|
Глава 8
|
Глава́ и҃
|
|
1
|
1
|
|
И глаго́ла Єліссе́й къ женѣ́, єя́же воскреси́ сы́на, глаго́ля: воста́ни и иди́ ты́ и до́мъ тво́й, и обита́й идѣ́же а́ще мо́жеши обита́ти, я́ко призва́ Госпо́дь гла́дъ на зе́млю, и пріи́детъ на зе́млю се́дмь лѣ́тъ.
|
И҆ глаго́ла є҆лїссе́й къ женѣ̀, є҆ѧ́же воскресѝ сы́на, глаго́лѧ: воста́ни и҆ и҆дѝ ты̀ и҆ до́мъ тво́й, и҆ ѡ҆бита́й и҆дѣ́же а҆́ще мо́жеши ѡ҆бита́ти, ꙗ҆́кѡ призва̀ гдⷭ҇ь гла́дъ на зе́млю, и҆ прїи́детъ на зе́млю се́дмь лѣ́тъ.
|
|
2
|
2
|
|
И воста́ жена́, и сотвори́ но глаго́лу Єліссе́єву, и по́йде сама́ и до́мъ єя́, и обита́ на земли́ иноплеме́нничи се́дмь лѣ́тъ.
|
И҆ воста̀ жена̀, и҆ сотворѝ но глаго́лꙋ є҆лїссе́евꙋ, и҆ по́йде сама̀ и҆ до́мъ є҆ѧ̀, и҆ ѡ҆бита̀ на землѝ и҆ноплеме́нничи се́дмь лѣ́тъ.
|
|
3
|
3
|
|
И бы́сть но сконча́ніи седми́ лѣ́тъ, и возврати́ся жена́ от земли́ иноплеме́нничи во гра́дъ, и пріи́де возопи́ти къ царю́ о до́мѣ своє́мъ и о се́лѣхъ свои́хъ.
|
И҆ бы́сть но сконча́нїи седмѝ лѣ́тъ, и҆ возврати́сѧ жена̀ ѿ землѝ и҆ноплеме́нничи во гра́дъ, и҆ прїи́де возопи́ти къ царю̀ ѡ҆ до́мѣ свое́мъ и҆ ѡ҆ се́лѣхъ свои́хъ.
|
|
4
|
4
|
|
И глаго́ла ца́рь ко гієзі́ю о́троку Єліссе́а человѣ́ка Бо́жія глаго́ля: повѣ́ждь ми́ ны́нѣ вся́ вели́кая, я́же сотвори́ Єліссе́й.
|
И҆ глаго́ла ца́рь ко гїезі́ю ѻ҆́трокꙋ є҆лїссе́а человѣ́ка бж҃їѧ глаго́лѧ: повѣ́ждь мѝ нн҃ѣ всѧ̑ вели̑каѧ, ꙗ҆̀же сотворѝ є҆лїссе́й.
|
|
5
|
5
|
|
И бы́сть єму́ повѣ́дающу царе́ви, я́ко жи́ва сотвори́ сы́на уме́ршаго: и се́, жена́, єя́же воскреси́ Єліссе́й сы́на єя́, вопию́щи ко царе́ви о до́мѣ своє́мъ и о се́лѣхъ свои́хъ, И рече́ гієзі́й: господи́не царю́, сія́ жена́ и се́й сы́нъ єя́, єго́же жи́ва сотвори́ Єліссе́й.
|
И҆ бы́сть є҆мꙋ̀ повѣ́дающꙋ царе́ви, ꙗ҆́кѡ жи́ва сотворѝ сы́на оу҆ме́ршаго: и҆ сѐ, жена̀, є҆ѧ́же воскресѝ є҆лїссе́й сы́на є҆ѧ̀, вопию́щи ко царе́ви ѡ҆ до́мѣ свое́мъ и҆ ѡ҆ се́лѣхъ свои́хъ, И҆ речѐ гїезі́й: господи́не царю̀, сїѧ̀ жена̀ и҆ се́й сы́нъ є҆ѧ̀, є҆го́же жи́ва сотворѝ є҆лїссе́й.
