Молитви за звільнення з полону

О до́брий наш па́стирю і богому́дрий наста́вниче, святи́телю Христо́в Нико́лає! Усли́ши нас, грі́шних, [імена́], моля́щихся тебі́ і призива́ющих в по́мощ ско́роє предста́тельство твоє́: ви́ждь нас, немощни́х, отвсю́ду уловля́ємих, вся́каго бла́га лише́нних і умо́м от малоду́шія помраче́нних. Потщи́ся, уго́дниче Бо́жий, не оста́вити нас в гріхо́внем пліну́ би́ти, да не бу́дем в ра́дость враго́м на́шим і не у́мрем в лука́вих дія́ніїх на́ших. Моли́ о нас, недосто́йних, Соді́теля на́шего і Влади́ку, Єму́ же ти со безпло́тними ли́ки предстої́ши: ми́лостива к нам сотвори́ Бо́га на́шего в ни́нішнем житії́ і в бу́дущем ві́ці, да не возда́сть нам по діло́м на́шим і по нечистоті́ серде́ць на́ших, но по Своє́й бла́гості возда́сть нам. На твоє́ бо хода́тайство упова́юще, твої́м предста́тельством хва́лимся, твоє́ заступле́ніє на по́мощ призива́єм, і ко пресвято́му о́бразу твоєму́ припа́дающе, по́мощи про́сим: ізба́ви нас, уго́дниче Христо́в, от зол находя́щих на нас, да ра́ди святи́х твої́х моли́тв не оби́меть нас напа́сть і не погря́знем в пучи́ні гріхо́вній і в ти́ні страсте́й на́ших. Моли́, святи́телю Христо́в Нико́лає, Христа́ Бо́га на́шего, да пода́сть нам ми́рноє житіє́ і оставле́ніє гріхо́в, душа́м же на́шим спасе́ніє і ве́лію ми́лость, ни́ні, і при́сно, і во ві́ки віко́в.

О Пресвята́я Ді́во, Ма́ти Го́спода Ви́шніх Сил, Небесе́ і землі́ Цари́це, гра́да і страни́ на́шея всемо́щная Засту́пнице! Прийми́ хвалебноблагода́рственноє пі́ніє сіє́ от нас, недосто́йних раб Твої́х, і вознеси́ моли́тви на́ша ко Престо́лу Бо́га Си́на Твоєго́, да ми́лостив бу́деть непра́вдам на́шим, і проба́вить благода́ть Свою́ чту́щим всечи́стно́є і́м'я Твоє́ і с ві́рою і любо́вію покланя́ющимся чудотво́рному о́бразу Твоєму́. Ні́сьми бо досто́йнії от Него́ поми́ловані би́ти, а́ще не Ти уми́лостивиши Єго́ о нас, Влади́чице, я́ко вся Тебі́ от Него́ возмо́жна суть. Сего́ ра́ди к Тебі́ прибіга́єм, я́ко к несомні́нній і ско́рій Засту́пниці на́шей: усли́ши нас моля́щихся Тебі́, осіни́ нас вседержа́вним покро́вом Твої́м, і іспроси́ у Бо́га Си́на Твоєго́ па́стирем на́шим ре́вность і бді́ніє о душа́х, градоправи́телем му́дрость і си́лу, судія́м пра́вду і нелицеприя́тіє, наста́вником ра́зум і смиренному́дріє, супру́гом любо́в і согла́сіє, ча́дом послуша́ніє, оби́димим терпі́ніє, оби́дящим страх Бо́жий, скорб'я́щим благоду́шіє, ра́дующимся воздержа́ніє; всім же нам дух ра́зума і благоче́стія, дух милосе́рдія і кро́тости, дух чистоти́ і пра́вди. Єй, Госпоже́ Пресвята́я, умилос́ердися на немощни́я лю́ди Твоя́: разсі́янния собери́, заблу́ждшия на путь пра́вий наста́ви, ста́рость поддержи́, ю́ния уцілому́дри, младе́нці воспита́й, і при́зри на всіх нас призрі́нієм ми́лостиваго Твоєго́ заступле́нія, воздви́гни нас із глубини́ гріхо́вния, і просвіти́ серде́чния о́чі на́ша к зрі́нію спаcе́нія, ми́лостива нам бу́ди зді і та́мо, в страні́ земна́го прише́льствія і на Стра́шнім Суді́ Си́на Твоєго́; преста́вльшияся же в ві́рі і покая́нії от житія́ сего́ отці́ і бра́тію на́шу в ві́чній жи́зні со А́нгели і со всі́ми святи́ми жи́ти сотвори́. Ти бо єси́, Госпоже́, сла́ва небе́сних і упова́ніє земни́х, Ти по Бо́зі на́ша наде́жда і Засту́пниця всіх, притека́ющих к Тебі́ с ві́рою. К Тебі́ у́бо мо́лимся, і Тебі́, я́ко всемогу́щей Помо́щниці, са́мі себе́, і друг дру́га, і весь живо́т наш предає́м, ни́ні, і при́сно, і во ві́ки віко́в. Амі́нь.