Молитви ранішні

Вставши зі сну, перш будь-якого діла, стань побожно перед святою іконою і, уявляючи себе перед Всевишнім Богом, поклади на себе тричі знак хреста, промовляючи:

Во і́м'я Отця́, і Си́на, і Свята́го Ду́ха. Амі́нь.

Спинившись, заспокой свої почуття, щоб твої думки лишили все земне, тоді сотвори три поклони, промовляючи:

Бо́же, ми́лостив бу́ди мні, грі́шному.

А потім читай наступні молитви без поспіху і з увагою.

Го́споди Ісу́се Христе́, Си́не Бо́жий, моли́тв ра́ди Пречи́стия Твоєя́ Ма́тере і всіх святи́х поми́луй нас. Амі́нь.

Сла́ва Тебі́, Бо́же наш, сла́ва Тебі́.

Царю́ Небе́сний^*, Уті́шителю, Ду́ше і́стини, І́же везді́ сий і вся ісполня́яй, Сокро́вище благи́х і жи́зні Пода́телю, прийди́ і всели́ся в ни, і очи́сти ни от вся́кия скве́рни^*, і спаси́, Бла́же, ду́ші на́ша.

Святи́й Бо́же, Святи́й Крі́пкий, Святи́й Безсме́ртний, поми́луй нас. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Пресвята́я Тро́йце, поми́луй нас: Го́споди, очи́сти гріхи́ на́ша; Влади́ко, прости́ беззако́нія на́ша; Святи́й, посіти́ і ісціли́ не́мощі на́ша і́мене Твоєго́ ра́ди.

Го́споди, поми́луй. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

О́тче наш, І́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́ і на землі́. Хліб наш насу́щний даждь нам днесь; і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.

Воста́вше от сна, припа́даєм Ті, Бла́же, і А́нгельськую піснь вопіє́м Ті, Си́льне: Свят, Свят, Свят єси́, Бо́же, Богоро́дицею поми́луй нас.

Сла́ва Отцю́, і Си́ну, і Свято́му Ду́ху.

От одра́ і сна воздви́гл м'я єси́, Го́споди, ум мой просвіти́ і се́рдце, і устні́ мої́ отве́рзи, во є́же пі́ти^* Тя, Свята́я Тро́йце: Свят, Свят, Свят єси́, Бо́же, Богоро́дицею поми́луй нас.

І ни́ні, і при́сно, і во ві́ки віко́в. Амі́нь.

Внеза́пу Судія́ при́йдеть, і коєго́ждо дія́нія обнажа́ться, но стра́хом зове́м в полу́нощі: Свят, Свят, Свят єси́, Бо́же, Богоро́дицею поми́луй нас.

Го́споди, поми́луй. [12 разів]

От сна воста́в, благодарю́ Тя, Свята́я Тро́йце, я́ко мно́гия ра́ди Твоєя́ бла́гости і долготерпі́нія не прогні́вался єси́ на м'я, ліни́ваго і грі́шнаго, ніже́ погуби́л м'я єси́ со беззако́ньми мої́ми, но человіколю́бствовал єси́ оби́чно і в неча́янії лежа́щаго воздви́гл м'я єси́, во є́же у́треневати і славосло́вити держа́ву Твою́. І ни́ні просвіти́ мої́ о́чі ми́сленния, отве́рзи моя́ уста́ поуча́тися словесе́м Твої́м, і разумі́ти за́повіді Твоя́, і твори́ти во́лю Твою́, і пі́ти Тя во іспові́данії серде́чнім, і воспіва́ти всесвято́є і́м'я Твоє́, Отця́, і Си́на, і Свята́го Ду́ха, ни́ні, і при́сно, і во ві́ки віко́в. Амі́нь.

Прийді́те, поклоні́мся Царе́ві на́шему Бо́гу. [Поклон]

Прийді́те, поклоні́мся і припаде́м Христу́, Царе́ві на́шему Бо́гу. [Поклон]

Прийді́те, поклоні́мся і припаде́м Само́му Христу́, Царе́ві і Бо́гу на́шему. [Поклон]

