Канон молебний до Пресвятої Богородиці

Творіння Теостирикта монаха. Співається у всякій скорботі душевній та недолі.

К Богоро́диці прилі́жно ни́ні притеце́м, грі́шнії і смире́ннії, і припаде́м, в покая́нії зову́ще із глубини́ душі́: Влади́чице, помози́, на ни милосе́рдовавши, потщи́ся, погиба́єм от мно́жества прегріше́ній, не отврати́ Твоя́ раби́ тщи, Тя бо і єди́ну наде́жду і́мами.

Слава, і нині:^* Не умолчи́м нікогда́, Богоро́дице, си́ли Твоя́ глаго́лати, недосто́йнії; а́ще бо Ти не би предстоя́ла моля́щи, кто би нас ізба́вил от толи́ких бід, кто же би сохрани́л до ни́ні свобо́дні? Не отсту́пим, Влади́чице, от Тебе́, Твоя́ бо раби́ спаса́єши при́сно от вся́ких лю́тих.

Поми́луй м'я, Бо́же, по вели́цій ми́лості Твоє́й і по мно́жеству щедро́т Твої́х очи́сти беззако́ніє моє́. Найпа́че оми́й м'я от беззако́нія моєго́ і от гріха́ моєго́ очи́сти м'я. Я́ко беззако́ніє моє́ аз зна́ю, і гріх мой пре́до мно́ю єсть ви́ну. Тебі́ єди́ному согріши́х і лука́воє пред Тобо́ю сотвори́х; я́ко да оправди́шися во словесі́х Твої́х і побіди́ши, внегда́ суди́ти Ті. Се бо в беззако́ніїх зача́т єсьм, і во грісі́х роди́ м'я ма́ти моя́. Се бо і́стину возлюби́л єси́, безві́стная і та́йная прему́дрости Твоєя́ яви́л мі єси́. Окропи́ши м'я іссо́пом, і очи́щуся; оми́єши м'я, і па́че сні́га убілю́ся. Слу́ху моєму́ даси́ ра́дость і весе́ліє; возра́дуються ко́сті смире́нния. Отврати́ лице́ Твоє́ от гріх мої́х і вся беззако́нія моя́ очи́сти. Се́рдце чи́сто сози́жди во мні, Бо́же, і дух прав обнови́ во утро́бі моє́й. Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́. Возда́ждь мі ра́дость спасе́нія Твоєго́ і Ду́хом влади́чним утверди́ м'я. Научу́ беззако́нния путе́м Твої́м, і нечести́вії к Тебі́ обратя́ться. Ізба́ви м'я от крове́й, Бо́же, Бо́же спасе́нія моєго́; возра́дується язи́к мой пра́вді Твоє́й. Го́споди, устні́ мої́ отве́рзеши, і уста́ моя́ возвістя́ть хвалу́ Твою́. Я́ко а́ще би восхоті́л єси́ же́ртви, дал бих у́бо: всесожже́нія не благоволи́ши. Же́ртва Бо́гу дух сокруше́н; се́рдце сокруше́нно і смире́нно Бог не унічижи́ть. Ублажи́, Го́споди, благоволе́нієм Твої́м Сіо́на, і да сози́ждуться сті́ни Ієрусали́мськія. Тогда́ благоволи́ши же́ртву пра́вди, возноше́ніє і всесожега́ємая; тогда́ возложа́ть на олта́р Твой тельці́.

Ірмо́с: Во́ду проше́д, я́ко су́шу, і єги́петськаго зла ізбіжа́в, ізра́їльтянин вопія́ше: Ізба́вителю і Бо́гу на́шему пої́м.

Приспів: Пресвята́я Богоро́дице, спаси́ нас.

Мно́гими содержи́м напа́стьми, к Тебі́ прибіга́ю, спасе́нія іски́й; о Ма́ти Сло́ва і Ді́во, от тя́жких і лю́тих м'я спаси́.

Пресвята́я Богоро́дице, спаси́ нас.

Страсте́й м'я смуща́ють прило́зі^*, мно́гаго уни́нія іспо́лнити мою́ ду́шу; умири́, Отрокови́це, тишино́ю Си́на і Бо́га Твоєго́, Всенепоро́чная.

