Акафіст Пресвятій Владичиці нашій Богородиці

Взбра́нной Воєво́ді побіди́тельная, я́ко ізба́вльшеся от злих, благода́рственная воспису́єм Ті раби́ Твої́, Богоро́дице; но, я́ко іму́щая держа́ву непобіди́мую, от вся́ких нас бід свободи́, да зове́м Ті: Ра́дуйся, Неві́сто Неневі́стная.

А́нгел предста́тель с небесе́ по́слан бисть, рещи́ Богоро́диці: "Ра́дуйся!" і, со безпло́тним гла́сом воплоща́єма Тя зря^*, Го́споди, ужаса́шеся і стоя́ше, зови́й к Ней такова́я:

Ра́дуйся, Є́юже ра́дость возсія́єть; ра́дуйся, Є́юже кля́тва ісче́знеть.

Ра́дуйся, па́дшаго Ада́ма воззва́ніє; ра́дуйся, слез Є́виних ізбавле́ніє.

Ра́дуйся, Висото́ неудобовосходи́мая челові́чеськими по́мисли; ра́дуйся, Глубино́ неудобозри́мая і а́нгельськима очи́ма.

Ра́дуйся, я́ко єси́ Царе́во Сіда́лище; ра́дуйся, я́ко но́сиши Нося́щаго вся.

Ра́дуйся, Звіздо́ явля́ющая Со́лнце; ра́дуйся, Утро́бо Боже́ственнаго воплоще́нія.

Ра́дуйся, Є́юже обновля́ється твар; ра́дуйся, Є́юже покланя́ємся Творцю́.

Ра́дуйся, Неві́сто Неневі́стная.

Ви́дящи Свята́я Себе́ в чистоті́, глаго́леть Гавриї́лу де́рзостно: "Пресла́вноє твоєго́ гла́са неудобоприя́тельно душі́ Моє́й явля́ється, безсі́меннаго бо зача́тія рождество́ ка́ко глаго́леши, зови́й: Аллилу́я".

Ра́зум недоразуміва́ємий разумі́ти Ді́ва і́щущи, возопи́ к служа́щему: "Із боку́ чи́сту, Си́ну ка́ко єсть роди́тися мо́щно, рци Мі?" К Не́йже он рече́ со стра́хом, оба́че зови́й си́це:

Ра́дуйся, сові́та неізрече́ннаго Таї́ннице; ра́дуйся, молча́нія прося́щих Ві́ро.

Ра́дуйся, чуде́с Христо́вих Нача́ло; ра́дуйся, велі́ній Єго́ Глави́зно.

Ра́дуйся, Лі́ствице Небе́сная, Є́юже сни́де Бог; ра́дуйся, Мо́сте, преводя́й су́щих от землі́ на Не́бо.

Ра́дуйся, А́нгелов многослову́щеє Чу́до; ра́дуйся, бісо́в многоплаче́вний Стру́пе.

Ра́дуйся, Світ неізрече́нно роди́вшая; ра́дуйся, є́же ка́ко, ні єди́нагоже научи́вшая.

Ра́дуйся, прему́дрих превосходя́щая ра́зум; ра́дуйся, ві́рних озаря́ющая сми́сли.

Ра́дуйся, Неві́сто Неневі́стная.

Си́ла Ви́шняго осіни́ тогда́ к зача́тію Браконеіску́сную, і благопло́дная Тоя́ ложесна́, я́ко село́ показа́ сла́дкоє, всім хотя́щим жа́ти спасе́ніє, внегда́ пі́ти си́це: Аллилу́я.

Іму́щи Богоприя́тную Ді́ва утро́бу, востече́ ко Єлисаве́ті, младе́нець же о́ноя а́біє позна́в Сея́ цілова́ніє, ра́довашеся, і ігра́ньми, я́ко пі́сньми, вопія́ше к Богоро́диці:

Ра́дуйся, о́траслі неув'яда́ємия Розго́; ра́дуйся, Плода́ безсме́ртнаго Стяжа́ніє.

Ра́дуйся, Ді́лателя ді́лающая Человіколю́бця; ра́дуйся, Сади́теля Жи́зні на́шея ро́ждшая.

Ра́дуйся, Ни́во, растя́щая гобзова́ніє щедро́т; ра́дуйся, Трапе́зо, нося́щая оби́ліє очище́ній.

