|
Глава 20
|
Глава́ к҃
|
|
1
|
1
|
|
И та́мо бя́ше сы́нъ беззако́нный, и́мя же єму́ Саве́й, сы́нъ вохо́ровъ, му́жъ Ієміні́овъ, и воструби́ трубо́ю ро́жаною и рече́: нѣ́сть на́мъ ча́сти въ даві́дѣ, ниже́ наслѣ́дія на́мъ въ сы́нѣ Ієссе́євѣ: [возврати́теся,] му́жіє Ізра́илтестіи, въ селе́нія ва́ша.
|
И҆ та́мѡ бѧ́ше сы́нъ беззако́нный, и҆́мѧ же є҆мꙋ̀ саве́й, сы́нъ вохо́ровъ, мꙋ́жъ і҆емїні́овъ, и҆ вострꙋбѝ трꙋбо́ю ро́жаною и҆ речѐ: нѣ́сть на́мъ ча́сти въ даві́дѣ, нижѐ наслѣ́дїѧ на́мъ въ сы́нѣ і҆ессе́евѣ: (возврати́тесѧ,) мꙋ́жїе і҆и҃лтестїи, въ селє́нїѧ ва̑ша.
|
|
2
|
2
|
|
И отступи́ша вси́ му́жіє Ізра́илевы от даві́да вслѣ́дъ Саве́а сы́на вохо́рова: му́жіє же Іу́дины прилѣпи́шася къ царю́ своєму́ от Іорда́на да́же и до Ієрусали́ма.
|
И҆ ѿстꙋпи́ша всѝ мꙋ́жїе і҆и҃лєвы ѿ даві́да в̾слѣ́дъ саве́а сы́на вохо́рова: мꙋ́жїе же і҆ꙋ̑дины прилѣпи́шасѧ къ царю̀ своемꙋ̀ ѿ і҆ѻрда́на да́же и҆ до і҆ерⷭ҇ли́ма.
|
|
3
|
3
|
|
И вни́де даві́дъ въ до́мъ сво́й во Ієрусали́мъ, и взя́ ца́рь де́сять же́нъ подло́жницъ свои́хъ, я́же оста́ви стрещи́ до́мъ, и даде́ и́хъ въ до́мъ стражбы́: и препита́ и́хъ, и [отто́лѣ] не вни́де къ ни́мъ: и бѣ́ша храни́ми до дне́ сме́рти своєя́, вдо́вски живу́щя.
|
И҆ вни́де даві́дъ въ до́мъ сво́й во і҆ерⷭ҇ли́мъ, и҆ взѧ̀ ца́рь де́сѧть же́нъ подло́жницъ свои́хъ, ꙗ҆̀же ѡ҆ста́ви стрещѝ до́мъ, и҆ дадѐ и҆̀хъ въ до́мъ стражбы̀: и҆ препита̀ и҆̀хъ, и҆ (ѿто́лѣ) не вни́де къ ни̑мъ: и҆ бѣ́ша храни́ми до днѐ сме́рти своеѧ̀, вдо́вски живꙋ́щѧ.
|
|
4
|
4
|
|
И рече́ ца́рь ко Амесса́ю: созови́ ми му́жы Іу́дины въ три́ дни́, ты́ же здѣ́ ста́ни.
|
И҆ речѐ ца́рь ко а҆месса́ю: созови́ ми мꙋ́жы і҆ꙋ̑дины въ трѝ дни̑, ты́ же здѣ̀ ста́ни.
|
|
5
|
5
|
|
И по́йде Амесса́й созва́ти муже́й Іу́диныхъ, и уме́дли от вре́мене, въ не́же повелѣ́ єму́ даві́дъ.
|
И҆ по́йде а҆месса́й созва́ти мꙋже́й і҆ꙋ́диныхъ, и҆ оу҆ме́дли ѿ вре́мене, въ не́же повелѣ̀ є҆мꙋ̀ даві́дъ.
