О́тче Святи́й^*, Предві́чний Бо́же, от Него́же ісхо́дить всяк дар і вся́коє бла́го; Тебі́ прилі́жно молю́ся о ча́діх, я́же дарова́ мні бла́гость Твоя́. Ти дал єси́ їм битіє́, оживотвори́л єси́ я душе́ю безсме́ртною і отроди́л святи́м креще́нієм, во є́же жи́ти їм сообра́зно с во́лею Твоє́ю і наслі́дити Ца́рствіє Небе́сноє; сохрани́ я в благода́ті Твоє́й до конця́ жи́зні їх і освяща́й Твоє́ю і́стиною, да святи́ться в них і́м'я Твоє́. Соді́йствуй мні Твоє́ю благода́тію, да бих воспита́л я во сла́ву Твоєго́ і́мене і в по́льзу бли́жніх. Пода́ждь мні к сему́ потре́бная сре́дства, терпі́ніє і си́лу. Го́споди, просвіща́й я сві́том прему́дрости Твоєя́, да лю́б'ять Тя все́ю душе́ю і всім помишле́нієм свої́м. Насади́ в се́рдці їх страх і отвраще́ніє от вся́каго беззако́нія, да бу́дуть непоро́чна в путе́х свої́х. Украси́ ду́шу їх цілому́дрієм, трудолю́бієм, долготерпі́нієм, удово́льствієм і вся́кою честно́тою. Огради́ уста́ їх пра́вдою, да вся́ка клевета́, лож і лесть бу́деть ме́рзостна їм. Окропи́ я росо́ю благода́ті Твоєя́, да преспіва́ють в доброді́телех і свя́тості, і да возраста́ють в благоволе́нії Твоє́м і в любві́ благочести́вих челові́к. А́нгел Храни́тель да пребива́єть с ни́ми всегда́ і соблюда́єть ю́ность їх от помишле́ній су́єтних, от пре́лести і собла́зна ми́ра сего́, і от вся́ких наві́тов лука́ваго. А́ще же когда́ і согріша́ть пред Тобо́ю, не отврати́ лиця́ Твоєго́ от них, но бу́ди їм ми́лостив; возбуди́ сокруше́ніє в се́рдці їх і по мно́жеству щедро́т Твої́х очи́сти согріше́нія їх. Не лиши́ їх і земни́х Твої́х благ, но пода́ждь їм вся ну́жная во вре́мені, в приобріте́ніє блаже́нния ві́чності. Сохраня́й я от вся́кия болі́зні, гні́ва і напа́сти, біди́ і ско́рби, і осіня́й Твоє́ю ми́лостію во вся дні живота́ їх. Бо́же Благи́й! єще́ молю́ся Тебі́: даждь мні весе́ліє і ра́дость о ча́діх мої́х і сподо́би м'я предста́ти с ни́ми на Стра́шнім Суді́ Твоє́м і с непости́дним дерзнове́нієм рещи́: се аз і ча́да моя́, я́же дал мні єси́, Го́споди, да ку́пно с ни́ми, прославля́я неізрече́нную Твою́ бла́гость і ві́чную любо́в, превозношу́ пресвято́є і́м'я Твоє́, Отця́, і Си́на, і Свята́го Ду́ха, во ві́ки віко́в амі́нь.