Глава 33
1
И бы́сть сло́во Госпо́дне ко мнѣ́ глаго́ля:
2
сы́не человѣ́чь, глаго́ли ко сыно́мъ люді́й твои́хъ и рече́ши къ ни́мъ: земля́, на ню́же а́зъ а́ще наведу́ ме́чь, и по́ймутъ лю́діє земли́ человѣ́ка єди́наго от себе́ и поста́вятъ єго́ себѣ́ во стра́жа,
3
и у́зритъ ме́чь гряду́щь на зе́млю, и востру́битъ трубо́ю, и проповѣ́сть лю́демъ,
4
и услы́шитъ услы́шавый гла́съ трубы́, а не сохрани́тся, и на́йдетъ ме́чь и пости́гнетъ єго́, кро́вь єго́ на главѣ́ єго́ бу́детъ:
5
я́ко слы́ша гла́съ трубы́ и не сохрани́ся, кро́вь єго́ на не́мъ бу́детъ: а се́й, поне́же сохрани́ся, ду́шу свою́ изба́вилъ.
6
И стра́жъ, а́ще уви́дитъ ме́чь гряду́щь, и не востру́битъ трубо́ю, [и не проповѣ́сть лю́демъ,] и лю́діє не охраня́тъ себе́, и наше́дъ ме́чь во́зметъ от ни́хъ ду́шу, та́ у́бо беззако́нія ра́ди своєго́ взя́ся, а кро́ве єя́ от руки́ стра́жа взыщу́.
7
И ты́, сы́не человѣ́чь, во стра́жа да́хъ тя́ до́му Ізра́илеву, и услы́шиши от у́стъ мои́хъ сло́во, и проповѣ́си и́мъ от мене́.
8
Єгда́ реку́ грѣ́шнику: грѣ́шниче, сме́ртію у́мреши: и не бу́деши глаго́лати [грѣ́шнику], є́же сохрани́тися нечести́вому, [є́же обрати́тся єму́] от пути́ своєго́ [и жи́ву бы́ти єму́], то́й беззако́нникъ во беззако́ніи своє́мъ у́мретъ, а кро́ве єго́ от руки́ твоєя́ взыщу́.
9
А́ще же ты́ проповѣ́си нечести́вому пу́ть єго́, є́же обрати́тися от него́, и не обрати́тся съ пути́ своєго́, то́й въ нече́стіи своє́мъ у́мретъ, а ты́ ду́шу твою́ изба́вилъ єси́.
10
И ты́, сы́не человѣ́чь, рцы́ до́му Ізра́илеву: си́це рѣ́сте глаго́люще: пре́лести на́шя и беззако́нія на́ша въ на́съ су́ть, и мы́ въ ни́хъ та́ємъ, и ка́ко на́мъ живы́мъ бы́ти?
11
Рцы́ и́мъ: живу́ а́зъ, глаго́летъ Адонаі́ Госпо́дь, не хощу́ сме́рти грѣ́шника, но є́же обрати́тися нечести́вому от пути́ своєго́ и жи́ву бы́ти єму́: обраще́ніємъ обрати́теся от пути́ ва́шего зла́го: и вску́ю умира́єте, до́ме Ізра́илевъ?
12
И ты́, сы́не человѣ́чь, рцы́ ко сыно́мъ люді́й твои́хъ: пра́вда пра́ведника не изба́витъ єго́, въ о́ньже де́нь прельсти́тся: и беззако́ніє беззако́нника не убіє́тъ, въ о́ньже де́нь обрати́тся от беззако́нія своєго́: и пра́ведникъ не мо́жетъ спасти́ся въ де́нь грѣха́ своєго́.
13
Єгда́ реку́ пра́веднику: жи́знію жи́въ бу́деши: се́й же упова́я на пра́вду свою́ и сотвори́тъ беззако́ніє, вся́ пра́вды єго́ не воспомяну́тся, въ непра́вдѣ своє́й, ю́же сотвори́, въ то́й у́мретъ.
14
И єгда́ реку́ нечести́вому: сме́ртію у́мреши: и обрати́тся от грѣха́ своєго́ и сотвори́тъ су́дъ и пра́вду,
15
и зало́гъ отда́стъ и восхище́ноє возврати́тъ, беззако́нникъ въ за́повѣдехъ жи́зни ходи́ти бу́детъ, є́же не сотвори́ти непра́вды, жи́знію жи́въ бу́детъ и не у́мретъ:
16
вси́ грѣси́ єго́, я́же согрѣши́, не помяну́тся: поне́же су́дъ и пра́вду сотвори́, жи́въ бу́детъ въ ни́хъ.
