Молитви на всяку потребу

О́тче наш, І́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́ і на землі́. Хліб наш насу́щний даждь нам днесь; і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.

Або:

О́чі всіх на Тя, Го́споди, упова́ють, і Ти дає́ши їм пи́щу во благовре́менії, отверза́єши Ти ще́друю ру́ку Твою́ і ісполня́єши вся́коє живо́тно благоволе́нія.

Або:

Го́споди, Ісу́се Христе́, Бо́же наш, благослови́ нам пи́щу і питіє́ моли́твами Пречи́стия Твоєя́ Ма́тере і всіх святи́х Твої́х, я́ко благослове́н єси́ во ві́ки віко́в. Амі́нь.

Або^*:

Го́споди Ісу́се Христе́, Си́не Бо́жий, благослови́вий тра́пезу Свої́м ученико́м, Сам благослови́ і нам пи́щу сію́, поне́же і ми ві́руєм во і́м'я Твоє́, на Тя упова́єм, мо́лимся Тебі́ і Тя сла́вим во ві́ки віко́в. Амі́нь.

Благодари́м Тя, Христе́ Бо́же наш, я́ко наси́тил єси́ нас земни́х Твої́х благ; не лиши́ нас і Небе́снаго Твоєго́ Ца́рствія, но я́ко посреді́ ученико́в Твої́х прише́л єси́, Спа́се, мир дая́ їм, прийди́ к нам і спаси́ нас.

Возвесели́хся о ре́кших мні: в дом Госпо́день по́йдем. Аз же мно́жеством ми́лости Твоєя́, Го́споди, вни́ду в дом Твой, поклоню́ся ко хра́му свято́му Твоєму́ в стра́сі Твоє́м. Го́споди, наста́ви м'я пра́вдою Твоє́ю, враг мої́х ра́ди іспра́ви пред Тобо́ю путь мой, да без преткнове́нія просла́влю Єди́но Божество́, Отця́, і Си́на, і Свята́го Ду́ха, ни́ні, і при́сно, і во ві́ки віко́в. Амі́нь.

Го́споди Ісу́се Христе́, Си́не Бо́жий, поми́луй м'я, грі́шнаго.

Разсі́янний мой ум собери́, Го́споди, і олядені́вшеє^* се́рдце моє́ очи́сти, я́ко Петру́ дая́й мні покая́ніє, я́ко митарю́ — воздиха́ніє і я́ко блудни́ці — сле́зи, да ве́ліїм гла́сом взива́ю Ті: Бо́же, спаси́ м'я, я́ко єди́н Благоутро́бен і Человіколю́бець.

Або:

Го́споди, а́ще кото́рую моли́тву без внима́нія прочита́л і разсі́ялся в по́мислах, прости́ і спаси́ м'я по ми́лості Твоє́й.

Царю́ Небе́сний, Уті́шителю, Ду́ше і́стини, І́же везді́ сий і вся ісполня́яй, Сокро́вище благи́х і жи́зні Пода́телю, прийди́ і всели́ся в ни, і очи́сти ни от вся́кия скве́рни, і спаси́, Бла́же, ду́ші на́ша.

Тво́рче і Созда́телю вся́чеських, Бо́же, діла́ рук на́ших к сла́ві Твоє́й начина́ємая Твої́м благослове́нієм спі́шно іспра́ви і нас от вся́каго зла ізба́ви, я́ко єди́н Всеси́лен і Человіколю́бець.

Ско́рий в заступле́ніє і крі́пкий в по́мощ, предста́ни благода́тію си́ли Твоєя́ ни́ні і, благослови́в, укріпи́ і в соверше́ніє намі́ренія блага́го ді́ла рабо́в Твої́х проізведи́: вся бо, єли́ка хо́щеши, я́ко Си́льний Бог, твори́ти мо́жеши.

Ісполне́ніє всіх благи́х Ти єси́, Христе́ мой, іспо́лни ра́дости і весе́лія ду́шу мою́ і спаси́ м'я, я́ко єди́н Многоми́лостив, Го́споди, сла́ва Тебі́.

Досто́йно єсть я́ко воі́стину блажи́ти Тя, Богоро́дицю, Присноблаже́нную і Пренепоро́чную і Ма́тер Бо́га на́шего. Честні́йшую Херуви́м і сла́внійшую без сравне́нія Серафи́м, без істлі́нія Бо́га Сло́ва ро́ждшую, су́щую Богоро́дицю Тя велича́єм.

