Глава 8
1
И глаго́ла Єліссе́й къ женѣ́, єя́же воскреси́ сы́на, глаго́ля: воста́ни и иди́ ты́ и до́мъ тво́й, и обита́й идѣ́же а́ще мо́жеши обита́ти, я́ко призва́ Госпо́дь гла́дъ на зе́млю, и пріи́детъ на зе́млю се́дмь лѣ́тъ.
2
И воста́ жена́, и сотвори́ но глаго́лу Єліссе́єву, и по́йде сама́ и до́мъ єя́, и обита́ на земли́ иноплеме́нничи се́дмь лѣ́тъ.
3
И бы́сть но сконча́ніи седми́ лѣ́тъ, и возврати́ся жена́ от земли́ иноплеме́нничи во гра́дъ, и пріи́де возопи́ти къ царю́ о до́мѣ своє́мъ и о се́лѣхъ свои́хъ.
4
И глаго́ла ца́рь ко гієзі́ю о́троку Єліссе́а человѣ́ка Бо́жія глаго́ля: повѣ́ждь ми́ ны́нѣ вся́ вели́кая, я́же сотвори́ Єліссе́й.
5
И бы́сть єму́ повѣ́дающу царе́ви, я́ко жи́ва сотвори́ сы́на уме́ршаго: и се́, жена́, єя́же воскреси́ Єліссе́й сы́на єя́, вопию́щи ко царе́ви о до́мѣ своє́мъ и о се́лѣхъ свои́хъ, И рече́ гієзі́й: господи́не царю́, сія́ жена́ и се́й сы́нъ єя́, єго́же жи́ва сотвори́ Єліссе́й.
6
И вопроси́ ца́рь жену́: и повѣ́да єму́. И даде́ є́й ца́рь скопца́ єди́наго, глаго́ля возврати́ вся́, я́же єя́ су́ть, и вся́ плоды́ села́ єя́, от да, въ о́ньже оста́ви зе́млю, да́же до ны́нѣ.
7
И пріи́де Єліссе́й въ Дама́скъ. И сы́нъ Аде́ровъ ца́рь Си́рскій разболѣ́ся, и возвѣсти́ша єму́, глаго́люще: пріи́де человѣ́къ Бо́жій до здѣ́.
8
И рече́ ца́рь ко азаи́лу: пріими́ въ ру́ку свою́ да́ръ, и иди́ во срѣ́теніє человѣ́ку Бо́жію, и вопроси́ Го́спода и́мъ, глаго́ля: а́ще ли жи́въ бу́ду от болѣ́зни сея́?
9
И и́де азаи́лъ на срѣ́теніє єму́, и взя́ да́ръ въ ру́ку свою́, и вся́ блага́я Дама́скова, бре́мя четы́редесять велблю́довъ, и пріи́де, и ста́ предъ ни́мъ, и рече́ ко Єліссе́ю: сы́нъ тво́й, сы́нъ Аде́ровъ, ца́рь Си́рскій, посла́ мя къ тебѣ́ вопроси́ти, глаго́ля: бу́ду ли жи́въ от болѣ́зни моєя́ сея́?
10
И рече́ къ нему́ Єліссе́й: иди́ и рцы́ єму́: живя́ поживе́ши: но показа́ ми Госпо́дь, я́ко сме́ртію у́мретъ.
11
И предста́ лицу́ єго́, и возложи́ [ру́ки] да́же до постыдѣ́нія, и пла́кася человѣ́къ Бо́жій.
12
И рече́ азаи́лъ: что́ я́ко господи́нъ мо́й пла́четъ? И рече́: вѣ́мъ єли́ка сотвори́ши сыно́мъ Ізра́илевымъ зла́: крѣ́пости и́хъ сожже́ши огне́мъ, и избра́нныя и́хъ избіє́ши мече́мъ, и младе́нцы и́хъ разбіє́ши, и во чре́вѣ имѣ́ющыя и́хъ расто́ргнеши.
13
И рече́ азаи́лъ: кто́ є́сть ра́бъ тво́й, пе́съ ме́ртвый, я́ко сотвори́тъ глаго́лъ се́й? И рече́ Єліссе́й: показа́ ми тя́ Госпо́дь ца́рствующа надъ сирі́єю.
