Акафіст Успінню Пресвятої Владичиці нашої Богородиці

Ізбра́нной от всіх родо́в Бо́жієй Ма́тері і Цари́ці, восходя́щей от землі́ к небесі́, благогові́йная пі́нія о пречеcтні́м Твоє́м Успе́нії прино́сим, раби́ Твої́, Богоро́дице. Ти же, я́ко іму́щая побі́ду над сме́ртію, от вся́ких нас смертоно́сних бід свободи́, да зове́м Ті:

Ра́дуйся, Обра́дованная, во успе́нії Твоє́м нас не оставля́ющая.

А́нгел предста́тель по́слан бисть, рещи́ Богоро́диці ко преми́рним Єя́ возше́ствіє; і прийти́ пред'явля́ше к Ней Си́ну Єя́ і Бо́гу, сві́тло о Ней блиста́яся, і стоя́, зови́й такова́я;

Ра́дуйся, прера́дованная Ма́ти Царе́ва; ра́дуйся, Небе́сная Цари́це, Ма́ти Бо́га і Го́спода Небесе́ і землі́.

Ра́дуйся, предпочте́нная превели́чеством прише́ствія к Тебі́ Си́на Твоєго́ і Бо́га; ра́дуйся, возвели́ченная ізвіще́нієм Твоєго́ к Си́ну отше́ствія.

Ра́дуйся, от всіх родо́в Бо́гом ізбра́нная; ра́дуйся, свято́є Вмісти́лище Сло́ва Бо́жия.

Ра́дуйся, проро́чеськаго прорече́нія Ісполне́ніє; ра́дуйся, Апо́столом пречестни́й Ві́нче.

Ра́дуйся, святи́телєм украше́ніє, і свяще́нником добро́то; ра́дуйся, прави́телєм удобре́ніє і держа́во.

Ра́дуйся, Богому́дрих і́ноков возведе́ніє к го́рнему Ца́рствію; ра́дуйся, отверза́ющая ра́йськия две́рі христия́нському ро́ду, при́сно Тя блажа́щему.

Ра́дуйся, Обра́дованная, во успе́нії Твоє́м нас не оставля́ющая.

Ви́дяще апо́столов лик, всеси́льним манове́нієм от коне́ць землі́ на о́блаціх предста́вших ко пречестно́му Твоєму́, Пренепоро́чная, успе́нію, священнонача́льниці, Діони́сій Небе́сний Таї́нник, Ієрофе́й ди́вний і Тимофе́й, с Боголі́пною че́стію свяще́нства, поя́ху Бо́гу: Аллилу́я.

Разу́мная вся твар, старі́йшая чинонача́лія А́нгельская, прийдо́ша со свої́м Царе́м, І́же во Своя́ живонача́льнійшия ру́ці ду́шу Ма́тере Своєя́ прия́ть; те́плий же ві́рою Петр со слеза́ми мно́гая к Ней ізрече́, зови́й:

Ра́дуйся, ко преми́рним, Ма́ти Творця́ ми́ру, Восходя́щая; ра́дуйся, к пренебе́сним, Простра́ннійшая небе́с, Взе́млющаяся.

Ра́дуйся, четвероча́стноє стихі́й освяти́вшая Твої́м восхожде́нієм; ра́дуйся, небе́сних возвесели́вшая Твої́м прехожде́нієм.

Ра́дуйся, во Ієрусали́м го́рній прекра́сний Прия́тая; ра́дуйся, в нерукотворе́нния хра́ми прера́достно Вше́дшая.

Ра́дуйся, херуви́мов і серафи́мов Цари́це; ра́дуйся, арха́нгелов і а́нгелов Влади́чице.

Ра́дуйся, Прибі́жище ві́рним, і Ізбавле́ніє; ра́дуйся, достоя́нію Твоєму́ По́мощ і Защище́ніє.

Ра́дуйся, о всем ми́рі христия́нстім к Бо́гу Хода́тайце; ра́дуйся, благ вся́чеських Всеблага́я Пода́тельнице.

Ра́дуйся, Обра́дованная, во успе́нії Твоє́м нас не оставля́ющая.

Си́ла Ви́шняго восхи́ти от Інді́ї Фому́, за ні́коє ізволе́ніє Бо́жиє не прилу́чшуся єму́ в пречестно́є успе́ніє Богома́тере, і предпоста́ви живоприє́мному Єя́ гро́бу, І́же Преста́вльшуюся прини́к ви́діти, уразумі́ Вознесе́нную на Небеса́ с ті́лом, і ві́ровав о сем, возопи́: Аллилу́я.