Благода́рні су́ще недосто́йнії раби́ Твої́, Го́споди, о Твої́х вели́ких благодія́ніїх на нас би́вших, сла́в’яще Тя хва́лим, благослови́м, благодари́м, поє́м і велича́єм Твоє́ благоутро́біє, і ра́бськи любо́вію вопіє́м Ті: Благоді́телю, Спа́се наш, сла́ва Тебі́.

Твої́х благодія́ній і даро́в ту́не, я́ко раби́ непотре́бнії, сподо́бльшеся, Влади́ко, к Тебі́ усе́рдно притека́юще, благодаре́ніє по си́лі прино́сим, і Тебе́, я́ко Благоді́теля і Творця́ сла́в’яще, вопіє́м: сла́ва Тебі́, Бо́же Преще́дрий.

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Богоро́дице, христия́ном помо́щнице, Твоє́ предста́тельство стяжа́вше раби́ Твої́, благода́рно Тебі́ вопіє́м: ра́дуйся, Пречи́стая Богоро́дице Ді́во, і от всіх нас бід Твої́ми моли́твами всегда́ ізба́ви, єди́на вско́рі предста́тельствующая.

Тебе́, Бо́га, хва́лим, Тебе́, Го́спода, іспові́дуєм, Тебе́, Преві́чнаго Отця́, вся земля́ велича́єть; Тебі́ всі А́нгели, Тебі́ Небеса́ і вся Си́ли, Тебі́ Херуви́ми і Серафи́ми непреста́нними гла́си взива́ють: Свят, Свят, Свят Госпо́дь Бог Савао́ф, по́лни суть Небеса́ і земля́ вели́чества сла́ви Твоєя́. Тебе́ пресла́вний Апо́стольський лик, Тебе́ проро́чеськоє хвале́бноє число́, Тебе́ хва́лить пресві́тлоє му́ченичеськоє во́їнство. Тебе́ по всей вселе́нній іспові́дуєть Свята́я Це́рков, Отця́ непостижи́маго вели́чества, покланя́ємаго Твоєго́ і́стиннаго і Єдиноро́днаго Си́на і Свята́го Уті́шителя Ду́ха. Ти, Царю́ сла́ви, Христе́, Ти Отця́ Присносу́щний Син єси́. Ти, ко ізбавле́нію приє́мля челові́ка, не возгнуша́лся єси́ Діви́чеськаго чре́ва. Ти, одолі́в сме́рти жа́ло, отве́рзл єси́ ві́рующим Ца́рство Небе́сноє. Ти одесну́ю Бо́га сіди́ши во сла́ві О́тчей, Судія́ прийти́ ві́ришися^*. Тебе́ у́бо про́сим: помози́ рабо́м Твої́м, ї́хже Честно́ю Кро́вію іскупи́л єси́. Сподо́би со святи́ми Твої́ми в ві́чной сла́ві Твоє́й ца́рствовати. Спаси́ лю́ди Твоя́, Го́споди, і благослови́ достоя́ніє Твоє́, іспра́ви я, і вознеси́ їх во ві́ки; во вся дні благослови́м Тебе́ і восхва́лим і́м'я Твоє́ во вік і во вік ві́ка. Сподо́би, Го́споди, в день сей без гріха́ сохрани́тися нам. Поми́луй нас, Го́споди, поми́луй нас. Бу́ди ми́лость Твоя́, Го́споди, на нас, я́коже упова́хом на Тя. На Тя, Го́споди, упова́хом, да не постиди́мся во ві́ки. Амі́нь.

Го́споди і Влади́ко живота́ моєго́, дух пра́здности, уни́нія, любонача́лія і праздносло́вія не даждь мі. [Поклін великий]

Дух же цілому́дрія, смиренному́дрія, терпі́нія і любве́ да́руй мі, рабу́ Твоєму́. [Поклін великий]

Єй, Го́споди, Царю́, да́руй мі зрі́ти моя́ прегріше́нія і не осужда́ти бра́та моєго́, я́ко благослове́н єси́ во ві́ки віко́в. Амі́нь. [Поклін великий]