Ра́дуйся, я́ко рай пи́щний процвіта́єши; ра́дуйся, я́ко приста́нище душа́м гото́виши.

Ра́дуйся, прия́тноє моли́тви Кади́ло; ра́дуйся, всего́ ми́ра очище́ніє.

Ра́дуйся, Бо́жиє к сме́ртним Благоволе́ніє; ра́дуйся, сме́ртних к Бо́гу Дерзнове́ніє.

Ра́дуйся, Неві́сто Неневі́стная.

Бу́рю внутр імі́я помишле́ній сумни́тельних, цілому́дренний Іо́сиф см'яте́ся, к Тебі́ зря, небра́чній, і бракоокра́дованную помишля́я, Непоро́чная; уві́дів же Твоє́ зача́тіє от Ду́ха Свя́та, рече́: Аллилу́я.

Сли́шаша па́стиріє А́нгелов, пою́щих плотсько́є Христо́во прише́ствіє, і те́кше, я́ко к Па́стирю, ви́дять Сего́, я́ко а́гнця непоро́чна, во чре́ві Марі́їні упа́сшася, Ю́же, пою́ще, рі́ша:

Ра́дуйся, А́гнця і Па́стиря Ма́ти; ра́дуйся, Дво́ре слове́сних ове́ць.

Ра́дуйся, неви́димих враго́в Муче́ніє; ра́дуйся, ра́йських две́рей Отверзе́ніє.

Ра́дуйся, я́ко Небе́сная сра́дуються земни́м; ра́дуйся, я́ко земна́я сликовству́ють Небе́сним.

Ра́дуйся, апо́столов немо́лчная Уста́; ра́дуйся, страстоте́рпцев непобіди́мая Де́рзосте.

Ра́дуйся, тве́рдоє ві́ри утвержде́ніє; ра́дуйся, сві́тлоє благода́ті Позна́ніє.

Ра́дуйся, Є́юже обнажи́ся ад; ра́дуйся, Є́юже облеко́хомся сла́вою.

Ра́дуйся, Неві́сто Неневі́стная.

Боготе́чную звізду́ узрі́вше волсви́, тоя́ послі́доваша зарі́; і, я́ко світи́льник держа́ще ю, то́ю іспита́ху крі́пкаго Царя́; і, дости́гше Непостижи́маго, возра́довашася, Єму́ вопію́ще: Аллилу́я.

Ви́діша о́троци Халде́йстії на руку́ Діви́чу, созда́вшаго рука́ма челові́ки, і Влади́ку разуміва́юще Єго́, а́ще і ра́бій прия́т зрак, потща́шася дарми́ послужи́ти Єму́ і возопи́ти Благослове́нній:

Ра́дуйся, Звізди́ незаходи́мия Ма́ти; ра́дуйся, Заре́ та́їнственнаго дне.

Ра́дуйся, пре́лести пещ угаси́вшая; ра́дуйся, Тро́йці таї́нники просвіща́ющая.

Ра́дуйся, мучи́теля безчелові́чнаго ізмета́ющая от нача́льства; ра́дуйся, Го́спода Человіколю́бця показа́вшая Христа́.

Ра́дуйся, ва́рварськаго ізбавля́ющая служе́нія; ра́дуйся, тимі́нія^* ізима́ющая діл.

Ра́дуйся, огня́ поклоне́ніє угаси́вшая; ра́дуйся, пла́мене страсте́й ізміня́ющая.

Ра́дуйся, ві́рних Наста́внице цілому́дрія; ра́дуйся, всіх родо́в Весе́ліє.

Ра́дуйся, Неві́сто Неневі́стная.

Пропові́дници Богоно́снії би́вше волсви́, возврати́шася в Вавило́н, сконча́вше Твоє́ проро́чество; і пропові́давше Тя, Христа́, всім, оста́виша І́рода, я́ко буєсло́в'яща, не ві́дуща пі́ти: Аллилу́я.

Возсія́вий во Єги́пті просвіще́ніє і́стини, отгна́л єси́ лжі тьму; і́доли бо єго́, Спа́се, не терп'я́ще Твоєя́ крі́пости, падо́ша. Сих же ізба́вльшіїся вопія́ху к Богоро́диці:

Ра́дуйся, ісправле́ніє челові́ков; ра́дуйся, Низпаде́ніє бісо́в.