|
|
6
|
6
|
|
И рече́ даві́дъ ко Аве́ссѣ: ны́нѣ зло́ сотвори́тъ на́мъ Саве́й сы́нъ вохо́рь па́че Авессало́ма: и ны́нѣ ты́ поими́ съ собо́ю о́троки господи́на своєго́, и пожени́ вслѣ́дъ єго́, да не ка́ко обря́щетъ себѣ́ гра́ды тве́рды и застѣни́тся от оче́съ на́шихъ.
|
И҆ речѐ даві́дъ ко а҆ве́ссѣ: нн҃ѣ ѕло̀ сотвори́тъ на́мъ саве́й сы́нъ вохо́рь па́че а҆вессалѡ́ма: и҆ нн҃ѣ ты̀ поимѝ съ собо́ю ѻ҆́троки господи́на своегѡ̀, и҆ поженѝ в̾слѣ́дъ є҆гѡ̀, да не ка́кѡ ѡ҆брѧ́щетъ себѣ̀ гра́ды твє́рды и҆ застѣни́тсѧ ѿ ѻ҆че́съ на́шихъ.
|
|
7
|
7
|
|
И изыдо́ша вслѣ́дъ єго́ Аве́сса и му́жіє Іоа́вли, и хереѳѳі́ и фелеѳѳі́ и вси́ си́льніи, и изыдо́ша изъ Ієрусали́ма гна́ти вслѣ́дъ Саве́а сы́на вохо́рова.
|
И҆ и҆зыдо́ша в̾слѣ́дъ є҆гѡ̀ а҆ве́сса и҆ мꙋ́жїе і҆ѡа̑вли, и҆ хереѳѳі̀ и҆ фелеѳѳі̀ и҆ всѝ си́льнїи, и҆ и҆зыдо́ша и҆з̾ і҆ерⷭ҇ли́ма гна́ти в̾слѣ́дъ саве́а сы́на вохо́рова.
|
|
8
|
8
|
|
И ті́и [бя́ху] у ка́мене вели́каго, и́же въ гавао́нѣ, и Амесса́й вни́де предъ ни́ми: Іоа́въ же препоя́санъ ри́зами одѣя́нія своєго́, и верху́ того́ препоя́санъ мече́мъ припря́женымъ при чре́слѣхъ єго́ въ ножна́хъ єго́, и єгда́ отъи́де, и ме́чь изсу́нуся и паде́.
|
И҆ ті́и (бѧ́хꙋ) оу҆ ка́мене вели́кагѡ, и҆́же въ гаваѡ́нѣ, и҆ а҆месса́й вни́де пред̾ ни́ми: і҆ѡа́въ же препоѧ́санъ ри́зами ѡ҆дѣѧ́нїѧ своегѡ̀, и҆ верхꙋ̀ тогѡ̀ препоѧ́санъ мече́мъ припрѧ́женымъ при чре́слѣхъ є҆гѡ̀ въ ножна́хъ є҆гѡ̀, и҆ є҆гда̀ ѿи́де, и҆ ме́чь и҆зсꙋ́нꙋсѧ и҆ падѐ.
|
|
9
|
9
|
|
И рече́ Іоа́въ Амесса́ю: здра́въ ли єси́, бра́те? И взя́ Іоа́въ руко́ю десно́ю за браду́ Амесса́єву лобза́ти єго́:
|
И҆ речѐ і҆ѡа́въ а҆месса́ю: здра́въ ли є҆сѝ, бра́те; И҆ взѧ̀ і҆ѡа́въ рꙋко́ю десно́ю за брадꙋ̀ а҆месса́евꙋ лобза́ти є҆го̀:
|
|
10
|
10
|
|
Амесса́й же не побреже́ся меча́, и́же въ руцѣ́ Іоа́вли: и уда́ри єго́ Іоа́въ мече́мъ въ чре́сла єго́, и излія́ся чре́во єго́ на зе́млю, и не повтори́ єму́, и у́мре [амесса́й]. Іоа́въ же и Аве́сса бра́тъ єго́ гна́ста вслѣ́дъ Саве́а сы́на вохо́ря.