17
И реку́тъ сы́нове люді́й твои́хъ: непра́въ пу́ть Госпо́день. И се́, пу́ть и́хъ непра́въ.
18
Єгда́ соврати́тся пра́ведникъ от пра́вды своєя́ и сотвори́тъ беззако́ніє, и у́мретъ въ не́мъ.
19
И єгда́ грѣ́шникъ возврати́тся от беззако́нія своєго́ и сотвори́тъ су́дъ и пра́вду, то́й жи́въ бу́детъ въ ни́хъ.
20
И се́ є́сть, є́же реко́сте: непра́въ пу́ть Госпо́день. Кому́ждо по путе́мъ єго́ сужду́ ва́мъ, до́ме Ізра́илевъ.
21
И бы́сть во второєна́десять лѣ́то, ме́сяца вторагона́десять, въ пя́тый де́нь ме́сяца плѣне́нія на́шего, пріи́де ко мнѣ́ от Ієрусали́ма уцѣлѣ́вый глаго́ля: плѣне́нъ бы́сть гра́дъ.
22
И рука́ Госпо́дня бы́сть на мнѣ́ въ ве́черъ, пре́жде прише́ствія єго́, и отве́рзе уста́ моя́, до́ндеже пріи́де ко мнѣ́ зау́тра: и отве́рзшаяся уста́ моя́ не затвори́шася ктому́.
23
И бы́сть сло́во Госпо́дне ко мнѣ́ глаго́ля:
24
сы́не человѣ́чь, живу́щіи на опустѣ́вшихъ мѣ́стѣхъ во земли́ Ізра́илевѣ глаго́лютъ: єди́нъ бя́ше Авраа́мъ и одержа́ше зе́млю, а мы́ мно́жайшіи єсмы́, на́мъ дана́ є́сть земля́ во одержа́ніє.
25
Того́ ра́ди рцы́ и́мъ: си́це глаго́летъ Адонаі́ Госпо́дь: поне́же съ кро́вію я́сте и о́чи ва́ши воздвиго́сте ко кумі́ромъ и кро́вь пролива́єте, и зе́млю ли наслѣ́дите?
26
ста́сте съ мече́мъ ва́шимъ, сотвори́сте ме́рзости, и кі́йждо жену́ бли́жняго своєго́ оскверни́сте, и та́ко ли зе́млю и́мате наслѣ́дити?
27
Того́ ра́ди рцы́ и́мъ: сія́ глаго́летъ Адонаі́ Госпо́дь: живу́ а́зъ, я́ко паду́тъ мече́мъ су́щіи во опустѣ́вшихъ, и и́же на лицы́ по́ля, звѣре́мъ по́льнымъ предаду́тся на изъяде́ніє, и су́щыя во градѣ́хъ и и́же въ пеще́рахъ сме́ртію поражу́,
28
и да́мъ зе́млю на опустѣ́ніє, и поги́бнетъ го́рдость крѣ́пости єя́, и опустѣ́ютъ го́ры Ізра́илевы, зане́же не бу́детъ проходя́щаго:
29
и увѣ́дятъ, я́ко а́зъ Госпо́дь: и сотворю́ зе́млю и́хъ пу́сту, и опустѣ́єтъ всѣ́хъ ра́ди ме́рзостей и́хъ, я́же сотвори́ша.
30
И ты́, сы́не человѣ́чь, сы́нове люді́й твои́хъ глаго́лющіи о тебѣ́ у забра́лъ и во вратѣ́хъ дворо́въ, и глаго́лютъ кі́йждо ко бли́жнему своєму́ и кі́йждо ко бра́ту своєму́, глаго́люще: собери́мся и услы́шимъ исходя́щая от у́стъ Госпо́днихъ.
31
И прихо́дятъ къ тебѣ́, я́коже схо́дятся лю́діє, и сѣдя́тъ лю́діє мои́ предъ тобо́ю, и послу́шаютъ глаго́ловъ твои́хъ, и не сотворя́тъ и́хъ: поне́же лжа́ во устѣ́хъ и́хъ, и вслѣ́дъ скве́рнъ и́хъ се́рдце и́хъ хо́дитъ.
32
И бу́деши и́мъ я́ко гла́съ пѣ́снивца сладкогла́снаго благосли́чнаго, и услы́шатъ глаго́лы твоя́, и не сотворя́тъ и́хъ.
33
И єгда́ пріи́деши, реку́тъ: се́, пріи́де. И увѣ́дятъ, я́ко проро́къ бѣ́ средѣ́ и́хъ.