Ра́дуйся, пре́лести держа́ву попра́вшая; ра́дуйся, і́дольськую лесть обличи́вшая.

Ра́дуйся, Мо́ре, потопи́вшеє фарао́на ми́сленнаго; ра́дуйся, Ка́меню, напої́вший жа́ждущия жи́зні.

Ра́дуйся, о́гненний Сто́лпе, наставля́яй су́щия во тьмі; ра́дуйся, Покро́ве ми́ру, ши́рший о́блака.

Ра́дуйся, Пи́ще, ма́нни Приє́мнице; ра́дуйся, сла́дости святи́я Служи́тельнице.

Ра́дуйся, Земле́ обітова́нія; ра́дуйся, із Нея́же тече́ть мед і млеко́.

Ра́дуйся, Неві́сто Неневі́стная.

Хотя́щу Симео́ну от ни́нішняго ві́ка преста́витися преле́стнаго, вда́лся єси́, я́ко младе́нець, тому́; но позна́лся єси́ єму́ і Бог Соверше́нний. Ті́мже удиви́ся Твоє́й неізрече́нній прему́дрості, зови́й: Аллилу́я.

Но́вую показа́ твар, я́влься Зижди́тель нам от Него́ би́вшим, із безсі́менния прозя́б утро́би, і сохрани́в Ю, я́коже бі, нетлі́нну. Да чу́до ви́дяще, воспої́м Ю, вопію́ще:

Ра́дуйся, Цві́те нетлі́нія; ра́дуйся, Ві́нче воздержа́нія.

Ра́дуйся, воскресе́нія о́браз облиста́ющая; ра́дуйся, А́нгельськоє житіє́ явля́ющая.

Ра́дуйся, Дре́во світлоплодови́тоє, от него́же пита́ються ві́рнії; ра́дуйся, Дре́во благосінноли́ственноє, і́мже покрива́ються мно́зі.

Ра́дуйся, во чре́ві нося́щая Ізба́вителя пліне́нним; ра́дуйся, ро́ждшая наста́вника заблу́ждшим.

Ра́дуйся, Судії́ Пра́веднаго Умоле́ніє; ра́дуйся, мно́гих согріше́ній проще́ніє.

Ра́дуйся, оде́ждо наги́х дерзнове́нія; ра́дуйся, Люби́, вся́коє жела́ніє побіжда́ющая.

Ра́дуйся, Неві́сто Неневі́стная.

Стра́нноє рождество́ ви́дівше, устрані́мся ми́ра, ум на Небеса́ прело́жше; сего́ бо ра́ди висо́кий Бог, на землі́ яви́ся смире́нний челові́к, хотя́й привлещи́ к висоті́, Тому́ вопію́щия: Аллилу́я.

Весь бі в ни́жніх, і ви́шніх ніка́коже отступи́ неопи́санноє Сло́во; снизхожде́ніє бо Боже́ственноє, не прехожде́ніє же мі́стноє бисть, і Рождество́ от Ді́ви Богоприя́тния, сли́шащия сія́:

Ра́дуйся, Бо́га невмісти́маго Вмісти́лище; ра́дуйся, честна́го та́їнства две́рі.

Ра́дуйся, неві́рних сумни́тельноє сли́шаніє; ра́дуйся, ві́рних ізві́стная Похвало́.

Ра́дуйся, Колесни́це Пресвята́я Су́щаго на Херуви́міх; ра́дуйся, Селе́ніє пресла́вноє Су́щаго на Серафи́міх.

Ра́дуйся, проти́вная в то́жде собра́вшая; ра́дуйся, ді́вство і рождество́ сочета́вшая.

Ра́дуйся, Є́юже разріши́ся преступле́ніє; ра́дуйся, Є́юже отве́рзеся рай.

Ра́дуйся, ключу́ Ца́рствія Христо́ва; ра́дуйся, Наде́ждо благ ві́чних.

Ра́дуйся, Неві́сто Неневі́стная.

Вся́коє єстество́ А́нгельськоє удиви́ся вели́кому Твоєго́ вочелові́ченія ді́лу; непристу́пнаго бо я́ко Бо́га, зря́ше всім присту́пнаго Челові́ка, нам у́бо спребива́юща, сли́шаща же от всіх: Аллилу́я.

