|
Глава 25
|
Глава́ к҃є
|
|
1
|
1
|
|
И бы́сть въ лѣ́то девя́тоє ца́рства єго́, въ ме́сяцъ деся́тый, пріи́де Навуходоно́соръ ца́рь Вавило́нскій и вся́ си́ла єго́ на Ієрусали́мъ: и обступи́ єго́ отвсю́ду, и созда́ша о́крестъ єго́ бойни́цы.
|
И҆ бы́сть въ лѣ́то девѧ́тое ца́рства є҆гѡ̀, въ мцⷭ҇ъ десѧ́тый, прїи́де навꙋходоно́соръ ца́рь вавѷлѡ́нскїй и҆ всѧ̀ си́ла є҆гѡ̀ на і҆ерⷭ҇ли́мъ: и҆ ѡ҆бстꙋпѝ є҆го̀ ѿвсю́дꙋ, и҆ созда́ша ѡ҆́крестъ є҆гѡ̀ бойни̑цы.
|
|
2
|
2
|
|
И бы́сть гра́дъ во облеже́ніи до первагона́десять лѣ́та ца́рства седекі́ина, девя́таго дне́ ме́сяца:
|
И҆ бы́сть гра́дъ во ѡ҆блеже́нїи до первагѡна́десѧть лѣ́та ца́рства седекі́ина, девѧ́тагѡ днѐ мцⷭ҇а:
|
|
3
|
3
|
|
и превозмо́же во гра́дѣ гла́дъ, и не бы́сть хлѣ́ба лю́демъ земли́ тоя́:
|
и҆ превозмо́же во гра́дѣ гла́дъ, и҆ не бы́сть хлѣ́ба лю́демъ землѝ тоѧ̀:
|
|
4
|
4
|
|
и разсѣ́деся гра́дъ, и вси́ му́жіє во́инстіи изыдо́ша но́щію путе́мъ вра́тъ, я́же посредѣ́ стѣ́нъ, я́же су́ть у вертогра́да царе́ва, и халде́є о́крестъ гра́да [бѣ́ша]. И побѣже́ [ца́рь седекі́а] путе́мъ пусты́ннымъ:
|
и҆ разсѣ́десѧ гра́дъ, и҆ всѝ мꙋ́жїе во́инстїи и҆зыдо́ша но́щїю пꙋте́мъ вра́тъ, ꙗ҆̀же посредѣ̀ стѣ́нъ, ꙗ҆̀же сꙋ́ть оу҆ вертогра́да царе́ва, и҆ халде́є ѡ҆́крестъ гра́да (бѣ́ша). И҆ побѣжѐ (ца́рь седекі́а) пꙋте́мъ пꙋсты́ннымъ:
|
|
5
|
5
|
|
и погна́ си́ла Халде́йская вслѣ́дъ царя́, и я́ша єго́ во Араво́ѳе ієріхо́нстѣмъ, и вся́ си́ла єго́ разсы́пася от него́:
|
и҆ погна̀ си́ла халде́йскаѧ в̾слѣ́дъ царѧ̀, и҆ ꙗ҆́ша є҆го̀ во а҆равѡ́ѳе і҆ерїхѡ́нстѣмъ, и҆ всѧ̀ си́ла є҆гѡ̀ разсы́пасѧ ѿ него̀:
|
|
6
|
6
|
|
и поя́ша царя́ и поведо́ша єго́ къ царю́ Вавило́нску въ ревла́ѳу: и глаго́ла съ ни́мъ су́дъ:
|
и҆ поѧ́ша царѧ̀ и҆ поведо́ша є҆го̀ къ царю̀ вавѷлѡ́нскꙋ въ ревла́ѳꙋ: и҆ глаго́ла съ ни́мъ сꙋ́дъ:
|
|
7
|
7
|
|
и сы́ны седекі́ины закла́ предъ очи́ма єго́, и о́чи седекі́ины избоде́, и связа́ єго́ у́зами, и отведе́ єго́ во Вавило́нъ.