Возсія́й в сердця́х на́ших, Человіколю́бче Влади́ко, Твоєго́ Богоразу́мія нетлі́нний світ і ми́сленния на́ша отве́рзи о́чі во Єва́нгельських Твої́х пропові́даній разумі́ніє; вложи́ в нас і страх блаже́нних Твої́х за́повідей, да плотські́я по́хоті вся попра́вше, духо́вноє жи́тельство про́йдем, вся я́же ко благоугожде́нію Твоєму́ і му́дрствующе і ді́юще. Ти бо єси́ просвіще́ніє душ і тіле́с на́ших, Христе́ Бо́же, і Тебі́ сла́ву возсила́єм со Безнача́льним Твої́м Отце́м і Всесвяти́м, і Благи́м, і Животворя́щим Твої́м Ду́хом, ни́ні, і при́сно, і во ві́ки віко́в. Амі́нь.

Або:

Го́споди, просвіти́ о́чі мої́ серде́чния сві́том ра́зума Свята́го Єва́нгелія Твоєго́.

Спаси́, Го́споди, і поми́луй раба́ Твоєго́ [ім'я] слова́ми боже́ственнаго Єва́нгелія, что́мими о спасе́нії раба́ Твоєго́. Попали́, Го́споди, те́рніє всіх єго́ согріше́ній, і да всели́ться в него́ благода́ть Твоя́, опаля́ющая, очища́ющая, освяща́ющая всего́ челові́ка, во і́м'я Отця́, і Си́на, і Свята́го Ду́ха. Амі́нь.

Або:

Сла́ва Тебі́, Го́споди Царю́, Си́не Бо́га жива́го, сподо́бивий м'я, недосто́йнаго, Боже́ственная Твоя́ словеса́ і глас свята́го Єва́нгелія Твоєго́ сли́шати; сим у́бо влади́чним Твої́м гла́сом укріпи́ м'я в покая́нії настоя́щия сея́ жи́зні прейти́ нощ, от вся́каго ізбавля́я м'я наві́та і зло́би ви́димих і неви́димих враг: Ти бо єси́ єди́н си́льний і ца́рствуяй во ві́ки. Амі́нь.

Преблаги́й Го́споди, низпосли́ нам благода́ть Ду́ха Твоєго́ Свята́го, да́рствующаго і укріпля́ющаго душе́вния на́ша си́ли, да́би, внима́юще преподава́ємому нам уче́нію, возросли́ ми Тебі́, на́шему Созда́телю, во сла́ву, роди́телем же на́шим на утіше́ніє, Це́ркві і Оте́честву на по́льзу.

Або:

Царю́ Небе́сний, Уті́шителю, Ду́ше і́стини, І́же везді́ сий і вся ісполня́яй, Сокро́вище благи́х і жи́зні Пода́телю, прийди́ і всели́ся в ни, і очи́сти ни от вся́кия скве́рни, і спаси́, Бла́же, ду́ші на́ша.

Благодари́м Тебе́, Созда́телю, я́ко сподо́бил єси́ нас благода́ті Твоєя́, во є́же внима́ти уче́нію. Благослови́ на́ших нача́льников, роди́телей і учи́телей, веду́щих нас к позна́нію бла́га, і пода́ждь нам си́лу і крі́пость к продолже́нію уче́нія сего́.

Або:

Досто́йно єсть я́ко воі́стину блажи́ти Тя, Богоро́дицю, Присноблаже́нную і Пренепоро́чную і Ма́тер Бо́га на́шего. Честні́йшую Херуви́м і сла́внійшую без сравне́нія Серафи́м, без істлі́нія Бо́га Сло́ва ро́ждшую, су́щую Богоро́дицю Тя велича́єм.

Сою́зом любве́ Апо́столи Твоя́ св'яза́вий, Христе́, і нас, Твої́х ві́рних рабо́в, к Себі́ тім крі́пко св'яза́в, твори́ти за́повіді Твоя́ і друг дру́га люби́ти нелицемі́рно сотвори́, моли́твами Богоро́диці, єди́не Человіколю́бче.

Пла́менем любве́ распали́ к Тебі́ сердця́ на́ша, Христе́ Бо́же, да то́ю разжига́ємі, се́рдцем, ми́слію же і душе́ю, і все́ю крі́постію на́шею возлю́бим Тя, і і́скренняго своєго́ я́ко себе́, і повелі́нія Твоя́ храня́ще сла́вим Тя, всіх благ Да́теля.