Сла́ва: Спа́са ро́ждшую Тя і Бо́га, молю́, Ді́во, ізба́витися мі лю́тих; к Тебі́ бо ни́ні прибіга́я, простира́ю і ду́шу і помишле́ніє.

І ни́ні: Неду́гующа ті́лом і душе́ю, посіще́нія Боже́ственнаго і промишле́нія от Тебе́ сподо́би, єди́на Богома́ти, я́ко блага́я, Блага́го же Роди́тельниця.

Ірмос: Небе́снаго кру́га Верхотво́рче Го́споди, і Це́ркве Зижди́телю, Ти мене́ утверди́ в любві́ Твоє́й, жела́ній кра́ю, ві́рних утвержде́ніє, єди́не Человіколю́бче.

Пресвята́я Богоро́дице, спаси́ нас.

Предста́тельство і покро́в жи́зні моєя́ полага́ю Тя, Богороди́тельнице Ді́во; Ти м'я окорми́ ко приста́нищу Твоєму́, благи́х вино́вна, ві́рних утвержде́ніє, єди́на Всепі́тая.

Пресвята́я Богоро́дице, спаси́ нас.

Молю́, Ді́во, душе́вноє смуще́ніє і печа́лі моєя́ бу́рю разори́ти: Ти бо, Богоневі́стная, Нача́льника тишини́ Христа́ родила́ єси́, єди́на Пречи́стая.

Сла́ва: Благоді́теля ро́ждши до́брих вино́внаго, благодія́нія бога́тство всім істочи́; вся бо мо́жеши, я́ко си́льнаго в крі́пости Христа́ ро́ждши, Богоблаже́нная.

І ни́ні: Лю́тими неду́ги і болі́зненними страстьми́ істяза́єму, Ді́во, Ти мі помози́; ісціле́ній бо неоску́дноє Тя зна́ю сокро́вище, Пренепоро́чная, неіждива́ємоє.

Спаси́ от бід раби́ Твоя́, Богоро́дице, я́ко всі по Бо́зі к Тебі́ прибіга́єм, я́ко неруши́мій стіні́ і предста́тельству.

При́зри благосе́рдієм, Всепі́тая Богоро́дице, на моє́ лю́тоє тілесе́ озлобле́ніє, і ісціли́ душі́ моєя́ болі́знь.

Го́споди, поми́луй. [Тричі]

Моле́ніє те́плоє і стіна́ необори́мая, ми́лости істо́чниче, ми́рові прибі́жище, прилі́жно вопіє́м Ті: Богоро́дице Влади́чице, предвари́ і от бід ізба́ви нас, єди́на вско́рі предста́тельствующая.

Ірмос: Усли́шах, Го́споди, смотре́нія Твоєго́ та́їнство, разумі́х діла́ Твоя́ і просла́вих Твоє́ Божество́.

Пресвята́я Богоро́дице, спаси́ нас.

Страсте́й мої́х смуще́ніє, Ко́рмчию ро́ждшая Го́спода, і бу́рю утиши́ мої́х прегріше́ній, Богоневі́стная.

Пресвята́я Богоро́дице, спаси́ нас.

Милосе́рдія Твоєго́ бе́здну призива́ющу пода́ждь мі, Я́же Благосе́рдаго ро́ждшая і Спа́са всіх пою́щих Тя.

Пресвята́я Богоро́дице, спаси́ нас.

Наслажда́ющеся, Пречи́стая, Твої́х дарова́ній, благода́рственноє воспіва́єм пі́ніє, ві́дуще Тя, Богома́тер.

Сла́ва: На одрі́ болі́зні моєя́ і не́мощі низлежа́щу мі, я́ко Боголюби́ва, помози́, Богоро́дице, єди́на Присноді́во.

І ни́ні: Наде́жду, і утвержде́ніє, і спасе́нія сті́ну недви́жиму іму́ще Тя, Всепі́тая, неудо́бства вся́каго ізбавля́ємся.