|
и҆ сы́ны седекі̑ины закла̀ пред̾ ѻ҆чи́ма є҆гѡ̀, и҆ ѻ҆́чи седекі̑ины и҆збодѐ, и҆ свѧза̀ є҆го̀ оу҆́зами, и҆ ѿведѐ є҆го̀ во вавѷлѡ́нъ.
|
|
8
|
8
|
|
Въ ме́сяцъ же пя́тый, въ седмы́й де́нь ме́сяца, сіє́ лѣ́то девятоєна́десять Навуходоно́сора царя́ Вавило́нска, пріи́де навузарда́нъ архімагі́ръ, ра́бъ царя́ Вавило́нскаго, во Ієрусали́мъ
|
Въ мцⷭ҇ъ же пѧ́тый, въ седмы́й де́нь мцⷭ҇а, сїѐ лѣ́то девѧтоена́десѧть навꙋходоно́сора царѧ̀ вавѷлѡ́нска, прїи́де навꙋзарда́нъ а҆рхїмагі́ръ, ра́бъ царѧ̀ вавѷлѡ́нскагѡ, во і҆ерⷭ҇ли́мъ
|
|
9
|
9
|
|
и зажже́ хра́мъ Госпо́день и до́мъ царе́въ, и вся́ до́мы Ієрусали́мли и вся́ до́мы вели́кія сожже́ архімагі́ръ:
|
и҆ зажжѐ хра́мъ гдⷭ҇ень и҆ до́мъ царе́въ, и҆ всѧ̑ до́мы і҆ерⷭ҇ли́мли и҆ всѧ̑ до́мы вели́кїѧ сожжѐ а҆рхїмагі́ръ:
|
|
10
|
10
|
|
и стѣ́ны Ієрусали́мли о́крестъ раскопа́ си́ла Халде́йская.
|
и҆ стѣ́ны і҆ерⷭ҇ли́мли ѡ҆́крестъ раскопа̀ си́ла халде́йскаѧ.
|
|
11
|
11
|
|
И оста́нокъ люді́й избы́вшихъ во гра́дѣ и впа́дшихъ, и́же отпадо́ша ко царю́ Вавило́нску, и про́чеє и утвержде́ніє пренесе́ навузарда́нъ воєво́да.
|
И҆ ѡ҆ста́нокъ люді́й и҆збы́вшихъ во гра́дѣ и҆ впа́дшихъ, и҆̀же ѿпадо́ша ко царю̀ вавѷлѡ́нскꙋ, и҆ про́чее и҆ оу҆твержде́нїе пренесѐ навꙋзарда́нъ воево́да.
|
|
12
|
12
|
|
И от ни́щихъ земли́ тоя́ оста́ви архімагі́ръ віногра́ды блюсти́ и вертогра́ды.
|
И҆ ѿ ни́щихъ землѝ тоѧ̀ ѡ҆ста́ви а҆рхїмагі́ръ вїногра́ды блюстѝ и҆ вертогра́ды.
