Глава 54
1
Возвесели́ся, непло́ды, неражда́ющая, возгласи́ и возопі́й, нечревоболѣ́вшая, я́ко мно́га ча́да пусты́я па́че, не́жели иму́щія му́жа.
2
Рече́ бо Госпо́дь: разшири́ мѣ́сто ку́щи твоєя́ и покро́вовъ твои́хъ, водрузи́, не пощади́, продолжи́ у́жя твоя́ и ко́ліє твоє́ укрѣпи́,
3
єще́ на де́сно и на лѣ́во простри́: и сѣ́мя твоє́ язы́ки наслѣ́дитъ, и гра́ды опустѣ́вшыя насели́ши.
4
Не бо́йся, я́ко посра́млена єси́, ниже́ устыди́ся, я́ко укоре́на єси́: поне́же срамоту́ вѣ́чную забу́деши и укори́зны вдовства́ твоєго́ не помяне́ши ктому́.
5
Я́ко Госпо́дь творя́й тя́, Госпо́дь Савао́ѳъ и́мя єму́: и изба́вивый тя́, святы́й Бо́гъ Ізра́илевъ, все́й земли́ прозове́тся.
6
Не я́ко жену́ оста́влену и малоду́шну призва́ тя Госпо́дь, ниже́ я́ко жену́ изъ ю́ности возненави́дѣну, рече́ Бо́гъ тво́й.
7
На вре́мя ма́ло оста́вихъ тя́, а съ ми́лостію вели́кою поми́лую тя́:
8
во я́рости ма́лѣ отврати́хъ лице́ моє́ от тебе́, но ми́лостію вѣ́чною поми́лую тя́, рече́ изба́вивый тя́ Госпо́дь.
9
От воды́, я́же при но́и, сіє́ ми́ є́сть, я́коже кля́хся єму́ во вре́мя о́но на зе́млю, не разгнѣ́ватися о тебѣ́ ктому́, ниже́ во преще́ніи твоє́мъ
10
го́ры преста́вити, и хо́лми твои́ не предви́гнутся: та́ко ниже́, я́же от мене́ къ тебѣ́, ми́лость оскудѣ́єтъ, ниже́ завѣ́тъ ми́ра твоєго́ преста́вится: рече́ бо ми́лостивъ къ тебѣ́ Госпо́дь.
11
Смире́нная и коле́блемая не имѣ́ла єси́ утѣше́нія: се́, а́зъ уготовля́ю тебѣ́ а́нѳраксъ ка́мень тво́й и на основа́ніє твоє́ сапфі́ръ:
12
и положу́ забра́ла твоя́ Іа́спісъ, и врата́ твоя́ ка́меніє криста́лла, и огражде́ніє твоє́ ка́меніє избра́нноє,
13
и вся́ сы́ны твоя́ науче́ны Бо́гомъ, и во мно́зѣ ми́рѣ ча́да твоя́.
14
И пра́вдою возгради́шися: удали́ся от непра́веднаго, и не убои́шися, и тре́петъ не прибли́жится тебѣ́.
15
Се́, прише́лцы пріи́дутъ къ тебѣ́ мно́ю и вселя́тся у тебе́ и къ тебѣ́ прибѣ́гнутъ.
16
Се́, а́зъ созда́хъ тя́, не я́коже кузне́цъ раздува́яй у́гліє и износя́ сосу́дъ на дѣ́ло: а́зъ же созда́хъ тя́ не на па́губу, є́же истли́ти.
17
Вся́къ сосу́дъ содѣ́ланъ на тя́ не благопоспѣшу́, и вся́къ гла́съ, и́же на тя́ воста́нетъ на прю́, одолѣ́єши и́мъ всѣ́мъ: пови́нніи же твои́ бу́дутъ въ не́мъ. Є́сть наслѣ́діє служа́щымъ Го́сподеви, и вы́ бу́дете мнѣ́ пра́ведни, глаго́летъ Госпо́дь.