Ірмос: Просвіти́ нас повелі́нії Твої́ми, Го́споди, і ми́шцею Твоє́ю висо́кою Твой мир пода́ждь нам, Человіколю́бче.

Пресвята́я Богоро́дице, спаси́ нас.

Іспо́лни, Чи́стая, весе́лія се́рдце моє́, Твою́ нетлі́нную даю́щи ра́дость, весе́лія ро́ждшая Вино́внаго.

Пресвята́я Богоро́дице, спаси́ нас.

Ізба́ви нас от бід, Богоро́дице Чи́стая, ві́чноє ро́ждши Ізбавле́ніє, і Мир, всяк ум преіму́щий.

Сла́ва: Разріши́ мглу прегріше́ній мої́х, Богоневі́сто, просвіще́нієм Твоєя́ сві́тлости, Світ ро́ждшая Боже́ственний і преві́чний.

І ни́ні: Ісціли́, Чи́стая, душі́ моєя́ неможе́ніє, посіще́нія Твоєго́ сподо́бльшая, і здра́віє моли́твами Твої́ми пода́ждь мі.

Ірмос: Моли́тву пролію́ ко Го́споду і Тому́ возвіщу́ печа́лі моя́, я́ко зол душа́ моя́ іспо́лнися, і живо́т мой а́ду прибли́жися, і молю́ся я́ко Іо́на: от тлі, Бо́же, возведи́ м'я.

Пресвята́я Богоро́дице, спаси́ нас.

Сме́рти і тлі я́ко спасл єсть, Сам Ся ізда́в сме́рти, тлі́нієм і сме́ртію моє́ єстество́ я́то би́вшеє, Ді́во, моли́ Го́спода і Си́на Твоєго́ враго́в злоді́йствія м'я ізба́вити.

Пресвята́я Богоро́дице, спаси́ нас.

Предста́тельницю Тя живота́ вім, і Храни́тельницю тве́рду, Ді́во, і напа́стей ріша́щу молви́, і нало́ги бісо́в отгоня́ющу; і молю́ся всегда́: от тлі страсте́й мої́х ізба́вити м'я.

Сла́ва: Я́ко сті́ну прибі́жища стяжа́хом, і душ всесоверше́нноє спасе́ніє, і простра́нство в ско́рбіх, Отрокови́це, і просвіще́нієм Твої́м при́сно ра́дуємся: о Влади́чице, і ни́ні нас от страсте́й і бід спаси́.

І ни́ні: На одрі́ ни́ні немощству́яй лежу́ і ність ісціле́нія пло́ті моє́й; но Бо́га і Спа́са ми́ру і Ізба́вителя неду́гов ро́ждшая, Тебі́ молю́ся Благо́й: от тлі неду́г возста́ви м'я.

Го́споди, поми́луй. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Предста́тельство христия́н непости́дноє, хода́тайство ко Творцю́ непрело́жноє, не пре́зри грі́шних моле́ній гла́си, но предвари́, я́ко Блага́я, на по́мощ нас, ві́рно зову́щих Ті: ускори́ на моли́тву і потщи́ся на умоле́ніє, предста́тельствующи при́сно, Богоро́дице, чту́щих Тя.

Не і́мами іни́я по́мощі, не і́мами іни́я наде́жди, ра́зві Тебе́, Пречи́стая Ді́во. Ти нам помози́, на Тебе́ наді́ємся і Тобо́ю хва́лимся, Твої́ бо єсьми́ раби́, да не постиди́мся.

Не вві́ри м'я челові́чеському предста́тельству, Пресвята́я Влади́чице, но прийми́ моле́ніє раба́ Твоєго́: скорб бо обдержи́ть м'я. Терпі́ти не могу́ де́монськаго стріля́нія, покро́ва не і́мам, ніже́ гді прибі́гну окая́нний, всегда́ побіжда́єм, і утіше́нія не і́мам, ра́зві Тебе́, Влади́чице ми́ра, упова́ніє і предста́тельство ві́рних, не пре́зри моле́ніє моє́, поле́зно сотвори́.