|
|
13
|
13
|
|
И столпы́ мѣ́дяны въ хра́мѣ Госпо́дни, и подста́вы, и мо́ре мѣ́дноє су́щеє во хра́мѣ Госпо́дни сокруши́ша халде́є, и взя́ша мѣ́дь и́хъ во Вавило́нъ:
|
И҆ столпы̀ мѣ̑дѧны въ хра́мѣ гдⷭ҇ни, и҆ подста̑вы, и҆ мо́ре мѣ́дное сꙋ́щее во хра́мѣ гдⷭ҇ни сокрꙋши́ша халде́є, и҆ взѧ́ша мѣ́дь и҆́хъ во вавѷлѡ́нъ:
|
|
14
|
14
|
|
и коно́бы, и котлы́ и фіа́лы, и кади́лницы, и вся́ сосу́ды мѣ́дяныя, въ ни́хже служа́ху, взя́ша:
|
и҆ коно́бы, и҆ котлы̑ и҆ фїа́лы, и҆ кади̑лницы, и҆ всѧ̑ сосꙋ́ды мѣ̑дѧныѧ, въ ни́хже слꙋжа́хꙋ, взѧ́ша:
|
|
15
|
15
|
|
и кади́лницы, и фіа́лы златы́я и сре́бряныя взя́ архімагі́ръ,
|
и҆ кади̑лницы, и҆ фїа́лы златы̑ѧ и҆ срє́брѧныѧ взѧ̀ а҆рхїмагі́ръ,
|
|
16
|
16
|
|
столпы́ два́, и мо́ре єди́но, и подста́вы, я́же сотвори́ Соломо́нъ хра́му Госпо́дню: не бѣ́ вѣ́са мѣ́ди всѣ́хъ сосу́довъ.
|
столпы̀ два̀, и҆ мо́рѧ є҆ди́но, и҆ подста̑вы, ꙗ҆̀же сотворѝ соломѡ́нъ хра́мꙋ гдⷭ҇ню: не бѣ̀ вѣ́са мѣ́ди всѣ́хъ сосꙋ́дѡвъ.
|
|
17
|
17
|
|
Осмина́десяти лако́тъ бы́сть высота́ столпа́ єди́наго, и глава́ мѣ́дяна на не́мъ: и высота́ главѣ́ три́ ла́кти, и на главѣ́ мре́жи и шипки́ о́крестъ, вся́ мѣ́дяна: по сему́ же и сто́лпъ вторы́й со мре́жею.
|
Ѡ҆смина́десѧти лакѡ́тъ бы́сть высота̀ столпа̀ є҆ди́нагѡ, и҆ глава̀ мѣ́дѧна на не́мъ: и҆ высота̀ главѣ̀ трѝ ла̑кти, и҆ на главѣ̀ мрє́жи и҆ шипки̑ ѡ҆́крестъ, всѧ̑ мѣ̑дѧна: по семꙋ́ же и҆ сто́лпъ вторы́й со мре́жею.
|
|
18
|
18
|
|
И поя́тъ архімагі́ръ саре́а жерца́ пе́рваго и софо́нію жерца́ втора́го, и три́ стра́жы вра́тныя:
|
И҆ поѧ́тъ а҆рхїмагі́ръ саре́а жерца̀ пе́рваго и҆ софо́нїю жерца̀ втора́го, и҆ трѝ стра́жы вра̑тныѧ:
|
|
19
|
19
|
|
и от гра́да взя́ скопца́ єди́наго, и́же бѣ́ приста́вникъ надъ му́жи воє́нными, и пя́ть муже́й предстоя́щихъ предъ лице́мъ царе́вымъ, обрѣ́тшихся во гра́дѣ, и книго́чіа кня́зя си́лы, и́же стро́яше лю́ди земли́ тоя́, и шестьдеся́тъ муже́й люді́й земли́ тоя́ обрѣ́тшихся во гра́дѣ:
|
и҆ ѿ гра́да взѧ̀ скопца̀ є҆ди́наго, и҆́же бѣ̀ приста́вникъ над̾ мꙋ́жи вое́нными, и҆ пѧ́ть мꙋже́й предстоѧ́щихъ пред̾ лице́мъ царе́вымъ, ѡ҆брѣ́тшихсѧ во гра́дѣ, и҆ книго́чїа кнѧ́зѧ си́лы, и҆́же стро́ѧше лю́ди землѝ тоѧ̀, и҆ шестьдесѧ́тъ мꙋже́й люді́й землѝ тоѧ̀ ѡ҆брѣ́тшихсѧ во гра́дѣ:
|
|
20
|
20
|
|
и поя́тъ я́ навузарда́нъ архімагі́ръ, и приведе́ я́ къ царю́ Вавило́нскому въ ревла́ѳу.