|
|
6
|
6
|
|
И вопроси́ ца́рь жену́: и повѣ́да єму́. И даде́ є́й ца́рь скопца́ єди́наго, глаго́ля возврати́ вся́, я́же єя́ су́ть, и вся́ плоды́ села́ єя́, от да, въ о́ньже оста́ви зе́млю, да́же до ны́нѣ.
|
И҆ вопросѝ ца́рь женꙋ̀: и҆ повѣ́да є҆мꙋ̀. И҆ дадѐ є҆́й ца́рь скопца̀ є҆ди́наго, глаго́лѧ возвратѝ всѧ̑, ꙗ҆̀же є҆ѧ̀ сꙋ́ть, и҆ всѧ̑ плоды̀ села̀ є҆ѧ̀, ѿ да, въ ѻ҆́ньже ѡ҆ста́ви зе́млю, да́же до нн҃ѣ.
|
|
7
|
7
|
|
И пріи́де Єліссе́й въ Дама́скъ. И сы́нъ Аде́ровъ ца́рь Си́рскій разболѣ́ся, и возвѣсти́ша єму́, глаго́люще: пріи́де человѣ́къ Бо́жій до здѣ́.
|
И҆ прїи́де є҆лїссе́й въ дама́скъ. И҆ сы́нъ а҆де́ровъ ца́рь сѵ́рскїй разболѣ́сѧ, и҆ возвѣсти́ша є҆мꙋ̀, глаго́люще: прїи́де человѣ́къ бж҃їй до здѣ̀.
|
|
8
|
8
|
|
И рече́ ца́рь ко азаи́лу: пріими́ въ ру́ку свою́ да́ръ, и иди́ во срѣ́теніє человѣ́ку Бо́жію, и вопроси́ Го́спода и́мъ, глаго́ля: а́ще ли жи́въ бу́ду от болѣ́зни сея́?
|
И҆ речѐ ца́рь ко а҆заи́лꙋ: прїимѝ въ рꙋ́кꙋ свою̀ да́ръ, и҆ и҆дѝ во срѣ́тенїе человѣ́кꙋ бж҃їю, и҆ вопросѝ гдⷭ҇а и҆̀мъ, глаго́лѧ: а҆́ще ли жи́въ бꙋ́дꙋ ѿ болѣ̑зни сеѧ̀;
|
|
9
|
9
|
|
И и́де азаи́лъ на срѣ́теніє єму́, и взя́ да́ръ въ ру́ку свою́, и вся́ блага́я Дама́скова, бре́мя четы́редесять велблю́довъ, и пріи́де, и ста́ предъ ни́мъ, и рече́ ко Єліссе́ю: сы́нъ тво́й, сы́нъ Аде́ровъ, ца́рь Си́рскій, посла́ мя къ тебѣ́ вопроси́ти, глаго́ля: бу́ду ли жи́въ от болѣ́зни моєя́ сея́?
|
И҆ и҆́де а҆заи́лъ на срѣ́тенїе є҆мꙋ̀, и҆ взѧ̀ да́ръ въ рꙋ́кꙋ свою̀, и҆ всѧ̑ блага̑ѧ дама́скова, бре́мѧ четы́редесѧть велблю́дѡвъ, и҆ прїи́де, и҆ ста̀ пред̾ ни́мъ, и҆ речѐ ко є҆лїссе́ю: сы́нъ тво́й, сы́нъ а҆де́ровъ, ца́рь сѵ́рскїй, посла́ мѧ къ тебѣ̀ вопроси́ти, глаго́лѧ: бꙋ́дꙋ ли жи́въ ѿ болѣ́зни моеѧ̀ сеѧ̀;
|
|
10
|
10
|
|
И рече́ къ нему́ Єліссе́й: иди́ и рцы́ єму́: живя́ поживе́ши: но показа́ ми Госпо́дь, я́ко сме́ртію у́мретъ.
|
И҆ речѐ къ немꙋ̀ є҆лїссе́й: и҆дѝ и҆ рцы̀ є҆мꙋ̀: живѧ̀ поживе́ши: но показа́ ми гдⷭ҇ь, ꙗ҆́кѡ сме́ртїю оу҆́мретъ.
|
|
11
|
11
|
|
И предста́ лицу́ єго́, и возложи́ [ру́ки] да́же до постыдѣ́нія, и пла́кася человѣ́къ Бо́жій.
