Акафіст Сладчайшому Господу нашому Ісусу Христу

Возбра́нний Воєво́до і Го́споди, а́да побіди́телю, я́ко ізба́влься от ві́чния сме́рти, похва́льная воспису́ю Ті, созда́ніє і раб Твой; но, я́ко імі́яй милосе́рдіє неізрече́нноє, от вся́ких м'я бід свободи́, зову́ща:

Ісу́се, Си́не Бо́жий, поми́луй м'я.

А́нгелов Тво́рче і Го́споди сил, отве́рзи мі недоумі́нний ум і язи́к на похвалу́ пречи́стаго Твоєго́ і́мене, я́коже глухо́му і гугни́вому дре́вле слух і язи́к отве́рзл єси́, і глаго́лаше зови́й такова́я:

Ісу́се пречу́дний, а́нгелов Удивле́ніє; Ісу́се преси́льний, прароди́телей Ізбавле́ніє.

Ісу́се пресла́дкий, патріа́рхов Велича́ніє; Ісу́се пресла́вний, царе́й Укріпле́ніє.

Ісу́се прелюби́мий, проро́ков Ісполне́ніє; Ісу́се преди́вний, му́чеников Крі́посте.

Ісу́се прети́хій, мона́хов Ра́досте; Ісу́се преми́лостивий, пресві́теров Сла́досте.

Ісу́се премилосе́рдий, по́стников Воздержа́ніє; Ісу́се пресла́достний, преподо́бних Ра́дованіє.

Ісу́се пречестни́й, ді́вственних Цілому́дріє; Ісу́се предві́чний, грі́шников Спасе́ніє.

Ісу́се, Си́не Бо́жий, поми́луй м'я.

Ви́дя вдови́цю зі́льні^* пла́чущу, Го́споди, я́коже бо тогда́ умилосе́рдився, си́на єя́ на погребе́ніє несо́ма воскреси́л єси́; си́це і о мні умилосе́рдися, Человіколю́бче, і гріхми́ умерщвле́нную мою́ ду́шу воскреси́, зову́щую: Аллилу́я.

Ра́зум неуразумі́нний разумі́ти Фили́пп іщя́: Го́споди, покажи́ нам Отця́, глаго́лаше. Ти же к нему́: толи́коє вре́м'я сий со Мно́ю, не позна́л ли єси́, я́ко Оте́ць во Мні, і Аз во Отці́ єсьм? Ті́мже, Неізслі́дованне, со стра́хом зову́ Ті:

Ісу́се, Бо́же предві́чний; Ісу́се, Царю́ преси́льний.

Ісу́се, Влади́ко долготерпіли́вий; Ісу́се, Спа́се преми́лостивий.

Ісу́се, Храни́телю мой преблаги́й; Ісу́се, очи́сти гріхи́ моя́.

Ісу́се, отими́ беззако́нія моя́; Ісу́се, отпусти́ непра́вди моя́.

Ісу́се, Наде́ждо моя́, не оста́ви мене́; Ісу́се Помо́щниче мой, не отри́ни мене́.

Ісу́се, Созда́телю мой, не забу́ди мене́; Ісу́се, Па́стирю мой, не погуби́ мене́.

Ісу́се, Си́не Бо́жий, поми́луй м'я.

Си́лою сви́ше апо́столи облеки́й, Ісу́се, во Ієрусали́мі сідя́щия, облеци́ і мене́, обнаже́ннаго от вся́каго благотворе́нія, теплото́ю Ду́ха Свята́го Твоєго́, і даждь мі с любо́вію пі́ти Тебі́: Аллилу́я.

Імі́яй бога́тство милосе́рдія, митарі́ і грі́шники, і неві́рния призва́л єси́, Ісу́се: не пре́зри і мене́ ни́ні, подо́бнаго їм, но я́ко многоці́нноє ми́ро, прийми́ піснь сію́:

Ісу́се, Си́ло непобіди́мая; Ісу́се, Ми́лосте безконе́чная.

Ісу́се, Красото́ пресві́тлая; Ісу́се, люби́ неізрече́нная.

Ісу́се, Си́не Бо́га жива́го; Ісу́се, поми́луй м'я, грі́шнаго.

Ісу́се, усли́ши м'я, в беззако́ніїх зача́таго; Ісу́се, очи́сти м'я, во грісі́х рожде́ннаго.

Ісу́се, научи́ м'я, непотре́бнаго; Ісу́се, освіти́ м'я, те́мнаго.