О распе́нших Тя моли́вийся, любоду́шне Го́споди, і рабо́м Твої́м о вразі́х моли́тися повелі́вий, ненави́дящих і оби́дящих нас прости́, і от вся́каго зла і лука́вства к братолю́бному і доброді́тельному наста́ви жи́тельству, смире́нно мольбу́ Тебі́ прино́сим, да в согла́сном єдиноми́слії сла́вим Тя, Єди́наго Человіколю́бця.

Я́коже первому́ченик Твой Стефа́н о убива́ющих єго́ моля́ше Тя, Го́споди, і ми, припа́дающе, мо́лим: ненави́дящих всіх і оби́дящих нас прости́, во є́же ні єди́ному от них нас ра́ди поги́бнути, но всім спасти́ся благода́тію Твоє́ю, Бо́же Всеще́дрий.

Ско́рий в заступле́нії Єди́н сий, Христе́, ско́роє сви́ше покажи́ посіще́ніє стра́ждущим рабо́м Твої́м [або: стра́ждущему рабу́ Твоєму́ / стра́ждущей рабі́ Твоє́й], і ізба́ви от неду́г і го́рких болі́зней, і воздви́гни во є́же пі́ти Тя і сла́вити непреста́нно моли́твами Богоро́диці, єди́не Человіколю́бче.

На одрі́ болі́зні лежа́щих [або: лежа́щаго / лежа́щую] і сме́ртною ра́ною уя́звленних [або: уя́звленнаго / уя́звленную], я́коже іногда́ воздви́гл єси́, Спа́се, Петро́ву те́щу і разсла́бленнаго, на одрі́ носи́маго, си́це і ни́ні, Милосе́рде, стра́ждущих [або: стра́ждущаго / стра́ждущую] посіти́ і ісціли́; Ти бо Єди́н єси́ неду́ги і болі́зні ро́да на́шего понеси́й і вся моги́й, я́ко Многоми́лостив.

Влади́ко, Вседержи́телю, Святи́й Царю́, наказу́яй і не умерщвля́яй, утвержда́яй низпа́дающия і возводя́й низве́рженния, тіле́сния челові́ков ско́рби ісправля́яй, мо́лимся Тебі́, Бо́же наш, рабо́в Твої́х [або: раба́ Твоєго́ / рабу́ Твою́] [імена], немощству́ющих [або: немощству́юща / немощству́ющу] посіти́ ми́лостію Твоє́ю, прости́ їм [або: єму́ / єй] вся́коє согріше́ніє во́льноє і нево́льноє. Єй, Го́споди, враче́бную Твою́ си́лу с Небесе́ низпосли́, прикосни́ся тілесі́, угаси́ огне́вицю, укроти́ страсть і вся́кую не́мощ тая́щуюся, бу́ди врач рабо́в Твої́х [або: раба́ Твоєго́ / раби́ Твоєя́] [імена], воздви́гни їх [або: єго́ / ю] от одра́ болі́зненнаго і от ло́жа озлобле́нія ці́лих і всесоверше́нних [або: ці́ла і всесоверше́нна / ці́лу і всесоверше́нну], да́руй їх [або: єго́ / ю] Це́ркві Твоє́й благоугожда́ющих і творя́щих [або: благоужда́юща і творя́ща / благоугожда́ющу і творя́щу] во́лю Твою́. Твоє́ бо єсть, є́же ми́ловати і спаса́ти ни, Бо́же наш, і Тебі́ сла́ву возсила́єм, Отцю́, і Си́ну, і Свято́му Ду́ху, ни́ні, і при́сно, і во ві́ки віко́в. Амі́нь.

Мана́ссію от уз і го́ркаго заточе́нія моли́тв ра́ди свободи́вий, Всеще́дрий Бо́же, і раби́ Твоя́ [або: раба́ Твоєго́ / рабу́ Твою́], на́ми ни́ні моля́щияся [або: моля́щагося / моля́щуюся], от уз і заточе́нія свободи́ і от вся́каго зла́го обстоя́нія ізба́ви, я́ко єди́н Человіколю́бець.

Я́ко милосе́рдія істо́чник і бла́гости пучи́на, Христе́ Бо́же, не пре́зри в ско́рбіх і біда́х Тебе́ ві́рою призива́ющих, но я́ко щедр поми́луй і от уз ско́ро свободи́, да поє́м Ті: аллилу́я.