Імі́я в себі́ помишле́ніє учени́к, я́ко Бо́жиїм смотре́нієм бі єму́, не обрісти́ся ко провожде́нію Богома́тере с про́чими вку́пі, обра́дован бив о безсме́ртнім Єя́ успе́нії, сія́ вопія́ше к Ней:

Ра́дуйся, Восприє́млемая от землі́ дла́ньма Си́на Твоєго́; ра́дуйся, ко преви́шнім Возше́дшая наслажда́тися сла́ви Єго́.

Ра́дуйся, Провожда́ємая от всіх чинонача́лій а́нгельських в го́рняя; ра́дуйся, Под'ємлемая Херуви́ми в Небе́сная і Наднебеcная.

Ра́дуйся, в Небе́сних враті́х от старі́йших сил велелі́пно пі́сньми Возноси́мая; ра́дуйся, от всіх небе́сних гра́ждан Окружа́ємая і Блажи́мая.

Ра́дуйся, Не́бо Земно́є, к го́рнему селе́нію Возви́шенноє; ра́дуйся, Престо́ле Госпо́день, от землі́ Вознесе́нний в Ца́рствіє Небе́сноє.

Ра́дуйся, Предста́тельство на́ше і крі́пкоє Заступле́ніє; ра́дуйся, грі́шником Спору́чнице во спасе́ніє.

Ра́дуйся, христия́ном Цари́це, і по Бо́зі Наде́ждо Небе́снаго Ца́рствія; ра́дуйся, Ма́ти Живота́, і по Го́споді нам Упова́ніє жи́зні ві́чния.

Ра́дуйся, Обра́дованная, во успе́нії Твоє́м нас не оставля́ющая.

Бу́рю внутрь імі́я помишле́ній неві́рних євре́їн Аффо́ній, і зря богоно́сними апо́столи Богома́тере Пречестно́є Ті́ло всечестні ко гро́бу несе́нноє, ко опроверже́нію устреми́ся; внеза́пу же, єгда́ со осліпле́нієм о́чію, ру́ці єго́ от'я́ті ко одру́ приліпле́ні ви́сясті, ві́рою Ма́тер Бо́жию іспові́даше, вопія́ Бо́гу: Аллилу́я.

Сли́шавше таїнниці і самови́дці Сло́ва А́нгелов пою́щих преви́шними пі́сньми, при погребе́нії Богоприя́тнаго Ті́ла Бо́жия Ма́тере, і честь пода́ти хотя́ще Богоуго́дную, потща́шася согла́сно пі́ти, глаго́люще:

Ра́дуйся, благові́стіє Приє́мшая о преше́ствії Твоє́м в го́рнеє Ца́рствіє; ра́дуйся, от благовісти́вшаго Гавриї́ла Приє́мшая ра́достнаго рая́ вра́віє.

Ра́дуйся, пречестно́є херуві́мськоє мно́жество Просвіти́вшая; ра́дуйся, пресла́вноє серафі́мськоє єстество́ Возра́довавшая.

Ра́дуйся, от патріа́рхов Прообразова́нная; ра́дуйся, от проро́ков Предвозвіще́нная.

Ра́дуйся, злу́ю де́рзость іуде́єву ско́ро Отмсти́вшая; ра́дуйся, ісціле́ніє тому́жде Пода́вшая.

Ра́дуйся, Обрати́вшая в ві́ру аффо́нієво неві́ріє; ра́дуйся, ві́рноє того́ Приє́мшая іспові́даніє.

Ра́дуйся, Возводя́щая к Небесі́, любо́в і ві́ру к Тебі́ іму́щих; ра́дуйся, Спаса́ющая ві́рою і́м'я Твоє́ призива́ющих.

Ра́дуйся, Обра́дованная, во успе́нії Твоє́м нас не оставля́ющая.

Боготе́чния зві́зди, апо́столи святі́ї, в поднебе́сній разсі́яннії ра́ди Єва́нгелія, восхище́ні би́ша на о́блаціх, по широті́ возду́шній, ко погребе́нію Ма́тере Госпо́дні: Ю́же пі́ньми і пі́сньми провожда́юще, с невеще́ственними взива́ху: Аллилу́я.