|
И҆ предста̀ лицꙋ̀ є҆гѡ̀, и҆ возложѝ (рꙋ́ки) да́же до постыдѣ́нїѧ, и҆ пла́касѧ человѣ́къ бж҃їй.
|
|
12
|
12
|
|
И рече́ азаи́лъ: что́ я́ко господи́нъ мо́й пла́четъ? И рече́: вѣ́мъ єли́ка сотвори́ши сыно́мъ Ізра́илевымъ зла́: крѣ́пости и́хъ сожже́ши огне́мъ, и избра́нныя и́хъ избіє́ши мече́мъ, и младе́нцы и́хъ разбіє́ши, и во чре́вѣ имѣ́ющыя и́хъ расто́ргнеши.
|
И҆ речѐ а҆заи́лъ: что̀ ꙗ҆́кѡ господи́нъ мо́й пла́четъ; И҆ речѐ: вѣ́мъ є҆ли̑ка сотвори́ши сынѡ́мъ і҆и҃лєвымъ ѕла̑: крѣ́пѡсти и҆̀хъ сожже́ши ѻ҆гне́мъ, и҆ и҆збра̑нныѧ и҆̀хъ и҆збїе́ши мече́мъ, и҆ младе́нцы и҆̀хъ разбїе́ши, и҆ во чре́вѣ и҆мѣ́ющыѧ и҆̀хъ расто́ргнеши.
|
|
13
|
13
|
|
И рече́ азаи́лъ: кто́ є́сть ра́бъ тво́й, пе́съ ме́ртвый, я́ко сотвори́тъ глаго́лъ се́й? И рече́ Єліссе́й: показа́ ми тя́ Госпо́дь ца́рствующа надъ сирі́єю.
|
И҆ речѐ а҆заи́лъ: кто̀ є҆́сть ра́бъ тво́й, пе́съ ме́ртвый, ꙗ҆́кѡ сотвори́тъ глаго́лъ се́й; И҆ речѐ є҆лїссе́й: показа́ ми тѧ̀ гдⷭ҇ь ца́рствꙋюща над̾ сѷрі́ею.
|
|
14
|
14
|
|
И отъи́де от Єліссе́а и вни́де ко господи́ну своєму́. И рече́ єму́ [ца́рь]: что́ ти рече́ Єліссе́й? Отвѣща́: рече́ ми Єліссе́й, живя́ поживе́ши.
|
И҆ ѿи́де ѿ є҆лїссе́а и҆ вни́де ко господи́нꙋ своемꙋ̀. И҆ речѐ є҆мꙋ̀ (ца́рь): что́ ти речѐ є҆лїссе́й; Ѿвѣща̀: рече́ ми є҆лїссе́й, живѧ̀ поживе́ши.
|
|
15
|
15
|
|
И бы́сть во у́тріи, и взя́ одея́ло, и намочи́ въ водѣ́, и обложи́ на лице́ єго́, и у́мре: и воцари́ся азаи́лъ вмѣ́сто єго́.
|
И҆ бы́сть во оу҆́трїи, и҆ взѧ̀ ѻ҆деѧ́ло, и҆ намочѝ въ водѣ̀, и҆ ѡ҆бложѝ на лицѐ є҆гѡ̀, и҆ оу҆́мре: и҆ воцари́сѧ а҆заи́лъ вмѣ́стѡ є҆гѡ̀.
|
|
16
|
16
|
|
Въ лѣ́то пя́тоє Іора́ма сы́на Ахаа́ва царя́ Ізра́илева и Іосафа́та царя́ Іу́дина, воцари́ся Іора́мъ сы́нъ Іосафа́товъ ца́рь Іу́динъ:
|
Въ лѣ́то пѧ́тое і҆ѡра́ма сы́на а҆хаа́ва царѧ̀ і҆и҃лєва и҆ і҆ѡсафа́та царѧ̀ і҆ꙋ́дина, воцари́сѧ і҆ѡра́мъ сы́нъ і҆ѡсафа́товъ ца́рь і҆ꙋ́динъ:
|
|
17
|
17
|
|
сы́нъ три́десяти и двою́ лѣ́ту бѣ́, внегда́ воцари́тися єму́, и о́смь лѣ́тъ ца́рствова во Ієрусали́мѣ,
|
сы́нъ три́десѧти и҆ двою̀ лѣ́тꙋ бѣ̀, внегда̀ воцари́тисѧ є҆мꙋ̀, и҆ ѻ҆́смь лѣ́тъ ца́рствова во і҆ерⷭ҇ли́мѣ,
|
|
18
|
18
|
|
и ходи́ въ пути́ царе́й Ізра́илевыхъ, я́коже сотвори́ до́мъ Ахаа́вль, бѣ́ бо дщи́ Ахаа́вля жена́ єму́, и сотвори́ лука́воє предъ Го́сподемъ.