Поми́луй м'я, Бо́же, по вели́цій ми́лості Твоє́й і по мно́жеству щедро́т Твої́х очи́сти беззако́ніє моє́. Найпа́че оми́й м'я от беззако́нія моєго́ і от гріха́ моєго́ очи́сти м'я. Я́ко беззако́ніє моє́ аз зна́ю, і гріх мой пре́до мно́ю єсть ви́ну. Тебі́ єди́ному согріши́х і лука́воє пред Тобо́ю сотвори́х; я́ко да оправди́шися во словесі́х Твої́х і побіди́ши, внегда́ суди́ти Ті. Се бо в беззако́ніїх зача́т єсьм, і во грісі́х роди́ м'я ма́ти моя́. Се бо і́стину возлюби́л єси́, безві́стная і та́йная прему́дрости Твоєя́ яви́л мі єси́. Окропи́ши м'я іссо́пом, і очи́щуся; оми́єши м'я, і па́че сні́га убілю́ся. Слу́ху моєму́ даси́ ра́дость і весе́ліє; возра́дуються ко́сті смире́нния. Отврати́ лице́ Твоє́ от гріх мої́х і вся беззако́нія моя́ очи́сти. Се́рдце чи́сто сози́жди во мні, Бо́же, і дух прав обнови́ во утро́бі моє́й. Не отве́ржи мене́ от лиця́ Твоєго́ і Ду́ха Твоєго́ Свята́го не отими́ от мене́. Возда́ждь мі ра́дость спасе́нія Твоєго́ і Ду́хом влади́чним утверди́ м'я. Научу́ беззако́нния путе́м Твої́м, і нечести́вії к Тебі́ обратя́ться. Ізба́ви м'я от крове́й, Бо́же, Бо́же спасе́нія моєго́; возра́дується язи́к мой пра́вді Твоє́й. Го́споди, устні́ мої́ отве́рзеши, і уста́ моя́ возвістя́ть хвалу́ Твою́. Я́ко а́ще би восхоті́л єси́ же́ртви, дал бих у́бо: всесожже́нія не благоволи́ши. Же́ртва Бо́гу дух сокруше́н; се́рдце сокруше́нно і смире́нно Бог не унічижи́ть. Ублажи́, Го́споди, благоволе́нієм Твої́м Сіо́на, і да сози́ждуться сті́ни Ієрусали́мськія. Тогда́ благоволи́ши же́ртву пра́вди, возноше́ніє і всесожега́ємая; тогда́ возложа́ть на олта́р Твой тельці́.

[1] Ві́рую во Єди́наго Бо́га Отця́, Вседержи́теля, Творця́ не́бу і землі́, ви́димим же всім і неви́димим.

[2] І во Єди́наго Го́спода Ісу́са Христа́, Си́на Бо́жия, Єдиноро́днаго, І́же от Отця́ рожде́ннаго пре́жде всіх вік: Сві́та от Сві́та^*, Бо́га і́стинна от Бо́га і́стинна, рожде́нна, не сотворе́нна, єдиносу́щна Отцю́, І́мже вся би́ша.

[3] Нас ра́ди челові́к і на́шего ра́ди спасе́нія сше́дшаго с Небе́с, і воплоти́вшагося от Ду́ха Свя́та і Марі́ї Ді́ви, і вочелові́чшася.

[4] Расп’я́таго же за ни при Понті́йстім Пила́ті, і страда́вша, і погребе́нна.

[5] І воскре́сшаго в тре́тій день по Писа́нієм.

[6] І возше́дшаго на Небеса́, і сідя́ща одесну́ю Отця́.

[7] І па́ки гряду́щаго со сла́вою суди́ти живи́м і ме́ртвим, Єго́же Ца́рствію не бу́деть конця́.

[8] І в Ду́ха Свята́го, Го́спода, Животворя́щаго, І́же от Отця́ ісходя́щаго, І́же со Отце́м і Си́ном спокланя́єма і ссла́вима, глаго́лавшаго проро́ки.

[9] Во Єди́ну Святу́ю, Собо́рную і Апо́стольськую Це́рков.

[10] Іспові́дую єди́но креще́ніє во оставле́ніє гріхо́в.

[11] Ча́ю воскресе́нія ме́ртвих,

[12] І жи́зні бу́дущаго ві́ка. Амі́нь.

Бо́же, очи́сти м'я, грі́шнаго, я́ко ніколи́же сотвори́х благо́є пред Тобо́ю, но ізба́ви м'я от лука́ваго, і да бу́деть во мні во́ля Твоя́; да неосужде́нно отве́рзу уста́ моя́ недосто́йная і восхвалю́ і́м'я Твоє́ свято́є, Отця́, і Си́на, і Свята́го Ду́ха, ни́ні, і при́сно, і во ві́ки віко́в. Амі́нь.