Путь і і́стина сий, Христе́, спу́тника А́нгела Твоєго́ рабо́м Твої́м [або: рабу́ Твоєму́ / рабі́ Твоє́й] ни́ні, я́коже Тові́ї іногда́, посли́, сохраня́юща і невреди́мих [або: невреди́ма / невреди́му] к сла́ві Твоє́й, от вся́каго зла во вся́ком благополу́чії соблюда́юща, моли́твами Богоро́диці, єди́не Человіколю́бче.

Луці́ і Клео́пі во Еммау́с спутеше́ствовавий, Спа́се, сше́ствуй і ни́ні рабо́м Твої́м [або: рабу́ Твоєму́ / рабі́ Твоє́й], путеше́ствовати хотя́щим [або: хотя́щему / хотя́щей], от вся́каго ізбавля́я їх [або: єго́ / ю] зла́го обстоя́нія; вся бо Ти, я́ко Человіколю́бець, мо́жеши хотя́й.

Го́споди Ісу́се Христе́, Бо́же наш, і́стинний і живи́й путю́, состра́нствовати мни́мому Твоєму́ отцю́ Іо́сифу і Пречи́стій Ті Ді́ві Ма́тері во Єги́пет ізво́ливий, і Луці́ і Клео́пі во Еммау́с спутеше́ствовавий! І ни́ні смире́нно мо́лим Тя, Влади́ко Пресвяти́й, і рабо́м Твої́м сим [або: рабу́ Твоєму́ сему́ / рабі́ Твоє́й сей] [імена] Твоє́ю благода́тію спутеше́ствуй. І я́коже рабу́ Твоєму́ Тові́ї А́нгела храни́теля і наста́вника посли́, сохраня́юща і ізбавля́юща їх [або: єго́ / ю] от вся́каго зла́го обстоя́нія ви́димих і неви́димих враго́в, і к ісполне́нію за́повідей Твої́х наставля́юща, ми́рно же, і благополу́чно, і здра́во препровожда́юща, і па́ки ці́ло і безмʼяте́жно возвраща́юща; і даждь їм [або: єму́ / єй] все благо́є своє́ намі́реніє ко благоугожде́нію Твоєму́ благополу́чно в сла́ву Твою́ іспо́лнити. Твоє́ бо єсть, є́же ми́ловати і спаса́ти нас, і Тебі́ сла́ву возсила́єм со Безнача́льним Твої́м Отце́м і со Пресвяти́м, і Благи́м, і Животворя́щим Твої́м Ду́хом, ни́ні, і при́сно, і во ві́ки віко́в. Амі́нь.

О всесвяти́й Нико́лає, уго́дниче преізря́дний Госпо́день, те́плий наш засту́пниче і везді́ в ско́рбіх ско́рий помо́щниче. Помози́ мні, грі́шному і уни́лому, в настоя́щем сем житії́, умоли́ Го́спода Бо́га дарова́ти мі оставле́ніє всіх мої́х гріхо́в, єли́ко согріши́х от ю́ности моєя́ во всем житії́ моє́м ді́лом, сло́вом, помишле́нієм і всі́ми мої́ми чу́встви, і во ісхо́ді душі́ моєя́ помози́ мі, окая́нному, умоли́ Го́спода Бо́га, всея́ тва́рі Соді́теля, ізба́вити м'я возду́шних мита́рств і ві́чнаго муче́нія, да всегда́ прославля́ю Отця́, і Си́на, і Свята́го Ду́ха і твоє́ ми́лостивноє предста́тельство, ни́ні, і при́сно, і во ві́ки віко́в. Амі́нь.

Многоми́лостиве, нетлі́нне, нескве́рне, безгрі́шне Го́споди, очи́сти м'я, непотре́бнаго раба́ Твоєго́, от вся́кия скве́рни плотськи́я і душе́вния, і от невнима́нія і уни́нія моєго́ приби́вшую мі нечистоту́ со іни́ми всі́ми беззако́нії мої́ми, і яви́ м'я нескве́рна, Влади́ко, за бла́гость Христа́ Твоєго́, і освяти́ м'я наше́ствієм Пресвята́го Твоєго́ Ду́ха; я́ко да возбну́в от мгли нечи́стих привиді́ній дия́вольських і вся́кия скве́рни, сподо́блюся чи́стою со́вістію отве́рсти скве́рная моя́ і нечи́стая уста́ і воспіва́ти всесвято́є і́м'я Твоє́, Отця́, і Си́на, і Свята́го Ду́ха, ни́ні, і при́сно, і во ві́ки віко́в. Амі́нь.