|
и҆ поѧ́тъ ѧ҆̀ навꙋзарда́нъ а҆рхїмагі́ръ, и҆ приведѐ ѧ҆̀ къ царю̀ вавѷлѡ́нскомꙋ въ ревла́ѳꙋ.
|
|
21
|
21
|
|
И порази́ и́хъ ца́рь Вавило́нскій, и умори́ я́ въ ревла́ѳѣ, въ земли́ Єма́ѳовѣ. И пресели́ся Іу́да свы́ше земли́ своєя́.
|
И҆ поразѝ и҆́хъ ца́рь вавѷлѡ́нскїй, и҆ оу҆морѝ ѧ҆̀ въ ревла́ѳѣ, въ землѝ є҆ма́ѳѡвѣ. И҆ пресели́сѧ і҆ꙋ́да свы́ше землѝ своеѧ̀.
|
|
22
|
22
|
|
И лю́діє оста́вшіися въ земли́ Іу́довѣ, и́хже оста́ви Навуходоно́соръ ца́рь Вавило́нскій, и поста́ви надъ ни́ми годолі́ю, сы́на Ахіка́мля, сы́на Сафа́ня.
|
И҆ лю́дїе ѡ҆ста́вшїисѧ въ землѝ і҆ꙋ́довѣ, и҆̀хже ѡ҆ста́ви навꙋходоно́соръ ца́рь вавѷлѡ́нскїй, и҆ поста́ви над̾ ни́ми годолі́ю, сы́на а҆хїка́млѧ, сы́на сафа́нѧ.
|
|
23
|
23
|
|
И услы́шаша вси́ кня́зи си́лы са́ми и му́жіє и́хъ, я́ко поста́ви ца́рь Вавило́нскій годолі́ю, и пріидо́ша къ годолі́и въ Массифу́, и Ісма́илъ сы́нъ наѳаніинъ, и Іоана́нъ сы́нъ кари́ѳовъ, и Сараі́а сы́нъ Ѳанама́ѳовъ нетофаѳі́тскій, и Ієзо́ніа сы́нъ Махаѳѳо́въ, са́ми и му́жіє и́хъ [пріидо́ша].
|
И҆ оу҆слы́шаша всѝ кнѧ̑зи си́лы са́ми и҆ мꙋ́жїе и҆́хъ, ꙗ҆́кѡ поста́ви ца́рь вавѷлѡ́нскїй годолі́ю, и҆ прїидо́ша къ годолі́и въ массифꙋ̀, и҆ і҆сма́илъ сы́нъ наѳанїинъ, и҆ і҆ѡана́нъ сы́нъ кари́ѳовъ, и҆ сараі́а сы́нъ ѳанама́ѳовъ нетѡфаѳі́тскїй, и҆ і҆езо́нїа сы́нъ махаѳѳо́въ, са́ми и҆ мꙋ́жїе и҆̀хъ (прїидо́ша).
|
|
24
|
24
|
|
И кля́тся и́мъ годолі́а и муже́мъ и́хъ и рече́ и́мъ: не бо́йтеся прише́ствія халде́євъ: сѣди́те на земли́ и рабо́тайте царю́ Вавило́нскому, и добро́ бу́детъ ва́мъ.
|
И҆ клѧ́тсѧ и҆̀мъ годолі́а и҆ мꙋжє́мъ и҆́хъ и҆ речѐ и҆̀мъ: не бо́йтесѧ прише́ствїѧ халде́євъ: сѣди́те на землѝ и҆ рабо́тайте царю̀ вавѷлѡ́нскомꙋ, и҆ добро̀ бꙋ́детъ ва́мъ.
|
|
25
|
25
|
|
И бы́сть въ ме́сяцъ седмы́й, пріи́де Ісма́илъ сы́нъ наѳані́инъ сы́на Єліса́мля от сѣ́мене ца́рска, и де́сять муже́й съ ни́мъ, и порази́ годолі́ю, и у́мре, и Іуде́євъ и халде́євъ, и́же съ ни́мъ бя́ху въ Массифѣ́.