Ви́дівше Богови́дці своєго́ Влади́ку, в ру́ці Ма́тере Своєя́ ду́шу приє́мша, і Го́спода Того́ разумі́вше, потща́шася священносло́вія пі́сньми благосло́вні воспі́ти Ю:

Ра́дуйся, Цари́це, над всі́ми Ца́рствующаго Носи́вшая; ра́дуйся, і Сама́ рука́ма Єго́ Си́но́внима носи́мая.

Ра́дуйся, Ски́птре Царський в Христо́вой десни́ці; ра́дуйся, в руці́ Но́я, Ві́тве Голуби́ці.

Ра́дуйся, Же́зле Ааро́нов, Прозя́бший нетлі́ніє; ра́дуйся, Кри́не Неув'яда́ємий, Процві́тшій безсме́ртіє.

Ра́дуйся, Богоотця́ Дави́да Цівни́це Богодохнове́нная; ра́дуйся, проро́чествія Єго́ Воста́вшая Сла́во, Псалти́рю і Гу́слі Прекра́сния.

Ра́дуйся, Одушевле́нний святи́ні Госпо́дні Киво́те; ра́дуйся, в поко́й Госпо́день Воскре́сший Наш Животе́.

Ра́дуйся, Ски́ніє, от херуви́мов Осіня́ємая; ра́дуйся, Свята́я Святи́х, от серафи́мов Глаго́лемая.

Ра́дуйся, Обра́дованная, во успе́нії Твоє́м нас не оставля́ющая.

Пропові́дници Богоно́снії апо́столи, по отше́ствії ко преми́рним Бо́жия Ма́тере, во о́бщем сіді́нії оби́чния трапе́зи би́вше, і Предложе́ніє ча́сті Хлі́ба, во і́м'я Госпо́днє вознося́ще, внеза́пу сви́ше Богоро́дицю Цари́цю прише́дшую со світоно́сними а́нгели зря́ху, і мир тім от Си́на і Бо́га Пода́вшую сли́шавше, возгласи́ша о сем: Аллилу́я.

Возсія́ нам Со́лнце Пра́вди Христо́с Бог, от Твої́х Пречи́стих ложе́сн во́лею, і благоразу́мієм пропові́данія чрез апо́столи мир просвіти́, і Тя Богома́тер от ро́да і в род просла́ви. Ті́мже і ми всі ублажа́єм Тя, вопію́ще Ті:

Ра́дуйся, Присноблаже́нная от всіх родо́в во ві́ки; ра́дуйся, Благоутро́бная і Ми́лостивая на челові́ки.

Ра́дуйся, учени́ческому ли́ку обіща́ніє Іспо́лнившая; ра́дуйся, присіще́нієм Твої́м от Си́на Твоєго́ і Бо́га, мир тому́ Пода́вшая.

Ра́дуйся, Всежела́тельноє святи́х Сла́дкоє Зрі́ніє; ра́дуйся, преподо́бних ма́терей і дів святи́х Всевеселя́щеє Ра́дованіє.

Ра́дуйся, Преходя́щая ра́йськоє селе́ніє пра́ведних; ра́дуйся, Посіща́ющая всіх во сла́ві небе́сній су́щих.

Ра́дуйся, Нача́ло челові́чеськаго спасе́нія; ра́дуйся, Ісполне́ніє всіх благи́х жела́нія.

Ра́дуйся, по Бо́зі Царі́ ца́рствующих Богоро́дице Цари́це; ра́дуйся, по Го́споді госпо́дствующих, Влади́ці на́шем, Госпоже́ і Влади́чице.

Ра́дуйся, Обра́дованная, во успе́нії Твоє́м нас не оставля́ющая.

Хотя́щих всіх с ві́рою входи́ти в храм Твой Святи́й, Богоро́дице, при́сно спаса́єши, і сла́в’ящих Тя, от вся́ких напа́стей і бід свобожда́єши; Ті́мже і правосла́вним христия́ном, присноблажа́щим Тя, побі́ди на сопроти́вния да́руй і вся ко спасе́нію проше́нія нам подава́й, о сем моля́щимся Тебі́, і пою́щим Бо́гу: Аллилу́я.

Но́вую показа́ твар, я́влься нам всіх Творе́ць Госпо́дь Тобо́ю, Богоро́дице. Ти же сро́дноє промишле́ніє о нас к Нему́ іму́щи, Честні почита́ющих пречестно́є Твоє́ успе́ніє, прийми́ сицева́я Тебі́ вопію́щих:

Ра́дуйся, Ма́ти Бо́гу Ізбра́нная от земни́х; ра́дуйся, Преви́шшая земни́х і небе́сних.