|
а҆месса́й же не побреже́сѧ меча̀, и҆́же въ рꙋцѣ̀ і҆ѡа́вли: и҆ оу҆да́ри є҆го̀ і҆ѡа́въ мече́мъ въ чре́сла є҆гѡ̀, и҆ и҆злїѧ́сѧ чре́во є҆гѡ̀ на зе́млю, и҆ не повторѝ є҆мꙋ̀, и҆ оу҆́мре (а҆месса́й). І҆ѡа́въ же и҆ а҆ве́сса бра́тъ є҆гѡ̀ гна́ста в̾слѣ́дъ саве́а сы́на вохо́рѧ.
|
|
11
|
11
|
|
И му́жъ ста́ надъ ни́мъ от о́трокъ Іоа́влихъ и рече́: кто́ хо́щетъ [бы́ти] Іоа́вль, и кто́ даві́довъ, вслѣ́дъ Іоа́ва [да и́детъ].
|
И҆ мꙋ́жъ ста̀ над̾ ни́мъ ѿ ѻ҆́трѡкъ і҆ѡа́влихъ и҆ речѐ: кто̀ хо́щетъ (бы́ти) і҆ѡа́вль, и҆ кто̀ даві́довъ, в̾слѣ́дъ і҆ѡа́ва (да и҆́детъ).
|
|
12
|
12
|
|
Амесса́й же ме́ртвъ валя́шеся въ крови́ посредѣ́ пути́. И ви́дѣ му́жъ, я́ко остановля́хуся надъ ни́мъ вси́ лю́діє, и соврати́ Амесса́я съ пути́ на село́, и возложи́ на него́ ри́зу, поне́же ви́дяше вся́каго приходя́ща надъ ни́мъ стоя́вша:
|
А҆месса́й же ме́ртвъ валѧ́шесѧ въ кровѝ посредѣ̀ пꙋтѝ. И҆ ви́дѣ мꙋ́жъ, ꙗ҆́кѡ ѡ҆становлѧ́хꙋсѧ над̾ ни́мъ всѝ лю́дїе, и҆ совратѝ а҆месса́ѧ съ пꙋтѝ на село̀, и҆ возложѝ на него̀ ри́зꙋ, поне́же ви́дѧше всѧ́каго приходѧ́ща над̾ ни́мъ стоѧ́вша:
|
|
13
|
13
|
|
и бы́сть єгда́ принесе́ от пути́, преидо́ша вси́ му́жіє Ізра́илевы вслѣ́дъ Іоа́ва, є́же гна́ти вслѣ́дъ Саве́а сы́на вохо́ря.
|
и҆ бы́сть є҆гда̀ принесѐ ѿ пꙋтѝ, преидо́ша всѝ мꙋ́жїе і҆и҃лєвы в̾слѣ́дъ і҆ѡа́ва, є҆́же гна́ти в̾слѣ́дъ саве́а сы́на вохо́рѧ.
|
|
14
|
14
|
|
И се́й про́йде вся́ колѣ́на Ізра́илева во Аве́ль и во веѳма́ху: и вси́ въ ха́ррѣ, и вси́ гра́ды собра́шася, и идо́ша вслѣ́дъ єго́,
|
И҆ се́й про́йде всѧ̑ кѡлѣ́на і҆и҃лєва во а҆ве́ль и҆ во веѳма́хꙋ: и҆ всѝ въ ха́ррѣ, и҆ всѝ гра́ды собра́шасѧ, и҆ и҆до́ша в̾слѣ́дъ є҆гѡ̀,
|
|
15
|
15
|
|
и пріидо́ша и ополчи́шася на него́ о́крестъ во Аве́ли и во веѳма́хѣ: и насы́паша зе́млю ко гра́ду, и ста́ на предстѣ́ніи: и вси́ лю́діє и́же со Іоа́вомъ помышля́ху низложи́ти стѣ́ну [гра́дскую].