Ірмос: От Іуде́ї доше́дше о́троци в Вавило́ні іногда́, ві́рою Тро́їчеською пла́мень пе́щний попра́ша, пою́ще: отце́в Бо́же, благослове́н єси́.

Пресвята́я Богоро́дице, спаси́ нас.

На́ше спасе́ніє я́коже восхоті́л єси́, Спа́се, устро́їти, во утро́бу Ді́вия всели́лся єси́, Ю́же ми́ру Предста́тельницю показа́л єси́: оте́ць на́ших Бо́же, благослове́н єси́.

Пресвята́я Богоро́дице, спаси́ нас.

Воли́теля ми́лости, Єго́же родила́ єси́, Ма́ти Чи́стая, умоли́ ізба́витися от прегріше́ній і душе́вних скверн ві́рою зову́щим: оте́ць на́ших Бо́же, благослове́н єси́.

Сла́ва: Сокро́вище спасе́нія і істо́чник нетлі́нія, Тя ро́ждшую, і столп утвержде́нія, і двер покая́нія зову́щим показа́л єси́: оте́ць на́ших Бо́же, благослове́н єси́.

І ни́ні: Тіле́сния сла́бості і душе́вния неду́ги, Богороди́тельнице, любо́вію приступа́ющих ко кро́ву Твоєму́, Ді́во, ісціли́ти сподо́би, Спа́са Христа́ нам ро́ждшая.

Ірмос: Царя́ Небе́снаго, Єго́же пою́ть во́ї а́нгельстії, хвалі́те і превозносі́те во вся ві́ки.

Пресвята́я Богоро́дице, спаси́ нас.

По́мощі я́же от Тебе́ тре́бующия не пре́зри, Ді́во, пою́щия і превознося́щия Тя во ві́ки.

Пресвята́я Богоро́дице, спаси́ нас.

Неможе́ніє душі́ моєя́ ісціля́єши і тіле́сния болі́зні, Ді́во, да Тя просла́влю, Чи́стая, во ві́ки.

Сла́ва: Ісціле́ній бога́тство ізлива́єши ві́рно пою́щим Тя, Ді́во, і превознося́щим неізрече́нноє Твоє́ Рождество́.

І ни́ні: Напа́стей Ти прило́ги отгоня́єши і страсте́й нахо́ди, Ді́во; ті́мже Тя поє́м во вся ві́ки.

Ірмос: Воі́стину Богоро́дицю Тя іспові́дуєм, спасе́ннії Тобо́ю, Ді́во Чи́стая, с безпло́тними ли́ки Тя велича́юще.

Пресвята́я Богоро́дице, спаси́ нас.

То́ка слез мої́х не отврати́ся, Я́же от вся́каго лиця́ вся́ку сле́зу от'є́мшаго, Ді́во, Христа́ ро́ждшая.

Пресвята́я Богоро́дице, спаси́ нас.

Ра́дости моє́ се́рдце іспо́лни, Ді́во, Я́же ра́дости приє́мшая ісполне́ніє, гріхо́вную печа́ль потребля́ющи.

Пресвята́я Богоро́дице, спаси́ нас.

Приста́нище і предста́тельство к Тебі́ прибіга́ющих бу́ди, Ді́во, і стіна́ неруши́мая, прибі́жище же, і покро́в, і весе́ліє.

Сла́ва: Сві́та Твоєго́ заря́ми просвіти́, Ді́во, мрак неві́дінія отгоня́ющи, благові́рно Богоро́дицю Тя іспові́дающих.

І ни́ні: На мі́сті озлобле́нія не́мощі смири́вшагося, Ді́во, ісціли́, із нездра́вія во здра́віє претворя́ющи.

Ви́шшую небе́с і чи́стшую сві́тлостей со́лнечних, ізба́вльшую нас от кля́тви, Влади́чицю ми́ра пі́сньми почти́м.

От мно́гих мої́х гріхо́в немощству́єть ті́ло, немощству́єть і душа́ моя́; к Тебі́ прибіга́ю, Благода́тній, наде́ждо ненаде́жних, Ти мі помози́.

