|
Глава 24
|
Глава́ к҃д
|
|
1
|
1
|
|
Во дне́хъ єго́ взы́де Навуходоно́соръ ца́рь Вавило́нскій, и бы́сть єму́ Іоакі́мъ ра́бъ три́ лѣ́та, и отврати́ся, и отве́ржеся єго́.
|
Во дне́хъ є҆гѡ̀ взы́де навꙋходоно́соръ ца́рь вавѷлѡ́нскїй, и҆ бы́сть є҆мꙋ̀ і҆ѡакі́мъ ра́бъ трѝ лѣ̑та, и҆ ѿврати́сѧ, и҆ ѿве́ржесѧ є҆гѡ̀.
|
|
2
|
2
|
|
И посла́ Госпо́дь єму́ єдинопоя́сники халде́йскія и єдинопоя́сники сирі́йскія, поя́сники сыно́въ Аммо́нихъ, и посла́ и́хъ въ зе́млю Іу́дову на побѣжде́ніє по словеси́ Госпо́дню, є́же глаго́ла руко́ю рабо́въ свои́хъ проро́ковъ.
|
И҆ посла̀ гдⷭ҇ь є҆мꙋ̀ є҆динопоѧ́сники халдє́йскїѧ и҆ є҆динопоѧ́сники сѷрі́йскїѧ, поѧ́сники сынѡ́въ а҆ммѡ́нихъ, и҆ посла̀ и҆́хъ въ зе́млю і҆ꙋ́довꙋ на побѣжде́нїе по словесѝ гдⷭ҇ню, є҆́же гл҃а рꙋко́ю рабѡ́въ свои́хъ прⷪ҇ро́кѡвъ.
|
|
3
|
3
|
|
Оба́че пріи́де по гнѣ́ву Госпо́дню на Іу́ду, є́же отста́вити єго́ от лица́ своєго́ грѣ́хъ ра́ди Манассі́иныхъ, по всѣ́мъ єли́ка сотвори́,
|
Ѻ҆ба́че прїи́де по гнѣ́вꙋ гдⷭ҇ню на і҆ꙋ́дꙋ, є҆́же ѿста́вити є҆го̀ ѿ лица̀ своегѡ̀ грѣ̑хъ ра́ди манассі́иныхъ, по всѣ̑мъ є҆ли̑ка сотворѝ,
|
|
4
|
4
|
|
и кро́вь непови́нную пролія́, и напо́лни Ієрусали́мъ кро́ве непови́нныя, сего́ ра́ди не восхотѣ́ Госпо́дь уми́лостивитися.
|
и҆ кро́вь непови́ннꙋю пролїѧ̀, и҆ напо́лни і҆ерⷭ҇ли́мъ кро́ве непови́нныѧ, сегѡ̀ ра́ди не восхотѣ̀ гдⷭ҇ь оу҆млⷭ҇тивитисѧ.
|
|
5
|
5
|
|
И про́чая слове́съ Іоакі́мовыхъ, и вся́ єли́ка сотвори́, не се́ ли, сія́ напи́сана въ кни́зѣ слове́съ дні́й царе́й Іу́диныхъ?
|
И҆ прѡ́чаѧ слове́съ і҆ѡакі́мовыхъ, и҆ всѧ̑ є҆ли̑ка сотворѝ, не сѐ ли, сїѧ̑ напи̑сана въ кни́зѣ слове́съ дні́й царе́й і҆ꙋ́диныхъ;
|
|
6
|
6
|
|
И у́спе Іоакі́мъ со отцы́ свои́ми, и воцари́ся Ієхоні́а вмѣ́сто єго́.
|
И҆ оу҆́спе і҆ѡакі́мъ со ѻ҆тцы̑ свои́ми, и҆ воцари́сѧ і҆ехоні́а вмѣ́стѡ є҆гѡ̀.
|
|
7
|
7
|
|
И не приложи́ ксему́ ца́рь Єги́петскій изы́ти изъ земли́ своєя́, я́ко взя́ ца́рь Вавило́нскій от пото́ка Єги́петска да́же до рѣки́ Євфра́та, вся́ єли́ка бы́ша царя́ Єги́петска.
|
И҆ не приложѝ ксемꙋ̀ ца́рь є҆гѵ́петскїй и҆зы́ти и҆з̾ землѝ своеѧ̀, ꙗ҆́кѡ взѧ̀ ца́рь вавѷлѡ́нскїй ѿ пото́ка є҆гѵ́петска да́же до рѣкѝ є҆ѵфра́та, всѧ̑ є҆ли̑ка бы́ша царѧ̀ є҆гѵ́петска.