От сна воста́в, полу́нощную піснь приношу́ Ті, Спа́се, і припа́дая вопію́ Ті: не даждь мі усну́ти во гріхо́вній сме́рті, но уще́дри м'я, распни́йся во́лею, і лежа́щаго м'я в лі́ності ускори́в возста́ви і спаси́ м'я в предстоя́нії і моли́тві, і по сні нощні́м возсія́й мі день безгрі́шен, Христе́ Бо́же, і спаси́ м'я.

К Тебі́, Влади́ко Человіколю́бче, от сна воста́в, прибіга́ю, і на діла́ Твоя́ подвиза́юся милосе́рдієм Твої́м, і молю́ся Тебі́: помози́ мні на вся́коє вре́м'я, во вся́кой ве́щі, і ізба́ви м'я от вся́кия мирськи́я зли́я ве́щі і дия́вольськаго поспіше́нія, і спаси́ м'я, і введи́ в Ца́рство Твоє́ ві́чноє. Ти бо єси́ мой Сотвори́тель і вся́кому бла́гу Проми́сленник і Пода́тель; о Тебі́ же все упова́ніє моє́, і Тебі́ сла́ву возсила́ю, ни́ні, і при́сно, і во ві́ки віко́в. Амі́нь.

Го́споди, І́же мно́гою Твоє́ю бла́гостію і вели́кими щедро́тами Твої́ми дал єси́ мні, рабу́ Твоєму́, мимоше́дшеє вре́м'я но́щі сея́ без напа́сти прейти́ от вся́каго зла проти́вна, Ти Сам, Влади́ко, вся́чеських Тво́рче, сподо́би м'я і́стинним Твої́м сві́том і просвіще́нним се́рдцем твори́ти во́лю Твою́, ни́ні, і при́сно, і во ві́ки віко́в. Амі́нь.

Го́споди Вседержи́телю, Бо́же сил і вся́кия пло́ті, в ви́шніх живи́й і на смире́нния призира́яй^*, сердця́ же і утро́би іспиту́яй і сокрове́нная челові́ков я́ві предві́дий, Безнача́льний і Присносу́щний Сві́те, у Него́же ність преміне́нія іли́ преложе́нія осіне́ніє, Сам, Безсме́ртний Царю́, прийми́ моле́нія на́ша, я́же в настоя́щеє вре́м'я, на мно́жество Твої́х щедро́т дерза́юще, от скве́рних к Тебі́ усте́н твори́м, і оста́ви нам прегріше́нія на́ша, я́же ді́лом, і сло́вом, і ми́слію, ві́дінієм іли́ неві́дінієм^* согріше́нная на́ми; і очи́сти ни от вся́кия скве́рни пло́ті і ду́ха. І да́руй нам бо́дренним се́рдцем і тре́звенною ми́слію всю настоя́щаго житія́ нощ прейти́, ожида́ющим прише́ствія сві́тлаго і явле́ннаго дне Єдиноро́днаго Твоєго́ Си́на, Го́спода і Бо́га і Спа́са на́шего Ісу́са Христа́, во́ньже со сла́вою Судія́ всіх при́йдеть, коєму́ждо отда́ти по діло́м єго́; да не па́дше і обліни́вшеся, но бо́дрствующе і воздви́жені в ді́ланіє обря́щемся гото́ві, в ра́дость і Боже́ственний черто́г сла́ви Єго́ совни́дем^*, іді́же пра́зднуюших глас непреста́нний і неізрече́нная сла́дость зря́щих Твоєго́ лиця́ добро́ту неізрече́нную. Ти бо єси́ і́стинний Світ, просвіща́яй і освяща́яй вся́чеськая, і Тя поє́ть вся твар во ві́ки віко́в. Амі́нь.

Тя благослови́м, Ви́шній Бо́же і Го́споди ми́лости, творя́щаго при́сно с на́ми вели́кая же і неізслі́дованная, сла́вная же і ужа́сная, ї́хже ність числа́, пода́вшаго нам сон во упокоє́ніє не́мощі на́шея, і ослабле́ніє трудо́в многотру́дния пло́ті. Благодари́м Тя, я́ко не погуби́л єси́ нас со беззако́ньми на́шими, но человіколю́бствовал єси́ оби́чно, і в неча́янії лежа́щия ни воздви́гл єси́, во є́же славосло́вити держа́ву Твою́. Ті́мже мо́лим безмі́рную Твою́ бла́гость: просвіти́ на́ша ми́слі, очеса́, і ум наш от тя́жкаго сна лі́ности возста́ви, отве́рзи на́ша уста́, і іспо́лни я Твоєго́ хвале́нія, я́ко да возмо́жем непоколе́блемо пі́ти же і іспові́датися Тебі́, во всіх і от всіх сла́вимому Бо́гу, Безнача́льному Отцю́, со Єдиноро́дним Твої́м Си́ном, і Всесвяти́м, і Благи́м, і Животворя́щим Твої́м Ду́хом, ни́ні, і при́сно, і во ві́ки віко́в. Амі́нь.