Ско́ро предвари́, пре́жде да́же не порабо́тимся враго́м, ху́лящим Тя і претя́щим нам, Христе́ Бо́же наш, погуби́ Кресто́м Твої́м борю́щия нас, да разумі́ють, ка́ко мо́жеть правосла́вних ві́ра, моли́твами Богоро́диці, єди́не Человіколю́бче.

Возбра́нний Воєво́до і Го́споди, а́да Побіди́телю! Я́ко ізба́влься от ві́чния сме́рти, похва́льная воспису́ю Ті, созда́ніє і раб Твой, но я́ко імі́яй милосе́рдіє неізрече́нноє, от вся́ких м'я бід свободи́, зову́ща: Ісу́се, Си́не Бо́жий, поми́луй м'я.

Да воскре́снеть Бог і расточа́ться вразі́ Єго́, і да біжа́ть от лиця́ Єго́ ненави́дящії Єго́. Я́ко ісчеза́єть дим, да ісче́знуть; я́ко та́єть воск от лиця́ огня́, та́ко да поги́бнуть бі́си от лиця́ лю́б’ящих Бо́га, і зна́менующихся кре́стним зна́менієм, і в весе́лії глаго́лющих: ра́дуйся, Пречестни́й і Животворя́щий Кре́сте Госпо́день, прогоня́яй бі́си си́лою на тебі́ проп'я́таго Го́спода на́шего Ісу́са Христа́, во ад сше́дшаго, і попра́вшаго си́лу дия́волю, і дарова́вшаго нам тебе́, Крест Свой Честни́й, на прогна́ніє вся́каго супоста́та. О Пречестни́й і Животворя́щий Кре́сте Госпо́день! Помога́й мі со Свято́ю Госпоже́ю Ді́вою Богоро́дицею і со всі́ми святи́ми во ві́ки. Амі́нь.

Живи́й в по́мощі Ви́шняго, в кро́ві^* Бо́га небе́снаго водвори́ться. Рече́ть Го́сподеві: засту́пник мой єси́ і прибі́жище моє́, Бог мой, і упова́ю на Него́. Я́ко Той ізба́вить тя от сі́ті ло́вчі і от словесе́ м'яте́жна. Плещма́ Свої́ма осіни́ть тя, і под крилі́ Єго́ наді́єшися. Ору́жієм оби́деть тя і́стина Єго́. Не убої́шися от стра́ха нощна́го, от стріли́ летя́щия во дні, от ве́щі во тьмі преходя́щия, от сря́ща і бі́са полу́деннаго. Паде́ть от страни́ твоєя́ ти́сяща і тьма одесну́ю тебе́, к тебі́ же не прибли́житься: оба́че очи́ма твої́ма смо́триши і воздая́ніє грі́шников у́зриши. Я́ко Ти, Го́споди, упова́ніє моє́, Ви́шняго положи́л єси́ прибі́жище твоє́. Не при́йдеть к тебі́ зло, і ра́на не прибли́житься тілесі́ твоєму́. Я́ко а́нгелом Свої́м запові́сть о тебі́ сохрани́ти тя во всіх путе́х твої́х. На рука́х во́зьмуть тя, да не когда́ преткне́ши о ка́мень но́гу твою́. На а́спида і васили́ска насту́пиши і попере́ши льва і змі́я. Я́ко на М'я упова́, і ізба́влю ї, покри́ю ї, я́ко позна́ і́м’я Моє́. Воззове́ть ко Мні, і усли́шу єго́; с ним єсьм в ско́рбі, ізму́ єго́ і просла́влю єго́. Долгото́ю дній іспо́лню єго́ і явлю́ єму́ спасе́ніє Моє́.

Го́споди Бо́же мой, да бу́деть дар Твой святи́й і свята́я вода́ во оставле́ніє гріхо́в мої́х, в просвіще́ніє ума́ моєго́, во укріпле́ніє душе́вних і тіле́сних мої́х сил, во здра́віє душі́ і ті́ла моєго́, в покоре́ніє страсте́й і не́мощей мої́х по безпреді́льному милосе́рдію Твоєму́, моли́твами Пречи́стия Твоєя́ Ма́тере і всіх святи́х Твої́х. Амі́нь.

Го́споди Ісу́се Христе́, Бо́же наш! Ти си́рих Храни́тель, скорб’я́щих Прибі́жище і пла́чущих Уті́шитель.