Ра́дуйся, херуви́мов і серафи́мов горі́ Превозше́дшая; ра́дуйся, лик учени́ческий о́блаком ко погребе́нію Ті до́лі Совоку́пльшая.

Ра́дуйся, Фому́ по погребе́нії Твоє́м си́лою Божиєю предпоста́вившая ізря́дніє; ра́дуйся, чрез Него́ уві́рившая Твоє́ на не́бо с пло́тію преселе́ніє.

Ра́дуйся, красото́ю всіх доброді́телей Укра́шенная; ра́дуйся, красні́йшему па́че сино́в челові́чеських Си́нові своєму́ Сопричте́нная.

Ра́дуйся, я́ко фі́нікс пло́тію воскре́сшею Процві́тшая; ра́дуйся, я́ко кедр в Лива́ні небе́сном Умно́жившаяся.

Ра́дуйся, Дре́во Живота́ насажде́нноє посреді́ рая́ преви́шняго; ра́дуйся, Ковче́же ми́сленний, Возви́шенний в го́рняя от пото́па сме́ртнаго.

Ра́дуйся, Обра́дованная, во успе́нії Твоє́м нас не оставля́ющая.

Стра́нно в преви́шних ві́дуще Тя ізбра́нная, я́ко Со́лнце, Влади́чице, внутр пренебеcних недоми́слимих красо́т і неізрече́нних добро́т, уми́льно к Си́ну і Бо́гу дла́ньма Єго́ Держи́му Возше́дшую, і прера́достно Прекло́ншуюся живонача́льній Єго́ десни́ці, о сем ви́ну вопіє́м: Аллилу́я.

Вся би́вши горі́ к небе́сним взята́, і земни́х не оставля́я, Богома́ти, рука́ма Си́но́внима Носи́ма, в незаходи́мая вни́де, во о́ний град всесвітя́щий і прекра́сний Ієрусали́м Ви́шній, херуви́ми Обстої́ма, со всі́ми небе́сними си́лами, іді́же сли́шить пою́щих сія́;

Ра́дуйся, Єя́же Пресвята́я душа́ в ви́шнем всесві́тлом Сіо́ні вселя́ється; ра́дуйся, Єя́же і нетлі́нноє ті́ло та́можде с душе́ю ку́пно прославля́ється.

Ра́дуйся, Вше́дшая в престо́льний град Самаго́ Вседержи́теля; ра́дуйся, Возне́сшаяся в прекра́сний рай Ви́шняго Насади́теля.

Ра́дуйся, Пренесе́нная во Град основа́нний от ка́меней всесвітя́щих; ра́дуйся, Введе́нная во огра́ду обстої́мую во́ї сил преви́шних.

Ра́дуйся, преви́шше небе́с во благолі́піє Бо́жиє Взя́тая; ра́дуйся, па́че всіх невеще́ственних умо́в Почте́ная.

Ра́дуйся, принося́щая к Си́ну Своєму́ і Бо́гу моле́ніє ві́рних; ра́дуйся, і Сама́ непреста́нно у Престо́ла Си́на Твоєго́ і Бо́га моля́щаяся о всіх.

Ра́дуйся, Предста́тельнице к Бо́гу мир спаса́ющая; ра́дуйся, Засту́пнице ро́ду христия́нському от Бо́га дарова́нная.

Ра́дуйся, Обра́дованная, во успе́нії Твоє́м нас не оставля́ющая.

Вся́коє єстество́ а́нгельськоє превозно́сить Тя, Богоро́дице, челові́честії же ро́ди всі Ма́тер Тя Бо́жию сла́вим, і почита́єм пречестно́є Твоє́ успе́ніє, Цари́це; Тебе́ бо ра́ди земні́ї небе́сним совокупля́ються, согла́сно пою́ще Бо́гу: Аллилу́я.

Віти́йства Боговіща́нних проро́ческих рече́ній, ни́ні зрим о Тебі́ сби́вшаяся Богоро́дице, я́ко воі́стину Бо́га пло́тію родила́ єси́ нам. Ті́мже та́їнству словесе́ Бо́жия ві́рующе, вопіє́м:

Ра́дуйся, Зако́на і проро́ков Глави́зно Соверше́нная; ра́дуйся, Звіздо́ Іа́ковля, Валаа́мом Пророкова́нная.

