|
Глава 5
|
Глава́ є҃
|
|
1
|
1
|
|
И неєма́нъ кня́зь си́лы сирі́йскія бѣ́ му́жъ ве́лій предъ господи́номъ свои́мъ и ди́венъ лице́мъ, я́ко и́мъ даде́ Госпо́дь спасе́ніє сирі́и: и му́жъ бѣ́ си́ленъ крѣ́постію прокаже́нъ.
|
И҆ неема́нъ кнѧ́зь си́лы сѷрі́йскїѧ бѣ̀ мꙋ́жъ ве́лїй пред̾ господи́номъ свои́мъ и҆ ди́венъ лице́мъ, ꙗ҆́кѡ и҆́мъ дадѐ гдⷭ҇ь спⷭ҇нїе сѷрі́и: и҆ мꙋ́жъ бѣ̀ си́ленъ крѣ́постїю прокаже́нъ.
|
|
2
|
2
|
|
И изъ сирі́и изыдо́ша во́ини и плѣни́ша ю́нотку ма́лу от земли́ Ізра́илевы: и бѣ́ предъ жено́ю неєма́новою [служа́]
|
И҆ и҆з̾ сѷрі́и и҆зыдо́ша во́ини и҆ плѣни́ша ю҆́ноткꙋ ма́лꙋ ѿ землѝ і҆и҃левы: и҆ бѣ̀ пред̾ жено́ю неема́новою (слꙋжа̀)
|
|
3
|
3
|
|
и рече́ госпожѣ́ своє́й: о, дабы́ господи́нъ мо́й бы́лъ у проро́ка Бо́жія, и́же въ самарі́и, то́й бы очи́стилъ єго́ и прока́зы єго́.
|
и҆ речѐ госпожѣ̀ свое́й: ѽ, дабы̀ господи́нъ мо́й бы́лъ оу҆ прⷪ҇ро́ка бж҃їѧ, и҆́же въ самарі́и, то́й бы ѡ҆чи́стилъ є҆го̀ и҆ прока́зы є҆гѡ̀.
|
|
4
|
4
|
|
И вни́де и возвѣсти́ господи́ну своєму́ и рече́: та́ко и та́ко глаго́ла ю́нотка, я́же от земли́ Ізра́илевы.
|
И҆ вни́де и҆ возвѣстѝ господи́нꙋ своемꙋ̀ и҆ речѐ: та́кѡ и҆ та́кѡ глаго́ла ю҆́нотка, ꙗ҆́же ѿ землѝ і҆и҃левы.
|
|
5
|
5
|
|
И рече́ ца́рь сирі́йскій ко неєма́ну: иди́, вни́ди, и послю́ писа́ніє ко царю́ Ізра́илеву. И по́йде, и взя́ въ ру́цѣ свои́ де́сять тала́нтъ сребра́ и ше́сть ты́сящъ златни́къ и де́сять измѣня́ємыхъ ри́зъ.
|
И҆ речѐ ца́рь сѷрі́йскїй ко неема́нꙋ: и҆дѝ, вни́ди, и҆ послю̀ писа́нїе ко царю̀ і҆и҃левꙋ. И҆ по́йде, и҆ взѧ̀ въ рꙋ́цѣ своѝ де́сѧть тала̑нтъ сребра̀ и҆ ше́сть ты́сѧщъ златни̑къ и҆ де́сѧть и҆змѣнѧ́емыхъ ри́зъ.
|
|
6
|
6
|
|
И внесе́ писа́ніє къ царю́ Ізра́илеву глаго́ля: и ны́нѣ єгда́ пріи́детъ писа́ніє сіє́ къ тебѣ́, се́, посла́хъ къ тебѣ́ неєма́на раба́ моєго́, да очи́стиши єго́ от прока́зы єго́.
|
И҆ внесѐ писа́нїе къ царю̀ і҆и҃левꙋ глаго́лѧ: и҆ нн҃ѣ є҆гда̀ прїи́детъ писа́нїе сїѐ къ тебѣ̀, сѐ, посла́хъ къ тебѣ̀ неема́на раба̀ моего̀, да ѡ҆чи́стиши є҆го̀ ѿ прока́зы є҆гѡ̀.