|
|
8
|
8
|
|
Сы́нъ осмина́десяти лѣ́тъ Ієхоні́а, єгда́ нача́ ца́рствовати, и три́ ме́сяцы ца́рствова во Ієрусали́мѣ. И́мя же ма́тере єго́ не́сѳа, дщи́ Єланасѳа́на, от Ієрусали́ма.
|
Сы́нъ ѻ҆смина́десѧти лѣ́тъ і҆ехоні́а, є҆гда̀ нача̀ ца́рствовати, и҆ трѝ мцⷭ҇ы ца́рствова во і҆ерⷭ҇ли́мѣ. И҆́мѧ же ма́тере є҆гѡ̀ не́сѳа, дщѝ є҆ланасѳа́на, ѿ і҆ерⷭ҇ли́ма.
|
|
9
|
9
|
|
И сотвори́ лука́воє предъ очи́ма Госпо́днима, по всему́ єли́ко сотвори́ оте́цъ єго́.
|
И҆ сотворѝ лꙋка́вое пред̾ ѻ҆чи́ма гдⷭ҇нима, по всемꙋ̀ є҆ли́ко сотворѝ ѻ҆те́цъ є҆гѡ̀.
|
|
10
|
10
|
|
И во вре́мя то́ взы́де Навуходоно́соръ ца́рь Вавило́нский на Ієрусали́мъ, и бы́сть гра́дъ во облеже́ніи.
|
И҆ въ вре́мѧ то̀ взы́де навꙋходоно́соръ ца́рь вавѷлѡ́нскими на і҆ерⷭ҇ли́мъ, и҆ бы́сть гра́дъ во ѡ҆блеже́нїи.
|
|
11
|
11
|
|
И пріи́де Навуходоно́соръ ца́рь Вавило́нскій на гра́дъ Ієрусали́мъ, и о́троцы єго́ о́коло обсѣдя́ху гра́дъ.
|
И҆ прїи́де навꙋходоно́соръ ца́рь вавѷлѡ́нскїй на гра́дъ і҆ерⷭ҇ли́мъ, и҆ ѻ҆́троцы є҆гѡ̀ ѡ҆́колѡ ѡ҆бсѣдѧ́хꙋ гра́дъ.
|
|
12
|
12
|
|
И изы́де Ієхоні́а ца́рь Іу́динъ ко царю́ Вавило́нскому, са́мъ и о́троцы єго́, и ма́ти єго́, и кня́зи єго́, и скопцы́ єго́, и взя́ єго́ ца́рь Вавило́нскій въ осмо́є лѣ́то ца́рства своєго́.
|
И҆ и҆зы́де і҆ехоні́а ца́рь і҆ꙋ́динъ ко царю̀ вавѷлѡ́нскомꙋ, са́мъ и҆ ѻ҆́троцы є҆гѡ̀, и҆ ма́ти є҆гѡ̀, и҆ кнѧ̑зи є҆гѡ̀, и҆ скопцы̀ є҆гѡ̀, и҆ взѧ̀ є҆го̀ ца́рь вавѷлѡ́нскїй въ ѻ҆смо́е лѣ́то ца́рства своегѡ̀.