Ра́дуйся, О́дре Царя́ вели́каго, Віща́нний Соломо́ном; ра́дуйся, Руно́ Ороше́нноє Ісу́сом, Образова́нноє Гедео́ном.

Ра́дуйся, Неопали́мая Купино́, законополо́жником Предзри́мая; ра́дуйся, Горо́ Свята́я, му́жем жела́нія усмотре́нная.

Ра́дуйся, Лі́ствице Небе́сная, Іа́ковом предви́димая; ра́дуйся, Две́ре Непроходи́мая, Єзеки́їлем Предзри́мая.

Ра́дуйся, Со́лнце селе́нія Христо́ва, псалмопі́вцем Пред'явле́нноє; ра́дуйся, Та́їнство, многообра́зні проро́ки Пронарече́нноє.

Ра́дуйся, проро́чеських глаго́л всіх предрече́нних о Тебі́, коне́ць Прине́сшая; ра́дуйся, Ви́шняго смотре́нія вся за спасе́ніє ми́ра Соверши́вшая.

Ра́дуйся, Обра́дованная, во успе́нії Твоє́м нас не оставля́ющая.

Спасти́ хотя́ мир, І́же всіх Госпо́дь, от земна́го Тя ро́да ізбра́ в Ма́тер Себі́, і нас ді́ля бив челові́к, взи́де, отню́дуже сни́де, к Небесі́ от землі́, і Тебе́ с Собо́ю возведе́ ко пребива́нію во сла́ві ві́чній, і соца́рствованію с Собо́ю конця́ не іму́щему. Ті́мже я́ко Бог сли́шить от всіх: Аллилу́я.

Стіна́ єси́ ві́рним, Богоро́дице Ді́во, і Заступле́ніє всім к Тебі́ прибіга́ющим; і́бо небесе́ і землі́ Творе́ць от Тебе́ пло́тію проше́д, Пречи́стая, ду́хом і ті́лом в небе́сная Тя пресели́ ко ближа́йшему предста́тельству о всіх, ї́хже приглаша́ти научи́:

Ра́дуйся, Гра́де Царя́ Вели́каго верху́ гори́ небе́сния; ра́дуйся, Стіно́ і Покро́ве, не Кри́ющийся от на́шего притека́нія.

Ра́дуйся, ві́рним царе́м на враги́ Посо́бствующая; ра́дуйся, наше́ствія ага́рянская Побіжда́ющая.

Ра́дуйся, ві́ри благочести́вия Недви́жимоє Сохране́ніє; ра́дуйся, єрети́чествующих полко́в Разоре́ніє.

Ра́дуйся, Ра́дость і Умире́ніє ми́ру Су́щая; ра́дуйся, всегуби́тельнаго а́да Попра́вшая.

Ра́дуйся, во́їнствующих на плоть цілому́дрієм, Ізря́дноє Вінча́ніє; ра́дуйся, му́ченичеських по́двигов всечестно́є Прославле́ніє.

Ра́дуйся, преподо́бних трудо́м Хода́тайце блаже́ннаго упокоє́нія; ра́дуйся, і́ноком благоскорб'я́щим Пода́тельнице ві́чнаго ра́дованія.

Ра́дуйся, Обра́дованная, во успе́нії Твоє́м нас не оставля́ющая.

Пі́ніє вся́коє Богодухнове́нних пі́сней, не довлі́єть от нас к похвалі́ всечи́стна́го успе́нія Твоєго́, Всехва́льная Влади́чице, Цари́це, Богоро́дице; но усе́рдно Тебі́ прино́сим, я́ко Ма́тері Царя́ всіх, смире́нноє моле́ніє на́ше, с небе́сними чи́ньми пою́ще Єди́ному досто́йно Прославля́ющему Тя Бо́гу: Аллилу́я.

Світоприє́мная Свіща́ І́стиннаго Сві́та, су́щим нам на землі́ я́вльшися, ду́ші просвіща́єши, і чту́щих Твоє́ всечестно́є преставле́ніє к ра́зуму Бо́же́ственному наставля́єши, да поє́м Ті сицева́я;

Ра́дуйся, Свіще́ Неугаси́мая огня́ невеще́ственнаго; ра́дуйся, Заре́ Незаходи́мая Сві́та невече́рняго.

