суд. • Руф. • 1 Цар. • 2 Цар. • 3 Цар. • 4 Цар. • 1 Пар. • 2 Пар. • 1 Езд. • 2 Езд. • 3 Езд. • Неєм. • Тов. • Юдиф. • Есф. • 1 Мак. • 2 Мак. • 3 Мак.
• Іов. • Пс. • Притч. • Еккл. • Пісн. • Прем. • Сир.
• Іс. • Єр. • Плач. • Посл. Єр. • Вар. • Єз. • Дан.
• Ос. • Іоїл. • Ам. • Авд. • Іона. • Мих. • Наум. • Авв. • Соф. • Агг. • Зах. • Мал.
Паперові видання
Старий Заповіт
• Бут. • Вих. • Лев. • Чис. • Втор.
• Нав. • Суд. • Руф. • 1 Цар. • 2 Цар. • 3 Цар. • 4 Цар. • 1 Пар. • 2 Пар. • 1 Езд. • 2 Езд. • 3 Езд. • Неєм. • Тов. • Юдиф. • Есф. • 1 Мак. • 2 Мак. • 3 Мак.
• Іов. • Пс. • Притч. • Еккл. • Пісн. • Прем. • Сир.
• Іс. • Єр. • Плач. • Посл. Єр. • Вар. • Єз. • Дан.
• Ос. • Іоїл. • Ам. • Авд. • Іона. • Мих. • Наум. • Авв. • Соф. • Агг. • Зах. • Мал.