|
|
13
|
13
|
|
И изнесе́ вся́ сокро́вища отту́ду су́щая во хра́мѣ Госпо́дни и сокро́вища до́му царе́ва, и сокруши́ вся́ сосу́ды златы́я, я́же сотвори́ Соломо́нъ ца́рь Ізра́илевъ во хра́мѣ по глаго́лу Госпо́дню,
|
И҆ и҆знесѐ всѧ̑ сокрѡ́вища ѿтꙋ́дꙋ сꙋ̑щаѧ во хра́мѣ гдⷭ҇ни и҆ сокро́вища до́мꙋ царе́ва, и҆ сокрꙋшѝ всѧ̑ сосꙋ́ды златы̑ѧ, ꙗ҆̀же сотворѝ соломѡ́нъ ца́рь і҆и҃левъ во хра́мѣ по гл҃ꙋ гдⷭ҇ню,
|
|
14
|
14
|
|
и пресели́ Ієрусали́мляны и вся́ кня́зи, и си́льныя крѣ́постію, плѣ́на де́сять ты́сящъ плѣни́въ, и вся́каго древодѣ́ля, и худо́жники: и никто́же оста́ся, то́кмо убо́зіи земли́ тоя́:
|
и҆ преселѝ і҆ерⷭ҇ли́млѧны и҆ всѧ̑ кнѧ̑зи, и҆ си̑льныѧ крѣ́постїю, плѣ́на де́сѧть ты́сѧщъ плѣни́въ, и҆ всѧ́каго древодѣ́лѧ, и҆ хꙋдо́жники: и҆ никто́же ѡ҆ста́сѧ, то́кмѡ оу҆бо́зїи землѝ тоѧ̀:
|
|
15
|
15
|
|
и преведе́ Ієхоні́ю въ Вавило́нъ, и ма́терь царе́ву, и жены́ царе́вы, и скопцы́ єго́, и крѣ́пкія земли́ тоя́ введе́ на преселе́ніє изъ Ієрусали́ма въ Вавило́нъ:
|
и҆ преведѐ і҆ехоні́ю въ вавѷлѡ́нъ, и҆ ма́терь царе́вꙋ, и҆ жєны̀ царє́вы, и҆ скопцы̀ є҆гѡ̀, и҆ крѣ̑пкїѧ землѝ тоѧ̀ введѐ на преселе́нїе и҆з̾ і҆ерⷭ҇ли́ма въ вавѷлѡ́нъ:
|
|
16
|
16
|
|
и вся́ му́жы си́лы, се́дмь ты́сящъ, и древодѣ́ль и худо́жниковъ ты́сящу, вси́ си́льніи творя́щіи бра́нь, и введе́ и́хъ ца́рь Вавило́нскій въ преселе́ніє въ Вавило́нъ.
|
и҆ всѧ̑ мꙋ́жы си́лы, се́дмь ты́сѧщъ, и҆ древодѣ̑ль и҆ хꙋдо́жникѡвъ ты́сѧщꙋ, всѝ си́льнїи творѧ́щїи бра́нь, и҆ введѐ и҆́хъ ца́рь вавѷлѡ́нскїй въ преселе́нїе въ вавѷлѡ́нъ.
|
|
17
|
17
|
|
И поста́ви царе́мъ Вавило́нскій ца́рь ватѳані́ю сы́на єго́ вмѣ́сто єго́, и преложи́ и́мя єму́ седекі́а.
|
И҆ поста́ви царе́мъ вавѷлѡ́нскїй ца́рь ватѳані́ю сы́на є҆гѡ̀ и҆ вмѣ́стѡ є҆гѡ̀, и҆ преложѝ и҆́мѧ є҆мꙋ̀ седекі́а.
|
|
18
|
18
|
|
Сы́нъ два́десяти и єди́наго лѣ́та седекі́а, внегда́ нача́ ца́рствовати, и єдинона́десять лѣ́тъ ца́рствова во Ієрусали́мѣ. И́мя же ма́тере єго́ Аміта́ла, дщи́ ієремі́ина, от ловны́.
|
Сы́нъ два́десѧти и҆ є҆ди́нагѡ лѣ́та седекі́а, внегда̀ нача̀ ца́рствовати, и҆ є҆динона́десѧть лѣ́тъ ца́рствова во і҆ерⷭ҇ли́мѣ. И҆́мѧ же ма́тере є҆гѡ̀ а҆мїта́ла, дщѝ і҆еремі́ина, ѿ ловны̀.
|
|
19
|
19
|
|
И сотвори́ лука́воє предъ очи́ма Госпо́днима, по всему́ єли́ка сотвори́ Іоакі́мъ,
|
И҆ сотворѝ лꙋка́вое пред̾ ѻ҆чи́ма гдⷭ҇нима, по всемꙋ̀ є҆ли̑ка сотворѝ і҆ѡакі́мъ,
|
|
20
|
20
|
|
я́ко я́рость бѣ́ Госпо́дня на Ієрусали́мѣ и на Іу́дѣ, до́ндеже отве́рже я́ от лица́ своєго́. И отве́ржеся седекі́а царя́ Вавило́нска.
|
ꙗ҆́кѡ ꙗ҆́рость бѣ̀ гдⷭ҇нѧ на і҆ерⷭ҇ли́мѣ и҆ на і҆ꙋ́дѣ, до́ндеже ѿве́рже ѧ҆̀ ѿ лица̀ своегѡ̀. И҆ ѿве́ржесѧ седекі́а царѧ̀ вавѷлѡ́нска.
|