Ра́дуйся, луно́ от Со́лнця пра́вди облистава́ємая; ра́дуйся, Сві́тлосте во тьмі світя́щая.

Ра́дуйся, Світи́льниче на сві́щниці преви́шнем поста́вленний; ра́дуйся, Істо́чниче жи́зні, із гро́ба во світ ізведе́нний.

Ра́дуйся, Ма́ти Сві́та у́мнаго, благочести́вих ду́ші просвіща́ющаго; ра́дуйся, Ма́ти всіх Бо́га, озло́бленних ду́ші утіша́ющаго.

Ра́дуйся, упова́ющим на Тя живота́ коне́ць непости́дний Да́рующая; ра́дуйся, достоя́ніє Бо́жиїм і Свої́м рабо́м, на суді́ Си́на Твоєго́, одесну́ю Єго́ устроя́ющая.

Ра́дуйся, Преблаже́нная, я́ко Тобо́ю блаже́нні єсьми́ і ми, І́же помо́щницю Тя і́мами; ра́дуйся, Преблагоcлове́нная в род і род, я́ко Госпо́дь с Тобо́ю, і Тобо́ю с на́ми.

Ра́дуйся, Обра́дованная, во успе́нії Твоє́м нас не оставля́ющая.

Благода́ть високопресто́льния сла́ви, на небе́сі́х дарова́нную Богома́тері, почте́ной сіді́нієм одесну́ю Си́на Єя́ і Бо́га, ви́дяще го́рнії уми́, под'я́ша Ю престо́ли і си́ли, окружи́ша нача́ла і вла́сті, припадо́ша стра́шнії Херуви́ми, Серафи́ми і Госпо́дьства, со Арха́нгели і А́нгели вопію́ще: Аллилу́я.

Пою́ще всечестно́є Твоє́ успе́ніє, восхваля́єм всі ко пренебе́сним возше́ствіє Твоє́, Цари́це Богома́ти; Ти же освяти́, просла́ви і спаси́ всіх любо́вію пою́щих Тебі́:

Ра́дуйся, Очи́стившая зе́млю пречи́стими ног Твої́х стопа́ми; ра́дуйся, Освяти́вшая возду́х восхожде́нієм Твої́м к Небесі́.

Ра́дуйся, на небе́сний круг Возступи́вшая; ра́дуйся, вся добро́ти неізрече́нния Зря́щая.

Ра́дуйся, во сла́ві присідя́щая Престо́лу Си́на Твоєго́ і Бо́га; ра́дуйся, с Си́ном і Бо́гом ві́чно Ца́рствующая.

Ра́дуйся, Красото́ в десни́ці Госпо́ній, Украша́ющая блажа́щих Тя всіх небе́сних; ра́дуйся, Обра́довавшая наді́янієм на Тя всіх земни́х.

Ра́дуйся, Облече́нная в со́лнце, Сія́ющая благода́тію і сла́вою всей вселе́нній; ра́дуйся, Обіща́вшая сохраня́ти і спаса́ти призива́ющих Тя всіх в поднебеcній.

Ра́дуйся, от христия́нских родо́в Ма́ти Бо́жия Почита́ємая, і Богоро́диця Імену́ємая; ра́дуйся, от восто́к Со́лнця до за́пад, пресла́вно і правосла́вно от всіх благочести́вих Сла́вимая.

Ра́дуйся, Обра́дованная, во успе́нії Твоє́м нас не оставля́ющая.

О Всепі́тая Ма́ти Безсме́ртнаго Царя́ небесе́ і землі́, Христа́ Бо́га на́шего, живу́щая і по сме́рті, ни́нішняя приноше́нія о всечестні́м Твоє́м успе́нії от нас приє́мши, в жи́зні сей і в сме́ртнім успе́нії на́шем, от вся́кия напа́сти, бід і му́ки ізба́ви, і Небе́снаго Ца́рствія нас, Цари́це, сподо́би, о Тебі́ вопію́щих: Аллилу́я.