Влади́чице і Ма́ти Ізба́вителя, прийми́ моле́ніє недосто́йних раб Твої́х, да хода́тайствуєши к Ро́ждшемуся от Тебе́; о Влади́чице ми́ра, бу́ди Хода́таїця!

Поє́м прилі́жно Тебі́ піснь ни́ні, всепі́той Богоро́диці, ра́достно: со Предте́чею і всі́ми святи́ми моли́, Богоро́дице, є́же уще́дрити ни.

Вся А́нгелов во́їнства, Предте́че Госпо́день, Апо́столов двоєнадеся́тице, святі́ї всі с Богоро́дицею, сотворі́те моли́тву, во є́же спасти́ся нам.

Цари́це моя́ преблага́я, Наде́ждо моя́ Богоро́дице, Прия́телище си́рих і стра́нних Предста́тельнице, скорб’я́щих Ра́досте, оби́димих Покрови́тельнице! Зри́ши мою́ біду́, зри́ши мою́ скорб, помози́ мі я́ко не́мощну, окорми́ м'я я́ко стра́нна. Оби́ду мою́ ві́си, разріши́ ту, я́коже во́лиши: я́ко не і́мам іни́я по́мощі ра́зві Тебе́, ні іни́я Предста́тельниці, ні благи́я Уті́шительниці, то́кмо Тебе́, о Богома́ти; я́ко да сохрани́ши м'я і покри́єши во ві́ки віко́в. Амі́нь.

К кому́ возопію́, Влади́чице? К кому́ прибі́гну в го́ресті моє́й, а́ще не к Тебі́, Цари́це Небе́сная? Кто плач мой і воздиха́ніє моє́ при́йметь, а́ще не Ти, Пренепоро́чная, Наде́ждо христия́н і Прибі́жище нам грі́шним? Кто па́че Тебе́ в напа́стех защити́ть? Усли́ши у́бо стена́ніє моє́ і приклони́ у́хо Твоє́ ко мні, Влади́чице, Ма́ти Бо́га моєго́, і не пре́зри мене́, тре́бующаго Твоєя́ по́мощі, і не отри́ни мене́, грі́шнаго. Вразуми́ і научи́ м'я, Цари́це Небе́сная; не отступи́ от мене́, раба́ Твоєго́, Влади́чице, за ропта́ніє моє́, но бу́ди мні Ма́ти і Засту́пниця. Вруча́ю себе́ ми́лостивому покро́ву Твоєму́: приведи́ м'я, грі́шнаго, к ти́хой і безм'яте́жній жи́зні, да пла́чуся о грісі́х мої́х. К кому́ бо прибі́гну пови́нний аз, а́ще не к Тебі́, упова́нію і прибі́жищу грі́шних, наде́ждою на неізрече́нную ми́лость Твою́ і щедро́ти Твоя́ окриля́єм? О Влади́чице, Цари́це Небе́сная! Ти мні упова́ніє і прибі́жище, покро́в і заступле́ніє, і по́мощ. Цари́це моя́ преблага́я і ско́рая Засту́пнице! Покри́й Твої́м хода́тайством моя́ прегріше́нія, защити́ мене́ от враг ви́димих і неви́димих, ум'ягчи́ сердця́ злих челові́к, возстаю́щих на м'я. О Ма́ти Го́спода моєго́ Творця́! Ти єси́ ко́рень ді́вства і неув'яда́ємий цвіт чистоти́. О Богороди́тельнице! Ти пода́ждь мі по́мощ немощству́ющему плотськи́ми страстьми́ і болі́знующему се́рдцем: єди́но бо Твоє́ і с Тобо́ю Твоєго́ Си́на і Бо́га на́шего і́мам заступле́ніє, і Твої́м пречу́дним заступле́нієм да ізба́влюся от вся́кия біди́ і напа́сти, о Пренепоро́чная і Пресла́вная Бо́жия Ма́ти Марі́є. Ті́мже со упова́нієм глаго́лю і вопію́: ра́дуйся, Благода́тная, ра́дуйся, Обра́дованная, ра́дуйся, Преблагослове́нная, Госпо́дь с Тобо́ю.