|
и҆ прїидо́ша и҆ ѡ҆полчи́шасѧ на него̀ ѡ҆́крестъ во а҆ве́ли и҆ во веѳма́хѣ: и҆ насы́паша зе́млю ко гра́дꙋ, и҆ ста̀ на предстѣ́нїи: и҆ всѝ лю́дїе и҆̀же со і҆ѡа́вомъ помышлѧ́хꙋ низложи́ти стѣ́нꙋ (гра́дскꙋю).
|
|
16
|
16
|
|
И возопи́ жена́ му́драя со стѣны́ и рече́: слы́шите, слы́шите, рцы́те ны́нѣ Іоа́ву, да прибли́жится до здѣ́, и возглаго́лю къ нему́.
|
И҆ возопѝ жена̀ мꙋ́драѧ со стѣны̀ и҆ речѐ: слы́шите, слы́шите, рцы́те нн҃ѣ і҆ѡа́вꙋ, да прибли́житсѧ до здѣ̀, и҆ возглаго́лю къ немꙋ̀.
|
|
17
|
17
|
|
И прибли́жися къ не́й [Іоа́въ], и рече́ жена́: ты́ ли єси́ Іоа́въ? О́нъ же рече́: а́зъ. И рече́ єму́: послу́шай слове́съ рабы́ твоєя́. И рече́ Іоа́въ: послу́шаю, а́зъ є́смь.
|
И҆ прибли́жисѧ къ не́й (і҆ѡа́въ), и҆ речѐ жена̀: ты́ ли є҆сѝ і҆ѡа́въ; Ѻ҆́нъ же речѐ: а҆́зъ. И҆ речѐ є҆мꙋ̀: послꙋ́шай слове́съ рабы̀ твоеѧ̀. И҆ речѐ і҆ѡа́въ: послꙋ́шаю, а҆́зъ є҆́смь.
|
|
18
|
18
|
|
И рече́ глаго́лющи: сло́во глаго́лаша въ пе́рвыхъ, глаго́люще: вопроша́ємь вопроше́нъ бы́сть во Аве́ли и въ да́нѣ, а́ще оскудѣ́ша, я́же положи́ша вѣ́рніи Ізра́илевы: вопроша́юще да вопро́сятъ во Аве́ли, и та́ко рече́, а́ще оскудѣ́ша:
|
И҆ речѐ глаго́лющи: сло́во глаго́лаша въ пе́рвыхъ, глаго́люще: вопроша́емь вопроше́нъ бы́сть во а҆ве́ли и҆ въ да́нѣ, а҆́ще ѡ҆скꙋдѣ́ша, ꙗ҆̀же положи́ша вѣ́рнїи і҆и҃лєвы: вопроша́юще да вопро́сѧтъ во а҆ве́ли, и҆ та́кѡ речѐ, а҆́ще ѡ҆скꙋдѣ́ша:
|
|
19
|
19
|
|
а́зъ є́смь ми́рная утвержде́ній Ізра́илевыхъ, ты́ же и́щеши умертви́ти гра́дъ и ма́терь градо́въ Ізра́илевыхъ: и почто́ потопля́єши достоя́ніє Госпо́дне?
|
а҆́зъ є҆́смь ми̑рнаѧ оу҆твержде́нїй і҆и҃левыхъ, ты́ же и҆́щеши оу҆мертви́ти гра́дъ и҆ ма́терь градѡ́въ і҆и҃левыхъ: и҆ почто̀ потоплѧ́еши достоѧ́нїе гдⷭ҇не;
|
|
20
|
20
|
|
И отвѣща́ Іоа́въ и рече́: ми́лостивъ мнѣ́, ми́лостивъ мнѣ́, а́ще потоплю́ и а́ще разрушу́:
|
И҆ ѿвѣща̀ і҆ѡа́въ и҆ речѐ: ми́лостивъ мнѣ̀, ми́лостивъ мнѣ̀, а҆́ще потоплю̀ и҆ а҆́ще разрꙋшꙋ̀:
|
|
21
|
21
|
|
не та́ко сло́во, я́ко му́жъ съ горы́ Єфре́мли, Саве́й сы́нъ вохо́рь и́мя єму́, и воздви́же ру́ку свою́ на царя́ даві́да: дади́те ми́ того́ єди́наго, и отиду́ от гра́да. И рече́ жена́ ко Іоа́ву: се́, глава́ єго́ све́ржется къ тебѣ́ со стѣны́.