О Пресвята́я Богоро́дице Ді́во, Влади́чице, ви́шшая а́нгел і арха́нгел і всея́ тва́рі честні́йшая, а́нгельськоє вели́коє Удивле́ніє, проро́ческая висо́кая Про́повідь, апо́стольская пресла́вная Похвало́, святи́телей ізря́дноє Украше́ніє, му́чеников крі́пкоє Утвержде́ніє, і́ноков спаси́тельноє Наставле́ніє, по́стников неізнемога́ющеє Воздержа́ніє, ді́вствующих Чистото́ і Сла́во, ма́терей ти́хоє Весе́ліє, младе́нцев Му́дросте і Наказа́ніє, вдови́ць і си́рих Корми́тельнице, наги́х Одія́ніє, боля́щих Здра́віє, плі́нников Ізбавле́ніє, по мо́рю пла́вающих Тишино́, обурева́ємих небу́рноє Приста́нище, блужда́ющих нетру́дная Наста́внице, путеше́ствующих ле́гкоє Прохожде́ніє, тружда́ющихся благо́є Поко́їще, в біда́х су́щих ско́рая Засту́пнице, оби́димих Покро́ве і Прибі́жище, ненаді́ющихся Наді́яніє, тре́бующих Помо́щнице, печа́льних при́сноє Утіше́ніє, ненави́димих любо́вноє Смире́ніє, грі́шников Спасе́ніє і к Бо́гу Присвоє́ніє, правові́рних всіх тве́рдоє Огражде́ніє, непобіди́моє Поможе́ніє і Заступле́ніє! Тобо́ю нам, Влади́чице, Неви́димий Ви́дим бисть, і Тебі́ мольбу́ прино́сим, Госпоже́, грі́шнії раби́ Твої́: о преми́лостивая і пречу́дная Сві́та у́мнаго Цари́це, ро́ждшая Царя́ Христа́, Бо́га на́шего, Живода́вця всіх, от Небе́сних сла́вимая і от земни́х хвали́мая, а́нгельський У́ме, світоза́рная Звіздо́, святи́х пресвяті́йшая, Влади́чице всіх тва́рей, Боголі́пная Діви́це, нескве́рная Неві́сто, Пала́то Ду́ха Пресвята́го, о́гненний Престо́ле Неви́димаго Царя́, небе́сний Киво́те, Носи́ло Сло́ва Бо́жия, огнеобра́зная Колесни́це, Поко́їще Жива́го Бо́га, неізрече́нноє Составле́ніє пло́ті Христо́ви, гніздо́ Орла́ Небе́снаго, Го́рлице Богогла́сная, Голуби́це кро́ткая, ти́хая і незло́бивая, Ма́ти чадолюби́вая, ми́лостей Бе́здно, разверга́ющая ту́чу гні́ва Бо́жия, неізмі́римая Глубино́, неізрече́нная Та́йно, несві́домоє Чу́до, нерукотворе́нная Це́ркве Єди́наго Царя́ всіх вік, благоуха́нноє Кади́ло, честна́я Багряни́це, Боготка́нная Порфи́ро, душе́вний Раю́, живоно́снаго са́да О́трасле, Цві́те прекра́сний, процві́тшій нам небе́сноє весе́ліє, Гро́зде спасе́нія на́шего, Ча́ше Царя́ Небе́снаго, в Не́йже раствори́ся от Ду́ха Свята́го Вино́ неісчерпа́ємия благода́ті, Хода́тайце Зако́на, Зача́ло і́стинния ві́ри Христо́ви, непоколеби́мий Сто́лпе, Мечу́ я́рости Бо́жия на богопроти́вних, бісо́в Устраше́ніє, во бра́нех Побіжде́ніє, христия́н всіх нело́жная Храни́тельнице і ми́ра всего́ ізві́стноє Спасе́ніє! О Всеми́лостивая Госпоже́, Ді́во Влади́чице, Богоро́дице, усли́ши нас, моля́щихся Тебі́, і яви́ ми́лость Твою́ на лю́дех Твої́х, моли́ Си́на Своєго́ ізба́витися нам от вся́каго зла і сохрани́ оби́тель на́шу і вся́ку оби́тель, і град, і страну́ ві́рних, і лю́ди, благоче́стно прибіга́ющия і призива́ющия і́м'я Твоє́ свято́є, от вся́кия напа́сти, губи́тельства, гла́да, тру́са, пото́па, огня́, меча́, наше́ствія іноплеме́нников і междоусо́бния бра́ні, от вся́кия болі́зні і вся́каго обстоя́нія, да ні ра́нами, ні преще́нієм, ні мо́ром, ні вся́ким пра́ведним гні́вом Бо́жиїм ума́ляться раби́ Твої́. Но соблюда́й і спаса́й ми́лостію Своє́ю, Госпоже́, за ни моля́щися, і поле́зноє благорастворе́ніє возду́ха во вре́мені пло́днаго приноше́нія нам да́руй. Облегчи́, возста́ви і поми́луй, преми́лостивая Влади́чице, Богоро́дице препі́тая, во вся́кой біді́ і ну́жді су́щия. Пом'яни́ раби́ Твоя́ і не пре́зри слез і воздиха́нія на́шего, і обнови́ нас бла́гостію Своєя́ ми́лості, да со благодаре́нієм утіша́ємся, обрі́тше Тя Помо́щницю. Умилосе́рдися, Госпоже́ Пречи́стая, на немощни́я лю́ди Твоя́, Наде́ждо на́ша. Разсі́янния собери́, заблу́ждшия на путь Пра́вий наста́ви, отпа́дшия от благочести́вия оте́чеськия ві́ри па́ки возврати́, ста́рость поддержи́, ю́ния вразуми́, младе́нці воспита́й і просла́ви сла́в'ящия Тя, ізря́дніє же, Це́рков Си́на Твоєго́ соблюди́ і сохрани́ в долготу́ дній.