|
|
7
|
7
|
|
И бы́сть єгда́ прочте́ писа́ніє ца́рь Ізра́илевъ, раздра́ ри́зы своя́ и рече́: єда́ а́зъ Бо́гъ є́смь, є́же мертви́ти и животвори́ти, я́ко се́й посла́ и мнѣ́, да очи́щу му́жа от прока́зы єго́? про́чеє разумѣ́йте и ви́дите, я́ко се́ и́щетъ вины́ ко мнѣ́.
|
И҆ бы́сть є҆гда̀ прочтѐ писа́нїе ца́рь і҆и҃левъ, раздра̀ ри̑зы своѧ̑ и҆ речѐ: є҆да̀ а҆́зъ бг҃ъ є҆́смь, є҆́же мертви́ти и҆ животвори́ти, ꙗ҆́кѡ се́й посла̀ и҆ мнѣ̀, да ѡ҆чи́щꙋ мꙋ́жа ѿ прока́зы є҆гѡ̀; про́чее разꙋмѣ́йте и҆ ви́дите, ꙗ҆́кѡ сѐ и҆́щетъ вины̀ ко мнѣ̀.
|
|
8
|
8
|
|
И бы́сть єгда́ услы́ша Єліссе́й, я́ко раздра́ ри́зы своя́ ца́рь Ізра́илевъ, и посла́ къ царю́ Ізра́илеву, глаго́ля: почто́ раздра́лъ єси́ ри́зы твоя́? да пріи́детъ ко мнѣ́ ны́нѣ неєма́нъ, и да разумѣ́єтъ, я́ко є́сть проро́къ во Ізра́или.
|
И҆ бы́сть є҆гда̀ оу҆слы́ша є҆лїссе́и, ꙗ҆́кѡ раздра̀ ри̑зы своѧ̑ ца́рь і҆и҃левъ, и҆ посла̀ къ царю̀ і҆и҃левꙋ, глаго́лѧ: почто̀ раздра́лъ є҆сѝ ри̑зы твоѧ̑; да прїи́детъ ко мнѣ̀ нн҃ѣ неема́нъ, и҆ да разꙋмѣ́етъ, ꙗ҆́кѡ є҆́сть прⷪ҇ро́къ во і҆и҃ли.
|
|
9
|
9
|
|
И пріи́де неєма́нъ на ко́нехъ и на колесни́цѣхъ и ста́ при две́рехъ до́му Єліссе́єва.
|
И҆ прїи́де неема́нъ на ко́нехъ и҆ на колесни́цѣхъ и҆ ста̀ при две́рехъ до́мꙋ є҆лїссе́ева.
|
|
10
|
10
|
|
И посла́ Єліссе́й посла́нника къ нему́, глаго́ля: ше́дъ измы́йся седми́жды во Іорда́нѣ, и возврати́тся пло́ть твоя́ къ тебѣ́, и очи́стишися.
|
И҆ посла̀ є҆лїссе́й посла́нника къ немꙋ̀, глаго́лѧ: ше́дъ и҆змы́йсѧ седми́жды во і҆ѻрда́нѣ, и҆ возврати́тсѧ пло́ть твоѧ̀ къ тебѣ̀, и҆ ѡ҆чи́стишисѧ.
|
|
11
|
11
|
|
И разгнѣ́вася неєма́нъ, и отъи́де, и рече́: се́, у́бо глаго́лахъ, я́ко изы́детъ ко мнѣ́, и ста́нетъ, и призове́тъ во и́мя Бо́га своєго́, и возложи́тъ ру́ку свою́ на мѣ́сто, и очи́ститъ прока́зу:
|
И҆ разгнѣ́васѧ неема́нъ, и҆ ѿи́де, и҆ речѐ: сѐ, оу҆́бѡ глаго́лахъ, ꙗ҆́кѡ и҆зы́детъ ко мнѣ̀, и҆ ста́нетъ, и҆ призове́тъ во и҆́мѧ бг҃а своегѡ̀, и҆ возложи́тъ рꙋ́кꙋ свою̀ на мѣ́сто, и҆ ѡ҆чи́ститъ прока́зꙋ:
|
|
12
|
12
|
|
не бла́ги ли Авана́ и фарфа́ръ рѣ́ки Дама́сковы па́че Іорда́на и всѣ́хъ во́дъ Ізра́илевыхъ? не ше́дъ ли измы́юся въ ни́хъ и очи́шуся? И уклони́ся и отъи́де во гнѣ́вѣ.
