Молитви воїна святим

Святи́й і вели́кий Архістрати́же Бо́жий Михаї́ле, низпрове́ргий с Небеса́ дия́вола і во́їнство єго́! К тебі́ прибіга́єм с ві́рою і тебі́ мо́лимся с любо́вію, бу́ди щит несокруши́м і забра́ло тве́рдо свято́й Це́ркві і правосла́вному Оте́честву на́шему, огражда́я їх молнієно́сним мече́м твої́м от всіх враг ви́димих і неви́димих. Бу́ди А́нгел Храни́тель, прему́др совітода́тель і споспі́шник предводи́телем на́шим. Бу́ди вождь непобіди́м христолюби́вому во́їнству на́шему, вінча́я єго́ сла́вою і побі́дами над супоста́ти, да позна́ють всі, противля́ющіїся нам, я́ко с на́ми Бог і святі́ї А́нгели Єго́. Амі́нь.

О всехва́льний святи́й великому́чениче і чудотво́рче Гео́ргіє! Умоли́ Человіколю́бця Бо́га, ско́рий помо́щнице всіх призива́ющих тя, да не осу́дить нас, грі́шних, по беззако́нієм на́шим, но да сотвори́ть с на́ми по вели́цій своє́й ми́лості і да пода́сть правосла́вному Оте́честву на́шему і всему́ боголюби́вому во́їнству на супоста́ти одолі́ніє; да укріпи́ть страну́ на́шу Украї́ну непреміня́ємим ми́ром і благослове́нієм. Ізря́дніє же да огради́ть нас святи́х а́нгел Свої́х ополче́нієм, во є́же ізба́витися нам по ісхо́ді на́шем от житія́ сего́ от ко́зней лука́ваго і тя́жких возду́шних мита́рств єго́ і неосужде́нним предста́ти Престо́лу Го́спода сла́ви. Амі́нь.

О дво́їце свяще́нная, святі́ї страстоте́рпці Бори́се і Глі́бе, от ю́ности Христу́ ві́рою чи́стою і любо́вію послужи́вшии, і кровми́ свої́ми, я́ко багряни́цею, украси́вшіїся, і ни́ні со Христо́м ца́рствующії! Бу́дите нам те́плії засту́пници, ограді́те всіх нас от вся́кия ско́рби, озлобле́нія і внеза́пния сме́рти. Мо́лим вас, христолюби́вії страстоте́рпці, споспішеству́йте держа́ві на́шей Украї́ні в побі́ді на сопроти́вния, да несу́ть украї́нстії во́їни страх враго́м і мир землі́ на́шей, да ти́хоє житіє́ поживу́ть лю́діє во вся́ком благоче́стії і прославля́ють Бо́га, Отця́, і Си́на, і Свята́го Ду́ха. Амі́нь.

О Пе́тре всесла́вне, пра́ведниче достоблаже́нний! Усли́ши мо́леніє нас, грі́шних, доброді́тельноє твоє́ житіє́ похваля́ющих, ра́тния по́двиги чту́щих і страда́нія почита́ющих! Те́плим твої́м предста́тельством умоли́ Го́спода, да прости́ть на́ша согріше́нія во́льная і нево́льная і очи́стить нас от вся́кия скве́рни пло́ті і ду́ха! Мо́лим тя, Пе́тре терпеливоду́шний, іспроси́ нам у Христа́ в ві́рі і благоче́стії крі́пкоє стоя́ніє, в ско́рбіх благоду́шіє, в напа́стех терпі́ніє, в іскуше́ніїх крі́пость, да соблюде́ть от суєму́дрих і душетлі́нних уче́ній, да сохрани́ть сердця́ на́ша от собла́знов ми́ра сего́ і да научи́ть чистоті́ і цілому́дрію. Єй, уго́дниче Бо́жий, ісхода́тайствуй моли́твами твої́ми у Христа́ Бо́га по моли́твам Єго́ Пречи́стой Ма́тері Оте́честву на́шему Украї́ні мир і благоустроє́ніє, всі́м же нам в правові́рії, чистоті́ і цілому́дрії всегда́шнєє пребива́ніє, ізбавле́ніє от ко́зней дия́вольських і зло́би челові́чеськия, от суєму́дрих і душетлі́нних уче́ній; я́ко да і ми купно с тобо́ю і всі́ми на́шими святи́ми сро́дниками просла́вим Єдиносу́щную Тро́йцю, Отця́, і Си́на, і Свята́го Ду́ха, во ві́ки віко́в.  Амі́нь.