Воспіва́ю благода́ть Твою́, Влади́чице, молю́ Тя, ум мой облагодати́. Ступа́ти пра́во м'я наста́ви, путе́м Христо́вих за́повідей. Бді́ти к пі́сні укріпи́, уни́нія сон отгоня́ющи. Св'я́зана плени́цями гріхопаде́ній, мольба́ми Твої́ми разріши́, Богоневі́сто. В нощі́ м'я і во дні сохраня́й, борю́щих враг ізбавля́ющи м'я. Жизнода́теля Бо́га ро́ждшая, умерщвле́нна м'я страстьми́ оживи́. Я́же Світ невече́рній ро́ждшая, ду́шу мою́ ослі́пшую просвіти́. О ди́вная Влади́чня пала́то, дом Ду́ха Боже́ственна мене́ сотвори́. Врача́ ро́ждшая, уврачу́й душі́ моєя́ многолі́тния стра́сті. Волну́ющася жите́йською бу́рею ко стезі́ м'я покая́нія напра́ви. Ізба́ви м'я огня́ ві́чнующаго, і че́рвія же зла́го, і та́ртара; да м'я не яви́ши бісо́м ра́дованіє, і́же мно́гим гріхо́м пови́нника. Но́ва сотвори́ м'я, обетша́вшаго нечу́вственними, Пренепоро́чная, согріше́нії. Стра́нна му́ки вся́кия покажи́ м'я^* і всіх Влади́ку умоли́. Небе́сная мі улучи́ти весе́лія со всі́ми святи́ми сподо́би. Пресвята́я Ді́во, усли́ши глас непотре́бнаго раба́ Твоєго́. Струю́ дава́й мні слеза́м, Пречи́стая, душі́ моєя́ скве́рну очища́ющи. Стена́нія от се́рдця приношу́ Ті непреста́нно, усе́рдствуй, Влади́чице. Моле́бную слу́жбу мою́ прийми́ і Бо́гу Благоутро́бному принеси́. Преви́шшая А́нгел, мирська́го м'я преви́шша сли́тія сотвори́. Світоно́сная Сі́не Небе́сная, духо́вную благода́ть во мні напра́ви. Ру́ці возді́ю і устні́ к похвале́нію, оскверне́ни скве́рною, Всенепоро́чная. Душетлі́нних м'я па́костей ізба́ви, Христа́ прилі́жно умоля́ющи; Єму́же честь і поклоне́ніє подоба́єть, ни́ні, і при́сно, і во ві́ки віко́в. Амі́нь.

Многоми́лостиве і Всеми́лостиве Бо́же мой, Го́споди Ісу́се Христе́, мно́гия ра́ди любве́ сшел і воплоти́лся єси́, я́ко да спасе́ши всіх. І па́ки, Спа́се, спаси́ м'я по благода́ті, молю́ Тя: а́ще бо от діл спасе́ши м'я, ність се благода́ть і дар, но долг па́че. Єй, мно́гий в щедро́тах і неізрече́нний в ми́лості! Ві́руяй бо в М'я, рекл єси́, о Христе́ мой, жив бу́деть, і не у́зрить сме́рти во ві́ки. А́ще у́бо ві́ра, я́же в Тя, спаса́єть отча́янния, се ві́рую, спаси́ м'я, я́ко Бог мой єси́ Ти і Созда́тель. Ві́ра же вмі́сто діл да вміни́ться мні, Бо́же мой, не обря́щеши бо діл отню́д оправда́ющих м'я. Но та ві́ра моя́ да довлі́єть вмі́сто всіх, та да отвіща́єть, та да оправди́ть м'я, та да пока́жеть м'я прича́стника сла́ви Твоєя́ ві́чния. Да не у́бо похи́тить м'я сатана́ і похва́литься, Сло́ве, є́же отто́ргнути м'я от Твоєя́ руки́ і огра́ди. Но іли́ хощу́, спаси́ м'я, іли́ не хощу́, Христе́ Спа́се мой, предвари́ ско́ро, ско́ро, погибо́х. Ти бо єси́ Бог мой от чре́ва ма́тере моєя́. Сподо́би м'я, Го́споди, ни́ні возлюби́ти Тя, я́коже возлюби́х іногда́ той са́мий гріх, і па́ки порабо́тати Тебі́ без лі́ности то́щно, я́коже порабо́тах пре́жде сатані́ льсти́вому. Найпа́че же порабо́таю Тебі́, Го́споду і Бо́гу моєму́ Ісу́су Христу́, во вся дні живота́ моєго́, ни́ні, і при́сно, і во ві́ки віко́в. Амі́нь.