|
не бла́ги ли а҆вана̀ и҆ фарфа́ръ рѣ́ки дама́скѡвы па́че і҆ѻрда́на и҆ всѣ́хъ во́дъ і҆и҃левыхъ; не ше́дъ ли и҆змы́юсѧ въ ни́хъ и҆ ѡ҆чи́шꙋсѧ; И҆ оу҆клони́сѧ и҆ ѿи́де во гнѣ́вѣ.
|
|
13
|
13
|
|
И прибли́жишася о́троцы єго́ и рѣ́ша єму́: а́ще бы ве́ліє сло́во глаго́лалъ проро́къ тебѣ́, не бы ли сотвори́лъ єси́? а я́ко рече́ къ тебѣ́: измы́йся, и очи́стишися.
|
И҆ прибли́жишасѧ ѻ҆́троцы є҆гѡ̀ и҆ рѣ́ша є҆мꙋ̀: а҆́ще бы ве́лїе сло́во глаго́лалъ прⷪ҇ро́къ тебѣ̀, не бы ли сотвори́лъ є҆сѝ; а҆ ꙗ҆́кѡ речѐ къ тебѣ̀: и҆змы́йсѧ, и҆ ѡ҆чи́стишисѧ.
|
|
14
|
14
|
|
И сни́де неєма́нъ, и погрузи́ся во Іорда́нѣ седми́жды, по глаго́лу Єліссе́єву: и возврати́ся пло́ть єго́ я́ко пло́ть отроча́те мла́да, и очи́стися.
|
И҆ сни́де неема́нъ, и҆ погрꙋзи́сѧ во і҆ѻрда́нѣ седми́жды, по глаго́лꙋ є҆лїссе́евꙋ: и҆ возврати́сѧ пло́ть є҆гѡ̀ ꙗ҆́кѡ пло́ть ѻ҆троча́те мла́да, и҆ ѡ҆чи́стисѧ.
|
|
15
|
15
|
|
И возврати́ся ко Єліссе́ю са́мъ и все́ ополче́ніє єго́, и пріи́де и ста́ предъ ни́мъ и рече́: се́, ны́нѣ разумѣ́хъ, я́ко нѣ́сть Бо́га во все́й земли́, но то́кмо во Ізра́или: и ны́нѣ пріими́ благослове́ніє от раба́ твоєго́.
|
И҆ возврати́сѧ ко є҆лїссе́ю са́мъ и҆ всѐ ѡ҆полче́нїе є҆гѡ̀, и҆ прїи́де и҆ ста̀ пред̾ ни́мъ и҆ речѐ: сѐ, нн҃ѣ разꙋмѣ́хъ, ꙗ҆́кѡ нѣ́сть бг҃а во все́й землѝ, но то́кмѡ во і҆и҃ли: и҆ нн҃ѣ прїимѝ благослове́нїе ѿ раба̀ твоегѡ̀.
|
|
16
|
16
|
|
И рече́ Єліссе́й: жи́въ Госпо́дь, єму́же предста́хъ предъ ни́мъ, а́ще пріиму́. И понужда́ше єго́ взя́ти, и не послу́ша.
|
И҆ речѐ є҆лїссе́й: жи́въ гдⷭ҇ь, є҆мꙋ́же предста́хъ пред̾ ни́мъ, а҆́ще прїимꙋ̀. И҆ понꙋжда́ше є҆го̀ взѧ́ти, и҆ не послꙋ́ша.