Ісу́се, очи́сти м'я, скве́рнаго; Ісу́се, возведи́ м'я, блу́днаго.

Ісу́се, Си́не Бо́жий, поми́луй м'я.

Бу́рю внутр імі́яй помишле́ній сумни́тельних, Петр утопа́ше; узрі́в же во пло́ті Тя су́ща, Ісу́се, і по вода́м ходя́ща, позна́ Тя Бо́га і́стиннаго, і ру́ку спасе́нія получи́в, рече́: Аллилу́я.

Сли́ша сліпи́й, Го́споди, мимоходя́ща Тя путе́м, вопія́ше: Ісу́се, Си́не Дави́дов, поми́луй м'я! і призва́в, отве́рзл єси́ о́чі єго́. Просвіти́ у́бо ми́лостію Твоє́ю о́чі ми́сленния се́рдця, і мене́, вопію́ща Ті і глаго́люща:

Ісу́се, ви́шніх Созда́телю; Ісу́се, ни́жніх Іскупи́телю.

Ісу́се, преіспо́дніх Потреби́телю; Ісу́се, всея́ тва́рі Украси́телю.

Ісу́се, душі́ моєя́ Уті́шителю; Ісу́се, ума́ моєго́ Просвіти́телю.

Ісу́се, се́рдця моєго́ Весе́ліє; Ісу́се, ті́ла моєго́ Здра́віє.

Ісу́се Спа́се мой, спаси́ м'я; Ісу́се, Сві́те мой, просвіти́ м'я.

Ісу́се, му́ки вся́кия ізба́ви м'я; Ісу́се, спаси́ м'я, недосто́йнаго.

Ісу́се, Си́не Бо́жий, поми́луй м'я.

Богото́чною Кро́вію я́коже іскупи́л єси́ нас дре́вле от зако́нния кля́тви, Ісу́се, си́це ізми́ нас от сі́ті, є́юже змій зап'я́т ни страстьми́ плотськи́ми, і блу́дним наважде́нієм, і злим уни́нієм, вопію́щия Ті: Аллилу́я.

Ви́дівше о́троци євре́йстії во о́бразі челові́честім Созда́вшаго руко́ю челові́ка і Влади́ку разумі́вше Єго́, потща́шася ві́твми угоди́ти Єму́, оса́нна вопію́ще. Ми же піснь прино́сим Ті глаго́люще:

Ісу́се, Бо́же і́стинний; Ісу́се, Си́не Дави́дов.

Ісу́се, Царю́ пресла́вний; Ісу́се, А́гнче непоро́чний.

Ісу́се, Па́стирю преди́вний; Ісу́се, Храни́телю во мла́дості моє́й.

Ісу́се, Корми́телю во ю́ності моє́й; Ісу́се, Похвало́ в ста́рості моє́й.

Ісу́се, Наде́ждо в сме́рті моє́й; Ісу́се, Животе́ по сме́рті моє́й.

Ісу́се, Утіше́ніє моє́ на суді́ Твоє́м; Ісу́се, Жела́ніє моє́, не посрами́ мене́ тогда́.

Ісу́се Си́не Бо́жий, поми́луй м'я.

Пропові́дник богоно́сних віща́ніє і глаго́ли ісполня́я, Ісу́се, на землі́ я́влься і с челові́ки, Невмісти́мий, пожи́л єси́ і болі́зні на́ша под'я́л єси́, отню́дуже ра́нами Твої́ми ми ісцілі́вше, пі́ти навико́хом: Аллилу́я.

Возсія́ вселе́нній просвіще́ніє і́стини Твоєя́, і отгна́ся лесть бісо́вськая: і́доли бо, Спа́се наш, не терп'я́ще Твоєя́ крі́пости, падо́ша. Ми же, спасе́ніє получи́вше, вопіє́м Ті:

Ісу́се, І́стино, лесть отгоня́щая; Ісу́се, Сві́те преви́шший всіх сві́тлостей.

Ісу́се, Царю́, премога́яй всіх крі́пості; Ісу́се, Бо́же, пребива́яй в ми́лості.

Ісу́се, Хлі́бе Живо́тний, наси́ти м'я, а́лчущаго; Ісу́се, Істо́чниче ра́зума, напо́й м'я, жа́ждущаго.

Ісу́се, Оде́ждо весе́лія, оді́й м'я, тлі́ннаго; Ісу́се, Покро́ве ра́дости, покри́й м'я, недосто́йнаго.