Прибіга́ю к Тебі́ аз, си́рий, стеня́ і пла́ча, і молю́ся Тебі́: усли́ши моле́ніє моє́ і не отврати́ лиця́ Твоєго́ от воздиха́ній се́рдця моєго́ і от слез оче́й мої́х. Молю́ся Тебі́, милосе́рдий Го́споди, утоли́ скорб мою́ о разлуче́нії с роди́вшими і воспита́вшими м'я роди́телями мої́ми [або: роди́вшим і воспита́вшим м'я роди́телем мої́м / роди́вшей і воспита́вшей м'я ма́терію моє́ю] [імена], ду́ші же їх [або: ду́шу же єго́ / ду́шу же єя́], я́ко отше́дшиє [або: отше́дшую] к Тебі́ с і́стинною ві́рою в Тя і с тве́рдою наде́ждою на Твоє́ человіколю́біє і ми́лость, прийми́ в Ца́рство Твоє́ Небе́сноє.

Преклоня́юсь пред Твоє́ю свято́ю во́лею, є́юже отʼя́ти [або: отʼя́т / отʼя́та] бисть у мене́, і прошу́ Тя, не отими́ то́чию от них [або: него́ / нея́] ми́лости і благосе́рдія Твоєго́. Вім, Го́споди, я́ко Ти, Судія́ ми́ра сего́, гріхи́ і нече́стія роди́телей наказу́єши в ді́тях, вну́ках і пра́внуках да́же до тре́тіяго і четве́ртаго ро́да; но і ми́луєши роди́телей за моли́тви і доброді́телі чад їх, вну́ков і пра́внуков. С сокруше́нієм і умиле́нієм се́рдця молю́ Тя, ми́лостивий Судіє́, не наказу́й ві́чним наказа́нієм усо́пших, незабве́нних для мене́ раб Твої́х, роди́телей мої́х [або: роди́теля моєго́ / ма́тер мою́] [імена], но отпусти́ їм [або: єму́ / єй] вся согріше́нія їх [або: єго́ / єя́] во́льная і нево́льная, сло́вом і ді́лом, ві́дінієм і неві́дінієм сотворе́нная ї́ми [або: їм / є́ю] в житії́ їх [або: єго́ / єя́] зді на землі́, і по милосе́рдію і человіколю́бію Твоєму́, моли́тв ра́ди Пречи́стия Богоро́диці і всіх святи́х поми́луй їх [або: єго́ / ю] і ві́чния му́ки ізба́ви.

Ти, милосе́рдий О́тче отце́в і чад! Да́руй мні во вся дні жи́зні моєя́ до послі́дняго іздиха́нія моєго́ не престава́ти па́м'ятовати о усо́пших роди́телях мої́х [або: усо́пшім роди́телі моє́м / усо́пшей ма́тері моєя́] в моли́твах свої́х, і умоля́ти Тя, пра́веднаго Судію́, да вчи́ниши їх [або: єго́ / ю] в мі́сті сві́тлі, в мі́сті прохла́дні і в мі́сті поко́йні со всі́ми святи́ми, отону́ду же отбіже́ вся́ка болі́знь, печа́ль і воздиха́ніє.

Ми́лостиве Го́споди! Прийми́ днесь о раба́х Твої́х [або: ра́бі Твоє́м / ра́бі Твоє́й] [імена] те́плую моли́тву мою́ сію́ і возда́й їм [або: єму́ / єй] воздая́нієм Твої́м за труди́ і попече́нія воспита́нія моєго́ в ві́рі і христия́нськом благоче́стії, я́ко научи́вшим [або: научи́вшему / научи́вшей] м'я пе́рвеє всего́ ві́діти Тя, своєго́ Го́спода, в благогові́нії моли́тися Тебі́, на Тебе́ єди́наго упова́ти в біда́х, ско́рбіх і болі́знех і храни́ти за́повіді Твоя́; за благопопече́ніє їх [або: єго́ / єя́] о моє́м духо́вном преуспе́янії, за те́плі приноси́мия ї́ми [або: ім / є́ю] о мні моле́нія пред Тобо́ю і за всі да́ри, ї́ми [або: їм / є́ю] іспро́шенниє мні от Тебе́, возда́й їм [або: єму́ / єй] Своє́ю ми́лостію, Свої́ми небе́сними бла́гами і ра́достьми в ві́чном Ца́рствії Твоє́м.