|
|
17
|
17
|
|
И рече́ неєма́нъ: а́ще ли не [хо́щеши взя́ти], то́ да́ждь рабу́ твоєму́ бре́мя, супру́гъ мско́въ, от земли́ сея́ червле́ныя: я́ко не сотвори́тъ отсе́лѣ ра́бъ тво́й всесожже́нія и же́ртвы бого́мъ ины́мъ, но Го́споду єди́ному,
|
И҆ речѐ неема́нъ: а҆́ще ли не (хо́щеши взѧ́ти), то̀ да́ждь рабꙋ̀ твоемꙋ̀ вре́мѧ, сꙋпрꙋ́гъ мскѡ́въ, ѿ землѝ сеѧ̀ червле́ныѧ: ꙗ҆́кѡ и҆ сотвори́тъ ѿсе́лѣ ра́бъ тво́й всесожже́нїѧ и҆ же́ртвы богѡ́мъ и҆ны̑мъ, но гдⷭ҇ꙋ є҆ди́номꙋ,
|
|
18
|
18
|
|
по глаго́лу сему́ и о словеси́ се́мъ: и очи́ститъ Госпо́дь раба́ твоєго́, єгда́ вни́детъ господи́нъ мо́й въ до́мъ ремма́новъ на поклоне́ніє та́мо: и то́й почі́єтъ на руку́ моє́ю, и поклоню́ся въ дому́ ремма́ни, внегда́ кла́нятися єму́ въ дому́ ремма́ни, и очи́ститъ Госпо́дь раба́ твоєго́ по словеси́ сему́.
|
по глаго́лꙋ семꙋ̀ и҆ ѡ҆ словесѝ се́мъ: и҆ ѡ҆чи́ститъ гдⷭ҇ь раба̀ твоего̀, є҆гда̀ вни́детъ господи́нъ мо́й въ до́мъ ремма́новъ на поклоне́нїе та́мѡ: и҆ то́й почі́етъ на рꙋкꙋ̀ моє́ю, и҆ поклоню́сѧ въ домꙋ̀ ремма́ни, внегда̀ кла́нѧтисѧ є҆мꙋ̀ въ домꙋ̀ ремма́ни, и҆ ѡ҆чи́ститъ гдⷭ҇ь раба̀ твоего̀ по словесѝ семꙋ̀.
|
|
19
|
19
|
|
И рече́ Єліссе́й ко неєма́ну: иди́ съ ми́ромъ. и отъи́де от него́ на хавраѳа́ земли́.
|
И҆ речѐ є҆лїссе́й ко неема́нꙋ: и҆дѝ съ ми́ромъ. и҆ ѿи́де ѿ негѡ̀ на хавраѳа̀ землѝ.
|
|
20
|
20
|
|
И рече́ гієзі́й о́трочищь Єліссе́євъ: се́, пощадѣ́ господи́нъ мо́й неєма́на Си́рянина сего́, є́же не взя́ти от руки́ єго́, я́же принесе́: жи́въ Госпо́дь, я́ко и́мамъ тещи́ вслѣ́дъ єго́, и возму́ от него́ нѣ́что.
|
И҆ речѐ гїезі́й ѻ҆́трочищь є҆лїссе́евъ: сѐ, пощадѣ̀ господи́нъ мо́й неема́на сѵ́рѧнина сего̀, є҆́же не взѧ́ти ѿ рꙋкѝ є҆гѡ̀, ꙗ҆̀же принесѐ: жи́въ гдⷭ҇ь, ꙗ҆́кѡ и҆́мамъ тещѝ вслѣ́дъ є҆гѡ̀, и҆ возмꙋ̀ ѿ негѡ̀ нѣ́что.
|
|
21
|
21
|
|
И тече́ гієзі́й во слѣ́дъ неєма́новъ. И ви́дѣ єго́ неєма́нъ теку́ща вслѣ́дъ себе́, и возврати́ся съ колесни́цы на срѣ́теніє єму́ и рече́: ми́ръ ли?
|
И҆ течѐ гїезі́й во слѣ́дъ неема́новъ. И҆ ви́дѣ є҆го̀ неема́нъ текꙋ́ща в̾слѣ́дъ себє̀, и҆ возврати́сѧ съ колесни́цы на срѣ́тенїе є҆мꙋ̀ и҆ речѐ: ми́ръ ли;
|
|
22
|
22
|
|
И рече́ гієзі́й: ми́ръ: господи́нъ мо́й посла́ мя, глаго́ля: се́, ны́нѣ пріидо́ста ко мнѣ́ два́ о́трочища от горы́ Єфре́мли от сыно́въ проро́чихъ: да́ждь у́бо и́ма тала́нтъ сребра́ и двѣ́ премѣ́ны ри́зъ.