|
И҆ бы́сть въ мцⷭ҇ъ седмы́й, прїи́де і҆сма́илъ сы́нъ наѳані́инъ сы́на є҆лїса́млѧ ѿ сѣ́мене ца́рска, и҆ де́сѧть мꙋже́й съ ни́мъ, и҆ поразѝ годолі́ю, и҆ оу҆́мре, и҆ і҆ꙋде́євъ и҆ халде́євъ, и҆̀же съ ни́мъ бѧ́хꙋ въ массифѣ̀.
|
|
26
|
26
|
|
И воста́ша вси́ лю́діє, от ма́ла и до вели́ка, и кня́зи си́лъ, и внидо́ша во Єги́петъ, я́ко убоя́шася от лица́ Халде́йска.
|
И҆ воста́ша всѝ лю́дїе, ѿ ма́ла и҆ до вели́ка, и҆ кнѧ̑зи си́лъ, и҆ внидо́ша во є҆гѵ́петъ, ꙗ҆́кѡ оу҆боѧ́шасѧ ѿ лица̀ халде́йска.
|
|
27
|
27
|
|
И бы́сть въ лѣ́то три́десять седмо́є преселе́нія Іоахі́на царя́ Іу́дина, въ дванадеся́тый ме́сяцъ, въ два́десять седмы́й де́нь ме́сяца, вознесе́ Євілмарода́хъ ца́рь Вавило́нскій, въ лѣ́то ца́рства своєго́, главу́ Іоахі́на царя́ Іу́дина, и изведе́ єго́ изъ до́му темни́цы єго́,
|
И҆ бы́сть въ лѣ́то три́десѧть седмо́е преселе́нїѧ і҆ѡахі́на царѧ̀ і҆ꙋ́дина, въ дванадесѧ́тый мцⷭ҇ъ, въ два́десѧть седмы́й де́нь мцⷭ҇а, вознесѐ є҆ѵїлмарѡда́хъ ца́рь вавѷлѡ́нскїй, въ лѣ́то ца́рства своегѡ̀, главꙋ̀ і҆ѡахі́на царѧ̀ і҆ꙋ́дина, и҆ и҆зведѐ є҆го̀ и҆з̾ до́мꙋ темни́цы є҆гѡ̀,
|
|
28
|
28
|
|
и глаго́ла съ ни́мъ блага́я, и даде́ престо́лъ єму́ свы́ше престо́ловъ царе́й, и́же бя́ху съ ни́мъ въ Вавило́нѣ:
|
и҆ глаго́ла съ ни́мъ блага̑ѧ, и҆ дадѐ престо́лъ є҆мꙋ̀ свы́ше престо́лѡвъ царе́й, и҆̀же бѧ́хꙋ съ ни́мъ въ вавѷлѡ́нѣ:
|
|
29
|
29
|
|
и измѣни́ ри́зы єго́ темни́чныя, и ядя́ше хлѣ́бъ съ ни́мъ всегда́, во вся́ дни́ живота́ своєго́.
|
и҆ и҆змѣнѝ ри̑зы є҆гѡ̀ темни́чныѧ, и҆ ꙗ҆дѧ́ше хлѣ́бъ съ ни́мъ всегда̀, во всѧ̑ дни̑ живота̀ своегѡ̀.
|
|
30
|
30
|
|
И пи́ща єго́ от до́му ца́рска да́вана бя́ше, и все́ изоби́ліє во дни́ єго́, во вся́ дни́ живота́ єго́.
|
И҆ пи́ща є҆гѡ̀ ѿ до́мꙋ ца́рска да́вана бѧ́ше, и҆ всѐ и҆зоби́лїе во дни̑ є҆гѡ̀, во всѧ̑ дни̑ живота̀ є҆гѡ̀.
|