Ти бо єси́ Бог ми́лостей, і щедро́т, і человіколю́бія, Ти поко́й і ра́дость ві́рних рабо́в Твої́х і Тебі́ сла́ву возсила́єм со Отце́м і Святи́м Ду́хом, і ни́ні, і при́сно, і во ві́ки віко́в. Амі́нь.

Го́споди, даждь мі с душе́вним споко́йствієм прия́ти вся, я́же принесе́ть мі гряду́щий день.

Даждь мі всеці́ло преда́тися во́лі Твоє́й святі́й.

На всяк час сего́ дне во всем наста́ви і укріпи́ м'я.

Ка́я би ізві́стія аз ні получи́л бих в день сей, научи́ м'я прия́ти я со споко́йною душе́ю і тве́рдим убіжде́нієм, я́ко на вся єсть свята́я во́ля Твоя́.

Во всіх словесі́х і ді́ліх мої́х окорми́ моя́ помишле́нія і чу́вствія.

Во всіх непредви́денних слу́чаях не даждь мі заби́ти, я́ко вся низпо́слана Тобо́ю.

Научи́ м'я пря́мо і разу́мно ді́йствовати с ка́ждим бли́жнім, нікого́же смуща́я ніже́ огорча́я.

Го́споди, даждь мі си́лу претерпі́ти утомле́ніє гряду́щаго дне і вся бива́ющая в тече́нії дне.

Руководи́ моє́ю во́лею і научи́ м'я моли́тися, ві́рити, наді́ятися, терпі́ти, проща́ти і люби́ти.

Амі́нь.

Всеще́дрий Го́споди і Влади́ко Человіколюби́ве, Ти у́бо мир сотвори́л єси́ до́брим, лю́ди по нему́ насажда́я, я́ко да всім жи́тельствовати на да́нній Тобо́ю землі́. Сего́ ра́ди взива́єм ни́ні в моли́тві ко Твоєму́ милосе́рдію, прося́ще ізба́вити ни от наше́ствія іноплеме́нних, і́же не по зако́ну Єва́нгельському творя́ть, но по го́рдості вели́цій і по не́нависті сатани́нськой. Согріши́хом, у́бо, Бо́же, согріши́хом: оба́че по ми́лості Твоє́й сохрани́ наро́д Твой, я́коже сохрани́л єси́ Ніневі́ю, і укріпи́ во́їни на́ша, я́коже укріпи́л єси́ ру́ці Ісу́са Нави́на на Амали́ка. Яви́, Го́споди, вразі́ на́ша постижде́нни, я́ко да ні єди́ною сла́вою їм украси́тися, прише́дших к нам, я́коже тать посреди́ нощі́, во є́же свобо́ду і жизнь жи́тельствующих во Украї́ні от’я́ти. Благослови́, Бо́же, защи́тителей на́ших храбо́рством і дерзнове́нієм, лі́карей си́лою неутоми́мою і милосе́рдієм, власть предержа́щих же благоми́слієм і му́дростію, да кі́йждо ді́лом би свої́м досто́йно наро́ду украї́нському послужи́л, а Ти, Миропода́телю Бо́же, зе́млю на́шу, я́коже а́гнця, от наше́ствія волко́в сохрани́л, да я́коже ни́ні, тако́жде би і в гряду́щая времена́ ми хвалу́ Тебі́ возноси́ли: Отцю́, і Си́ну, і Ду́хові Свято́му. Амі́нь!

Го́споди Бо́же Вседержи́телю, при́сно о лю́дех Твої́х любо́вію промишля́яй і ко спасе́нію всіх направля́яй, у Него́же власи́ вся на глава́х челові́чеських ізочте́ни суть. Смире́нно мо́лим Тя: рабо́в Твої́х, во́їнов [імена], в тя́готах слу́жби ра́тния укріпи́, упова́нієм і ві́рою уті́ши, благода́тію Твоє́ю на по́лі бра́ні, покрива́юще їх і сохраня́юще. Да по́двиг любве́ в служе́нії бли́жнім і Оте́чествію своєму́ соверши́вше, здра́ви і неврежде́нни в до́ми своя́ возвратя́ться, хва́ляще Тя, Єди́наго Бо́га, Творця́ і Промисли́теля на́шего, Отця́, і Си́на, і Свята́го Ду́ха. Амі́нь.