Святи́й А́нгеле, предстоя́й окая́нній моє́й душі́ і стра́стній моє́й жи́зні, не оста́ви мене́, грі́шнаго, ніже́ отступи́ от мене́ за невоздержа́ніє моє́; не даждь мі́ста^* лука́вому де́мону облада́ти мно́ю, наси́льством сме́ртнаго сего́ тілесе́; укріпи́ бі́дствующую і худу́ю мою́ ру́ку і наста́ви м'я на путь спасе́нія. Єй, святи́й А́нгеле Бо́жий, храни́телю і покрови́телю окая́нния моєя́ душі́ і ті́ла, вся мні прости́, єли́кими тя оскорби́х во вся дні живота́ моєго́, і а́ще что согріши́х в преше́дшую нощ сію́, покри́й м'я в настоя́щий день і сохрани́ м'я от вся́каго іскуше́нія проти́внаго, да ні в ко́єм грісі́ прогні́ваю Бо́га, і моли́ся за м'я ко Го́споду, да утверди́ть м'я в стра́сі Своє́м і досто́йна пока́жеть м'я раба́ своєя́ бла́гости. Амі́нь.

Пресвята́я Влади́чице моя́ Богоро́дице, святи́ми Твої́ми і всеси́льними мольба́ми отжени́ от мене́, смире́ннаго і окая́ннаго раба́ Твоєго́, уни́ніє, забве́ніє, неразу́міє, нераді́ніє і вся скве́рная, лука́вая і ху́льная помишле́нія от окая́ннаго моєго́ се́рдця і от помраче́ннаго ума́ моєго́. І погаси́ пла́мень страсте́й мої́х, я́ко нищ єсьм і окая́нен; і ізба́ви м'я от мно́гих і лю́тих воспомина́ній і предприя́тій, і от всіх дійств злих свободи́ м'я. Я́ко благослове́нна єси́ от всіх родо́в, і сла́виться пречестно́є і́м'я Твоє́ во ві́ки віко́в. Амі́нь.

Моли́ Бо́га о мні, святи́й уго́дниче Бо́жий [ім'я], я́ко аз усе́рдно к тебі́ прибіга́ю, ско́рому помо́щнику і моли́твеннику о душі́ моє́й.

Богоро́дице Ді́во, ра́дуйся, Благода́тная Марі́є, Госпо́дь с Тобо́ю; благослове́нна Ти в жена́х, і благослове́н Плод чре́ва Твоєго́, я́ко Спа́са родила́ єси́ душ на́ших.

Спаси́, Го́споди, лю́ди Твоя́, і благослови́ достоя́ніє Твоє́, побі́ди правосла́вним христия́ном на сопроти́вния да́руя і Твоє́ сохраня́я Кресто́м Твої́м жи́тельство.

Спаси́, Го́споди, і поми́луй отця́ моєго́ духо́внаго [ім'я], роди́телей мої́х [імена], сро́дников [імена], нача́льников, наста́вников, благоді́телей [імена] і всіх правосла́вних христия́н.

Упоко́й, Го́споди, ду́ші усо́пших раб Твої́х: [роди́телей мої́х], сро́дников [імена], благоді́телей [імена] і всіх правосла́вних христия́н, і прости́ їм вся согріше́нія во́льная і нево́льная, і да́руй їм Ца́рствіє Небе́сноє.

Якщо можеш, читай пом'янник замість цих коротких молитов за живих і померлих.

Досто́йно єсть^* я́ко воі́стину^* блажи́ти Тя, Богоро́дицю, Присноблаже́нную і Пренепоро́чную і Ма́тер Бо́га на́шего. Честні́йшую Херуви́м і сла́внійшую без сравне́нія Серафи́м, без істлі́нія Бо́га Сло́ва ро́ждшую, су́щую Богоро́дицю Тя велича́єм.

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Го́споди, поми́луй. [Тричі]

Го́споди Ісу́се Христе́, Си́не Бо́жий, моли́тв ра́ди Пречи́стия Твоєя́ Ма́тере, преподо́бних і богоно́сних оте́ць на́ших і всіх святи́х поми́луй нас. Амі́нь.