Віті́я многовіща́нния, я́ко ри́би безгла́сния, ви́дим о Тебі́, Богоро́дице; недоуміва́ють бо глаго́лати, є́же ка́ко, і Ді́ва пребива́єши, і роди́ти возмогла́ єси́; ми же, та́їнству див'я́щеся, ві́рно вопіє́м:

Ра́дуйся, прему́дрости Бо́жия Прия́телище; ра́дуйся, промишле́нія Єго́ Сокро́вище.

Ра́дуйся, любому́дрия нему́дрия явля́ющая; ра́дуйся, хитрослове́сния безслове́сния облича́ющая.

Ра́дуйся, я́ко обуя́ша лю́тії взиска́теле; ра́дуйся, я́ко ув'ядо́ша баснотво́рці.

Ра́дуйся, афіне́йськая плете́нія растерза́ющая; ра́дуйся, ри́барськія мре́жі ісполня́ющая.

Ра́дуйся, із глубини́ неві́дінія ізвлача́ющая; ра́дуйся, мно́гі в ра́зумі просвіща́ющая.

Ра́дуйся, Кораблю́ хотя́щих спасти́ся; ра́дуйся, Приста́нище жите́йських пла́ваній.

Ра́дуйся, Неві́сто Неневі́стная.

Спасти́ хотя́ мир, І́же всіх Украси́тель, к сему́ самообітова́н при́йде, і Па́стир сий я́ко Бог, нас ра́ди яви́ся по нам челові́к; подо́бним бо подо́бноє призва́в, я́ко Бог сли́шить: Аллилу́я.

Стіна́ єси́ ді́вам, Богоро́дице Ді́во, і всім к Тебі́ прибіга́ющим; і́бо небесе́ і землі́ Творе́ць устро́ї Тя, Пречи́стая, все́лься во утро́бі Твоє́й, і вся приглаша́ти Тебі́ научи́в:

Ра́дуйся, Сто́лпе ді́вства; ра́дуйся, Двер спасе́нія.

Ра́дуйся, Нача́льнице ми́сленнаго назда́нія; ра́дуйся, Пода́тельнице Бо́же́ственния бла́гости.

Ра́дуйся, Ти бо обнови́ла єси́ зача́тия сту́дно; ра́дуйся, Ти бо наказа́ла єси́ окра́денния умо́м.

Ра́дуйся, тли́теля сми́слов упражня́ющая; ра́дуйся, Сі́ятеля чистоти́ ро́ждшая.

Ра́дуйся, Черто́же безсі́меннаго уневі́щенія; ра́дуйся, ві́рних Го́сподеві сочета́вшая.

Ра́дуйся, до́брая Младопита́тельнице ді́вам; ра́дуйся, невістокраси́тельнице душ святи́х.

Ра́дуйся, Неві́сто Неневі́стная.

Пі́ніє вся́коє побіжда́ється, спростре́тися тща́щеєся ко мно́жеству мно́гих щедро́т Твої́х; равночи́сленния бо піска́ пі́сні а́ще прино́сим Ті, Царю́ Святи́й, нічто́же соверша́єм досто́йно, я́же дал єси́ нам, Тебі́ вопію́щим: Аллилу́я.

Світоприє́мную свіщу́, су́щим во тьмі я́вльшуюся, зрим Святу́ю Ді́ву; невеще́ственний бо вжига́ющи огнь, наставля́єть к ра́зуму Бо́же́ственному вся, заре́ю ум просвіща́ющая, зва́нієм же почита́ємая, си́ми:

Ра́дуйся, Луче́ у́мнаго Со́лнця; ра́дуйся, Світи́ло незаходи́маго Сві́та.

Ра́дуйся, Мо́лніє, ду́ші просвіща́ющая; ра́дуйся, я́ко гром, враги́ устраша́ющая.

Ра́дуйся, я́ко многосві́тлоє возсіява́єши просвіще́ніє; ра́дуйся, я́ко многотеку́щую істоча́єши ріку́.

Ра́дуйся, купі́лі живопису́ющая о́браз; ра́дуйся, гріхо́вную от'є́млющая скве́рну.

Ра́дуйся, Ба́не, омива́ющая со́вість; ра́дуйся, Ча́ше, че́рплющая ра́дость.

Ра́дуйся, Обоня́ніє Христо́ва благоуха́нія; ра́дуйся, Животе́ та́йнаго весе́лія.

Ра́дуйся, Неві́сто Неневі́стная.

