Пом'яни́, Го́споди Ісу́се Христе́, Бо́же наш, ми́лості і щедро́ти Твоя́ от ві́ка су́щия, ї́хже ра́ди і вочелові́чился єси́, і расп'я́тіє і смерть, спасе́нія ра́ди пра́во в Тя ві́рующих, претерпі́ти ізво́лил єси́; і воскре́с із ме́ртвих, возне́слся єси́ на Небеса́, і сіди́ши одесну́ю Бо́га Отця́, і призира́єши на смире́нния мольби́ всім се́рдцем призива́ющих Тя; приклони́ у́хо Твоє́ і усли́ши смире́нноє моле́ніє мене́, непотре́бнаго раба́ Твоєго́, в воню́ благоуха́нія духо́внаго, Тебі́ за вся лю́ди Твоя́ принося́щаго. І в пе́рвих пом'яни́ Це́рков Твою́ Святу́ю, Собо́рную і Апо́стольськую, ю́же снабді́л єси́ Честно́ю Твоє́ю Кро́вію, і утверди́, і укріпи́, і разшири́, умно́жи, умири́ і непреобори́му а́довими врати́ во ві́ки сохрани́; раздира́нія Церкве́й утиши́, шата́нія язи́чеськая угаси́, і єресе́й воста́нія ско́ро разори́, і іскорени́, і в нічто́же си́лою Свята́го Твоєго́ Ду́ха обрати́. [Поклін]
Спаси́, Го́споди, і поми́луй богохрани́мую страну́ на́шу, вла́сті і во́їнство єя́, да ти́хоє і безмо́лвноє житіє́ поживе́м во вся́ком благоче́стії і чистоті́. [Поклін]
Спаси́, Го́споди, і поми́луй Вели́каго Господи́на і Отця́ на́шего Святі́йшаго Патріа́рха [або: Блаже́ннійшаго Митрополи́та] [ім'я], преосвяще́нния митрополи́ти, архієпи́скопи і єпи́скопи правосла́вния, ієре́ї же і дия́кони, і весь при́чет церко́вний, я́же поста́вил єси́ пасти́ слове́сноє Твоє́ ста́до, і моли́твами їх поми́луй і спаси́ м'я, грі́шнаго. [Поклін]
Спаси́, Го́споди, і поми́луй отця́ моєго́ духо́внаго [ім'я] і святи́ми єго́ моли́твами прости́ моя́ согріше́нія. [Поклін]
Спаси́, Го́споди, і поми́луй роди́телі моя́ [імена], бра́тію і сестри́, і сро́дники моя́ по пло́ті, і вся бли́жнія ро́да моєго́, і дру́ги, і да́руй їм ми́рная Твоя́ і преми́рная блага́я*. [Поклін]
Спаси́, Го́споди, і поми́луй ста́рці і ю́ния, ни́щия і сироти́ і вдови́ці, і су́щия в болі́зні і в печа́лех, біда́х же і ско́рбіх*, обстоя́ніїх і пліне́ніїх, темни́цях же і заточе́ніїх, ізря́дніє же в гоне́ніїх Тебе́ ра́ди і ві́ри Правосла́вния, от язи́к безбо́жних, от отсту́пник і от єретико́в, су́щия раби́ Твоя́, і пом'яни́ я, посіти́, укріпи́, уті́ши і вско́рі си́лою Твоє́ю осла́бу, свобо́ду і ізба́ву їм пода́ждь. [Поклін]
Спаси́, Го́споди, і поми́луй по́сланния в слу́жбу, путеше́ствующия, отці́ і бра́тію на́шу, і сестри́ і вся правосла́вния христия́ни. [Поклін]
Спаси́, Го́споди, і поми́луй благотворя́щия нам, ми́лующия і пита́ющия* нас, да́вшия нам ми́лостині і запові́давшия нам, недосто́йним, моли́тися о них, і упокоєва́ющия нас, і сотвори́ ми́лость Твою́ с ни́ми, да́руя їм вся, я́же ко спасе́нію, проше́нія, і ві́чних благ восприя́тіє. [Поклін]
Спаси́, Го́споди, і поми́луй ї́хже аз безу́мієм мої́м соблазни́х, і от путі́ спаси́тельнаго отврати́х, к діло́м злим і неподо́бним приведо́х; Боже́ственним Твої́м про́мислом к путі́ спасе́нія па́ки возврати́. [Поклін]
Спаси́, Го́споди, і поми́луй ненави́дящия і оби́дящия м'я, і творя́щия мі па́кости, і не оста́ви їх поги́бнути мене́ ра́ди, грі́шнаго. [Поклін]
Отступи́вшия от Правосла́вния ві́ри і поги́бельними єресьми́ осліпле́нния сві́том Твоєго́ позна́нія просвіти́ і Святі́й Твоє́й Апо́стольстій Собо́рній Це́ркві причти́. [Поклін]
Пом'яни́, Го́споди, от житія́ сего́ отше́дшия святі́йшия патріа́рхи, преосвяще́нния митрополи́ти, архієпи́скопи і єпи́скопи правосла́вния, во ієре́йстім же і при́чті церко́внім і і́ночестім чи́ні Тебі́ послужи́вшия, і в ві́чних Твої́х селе́ніїх со святи́ми упоко́й. [Поклін]
Пом'яни́, Го́споди, ду́ші усо́пших рабо́в Твої́х, [роди́телей мої́х] [імена] і всіх сро́дников по пло́ті; і прости́ їх вся согріше́нія во́льная і нево́льная, да́руя їм Ца́рствіє і прича́стіє ві́чних Твої́х благи́х і Твоєя́ безконе́чния і блаже́нния жи́зні наслажде́ніє. [Поклін]
Пом'яни́, Го́споди, і вся в наде́жді воскресе́нія і жи́зні ві́чния усо́пшия, отці́ і бра́тію на́шу, і сестри́, і зді лежа́щия і повсю́ду, правосла́вния христия́ни, і со святи́ми Твої́ми, іді́же присіща́єть світ лиця́ Твоєго́, всели́, і нас поми́луй, я́ко Благ і Человіколю́бець. Амі́нь. [Поклін]