О святи́й преподо́бний о́тче Іліє́! Руси́ Ки́євськия засту́пниче, могу́чий ратобо́рче, во́їне духо́вний і тіле́сний єй яви́вийся, в житії́ своє́м бла́гу наро́да ру́ськаго і прославле́нію Бо́га христия́нськаго ві́рно послужи́вий, і по преставле́нії своє́м предста́тельства своєго́ о нас не оста́вивий, іспроси́, свя́те, у Всеми́лостиваго Го́спода Оте́честву на́шему Украї́ні мир і благоде́нствіє, Це́ркві благоустроє́ніє, лю́дем правосла́вним от нечести́вих ізбавле́ніє, во́їном на́шим в ра́тех побі́ду і на враго́в, замишля́ющих зла́я, Це́ркві і Оте́честву правосла́вному одолі́ніє, всіх же нас заступи́; і є́ще про́сим тя, свя́тче Бо́жий, ра́зум нам от Бо́га ниспосли́, да позна́єм согріше́нія на́ша і си́лу духо́вную, да пока́ємся во грісі́х на́ших, і крі́пость тіле́сную, да возмощи́ нам житіє́ іспра́вити і Русь-Украї́ну Святу́ю возроди́ти, і в Ца́рствіє Небе́сноє прейти́, да та́мо с тобо́ю і всі́ми святи́ми сподо́битися непреста́нні восхваля́ти в Тройці́ слави́маго Бо́га Отця́, і Си́на, і Свята́го Ду́ха, во ві́ки віко́в. Амі́нь.

Святи́й і сла́вний великому́чениче Христо́в Дими́тріє, ско́рий помо́щниче і те́плий засту́пниче с ві́рою притека́ющих к тебі́! Предстоя́ со дерзнове́нієм Небе́сному Царю́, іспроси́ у Него́ проще́ніє согріше́ній на́ших, і о є́же ізба́витися нам от всегуби́тельния я́зви, тру́са, пото́па, огня́, меча́ і ві́чния ка́зні. Моли́ бла́гость Єго́, є́же уще́дрити град сей, [або́: оби́тель сію́] і вся́кую страну́ христия́нськую. Ісхода́тайствуй у Царя́ ца́рствующих на враги́ побі́ду і одолі́ніє благочести́вому наро́ду на́шему, всей же держа́ві на́шей мир, тишину́, тве́рдость в ві́рі і преспі́яніє во благоче́стії; нам же, чту́щим честну́ю па́м'ять твою́, іспроси́ благода́тноє укріпле́ніє на діла́ блага́я, да благоуго́дноє Влади́ці на́шему Христу́ Бо́гу зді творя́ще, сподо́бимся моли́твами твої́ми наслі́довати Ца́рствіє Небе́сноє і та́мо прославля́ти Єго́ со Отце́м і Святи́м Ду́хом, во ві́ки віко́в. Амі́нь.

О святи́й, сла́вний і всехва́льний великому́чениче Фео́доре Стратила́те! Со́браннії днесь во хра́мі твоє́м і пред іко́ною твоє́ю свято́ю покланя́ющіїся лю́діє мо́лим тя, ізві́стний жела́нія на́шего хода́таю: моли́ с на́ми і о нас умоля́ємаго от Своєго́ благосе́рдія Бо́га, да ми́лостивно усли́шить нас, благости́ні у Него́ прося́щих, і вся на́ша ко спасе́нію і житію́ ну́жная проше́нія да іспо́лнить, да да́руєть же нам побі́ду на сопроти́вния і стра́ну на́шу Украї́ну в ми́рі сохрани́ть. Єще́ же мо́лим тя, святи́й побідоно́сче Фео́доре Стратила́те: укріпи́ да́нною тебі́ благода́тію во бра́нех правосла́вноє во́їнство на́ше, разруши́ си́ли возстаю́щих на ни враго́в, да постидя́ться і посра́м'яться от лиця́ ві́рних, і де́рзость їх да сокруши́ться, і да уві́дять, я́ко при́сно Бо́же́ственную по́мощ і́мами. Та́кожде і всім, в ско́рбі і обстоя́нії су́щим, многомо́щноє твоє́ яви́ заступле́ніє. Умоли́ же Го́спода Бо́га, всея́ тва́рі Созда́теля, ізба́вити нас от ві́чнаго муче́нія, да всегда́ прославля́єм Отця́, і Си́на, і Свята́го Ду́ха, і твоє́ іспові́дуєм предста́тельство, ни́ні, і при́сно, і во ві́ки віко́в.