|
не та́кѡ сло́во, ꙗ҆́кѡ мꙋ́жъ съ горы̀ є҆фре́мли, саве́й сы́нъ вохо́рь и҆́мѧ є҆мꙋ̀, и҆ воздви́же рꙋ́кꙋ свою̀ на царѧ̀ даві́да: дади́те мѝ того̀ є҆ди́наго, и҆ ѿидꙋ̀ ѿ гра́да. И҆ речѐ жена̀ ко і҆ѡа́вꙋ: сѐ, глава̀ є҆гѡ̀ све́ржетсѧ къ тебѣ̀ со стѣны̀.
|
|
22
|
22
|
|
И вни́де жена́ ко всѣ́мъ лю́демъ и глаго́ла ко всему́ гра́ду му́дростію своє́ю, отъя́ти главу́ Саве́а сы́на вохо́ря. И отсѣко́ша главу́ Саве́а сы́на вохо́ря, и сверго́ша ю́ ко Іоа́ву. И Іоа́въ воструби́ въ трубу́, и разыдо́шася му́жіє от гра́да вси́ въ селе́нія своя́. Іоа́въ же возврати́ся во Ієрусали́мъ ко царю́.
|
И҆ вни́де жена̀ ко всѣ̑мъ лю́демъ и҆ глаго́ла ко всемꙋ̀ гра́дꙋ мꙋ́дростїю свое́ю, ѿѧ́ти главꙋ̀ саве́а сы́на вохо́рѧ. И҆ ѿсѣко́ша главꙋ̀ саве́а сы́на вохо́рѧ, и҆ сверго́ша ю҆̀ ко і҆ѡа́вꙋ. И҆ і҆ѡа́въ вострꙋбѝ въ трꙋбꙋ̀, и҆ разыдо́шасѧ мꙋ́жїе ѿ гра́да всѝ въ селє́нїѧ своѧ̑. І҆ѡа́въ же возврати́сѧ во і҆ерⷭ҇ли́мъ ко царю̀.
|
|
23
|
23
|
|
И [бѣ́] Іоа́въ надъ все́ю си́лою Ізра́илевою, и ване́а сы́нъ Іода́євъ надъ хереѳѳі́ и надъ фелеѳѳі́,
|
И҆ (бѣ̀) і҆ѡа́въ над̾ все́ю си́лою і҆и҃левою, и҆ ване́а сы́нъ і҆ѡда́евъ над̾ хереѳѳі̀ и҆ над̾ фелеѳѳі̀,
|
|
24
|
24
|
|
Адоніра́мъ же надъ да́нми, и Іосафа́тъ сы́нъ Ахілу́ѳовъ воспомина́яй,
|
а҆дѡнїра́мъ же над̾ да́нми, и҆ і҆ѡсафа́тъ сы́нъ а҆хїлꙋ́ѳовъ воспомина́ѧй,
|
|
25
|
25
|
|
и суса́ книго́чій, садо́къ же и Авіаѳа́ръ ієре́є,
|
и҆ сꙋса̀ книго́чїй, садѡ́къ же и҆ а҆вїаѳа́ръ і҆ере́є,
|
|
26
|
26
|
|
Іра́съ же Іарі́нь бы́сть жре́цъ даві́довъ.
|
і҆ра́съ же і҆арі́нь бы́сть жре́цъ даві́довъ.
|