Ісу́се, Пода́телю прося́щим, даждь мі плач за гріхи́ моя́; Ісу́се, Обрі́теніє і́щущих, обря́щи ду́шу мою́.

Ісу́се, Отве́рзителю толку́щим, отве́рзи се́рдце моє́, окая́нноє; Ісу́се, Іскупи́телю грі́шних, очи́сти беззако́нія моя́.

Ісу́се, Си́не Бо́жий, поми́луй м'я.

Хотя́ сокрове́нную та́йну от ві́ка откри́ти, я́ко овча́ на заколе́ніє веде́н бил єси́, Ісу́се, і я́ко а́гнець пря́мо стригу́щаго єго́ безгла́сен; і я́ко Бог із ме́ртвих воскре́сл єси́, і со сла́вою на Небеса́ возне́слся єси́, і нас совоздви́гл єси́, зову́щих: Аллилу́я.

Ди́вную показа́ твар, явле́йся Творе́ць нам: без сі́мене от Ді́ви воплоти́ся, із гро́ба печа́ти не руши́в, воскре́се, і ко апо́столом, две́рем затворе́нним, с пло́тію вни́де. Ті́мже чудя́щеся, воспої́м:

Ісу́се, Сло́ве необиме́нний; Ісу́се, Сло́ве несогляда́ємий.

Ісу́се, Си́ло непостижи́мая; Ісу́се, Му́дросте недоми́слимая.

Ісу́се, Божество́ неопи́санноє; Ісу́се, Госпо́дство неісче́тноє.

Ісу́се, Ца́рство непобіди́моє; Ісу́се, Влади́чество безконе́чноє.

Ісу́се, Крі́посте височа́йшая; Ісу́се, Вла́сте ві́чная.

Ісу́се, Тво́рче мой, уще́дри м'я; Ісу́се, Спа́се мой, спаси́ м'я.

Ісу́се, Си́не Бо́жий, поми́луй м'я.

Стра́нно Бо́га вочелові́чшася ви́дяще, устрані́мся су́єтнаго ми́ра і ум на Боже́ственная возложі́м. Сего́ бо ра́ди Бог на зе́млю сни́де, да нас на Небеса́ возведе́ть, вопію́щих Єму́: Аллилу́я.

Весь бі в ни́жніх, і ви́шніх ніка́коже отступи́ Неісче́тний, єгда́ во́лею нас ра́ди пострада́, і сме́ртію Своє́ю на́шу смерть умертви́, і воскресе́нієм живо́т дарова́ пою́щим:

Ісу́се, Сла́досте серде́чная; Ісу́се, Крі́посте тіле́сная.

Ісу́се, Сві́тлосте душе́вная; Ісу́се, бистрото́ у́мная.

Ісу́се, Ра́досте со́вістная; Ісу́се, Наде́ждо ізві́стная.

Ісу́се, Па́м'яте предві́чная; Ісу́се, Похвало́ висо́кая.

Ісу́се, Сла́во моя́ превознесе́нная; Ісу́се, Жела́ніє моє́, не отри́ни мене́.

Ісу́се, Па́стирю мой, взищи́ мене́; Ісу́се, Спа́се мой, спаси́ мене́.

Ісу́се, Си́не Бо́жий, поми́луй м'я.

Все єстество́ а́нгельськоє безпреста́ні сла́вить пресвято́є і́м'я Твоє́, Ісу́се, на Небесі́: Свят, Свят, Свят, вопію́ще; ми же, грі́шнії, на землі́ бре́нними устна́ми вопіє́м: Аллилу́я.

Віті́я многовіща́нния я́коже ри́би безгла́сния ви́дим о Тебі́, Ісу́се, Спа́се наш: недоумі́ють бо глаго́лати, ка́ко Бог непрело́жний і челові́к соверше́нний пребива́єши? Ми же та́їнству див'я́щеся, вопіє́м ві́рно:

Ісу́се, Бо́же Предві́чний; Ісу́се, Царю́ ца́рствующих.

Ісу́се, Влади́ко владі́ющих; Ісу́се, Судіє́ живи́х і ме́ртвих.

Ісу́се, Наде́ждо ненаде́жних; Ісу́се, Утіше́ніє пла́чущих.

Ісу́се, Сла́во ни́щих; Ісу́се, не осуди́ м'я по діло́м мої́м.

Ісу́се, очи́сти м'я по ми́лості Твоє́й; Ісу́се, отжени́ от мене́ уни́ніє.