|
и҆ ходѝ въ пꙋтѝ царе́й і҆и҃левыхъ, ꙗ҆́коже сотворѝ до́мъ а҆хаа́вль, бѣ̀ бо дщѝ а҆хаа́влѧ жена̀ є҆мꙋ̀, и҆ сотворѝ лꙋка́вое пред̾ гдⷭ҇емъ.
|
|
19
|
19
|
|
И не хотя́ше Госпо́дь потреби́ти Іу́ды, даві́да ра́ди раба́ своєго́, я́коже рече́ да́ти єму́ свѣти́лникъ и сыно́мъ єго́ во вся́ дни́.
|
И҆ не хотѧ́ше гдⷭ҇ь потреби́ти і҆ꙋ́ды, даві́да ра́ди раба̀ своегѡ̀, ꙗ҆́коже речѐ да́ти є҆мꙋ̀ свѣти́лникъ и҆ сынѡ́мъ є҆гѡ̀ во всѧ̑ дни̑.
|
|
20
|
20
|
|
Во дни́ єго́ отве́ржеся Єдо́мъ изъ подъ руки́ Іу́дины и поста́ви надъ собо́ю царя́.
|
Во дни̑ є҆гѡ̀ ѿве́ржесѧ є҆дѡ́мъ и҆з̾ под̾ рꙋкѝ і҆ꙋ́дины и҆ поста́ви над̾ собо́ю царѧ̀.
|
|
21
|
21
|
|
И взы́де Іора́мъ въ Сіо́ръ, и вся́ колесни́цы я́же съ ни́мъ. И бы́сть єму́ воста́вшу, и изби́ Єдо́ма обступи́вшаго о́крестъ єго́, и кня́зи колесни́цъ, и бѣжа́ша лю́діє въ селе́нія своя́.
|
И҆ взы́де і҆ѡра́мъ въ сїѡ́ръ, и҆ всѧ̑ колєсни́цы ꙗ҆̀же съ ни́мъ. И҆ бы́сть є҆мꙋ̀ воста́вшꙋ, и҆ и҆збѝ є҆дѡ́ма ѡ҆бстꙋпи́вшаго ѡ҆́крестъ є҆гѡ̀, и҆ кнѧ̑зи колесни́цъ, и҆ бѣжа́ша лю́дїе въ селє́нїѧ своѧ̑.
|
|
22
|
22
|
|
И отступи́ Єдо́мъ изъ подъ руки́ Іу́дины до дне́ сего́: тогда́ отве́ржеся ловна́ во вре́мя о́но.
|
И҆ ѿстꙋпѝ є҆дѡ́мъ и҆з̾ под̾ рꙋкѝ і҆ꙋ́дины да днѐ сегѡ̀: тогда̀ ѿве́ржесѧ ловна̀ во вре́мѧ ѻ҆́но.
|
|
23
|
23
|
|
И про́чая слове́съ Іора́млихъ, и вся́ єли́ка сотвори́, не се́ ли, сія́ пи́сана въ кни́зѣ слове́съ дні́й царе́й Іу́диныхъ?
|
И҆ прѡ́чаѧ слове́съ і҆ѡра́млихъ, и҆ всѧ̑ є҆ли̑ка сотворѝ, не сѐ ли, сїѧ̑ пи̑сана въ кни́зѣ слове́съ дні́й царе́й і҆ꙋ́диныхъ;
|
|
24
|
24
|
|
И у́спе Іора́мъ со отцы́ свои́ми, и погребе́нъ бы́сть со отцы́ свои́ми во гра́дѣ даві́да отца́ своєго́: и ца́рствова Охозі́а сы́нъ єго́ вмѣ́сто єго́.
