Молитви Пресвятій Богородиці про допомогу

О Пресвята́я і Преблагоcлове́нная Ма́ти Сладча́йшаго Го́спода на́шего Ісу́са Христа́! Припа́даєм і покланя́ємся Тебі́ пред свято́ю чудотво́рною іко́ною Твоє́ю, воспомина́юще ди́вноє зна́меніє Твоєго́ заступле́нія, Вели́кому Нову́граду^* от нея́ явле́нноє во дні ра́тнаго на сей град наше́ствія. Смире́нно мо́лим Тя, всеси́льная ро́да на́шего Засту́пнице: я́коже дре́вле отце́м на́шим на по́мощ ускори́ла єси́, та́ко і ни́ні нас, немощни́х і грі́шних, сподо́би Твоєго́ Ма́терняго заступле́нія і благопопече́нія. Спаси́ і сохрани́, Влади́чице, под кро́вом ми́лости Твоєя́ Це́рков святу́ю, град Твой, всю страну́ на́шу правосла́вную і всіх нас, припа́дающих к Тебі́ с ві́рою і любо́вію умиле́нно прося́щих со слеза́ми Твоєго́ заступле́нія. Єй, Госпоже́ Всеми́лостивая! Умилосе́рдися на ни, обурева́ємия гріхи́ мно́гими, простри́ ко Христу́ Го́споду Богопри́їмнії ру́ці Твої́ і предста́тельствуй за нас пред бла́гостію Єго́, прося́щи нам проще́нія прегріше́ній на́ших, благоче́стнаго ми́рнаго житія́, благи́я христия́нськия кончи́ни і до́браго отві́та на Стра́шнім Суді́ Єго́, да, спаса́ємі всеси́льними Твої́ми к Нему́ моли́твами, блаже́нство ра́йськоє унаслі́дуєм і со всі́ми святи́ми воспоє́м Пречестно́є і Великолі́поє і́м'я Достопокланя́ємия Тро́йці, Отця́, і Си́на, і Свята́го Ду́ха, і Твоє́ ве́ліє к нам милосе́рдіє во ві́ки віко́в. Амі́нь.

О Пресвята́я Ді́во, Ма́ти Го́спода Ви́шніх Сил, Небесе́ і землі́ Цари́це, гра́да і страни́ на́шея всемо́щная Засту́пнице! Прийми́ хвалебноблагода́рственноє пі́ніє сіє́ от нас, недосто́йних раб Твої́х, і вознеси́ моли́тви на́ша ко Престо́лу Бо́га Си́на Твоєго́, да ми́лостив бу́деть непра́вдам на́шим, і проба́вить благода́ть Свою́ чту́щим всечи́стно́є і́м'я Твоє́ і с ві́рою і любо́вію покланя́ющимся чудотво́рному о́бразу Твоєму́. Ні́сьми бо досто́йнії от Него́ поми́ловані би́ти, а́ще не Ти уми́лостивиши Єго́ о нас, Влади́чице, я́ко вся Тебі́ от Него́ возмо́жна суть. Сего́ ра́ди к Тебі́ прибіга́єм, я́ко к несомні́нній і ско́рій Засту́пниці на́шей: усли́ши нас моля́щихся Тебі́, осіни́ нас вседержа́вним покро́вом Твої́м, і іспроси́ у Бо́га Си́на Твоєго́ па́стирем на́шим ре́вность і бді́ніє о душа́х, градоправи́телем му́дрость і си́лу, судія́м пра́вду і нелицеприя́тіє, наста́вником ра́зум і смиренному́дріє, супру́гом любо́в і согла́сіє, ча́дом послуша́ніє, оби́димим терпі́ніє, оби́дящим страх Бо́жий, скорб'я́щим благоду́шіє, ра́дующимся воздержа́ніє; всім же нам дух ра́зума і благоче́стія, дух милосе́рдія і кро́тости, дух чистоти́ і пра́вди. Єй, Госпоже́ Пресвята́я, умилос́ердися на немощни́я лю́ди Твоя́: разсі́янния собери́, заблу́ждшия на путь пра́вий наста́ви, ста́рость поддержи́, ю́ния уцілому́дри, младе́нці воспита́й, і при́зри на всіх нас призрі́нієм ми́лостиваго Твоєго́ заступле́нія, воздви́гни нас із глубини́ гріхо́вния, і просвіти́ серде́чния о́чі на́ша к зрі́нію спаcе́нія, ми́лостива нам бу́ди зді і та́мо, в страні́ земна́го прише́льствія і на Стра́шнім Суді́ Си́на Твоєго́; преста́вльшияся же в ві́рі і покая́нії от житія́ сего́ отці́ і бра́тію на́шу в ві́чній жи́зні со А́нгели і со всі́ми святи́ми жи́ти сотвори́. Ти бо єси́, Госпоже́, сла́ва небе́сних і упова́ніє земни́х, Ти по Бо́зі на́ша наде́жда і Засту́пниця всіх, притека́ющих к Тебі́ с ві́рою. К Тебі́ у́бо мо́лимся, і Тебі́, я́ко всемогу́щей Помо́щниці, са́мі себе́, і друг дру́га, і весь живо́т наш предає́м, ни́ні, і при́сно, і во ві́ки віко́в. Амі́нь.

К кому́ возопію́, Влади́чице? К кому́ прибі́гну в го́ресті моє́й? а́ще не к Тебі́, Госпоже́ Влади́чице Богоро́дице, Цари́це Небе́сная? Кто плач мой і воздиха́ніє моє́ при́йметь, а́ще не Ти, о Пренепоро́чная, Наде́ждо христия́н і Прибі́жище грі́шним? Приклони́, о Пречи́стая Влади́чице, ушеса́ Твоя́ к моле́нію моєму́. Ма́ти Бо́га моєго́, не пре́зри м'я, тре́бующа Твоєя́ по́мощі, усли́ши стена́ніє моє́ і вопль се́рдця моєго́ внуши́, о Госпоже́ Богоро́дице Цари́це. І пода́ждь мі ра́дость душе́вную, подкріпи́ м'я нетерпіли́ваго, уни́лаго і неради́ваго к Твоєму́ хвале́нію. Вразуми́ і научи́ м'я, ка́ко Тебі́ моли́тися подоба́єть, і не отступи́ от мене́, Ма́ти Бо́га моєго́, за ропта́ніє і нетерпі́ніє моє́, но бу́ди мі покро́в і заступле́ніє в жи́зні моє́й і приведи́ м'я к ти́хому приста́нищу блаже́ннаго о́наго поко́я, і сопричти́ м'я к ли́ку ізбра́ннаго Твоєго́ ста́да і та́мо удосто́й м'я воспіва́ти і сла́вити Тя во ві́ки. Амі́нь.

Цари́це моя́ Преблага́я, Наде́ждо моя́ Богоро́дице, Прия́телище си́рих і стра́нних Предста́тельнице, скорб’я́щих Ра́досте, оби́димих Покрови́тельнице! Зри́ши мою́ біду́, зри́ши мою́ скорб, помози́ мі я́ко не́мощну, окорми́ м'я я́ко стра́нна. Оби́ду мою́ ві́си, разріши́ ту, я́коже во́лиши; я́ко не і́мам іни́я по́мощі ра́зві Тебе́, ні іни́я Предста́тельниці, ні благи́я Уті́шительниці, то́кмо Тебе́, о Богома́ти; я́ко да сохрани́ши м'я і покри́єши во ві́ки віко́в. Амі́нь.