14
И отъи́де от Єліссе́а и вни́де ко господи́ну своєму́. И рече́ єму́ [ца́рь]: что́ ти рече́ Єліссе́й? Отвѣща́: рече́ ми Єліссе́й, живя́ поживе́ши.
15
И бы́сть во у́тріи, и взя́ одея́ло, и намочи́ въ водѣ́, и обложи́ на лице́ єго́, и у́мре: и воцари́ся азаи́лъ вмѣ́сто єго́.
16
Въ лѣ́то пя́тоє Іора́ма сы́на Ахаа́ва царя́ Ізра́илева и Іосафа́та царя́ Іу́дина, воцари́ся Іора́мъ сы́нъ Іосафа́товъ ца́рь Іу́динъ:
17
сы́нъ три́десяти и двою́ лѣ́ту бѣ́, внегда́ воцари́тися єму́, и о́смь лѣ́тъ ца́рствова во Ієрусали́мѣ,
18
и ходи́ въ пути́ царе́й Ізра́илевыхъ, я́коже сотвори́ до́мъ Ахаа́вль, бѣ́ бо дщи́ Ахаа́вля жена́ єму́, и сотвори́ лука́воє предъ Го́сподемъ.
19
И не хотя́ше Госпо́дь потреби́ти Іу́ды, даві́да ра́ди раба́ своєго́, я́коже рече́ да́ти єму́ свѣти́лникъ и сыно́мъ єго́ во вся́ дни́.
20
Во дни́ єго́ отве́ржеся Єдо́мъ изъ подъ руки́ Іу́дины и поста́ви надъ собо́ю царя́.
21
И взы́де Іора́мъ въ Сіо́ръ, и вся́ колесни́цы я́же съ ни́мъ. И бы́сть єму́ воста́вшу, и изби́ Єдо́ма обступи́вшаго о́крестъ єго́, и кня́зи колесни́цъ, и бѣжа́ша лю́діє въ селе́нія своя́.
22
И отступи́ Єдо́мъ изъ подъ руки́ Іу́дины до дне́ сего́: тогда́ отве́ржеся ловна́ во вре́мя о́но.
23
И про́чая слове́съ Іора́млихъ, и вся́ єли́ка сотвори́, не се́ ли, сія́ пи́сана въ кни́зѣ слове́съ дні́й царе́й Іу́диныхъ?
24
И у́спе Іора́мъ со отцы́ свои́ми, и погребе́нъ бы́сть со отцы́ свои́ми во гра́дѣ даві́да отца́ своєго́: и ца́рствова Охозі́а сы́нъ єго́ вмѣ́сто єго́.
25
Въ лѣ́то второєна́десять Іора́ма сы́на Ахаа́вля царя́ Ізра́илева, ца́рствовати нача́ Охозі́а сы́нъ Іора́ма царя́ Іу́дина:
26
сы́нъ два́десяти дву́хъ лѣ́тъ бы́сть Охозі́а, єгда́ нача́ ца́рствовати, и лѣ́то єди́но ца́рствова во Ієрусали́мѣ. И́мя же ма́тери єго́ Гоѳолі́а, дще́рь Амврі́а царя́ Ізра́илева.
27
И хожда́ше по путе́мъ до́му Ахаа́вля, и сотвори́ лука́воє предъ Го́сподемъ, я́коже до́мъ Ахаа́вль: зя́ть бо бѣ́ до́му Ахаа́вля.
28
И и́де со Іора́момъ сы́номъ Ахаа́влимъ на бра́нь, на азаи́ла царя́ иноплеме́ннича въ рамо́ѳъ Галаа́дскій, и уязви́ша Си́ряне Іора́ма.
29
И возврати́ся ца́рь Іора́мъ цѣли́тися во Ієзрає́ль от я́звъ, и́миже уязви́ша єго́ въ рамо́ѳѣ, єгда́ ра́товаше то́й на азаи́ла царя́ Си́рска, и Охозі́а сы́нъ Іора́мль ца́рь Іу́динъ сни́де ви́дѣти Іора́ма, сы́на Ахаа́вля, во Ієзрає́ль, я́ко боля́ше то́й.
