|
Глава 4
|
Глава́ д҃
|
|
1
|
1
|
|
И слы́ша Ієвосѳе́й сы́нъ Сау́ль, я́ко у́мре Авени́ръ сы́нъ ни́ровъ въ Хевро́нѣ, и ослабѣ́ша ру́цѣ єго́, и вси́ му́жіє Ізра́илевы изнемого́ша.
|
И҆ слы́ша і҆евосѳе́й сы́нъ саꙋ́ль, ꙗ҆́кѡ оу҆́мре а҆вени́ръ сы́нъ ни́ровъ въ хеврѡ́нѣ, и҆ ѡ҆слабѣ́ша рꙋ́цѣ є҆гѡ̀, и҆ всѝ мꙋ́жїе і҆и҃лєвы и҆знемого́ша.
|
|
2
|
2
|
|
И два́ му́жа старѣ́йшины полко́въ Ієвосѳе́а сы́на Сау́ля: и́мя єди́ному Ваана́ и и́мя друго́му риха́въ, сы́нове реммо́на вироѳе́йскаго от сыно́въ Веніамі́нихъ: я́ко виро́ѳъ вмѣня́шеся въ сынѣ́хъ Веніамі́нихъ.
|
И҆ два̀ мꙋ̑жа старѣ̑йшины полкѡ́въ і҆евосѳе́а сы́на саꙋ́лѧ: и҆́мѧ є҆ди́номꙋ ваана̀ и҆ и҆́мѧ дрꙋго́мꙋ риха́въ, сы́нове реммѡ́на вирѡѳе́йскагѡ ѿ сынѡ́въ венїамі́нихъ: ꙗ҆́кѡ вирѡ́ѳъ вмѣнѧ́шесѧ въ сынѣ́хъ венїамі́нихъ.
|
|
3
|
3
|
|
И отбѣго́ша вироѳе́є въ геѳе́мъ, и бѣ́ша та́мо живу́ще до дне́шняго дне́.
|
И҆ ѿбѣго́ша вирѡѳе́є въ геѳе́мъ, и҆ бѣ́ша та́мѡ живꙋ́ще до дне́шнѧгѡ днѐ.
|
|
4
|
4
|
|
И Іонаѳа́ну сы́ну Сау́лю сы́нъ бѣ́ хро́мъ нога́ма, сы́нъ пяти́ лѣ́тъ: и то́й, єгда́ пріи́де возвѣще́ніє о Сау́лѣ и Іонаѳа́нѣ сы́нѣ єго́ от Ієзрає́ля, и взя́тъ єго́ пѣ́стунница єго́, и бѣжа́: и бы́сть тща́щейся є́й на отше́ствіє, и паде́, и охромѣ́, и́мя же єму́ мемфівосѳе́й.
|
И҆ і҆ѡнаѳа́нꙋ сы́нꙋ саꙋ́лю сы́нъ бѣ̀ хро́мъ нога́ма, сы́нъ пѧтѝ лѣ́тъ: и҆ то́й, є҆гда̀ прїи́де возвѣще́нїе ѡ҆ саꙋ́лѣ и҆ і҆ѡнаѳа́нѣ сы́нѣ є҆гѡ̀ ѿ і҆езрае́лѧ, и҆ взѧ́тъ є҆го̀ пѣ́стꙋнница є҆гѡ̀, и҆ бѣжа̀: и҆ бы́сть тща́щейсѧ є҆́й на ѿше́ствїе, и҆ падѐ, и҆ ѡ҆хромѣ̀, и҆́мѧ же є҆мꙋ̀ мемфївосѳе́й.
|
|
5
|
5
|
|
И поидо́ста сы́нове реммо́на вироѳе́йскаго, риха́въ и Ваана́, и внидо́ста во вре́мя зно́я дневна́го въ до́мъ Ієвосѳе́овъ, и то́й почива́ше на одрѣ́ въ полу́дне:
|
И҆ поидо́ста сы́нове реммѡ́на вирѡѳе́йскагѡ, риха́въ и҆ ваана̀, и҆ внидо́ста во вре́мѧ зно́ѧ дневна́гѡ въ до́мъ і҆евосѳе́овъ, и҆ то́й почива́ше на ѻ҆дрѣ̀ въ полꙋ́дне:
|
|
6
|
6
|
|
и се́, вра́тникъ до́му очища́ше пшени́цу и воздрема́ и спа́ше, риха́въ же и Ваана́ бра́тія утаи́вшася внидо́ста въ до́мъ:
|
и҆ сѐ, вра́тникъ до́мꙋ ѡ҆чища́ше пшени́цꙋ и҆ воздрема̀ и҆ спа́ше, риха́въ же и҆ ваана̀ бра́тїѧ оу҆таи̑вшасѧ внидо́ста въ до́мъ:
|
|
7
|
7
|
|
Ієвосѳе́й же почива́ше на одрѣ́ своє́мъ въ ло́жницѣ своє́й: и би́ста єго́, и умертви́ста єго́, и отъя́ста главу́ єго́, и взя́ста главу́ єго́, и отидо́ста путе́мъ и́же на за́падъ всю́ но́щь:
|
і҆евосѳе́й же почива́ше на ѻ҆дрѣ̀ свое́мъ въ ло́жницѣ свое́й: и҆ би́ста є҆го̀, и҆ оу҆мертви́ста є҆го̀, и҆ ѿѧ́ста главꙋ̀ є҆гѡ̀, и҆ взѧ́ста главꙋ̀ є҆гѡ̀, и҆ ѿидо́ста пꙋте́мъ и҆́же на за́падъ всю̀ но́щь:
|
|
8
|
8
|
|
и принесо́ста главу́ Ієвосѳе́ову къ даві́ду въ Хевро́нъ и рѣ́ста къ царю́: се́, глава́ Ієвосѳе́а сы́на Сау́лова врага́ твоєго́, и́же иска́ше души́ твоєя́, и даде́ Госпо́дь господи́ну на́шему царю́ отмще́ніє враго́въ єго́, я́коже де́нь се́й, от Сау́ла врага́ твоєго́ и от сѣ́мене єго́.