|
И҆ оу҆́спе і҆ѡра́мъ со ѻ҆тцы̑ свои́ми, и҆ погребе́нъ бы́сть со ѻ҆тцы̑ свои́ми во гра́дѣ даві́да ѻ҆тца̀ своегѡ̀: и҆ ца́рствова ѻ҆хозі́а сы́нъ є҆гѡ̀ вмѣ́стѡ є҆гѡ̀.
|
|
25
|
25
|
|
Въ лѣ́то второєна́десять Іора́ма сы́на Ахаа́вля царя́ Ізра́илева, ца́рствовати нача́ Охозі́а сы́нъ Іора́ма царя́ Іу́дина:
|
Въ лѣ́то второена́десѧть і҆ѡра́ма сы́на а҆хаа́влѧ царѧ̀ і҆и҃лева, ца́рствовати нача̀ ѻ҆хозі́а сы́нъ і҆ѡра́ма царѧ̀ і҆ꙋ́дина:
|
|
26
|
26
|
|
сы́нъ два́десяти дву́хъ лѣ́тъ бы́сть Охозі́а, єгда́ нача́ ца́рствовати, и лѣ́то єди́но ца́рствова во Ієрусали́мѣ. И́мя же ма́тери єго́ Гоѳолі́а, дще́рь Амврі́а царя́ Ізра́илева.
|
сы́нъ два́десѧти двꙋ́хъ лѣ́тъ бы́сть ѻ҆хозі́а, є҆гда̀ нача̀ ца́рствовати, и҆ лѣ́то є҆ди́но ца́рствова во і҆ерⷭ҇ли́мѣ. И҆́мѧ же ма́тери є҆гѡ̀ гоѳолі́а, дще́рь а҆мврі́а царѧ̀ і҆и҃лева.
|
|
27
|
27
|
|
И хожда́ше по путе́мъ до́му Ахаа́вля, и сотвори́ лука́воє предъ Го́сподемъ, я́коже до́мъ Ахаа́вль: зя́ть бо бѣ́ до́му Ахаа́вля.
|
И҆ хожда́ше по пꙋтє́мъ до́мꙋ а҆хаа́влѧ, и҆ сотворѝ лꙋка́вое пред̾ гдⷭ҇емъ, ꙗ҆́коже до́мъ а҆хаа́вль: зѧ́ть бо бѣ̀ до́мꙋ а҆хаа́влѧ.
|
|
28
|
28
|
|
И и́де со Іора́момъ сы́номъ Ахаа́влимъ на бра́нь, на азаи́ла царя́ иноплеме́ннича въ рамо́ѳъ Галаа́дскій, и уязви́ша Си́ряне Іора́ма.
|
И҆ и҆́де со і҆ѡра́момъ сы́номъ а҆хаа́влимъ на бра́нь, на а҆заи́ла царѧ̀ и҆ноплеме́ннича въ рамѡ́ѳъ галаа́дскїй, и҆ оу҆ѧзви́ша сѵ́рѧне і҆ѡра́ма.
|
|
29
|
29
|
|
И возврати́ся ца́рь Іора́мъ цѣли́тися во Ієзрає́ль от я́звъ, и́миже уязви́ша єго́ въ рамо́ѳѣ, єгда́ ра́товаше то́й на азаи́ла царя́ Си́рска, и Охозі́а сы́нъ Іора́мль ца́рь Іу́динъ сни́де ви́дѣти Іора́ма, сы́на Ахаа́вля, во Ієзрає́ль, я́ко боля́ше то́й.
|
И҆ возврати́сѧ ца́рь і҆ѡра́мъ цѣли́тисѧ во і҆езрае́ль ѿ ꙗ҆́звъ, и҆́миже оу҆ѧзви́ша є҆го̀ въ рамѡ́ѳѣ, є҆гда̀ ра́товаше то́й на а҆заи́ла царѧ̀ сѵ́рска, и҆ ѻ҆хозі́а сы́нъ і҆ѡра́мль ца́рь і҆ꙋ́динъ сни́де ви́дѣти і҆ѡра́ма, сы́на а҆хаа́влѧ, во і҆езрае́ль, ꙗ҆́кѡ болѧ́ше то́й.
|