Благода́ть да́ти восхоті́в долго́в дре́вніх, всіх долго́в Ріши́тель челові́ком, при́йде Собо́ю ко отше́дшим Того́ благода́ті; і, раздра́в рукописа́ніє, сли́шить от всіх си́це: Аллилу́я.

Пою́ще Твоє́ Рождество́, хва́лим Тя всі, я́ко одушевле́нний храм, Богоро́дице; во Твоє́й бо всели́вся утро́бі, содержа́й вся руко́ю Госпо́дь, освяти́, просла́ви, научи́ вопи́ти Тебі́ всіх:

Ра́дуйся, Селе́ніє Бо́га і Сло́ва; ра́дуйся, Свята́я святи́х бо́льшая.

Ра́дуйся, Ковче́же позлаще́нний Ду́хом; ра́дуйся, Сокро́вище живота́ неістощи́моє.

Ра́дуйся, честни́й ві́нче люде́й благочести́вих; ра́дуйся, честна́я Похвало́ ієре́єв благогові́йних.

Ра́дуйся, Це́ркве непоколеби́мий Сто́лпе; ра́дуйся, ца́рствія неруши́мая Стіно́.

Ра́дуйся, Є́юже воздви́жуться побі́ди; ра́дуйся, Є́юже низпа́дають вразі́.

Ра́дуйся, ті́ла моєго́ врачева́ніє; ра́дуйся, душі́ Моєя́ спасе́ніє.

Ра́дуйся, Неві́сто Неневі́стная.

О Всепі́тая Ма́ти, ро́ждшая всіх святи́х Святі́йшеє Сло́во, ни́нішнєє приє́мши приноше́ніє, от вся́кия ізба́ви напа́сти всіх, і бу́дущия ізми́ му́ки, Тебі́ вопію́щих: Аллилу́я.

Цей кондак читається тричі, потім 1-й ікос і 1-й кондак.

А́нгел предста́тель с небесе́ по́слан бисть, рещи́ Богоро́диці: "Ра́дуйся!" і, со безпло́тним гла́сом воплоща́єма Тя зря, Го́споди, ужаса́шеся і стоя́ше, зови́й к Ней такова́я:

Ра́дуйся, Є́юже ра́дость возсія́єть; ра́дуйся, Є́юже кля́тва ісче́знеть.

Ра́дуйся, па́дшаго Ада́ма воззва́ніє; ра́дуйся, слез Є́виних ізбавле́ніє.

Ра́дуйся, Висото́ неудобовосходи́мая челові́чеськими по́мисли; ра́дуйся, Глубино́ неудобозри́мая і а́нгельськима очи́ма.

Ра́дуйся, я́ко єси́ Царе́во Сіда́лище; ра́дуйся, я́ко но́сиши Нося́щаго вся.

Ра́дуйся, Звіздо́ явля́ющая Со́лнце; ра́дуйся, Утро́бо Боже́ственнаго воплоще́нія.

Ра́дуйся, Є́юже обновля́ється твар; ра́дуйся, Є́юже покланя́ємся Творцю́.

Ра́дуйся, Неві́сто Неневі́стная.

Взбра́нной Воєво́ді побіди́тельная, я́ко ізба́вльшеся от злих, благода́рственная воспису́єм Ті раби́ Твої́, Богоро́дице; но, я́ко іму́щая держа́ву непобіди́мую, от вся́ких нас бід свободи́, да зове́м Ті: Ра́дуйся, Неві́сто Неневі́стная.

Пресвята́я Влади́чице моя́ Богоро́дице, святи́ми Твої́ми і всеси́льними мольба́ми отжени́ от мене́, смире́ннаго і окая́ннаго раба́ Твоєго́, уни́ніє, забве́ніє, неразу́міє, нераді́ніє, і вся скве́рная, лука́вая і ху́льная помишле́нія от окая́ннаго моєго́ се́рдця і от помраче́ннаго ума́ моєго́, і погаси́ пла́мень страсте́й мої́х, я́ко нищ єсьм і окая́нен; і ізба́ви м'я от мно́гих і лю́тих воспомина́ній і предприя́тій, і от всіх дійств злих свободи́ м'я; я́ко Благослове́нна єси́ от всіх родо́в, і сла́виться пречестно́є і́м'я Твоє́ во ві́ки віко́в. Амі́нь.