Глава 25
1
И бы́сть въ лѣ́то девя́тоє ца́рства єго́, въ ме́сяцъ деся́тый, пріи́де Навуходоно́соръ ца́рь Вавило́нскій и вся́ си́ла єго́ на Ієрусали́мъ: и обступи́ єго́ отвсю́ду, и созда́ша о́крестъ єго́ бойни́цы.
2
И бы́сть гра́дъ во облеже́ніи до первагона́десять лѣ́та ца́рства седекі́ина, девя́таго дне́ ме́сяца:
3
и превозмо́же во гра́дѣ гла́дъ, и не бы́сть хлѣ́ба лю́демъ земли́ тоя́:
4
и разсѣ́деся гра́дъ, и вси́ му́жіє во́инстіи изыдо́ша но́щію путе́мъ вра́тъ, я́же посредѣ́ стѣ́нъ, я́же су́ть у вертогра́да царе́ва, и халде́є о́крестъ гра́да [бѣ́ша]. И побѣже́ [ца́рь седекі́а] путе́мъ пусты́ннымъ:
5
и погна́ си́ла Халде́йская вслѣ́дъ царя́, и я́ша єго́ во Араво́ѳе ієріхо́нстѣмъ, и вся́ си́ла єго́ разсы́пася от него́:
6
и поя́ша царя́ и поведо́ша єго́ къ царю́ Вавило́нску въ ревла́ѳу: и глаго́ла съ ни́мъ су́дъ:
7
и сы́ны седекі́ины закла́ предъ очи́ма єго́, и о́чи седекі́ины избоде́, и связа́ єго́ у́зами, и отведе́ єго́ во Вавило́нъ.
8
Въ ме́сяцъ же пя́тый, въ седмы́й де́нь ме́сяца, сіє́ лѣ́то девятоєна́десять Навуходоно́сора царя́ Вавило́нска, пріи́де навузарда́нъ архімагі́ръ, ра́бъ царя́ Вавило́нскаго, во Ієрусали́мъ
9
и зажже́ хра́мъ Госпо́день и до́мъ царе́въ, и вся́ до́мы Ієрусали́мли и вся́ до́мы вели́кія сожже́ архімагі́ръ:
10
и стѣ́ны Ієрусали́мли о́крестъ раскопа́ си́ла Халде́йская.
11
И оста́нокъ люді́й избы́вшихъ во гра́дѣ и впа́дшихъ, и́же отпадо́ша ко царю́ Вавило́нску, и про́чеє и утвержде́ніє пренесе́ навузарда́нъ воєво́да.
12
И от ни́щихъ земли́ тоя́ оста́ви архімагі́ръ віногра́ды блюсти́ и вертогра́ды.
13
И столпы́ мѣ́дяны въ хра́мѣ Госпо́дни, и подста́вы, и мо́ре мѣ́дноє су́щеє во хра́мѣ Госпо́дни сокруши́ша халде́є, и взя́ша мѣ́дь и́хъ во Вавило́нъ:
14
и коно́бы, и котлы́ и фіа́лы, и кади́лницы, и вся́ сосу́ды мѣ́дяныя, въ ни́хже служа́ху, взя́ша:
15
и кади́лницы, и фіа́лы златы́я и сре́бряныя взя́ архімагі́ръ,
16
столпы́ два́, и мо́ре єди́но, и подста́вы, я́же сотвори́ Соломо́нъ хра́му Госпо́дню: не бѣ́ вѣ́са мѣ́ди всѣ́хъ сосу́довъ.
17
Осмина́десяти лако́тъ бы́сть высота́ столпа́ єди́наго, и глава́ мѣ́дяна на не́мъ: и высота́ главѣ́ три́ ла́кти, и на главѣ́ мре́жи и шипки́ о́крестъ, вся́ мѣ́дяна: по сему́ же и сто́лпъ вторы́й со мре́жею.
18
И поя́тъ архімагі́ръ саре́а жерца́ пе́рваго и софо́нію жерца́ втора́го, и три́ стра́жы вра́тныя:
19
и от гра́да взя́ скопца́ єди́наго, и́же бѣ́ приста́вникъ надъ му́жи воє́нными, и пя́ть муже́й предстоя́щихъ предъ лице́мъ царе́вымъ, обрѣ́тшихся во гра́дѣ, и книго́чіа кня́зя си́лы, и́же стро́яше лю́ди земли́ тоя́, и шестьдеся́тъ муже́й люді́й земли́ тоя́ обрѣ́тшихся во гра́дѣ:
20
и поя́тъ я́ навузарда́нъ архімагі́ръ, и приведе́ я́ къ царю́ Вавило́нскому въ ревла́ѳу.
21
И порази́ и́хъ ца́рь Вавило́нскій, и умори́ я́ въ ревла́ѳѣ, въ земли́ Єма́ѳовѣ. И пресели́ся Іу́да свы́ше земли́ своєя́.
22
И лю́діє оста́вшіися въ земли́ Іу́довѣ, и́хже оста́ви Навуходоно́соръ ца́рь Вавило́нскій, и поста́ви надъ ни́ми годолі́ю, сы́на Ахіка́мля, сы́на Сафа́ня.
23
И услы́шаша вси́ кня́зи си́лы са́ми и му́жіє и́хъ, я́ко поста́ви ца́рь Вавило́нскій годолі́ю, и пріидо́ша къ годолі́и въ Массифу́, и Ісма́илъ сы́нъ наѳаніинъ, и Іоана́нъ сы́нъ кари́ѳовъ, и Сараі́а сы́нъ Ѳанама́ѳовъ нетофаѳі́тскій, и Ієзо́ніа сы́нъ Махаѳѳо́въ, са́ми и му́жіє и́хъ [пріидо́ша].
24
И кля́тся и́мъ годолі́а и муже́мъ и́хъ и рече́ и́мъ: не бо́йтеся прише́ствія халде́євъ: сѣди́те на земли́ и рабо́тайте царю́ Вавило́нскому, и добро́ бу́детъ ва́мъ.
25
И бы́сть въ ме́сяцъ седмы́й, пріи́де Ісма́илъ сы́нъ наѳані́инъ сы́на Єліса́мля от сѣ́мене ца́рска, и де́сять муже́й съ ни́мъ, и порази́ годолі́ю, и у́мре, и Іуде́євъ и халде́євъ, и́же съ ни́мъ бя́ху въ Массифѣ́.
26
И воста́ша вси́ лю́діє, от ма́ла и до вели́ка, и кня́зи си́лъ, и внидо́ша во Єги́петъ, я́ко убоя́шася от лица́ Халде́йска.
27
И бы́сть въ лѣ́то три́десять седмо́є преселе́нія Іоахі́на царя́ Іу́дина, въ дванадеся́тый ме́сяцъ, въ два́десять седмы́й де́нь ме́сяца, вознесе́ Євілмарода́хъ ца́рь Вавило́нскій, въ лѣ́то ца́рства своєго́, главу́ Іоахі́на царя́ Іу́дина, и изведе́ єго́ изъ до́му темни́цы єго́,
28
и глаго́ла съ ни́мъ блага́я, и даде́ престо́лъ єму́ свы́ше престо́ловъ царе́й, и́же бя́ху съ ни́мъ въ Вавило́нѣ:
29
и измѣни́ ри́зы єго́ темни́чныя, и ядя́ше хлѣ́бъ съ ни́мъ всегда́, во вся́ дни́ живота́ своєго́.
30
И пи́ща єго́ от до́му ца́рска да́вана бя́ше, и все́ изоби́ліє во дни́ єго́, во вся́ дни́ живота́ єго́.