|
И҆ речѐ гїезі́й: ми́ръ: господи́нъ мо́й посла́ мѧ, глаго́лѧ: сѐ, нн҃ѣ прїидо́ста ко мнѣ̀ два̀ ѻ҆́трѡчища ѿ горы̀ є҆фре́мли ѿ сынѡ́въ проро́чихъ: да́ждь оу҆̀бо и҆́ма тала́нтъ сребра̀ и҆ двѣ̀ премѣ̑ны ри́зъ.
|
|
23
|
23
|
|
И рече́ неєма́нъ: возми́ два́ тала́нта сребра́. И взя́ два́ тала́нта во два́ мѣшца́ и двѣ́ премѣ́ны ри́зъ, и возложи́ на два́ о́трочиша своя́, и несо́ста предъ ни́мъ:
|
И҆ речѐ неема́нъ: возмѝ два̀ тала̑нта сребра̀. И҆ взѧ̀ два̀ тала̑нта во два̀ мѣшца̑ и҆ двѣ̀ премѣ̑ны ри́зъ, и҆ возложѝ на два̀ ѻ҆́трѡчиша своѧ̑, и҆ несо́ста пред̾ ни́мъ:
|
|
24
|
24
|
|
и пріидо́ша въ сумра́ки, и взя́ от ру́къ и́хъ и сокры́ во хра́минѣ, и отпусти́ му́жы.
|
и҆ прїидо́ша въ сꙋмра́ки, и҆ взѧ̀ ѿ рꙋ́къ и҆́хъ и҆ сокры̀ во хра́минѣ, и҆ ѿпꙋстѝ мꙋ́жы.
|
|
25
|
25
|
|
И са́мъ вни́де и предста́ господи́ну своєму́. И рече́ къ нему́ Єліссе́й: отку́ду [прише́лъ єси́], гієзі́є? И рече́ гієзі́й: не исходи́лъ ра́бъ тво́й ника́може.
|
И҆ са́мъ вни́де и҆ предста̀ господи́нꙋ своемꙋ̀. И҆ речѐ къ немꙋ̀ є҆лїссе́й: ѿкꙋ́дꙋ (прише́лъ є҆сѝ), гїезі́е; И҆ речѐ гїезі́й: не и҆сходи́лъ ра́бъ тво́й ника́може.
|
|
26
|
26
|
|
И рече́ къ нему́ Єліссе́й: не ходи́ло ли се́рдце моє́ съ тобо́ю, и ви́дѣхъ, єгда́ возвраща́шеся му́жъ съ колесни́цы своє́й во срѣ́теніє тебѣ́? и ны́нѣ взя́лъ єси́ сребро́ и ри́зы взя́лъ єси́, да купи́ши за ни́хъ вертогра́ды и ма́слины и віногра́ды, и о́вцы и волы́, и о́троки и отрокови́цы:
|
И҆ речѐ къ немꙋ̀ є҆лїссе́й: не ходи́ло ли се́рдце моѐ съ тобо́ю, и҆ ви́дѣхъ, є҆гда̀ возвраща́шесѧ мꙋ́жъ съ колесни́цы свое́й во срѣ́тенїе тебѣ̀; и҆ нн҃ѣ взѧ́лъ є҆сѝ сребро̀ и҆ ри̑зы взѧ́лъ є҆сѝ, да кꙋпи́ши за ни́хъ вертогра́ды и҆ ма̑слины и҆ вїногра́ды, и҆ ѻ҆́вцы и҆ волы̀, и҆ ѻ҆́троки и҆ ѻ҆трокѡви́цы:
|
|
27
|
27
|
|
и прока́за неєма́нова да прильпне́тъ къ тебѣ́ и къ сѣ́мени твоєму́ во вѣ́ки. И изы́де от лица́ єго́ прокаже́нъ я́ко снѣ́гъ.
|
и҆ прока́за неема́нова да прильпне́тъ къ тебѣ̀ и҆ къ сѣ́мени твоемꙋ̀ во вѣ́ки. И҆ и҆зы́де ѿ лица̀ є҆гѡ̀ прокаже́нъ ꙗ҆́кѡ снѣ́гъ.
|