Ісу́се, просвіти́ моя́ ми́слі серде́чния; Ісу́се, даждь мі па́м'ять сме́ртную.

Ісу́се, Си́не Бо́жий, поми́луй м'я.

Спасти́ хотя́ мир, Восто́че восто́ком, к те́мному за́паду єстеству́ на́шему прише́д, смири́лся єси́ до сме́рти; ті́мже превознесе́ся і́м'я Твоє́ па́че вся́каго і́мене, і от всіх колі́н небе́сних і земни́х сли́шиши: Аллилу́я.

Царю́ преві́чний, Уті́шителю, Христе́ і́стинний, очи́сти ни от вся́кия скве́рни, я́коже очи́стил єси́ де́сять прокаже́нних, і ісціли́ ни, я́коже ісціли́л єси́ сребролюби́вую ду́шу Закхе́я митаря́, да вопіє́м Ті во умиле́нії, зову́ще:

Ісу́се, Сокро́вище нетлі́нноє; Ісу́се, Бога́тство неістощи́моє.

Ісу́се, Пи́ще крі́пкая; Ісу́се, Питіє́ неісчерпа́ємоє.

Ісу́се, ни́щих Одія́ніє; Ісу́се, вдов Заступле́ніє.

Ісу́се, си́рих Защи́тниче; Ісу́се, тружда́ющихся По́моще.

Ісу́се, стра́нних Наста́вниче; Ісу́се, пла́вающих Ко́рмчий.

Ісу́се, бу́рних Оти́шіє; Ісу́се Бо́же, воздви́гни м'я, па́дшаго.

Ісу́се, Си́не Бо́жий, поми́луй м'я.

Пі́ніє всеумиле́нноє приношу́ Ті недосто́йний, вопію́ Ті, я́ко Ханане́я: Ісу́се, поми́луй м'я! Не дщер бо, но плоть і́мам страстьми́ лю́ті біся́щуюся і я́ростію пали́мую, і ісціле́ніє даждь вопію́щу Ті: Аллилу́я.

Світопода́тельна світи́льника су́щим во тьмі неразу́мія, пре́жде гоня́й Тя Па́вел, богоразу́мнаго гла́са си́лу внуши́ і душе́вную бистроту́ уясни́; си́це і мене́ те́мния зі́ниці душе́вния просвіти́, зову́ща:

Ісу́се, Царю́ мой прекрі́пкий; Ісу́се, Бо́же мой преси́льний.

Ісу́се, Го́споди мой пребезсме́ртний; Ісу́се, Созда́телю мой пресла́вний.

Ісу́се, Наста́вниче мой предо́брий; Ісу́се, Па́стирю мой преще́дрий.

Ісу́се, Влади́ко мой преми́лостивий; Ісу́се, Спа́се мой премилосе́рдий.

Ісу́се просвіти́ моя́ чу́вствія потемне́нная страстьми́; Ісу́се, ісціли́ моє́ ті́ло острупле́нноє гріхми́.

Ісу́се, очи́сти мой ум от по́мислов су́єтних; Ісу́се, сохрани́ се́рдце моє́ от по́хотей лука́вих.

Ісу́се, Си́не Бо́жий, поми́луй м'я.

Благода́ть пода́ждь мі, всіх долго́в Ріши́телю, Ісу́се, і прийми́ м'я, ка́ющася, я́коже прия́л єси́ Петра́, отве́ргшагося Тебе́, і призови́ м'я, унива́ющаго, я́коже дре́вле Па́вла, гоня́ща Тя, і усли́ши м'я вопію́ща Ті: Аллилу́я.

Пою́ще Твоє́ вочелові́ченіє, восхваля́єм Тя всі і ві́руєм со Фомо́ю, я́ко Госпо́дь і Бог єси́ сідя́й со Отце́м і хотя́й суди́ти живи́м і ме́ртвим; тогда́ у́бо сподо́би м'я десна́го стоя́нія^*, вопію́щаго:

Ісу́се, Царю́ предві́чний, поми́луй м'я; Ісу́се, Цві́те благово́нний, облагоуха́й м'я.

Ісу́се, Теплото́ люби́мая, огрі́й м'я; Ісу́се, Хра́ме предві́чний, покри́й м'я.

Ісу́се, Оде́ждо сві́тлая, украси́ м'я; Ісу́се, Би́сере честни́й, осія́й м'я.