О Ми́лостивая і преми́лостивая Цари́це небесе́ і землі́, Богоро́дице Присноді́во! Хода́тайством Твої́м поми́луй вся правосла́вния христия́ни, сохраня́ющи їх под кро́вом ми́лості Твоєя́, ри́зою Твоє́ю честно́ю защити́ і моли́ із Тебі́ вопло́щшагося без сі́мені Христа́, Бо́га на́шего, да препоя́шеть ни сви́ше си́лою на вся ви́димия і неви́димия враги́ на́ша. Спаси́ же і поми́луй, Госпоже́, вели́каго господи́на і отця́ на́шего (ім'я), Блаженнійшаго митрополита Ки́євськаго і всея́ Украї́ни, преосвяще́нния митрополи́ти, архієпи́скопи і єпи́скопи правосла́вния, ієре́ї же і дия́кони і весь при́чет церко́вний, і весь мона́шеський чин, і вся правові́рния лю́ди, покланя́ющияся і моля́щияся пред честно́ю Твоє́ю іко́ною. При́зри на всіх нас призрі́нієм ми́лостивнаго Твоєго́ заступле́нія, воздви́гни нас із глубини́ гріхо́вния і просвіти́ о́чі серде́чния ко зрі́нію спасе́нія, ми́лостива нам бу́ди зді і на Стра́шнім суді́ Си́на Твоєго́ о нас умоли́, преста́вльшияся во благоче́стії от житія́ сего́ раби́ Твоя́ в ві́чній жи́зні со а́нгели і арха́нгели і со всі́ми святи́ми причти́, да одесну́ю Си́на Твоєго́ Бо́га предста́нуть, і моли́твою Твоє́ю сподо́би вся правосла́вния христия́ни со Христо́м жи́ти і ра́дості а́нгельськия в Небе́сних селе́ніїх наслажда́тися. Ти бо єси́, Госпоже́, Сла́ва Небе́сних і Упова́ніє земни́х, Ти на́ша Наде́жда і Засту́пниця всіх притека́ющих к Тебі́ і Твоєя́ святи́я по́мощі прося́щих. Ти Моле́бниця на́ша те́плая к Си́ну Твоєму́ і Бо́гу на́шему; Твоя́ ма́терняя моли́тва мно́го мо́жеть на умоле́ніє Влади́ки, і Твої́м предста́тельством ко Престо́лу благода́ті Пресвяти́х і Животворя́щих Єго́ та́їн приступа́ти дерза́єм, а́ще і недосто́йнії. Ті́мже всечестни́й о́браз Твой і руко́ю Твоє́ю держи́маго Вседержи́теля ви́дяще на іко́ні, ра́дуємся, грі́шнії, со умиле́нієм припа́дающе, і любо́вію сей цілу́єм, ча́юще, Госпоже́, Твої́ми святи́ми Богоприя́тними моли́твами дойти́ небе́сния безконе́чния жи́зні і непости́дно ста́ти в день су́дний одесну́ю Си́на Твоєго́ і Бо́га на́шего, сла́в’яще Єго́ ку́пно со Безнача́льним Отце́м і Пресвяти́м, Благи́м, Животворя́щим і Єдиносу́щним Ду́хом, во ві́ки віко́в. Амі́нь.