|
и҆ принесо́ста главꙋ̀ і҆евосѳе́овꙋ къ даві́дꙋ въ хеврѡ́нъ и҆ рѣ́ста къ царю̀: сѐ, глава̀ і҆евосѳе́а сы́на саꙋ́лова врага̀ твоегѡ̀, и҆́же и҆ска́ше дꙋшѝ твоеѧ̀, и҆ дадѐ гдⷭ҇ь господи́нꙋ на́шемꙋ царю̀ ѿмще́нїе врагѡ́въ є҆гѡ̀, ꙗ҆́коже де́нь се́й, ѿ саꙋ́ла врага̀ твоегѡ̀ и҆ ѿ сѣ́мене є҆гѡ̀.
|
|
9
|
9
|
|
И отвѣща́ даві́дъ риха́ву и Ваанѣ́ бра́ту єго́, сыно́мъ реммо́на вироѳе́йскаго, и рече́ и́ма: жи́въ Госпо́дь, и́же изба́ви ду́шу мою́ от вся́кія ско́рби:
|
И҆ ѿвѣща̀ даві́дъ риха́вꙋ и҆ ваанѣ̀ бра́тꙋ є҆гѡ̀, сынѡ́мъ реммѡ́на вирѡѳе́йскагѡ, и҆ речѐ и҆́ма: жи́въ гдⷭ҇ь, и҆́же и҆зба́ви дꙋ́шꙋ мою̀ ѿ всѧ́кїѧ ско́рби:
|
|
10
|
10
|
|
и́бо возвѣсти́вый мнѣ́, я́ко у́мре Сау́лъ и Іонаѳа́нъ, и то́й бя́ше а́ки благовѣству́яй предо мно́ю, и я́хъ єго́ и уби́хъ єго́ въ секела́зѣ, єму́же до́лженъ бѣ́хъ да́ти да́ръ:
|
и҆́бо возвѣсти́вый мнѣ̀, ꙗ҆́кѡ оу҆́мре саꙋ́лъ и҆ і҆ѡнаѳа́нъ, и҆ то́й бѧ́ше а҆́ки благовѣствꙋ́ѧй предо мно́ю, и҆ ꙗ҆́хъ є҆го̀ и҆ оу҆би́хъ є҆го̀ въ секела́зѣ, є҆мꙋ́же до́лженъ бѣ́хъ да́ти да́ръ:
|
|
11
|
11
|
|
и ны́нѣ му́жіє лука́віи уби́ша му́жа пра́ведна въ дому́ єго́ на одрѣ́ єго́, и ны́нѣ взыщу́ кро́ве єго́ от руки́ ва́шея и искореню́ ва́съ от земли́.
|
и҆ нн҃ѣ мꙋ́жїе лꙋка́вїи оу҆би́ша мꙋ́жа пра́ведна въ домꙋ̀ є҆гѡ̀ на ѻ҆дрѣ̀ є҆гѡ̀, и҆ нн҃ѣ взыщꙋ̀ кро́ве є҆гѡ̀ ѿ рꙋкѝ ва́шеѧ и҆ и҆скореню̀ ва́съ ѿ землѝ.
|
|
12
|
12
|
|
И заповѣ́да даві́дъ отроко́мъ свои́мъ, и уби́ша и́хъ, и отсѣко́ша ру́цѣ и́хъ и но́зѣ и́хъ, и повѣ́сиша и́хъ надъ исто́чникомъ въ Хевро́нѣ, и главу́ Ієвосѳе́ову погребо́ша во гро́бѣ Авени́ра сы́на ни́рова [въ Хевро́нѣ].
|
И҆ заповѣ́да даві́дъ ѻ҆трокѡ́мъ свои̑мъ, и҆ оу҆би́ша и҆́хъ, и҆ ѿсѣко́ша рꙋ́цѣ и҆́хъ и҆ но́зѣ и҆́хъ, и҆ повѣ́сиша и҆̀хъ над̾ и҆сто́чникомъ въ хеврѡ́нѣ, и҆ главꙋ̀ і҆евосѳе́овꙋ погребо́ша во гро́бѣ а҆вени́ра сы́на ни́рова (въ хеврѡ́нѣ).
|