Ісу́се, Ка́меню драги́й, просвіти́ м'я; Ісу́се, Со́лнце пра́вди, освіти́ м'я.

Ісу́се, Сві́те святи́й, облиста́й м'я; Ісу́се, болі́зні душе́вния і тіле́сния ізба́ви м'я.

Ісу́се, із руки́ сопроти́вния ізми́ м'я; Ісу́се, огня́ неугаси́маго і про́чих ві́чних мук свободи́ м'я.

Ісу́се, Си́не Бо́жий, поми́луй м'я.

О пресла́дкий і всеще́дрий Ісу́се! Прийми́ ни́ні ма́лоє моле́ніє сіє́ на́ше, я́коже прия́л єси́ вдови́ці дві ле́пті; і сохрани́ достоя́ніє Твоє́ от враг ви́димих і неви́димих, от наше́ствія іноплеме́нник, от неду́га і гла́да, от вся́кия ско́рби, і смертоно́сния ра́ни, і гряду́щия ізми́ му́ки всіх, вопію́щих Ті: Аллилу́я, аллилу́я, аллилу́я.

Цей кондак читається тричі. Після цього знову читають ікос 1 і кондак 1.

А́нгелов Тво́рче і Го́споди сил, отве́рзи мі недоумі́нний ум і язи́к на похвалу́ пречи́стаго Твоєго́ і́мене, я́коже глухо́му і гугни́вому дре́вле слух і язи́к отве́рзл єси́, і глаго́лаше зови́й такова́я:

Ісу́се пречу́дний, а́нгелов Удивле́ніє; Ісу́се преси́льний, прароди́телей Ізбавле́ніє.

Ісу́се пресла́дкий, патріа́рхов Велича́ніє; Ісу́се пресла́вний, царе́й Укріпле́ніє.

Ісу́се прелюби́мий, проро́ков Ісполне́ніє; Ісу́се преди́вний, му́чеников Крі́посте.

Ісу́се прети́хій, мона́хов Ра́досте; Ісу́се преми́лостивий, пресві́теров Сла́досте.

Ісу́се премилосе́рдий, по́стников Воздержа́ніє; Ісу́се пресла́достний, преподо́бних Ра́дованіє.

Ісу́се пречестни́й, ді́вственних Цілому́дріє; Ісу́се предві́чний, грі́шников Спасе́ніє.

Ісу́се, Си́не Бо́жий, поми́луй м'я.

Возбра́нний Воєво́до і Го́споди, а́да побіди́телю, я́ко ізба́влься от ві́чния сме́рти, похва́льная воспису́ю Ті, созда́ніє і раб Твой; но, я́ко імі́яй милосе́рдіє неізрече́нноє, от вся́ких м'я бід свободи́, зову́ща:

Ісу́се, Си́не Бо́жий, поми́луй м'я.

Влади́ко Го́споди Ісу́се Христе́ Бо́же мой, і́же неізрече́ннаго ра́ди Твоєго́ человіколю́бія на коне́ць віко́в во плоть оболки́йся от Присноді́ви Марі́ї! Сла́влю о мні Твоє́ спаси́тельноє промишле́ніє, раб Твой, Влади́ко; пісносло́влю Тя, я́ко Тебе́ ра́ди Отця́ позна́х; благословлю́ Тя, Єго́же ра́ди і Дух Святи́й в мир при́йде; покланя́юся Твоє́й по пло́ті Пречи́стій Ма́тері, такові́й стра́шній та́йні послужи́вшей; восхваля́ю Твоя́ А́нгельськая ликостоя́нія, я́ко воспіва́телі і служи́телі Твоєго́ вели́чествія; ублажа́ю Предте́чу Іоа́нна, Тебе́ крести́вшаго, Го́споди; почита́ю і провозвісти́вшия Тя проро́ки, прославля́ю апо́столи Твоя́ святи́я; торжеству́ю же і му́ченики, свяще́нники же Твоя́ сла́влю; покланя́юся преподо́бним Твої́м, і вся Твоя́ пра́ведники пі́стунствую. Такова́го і толи́ко мно́гаго і неізрече́ннаго ли́ка Боже́ственнаго в моли́тву привожду́ Тебі́, Всеще́дрому Бо́гу, раб Твой, і сего́ ра́ди прошу́ мої́м согріше́нієм проще́нія, є́же да́руй мі всіх Твої́х ра́ди святи́х, ізря́дніє же святи́х Твої́х щедро́т, я́ко благослове́н єси́ во ві́ки. Амі́нь.