О священному́чениче і іспові́дниче Христо́в Влади́мире! Усли́ши сле́зния моли́тви чад твої́х і воздиха́нія, се́рдцем сокруше́нним і смире́нним тебі́ приноси́мия. Се бо беззако́нії омрачи́хомся і того́ ра́ди біда́ми, я́ко ту́чами, обложи́хомся. Но ти, свя́те Влади́мире, понеси́ я́ко си́льний не́мощі на́ша, не отлуча́йся от нас ду́хом, да не разлучи́мся вконе́ць от любве́ Бо́жия. При́зри ми́лостивно на нас, предстоя́щих і моля́щихся пред свято́ю іко́ною твоє́ю і вся проше́нія наша во благо́є іспо́лни. Ві́руєм бо, я́ко твої́х страда́ній ра́ди ве́ліє дерзнове́ніє ко Го́споду і́маши. Єго́же умоли́, да укріпи́ть ни в Правосла́вії і єдиноми́слії і непоколеби́мом да́же до сме́рти іспові́данії ві́ри Христо́ви, страну́ на́шу Украї́ну да спасе́ть от наше́ствія іноплеме́нних, па́стирем на́шим да пода́сть духо́вноє трезві́ніє і ре́вность о спасе́нії пасо́мих, прави́телем же суд і пра́вду, оби́димим заступле́ніє, неду́гующим душ і тіле́с ісціле́ніє. Ми же, грі́шнії, твої́м предста́тельством укріпля́ємі, восхва́лим Го́спода Ісу́са Христа́, Єму́же подоба́єть сла́ва, че́сть і поклоне́ніє со Безнача́льним Єго́ Отце́м і Пресвяти́м Ду́хом, ни́ні, і при́сно, і во ві́ки віко́в. Амі́нь.

О вели́кий Христо́в му́чениче Іоа́нне, правові́рних побо́рниче, враго́в прогони́телю, христолюби́ваго во́їнства покрови́телю і оби́димих засту́пниче! Усли́ши нас, в біда́х і ско́рбіх моля́щихся тебі́, я́ко дана́ ті бисть благода́ть от Бо́га печа́льния утіша́ти, немощни́м помога́ти, непови́нния от напра́сния сме́рти ізбавля́ти і за всіх злі стра́ждущих моли́тися. Бу́ди у́бо і нам побо́рник крі́пок на вся ви́димия і неви́димия враги́ на́ша, я́ко да твоє́ю по́мощію і побо́рством по нас посра́м'яться всі явля́ющії нам зла́я. Умоли́ Го́спода на́шего, да сподо́бить ни грі́шния і недосто́йния раби́ своя́ получи́ти от Него́ неізрече́нная блага́я, я́же угото́ва лю́б'ящим Єго́, в Тро́йці Святі́й сла́вимаго Бо́га, всегда́, ни́ні, і при́сно, і во ві́ки віко́в.

О вели́кий во́їне і чудотво́рче, преподо́бне о́тче наш Ти́те! Хра́брий бил єси́ во бра́нех, защища́я Оте́чество от врага́ неви́димаго! Бу́ди нам побо́рник крі́пок на злоко́зненнаго супоста́та і ско́рий засту́пник всіх правосла́вних христия́н в бі́дах і напа́стех. Умоли́ Человіколю́бця Бо́га, ско́рий помо́щниче всім призива́ющим тя, да не осу́дить нас, грі́шних, по беззако́нієм на́шим, но да сотвори́ть с на́ми по вели́цій Своє́й ми́лости і пода́сть правосла́вному Отечеству на́шему і всему́ Боголюби́вому во́їнству на врага́ одолі́ніє; да укріпи́ть держа́ву на́шу Украї́ну непреміня́ємим ми́ром і благослове́нієм. Преподо́бне о́тче Ти́те, ти, оста́вив тлі́нний віне́ць во́їнства земна́го, ізбра́л єси́ безмо́лвноє жи́тіє, і ни́ні пра́ведно вінце́м нетлі́нним увінча́нний на небесі́х ца́рствуєши; ісхода́тайствуй і нам, смире́нно мо́лим тя, житіє́ ти́хоє і безм'яте́жноє, і к ві́чному ца́рствію ше́ствіє неукло́нноє. Предстоя́ же со всі́ми святи́ми Престо́лу Бо́жию, моли́ся о оби́телі і земно́й Отчи́зні своє́й, о всіх правосла́вних христия́нех, да сохрани́ть їх Госпо́дь Бог своє́ю благода́тію в ми́рі, здра́вії, долгоде́нствії і вся́ком благополу́чії во мно́гая лі́та, да ку́пно сла́вим Бо́га во святі́й Тро́йці, Отця́, і Си́на, і Свята́го Ду́ха, в несконча́ємия ві́ки. Амі́нь.