Глава 45
1
И єгда́ раздѣля́ти ва́мъ зе́млю въ наслѣ́діє, отлучи́те нача́токъ Го́сподеви, свято от земли́, въ долготу́ дву́десяти и пяти́ ты́сящъ, а въ широту́ десяти́ ты́сящъ, свято да бу́детъ во всѣ́хъ предѣ́лѣхъ и́хъ о́крестъ.
2
И да бу́дутъ от того́ на свято́є пя́ть со́тъ, по пяти́ со́тъ четвероуго́лно о́крестъ, разстоя́ніє же и́хъ пятьдеся́тъ лакте́й о́крестъ.
3
И от сего́ размѣре́нія да размѣ́риши въ долготу́ два́десять пя́ть ты́сящъ, а въ широту́ де́сять ты́сящъ: и въ то́мъ да бу́детъ освяще́ніє, свята́я святы́хъ.
4
Свято от земли́ да бу́детъ жерце́мъ служа́щымъ во святѣ́мъ и да бу́детъ приступа́ющымъ служи́ти Го́сподеви, и бу́детъ и́мъ мѣ́сто на до́мы отлуче́нны освяще́нію и́хъ,
5
два́десять пя́ть ты́сящъ въ долготу́ и два́десять {Євр.: де́сять.} ты́сящъ въ широту́ да бу́детъ, леві́томъ служа́щымъ хра́му, тѣ́мъ во одержа́ніє гра́ды ко обита́нію.
6
И одержа́ніє гра́да да да́си въ широту́ пя́ть ты́сящъ, а въ долготу́ два́десять пя́ть ты́сящъ, я́коже нача́токъ святы́хъ всему́ до́му Ізра́илеву да бу́детъ
7
и старѣ́йшинѣ от того́: и от сего́ въ нача́тки святы́хъ, во одержа́ніє гра́да по лицу́ нача́тковъ святы́нь и по лицу́ одержа́нія гра́да, я́же къ мо́рю, и от су́щихъ къ мо́рю, я́же на восто́къ: долгота́ же я́ко єди́на ча́сть от предѣ́лъ и́же къ мо́рю, и долгота́ ко предѣ́ломъ и́же на восто́къ земли́.
8
И бу́детъ єму́ во одержа́ніє во Ізра́или, и да не наси́луютъ ктому́ старѣ́йшины Ізра́илевы лю́демъ мои́мъ, и зе́млю да наслѣ́дятъ до́мъ Ізра́илевъ по племено́мъ свои́мъ.
9
Сія́ глаго́летъ Госпо́дь Бо́гъ: да довлѣ́ютъ ва́мъ, старѣ́йшины Ізра́илевы, непра́вду и озлобле́ніє отве́ржите, су́дъ же и пра́вду сотвори́те: изыми́те наси́ліє от люді́й мои́хъ, глаго́летъ Госпо́дь Бо́гъ.
10
Вѣ́съ пра́ведный и мѣ́ра пра́ведна и хі́ніксъ пра́веденъ да бу́дутъ ва́мъ въ мѣ́ры:
11
и хі́ніксъ та́кожде єди́нъ да бу́детъ ва́мъ, є́же пріима́ти, деся́тая ча́сть гомо́ра хі́ніксъ, и деся́тая ча́сть гомо́ра є́фі, мѣ́ра къ гомо́ру да бу́детъ ра́вна.
12
И вѣ́съ, два́десять о́воли сі́кль, и два́десять пя́ть сі́клей, и два́десять сі́клей, и пятьна́десять сі́клей мна́съ бу́детъ ва́мъ.
13
И се́й нача́токъ, єго́же отлучите́, шесту́ю ча́сть мѣ́ры от гомо́ра пшени́цы и шесту́ю ча́сть є́фі от ко́ра ячме́ня.
14
За́повѣдь же о єле́и, мѣ́ру єле́а от десяти́ мѣ́ръ, поне́же де́сять мѣ́ръ су́ть гомо́ръ.
15
И овча́ єди́но от десяти́ ове́цъ уча́стіє от всѣ́хъ оте́чествъ Ізра́илевыхъ, на же́ртвы и на всесожже́нія и на спасе́ніє, є́же умоли́ти о ва́съ, глаго́летъ Госпо́дь Бо́гъ.
16
Вси́ же лю́діє земли́ да дадя́тъ се́й нача́токъ старѣ́йшинѣ Ізра́илеву,
17
и старѣ́йшиною да быва́ютъ всесожже́нія: и же́ртвы и возлія́нія бу́дутъ въ пра́здники и въ новоме́сячія, и въ суббо́ты и во вся́ пра́здники до́му Ізра́илева: то́й сотвори́тъ я́же за грѣхи́ и же́ртву, и всесожже́нія и я́же спасе́нія, є́же умоля́ти о до́мѣ Ізра́илевѣ.
18
Та́ко глаго́летъ Госпо́дь Бо́гъ: въ пе́рвый ме́сяцъ, во єди́нъ де́нь ме́сяца, да во́змете телца́ от говя́дъ непоро́чна, є́же очи́стити свято́є:
19
и да во́зметъ жре́цъ от кро́ве очище́нія и да возліє́тъ на пра́ги хра́ма и на четы́ри у́глы святи́лища, и на же́ртвенникъ и на пра́ги вра́тъ двора́ вну́тренняго.
20
И си́це да сотвори́ши въ седмы́й ме́сяцъ: во єди́нъ [де́нь] ме́сяца во́змеши от коєго́ждо невѣ́дущаго и от младе́нца, и очи́стите хра́мъ.
21
Въ пе́рвый ме́сяцъ, четвертагона́десять дне́ ме́сяца, да бу́детъ ва́мъ па́сха пра́здникъ: се́дмь дні́й да я́сте опрѣсно́ки.
22
И сотвори́тъ старѣ́йшина въ то́й де́нь за ся́ и за до́мъ и за вся́ лю́ди земли́, телца́ за грѣ́хъ:
23
въ се́дмь же дні́й пра́здника да сотвори́тъ всесожже́нія Го́сподеви се́дмь телце́въ и се́дмь овно́въ непоро́чныхъ по вся́къ де́нь седми́ дні́й: и за грѣ́хъ ко́злище от ко́зъ на вся́къ де́нь, и же́ртву,
24
и опрѣсно́ки телцу́ и опрѣсно́ки овну́ да сотвори́ши, и єле́а і́нъ опрѣсно́ку.
25
Въ седмы́й же ме́сяцъ, въ пятыйна́десять де́нь ме́сяца, въ пра́здницѣ сотвори́ши по тому́жде, се́дмь дні́й, я́коже и за грѣ́хъ, и я́коже всесожже́нія, и я́коже да́ръ, и я́коже ма́сло древя́ноє.
