Молебний спів за недужних (поранених), одного чи багатьох

Священник: Благослове́н Бог наш, всегда́, ни́ні, і при́сно, і во ві́ки віко́в.

Хор: Амі́нь.

Диякон: Сла́ва Тебі́, Бо́же наш, сла́ва Тебі́.

І співає хор:

Царю́ Небе́сний, Уті́шителю, Ду́ше і́стини, І́же везді́ сий і вся ісполня́яй, Сокро́вище благи́х і жи́зні Пода́телю, прийди́ і всели́ся в ни, і очи́сти ни от вся́кия скве́рни, і спаси́, Бла́же, ду́ші на́ша.

Чтець:

Святи́й Бо́же, Святи́й Крі́пкий, Святи́й Безсме́ртний, поми́луй нас. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Пресвята́я Тро́йце, поми́луй нас: Го́споди, очи́сти гріхи́ на́ша; Влади́ко, прости́ беззако́нія на́ша; Святи́й, посіти́ і ісціли́ не́мощі на́ша і́мене Твоєго́ ра́ди.

Го́споди, поми́луй. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

О́тче наш, І́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́ і на землі́. Хліб наш насу́щний даждь нам днесь; і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.

Священник:

Я́ко Твоє́ єсть Ца́рство, і си́ла, і сла́ва, Отця́, і Си́на, і Свята́го Ду́ха, ни́ні, і при́сно, і во ві́ки віко́в.

Чтець: Амі́нь.

Потім, Го́споди, поми́луй [12 разів.]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Прийді́те, поклоні́мся Царе́ві на́шему Бо́гу. [Поклон]

Прийді́те, поклоні́мся і припаде́м Христу́, Царе́ві на́шему Бо́гу. [Поклон]

Прийді́те, поклоні́мся і припаде́м Само́му Христу́, Царе́ві і Бо́гу на́шему. [Поклон]

На Тя, Го́споди, упова́х, да не постижу́ся во вік. Пра́вдою Твоє́ю ізба́ви м'я і ізми́ м'я; приклони́ ко мні у́хо Твоє́ і спаси́ м'я. Бу́ди мі в Бо́га Защи́тителя і в мі́сто крі́пко спасти́ м'я. Я́ко утвержде́ніє моє́ і прибі́жище моє́ єси́ Ти. Бо́же мой, ізба́ви м'я із руки́ грі́шнаго, із руки́ законопресту́пнаго і оби́дящаго. Я́ко Ти єси́ терпі́ніє моє́, Го́споди, Го́споди, упова́ніє моє́ от ю́ности моєя́. В Тебі́ утверди́хся от утро́би, от чре́ва ма́тере моєя́ Ти єси́ мой покрови́тель, о Тебі́ пі́ніє моє́ ви́ну. Я́ко чу́до бих мно́гим, і Ти помо́щник мой крі́пок. Да іспо́лняться уста́ моя́ хвале́нія, я́ко да воспою́ сла́ву Твою́, весь день великолі́піє Твоє́. Не отве́ржи мене́ во вре́м'я ста́рости, внегда́ оскудіва́ти крі́пости моє́й, не оста́ви мене́. Я́ко рі́ша вразі́ мої́ мні, і стрегу́щії ду́шу мою́ совіща́ша вку́пі, глаго́люще: Бог оста́вил єсть єго́, пожені́те і імі́те єго́, я́ко ність ізбавля́яй. Бо́же мой, не удали́ся от мене́. Бо́же мой, в по́мощ мою́ воньми́. Да постидя́ться і ісче́знуть оклевета́ющії ду́шу мою́, да облеку́ться во студ і срам і́щущії зла́я мні. Аз же всегда́ возупова́ю на Тя, і приложу́ на вся́ку похвалу́ Твою́. Уста́ моя́ возвістя́ть пра́вду Твою́, весь день спасе́ніє Твоє́, я́ко не позна́х кни́жная. Вни́ду в си́лі Госпо́дні: Го́споди, пом'яну́ пра́вду Тебе́ єди́наго. Бо́же мой, ї́мже научи́л м'я єси́ от ю́ности моєя́, і до ни́ні возвіщу́ чудеса́ Твоя́. І да́же до ста́рости і престарі́нія, Бо́же мой, не оста́ви мене́, до́ндеже возвіщу́ ми́шцю Твою́ ро́ду всему гряду́щему, си́лу Твою́ і пра́вду Твою́, Бо́же, да́же до ви́шніх, яже сотвори́л мі єси́ вели́чія. Бо́же, кто подо́бен Тебі́? Єли́ки яви́л мі єси́ ско́рбі мно́гі і зли, і обра́щся оживотвори́л м'я єси́ і от бездн землі́ возве́л м'я єси́. Умно́жил єси́ на мні вели́чествіє Твоє́, і обра́щся уті́шил м'я єси́, і от бездн землі́ па́ки возве́л м'я єси́. І́бо аз іспові́мся Тебі́ в лю́дех, Го́споди, в сосу́діх псало́мських і́стину Твою́, Бо́же. Воспою́ Тебі́ в гу́слех, Святи́й Ізра́їлев. Возра́дуєтіся устні́ мої́, єгда́ воспою́ Тебі́, і душа́ моя́, ю́же єси́ ізба́вил. Єще́ же і язи́к мой весь день поучи́ться пра́вді Твоє́й, єгда́ постидя́ться і посра́м'яться і́щущий зла́я мні.

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Аллилу́я, аллилу́я, аллилу́я, сла́ва Тебі́, Бо́же. [Тричі]

[1] Ві́рую во Єди́наго Бо́га Отця́, Вседержи́теля, Творця́ не́бу і землі́, ви́димим же всім і неви́димим.

[2] І во Єди́наго Го́спода Ісу́са Христа́, Си́на Бо́жия, Єдиноро́днаго, І́же от Отця́ рожде́ннаго пре́жде всіх вік: Сві́та от Сві́та, Бо́га і́стинна от Бо́га і́стинна, рожде́нна, не сотворе́нна, єдиносу́щна Отцю́, І́мже вся би́ша.

[3] Нас ра́ди челові́к і на́шего ра́ди спасе́нія сше́дшаго с Небе́с, і воплоти́вшагося от Ду́ха Свя́та і Марі́ї Ді́ви, і вочелові́чшася.

[4] Расп’я́таго же за ни при Понті́йстім Пила́ті, і страда́вша, і погребе́нна.

[5] І воскре́сшаго в тре́тій день по Писа́нієм.

[6] І возше́дшаго на Небеса́, і сідя́ща одесну́ю Отця́.

[7] І па́ки гряду́щаго со сла́вою суди́ти живи́м і ме́ртвим, Єго́же Ца́рствію не бу́деть конця́.

[8] І в Ду́ха Свята́го, Го́спода, Животворя́щаго, І́же от Отця́ ісходя́щаго, І́же со Отце́м і Си́ном спокланя́єма і ссла́вима, глаго́лавшаго проро́ки.

[9] Во Єди́ну Святу́ю, Собо́рную і Апо́стольськую Це́рков.

[10] Іспові́дую єди́но креще́ніє во оставле́ніє гріхо́в.

[11] Ча́ю воскресе́нія ме́ртвих,

[12] І жи́зні бу́дущаго ві́ка. Амі́нь.

Ми́ром Го́споду помо́лимся.

Хор: Го́споди, поми́луй. [на кожне прохання]

О сви́шнім ми́рі, і спасе́нії душ на́ших Го́споду помо́лимся.

О ми́рі всего́ ми́ра, благостоя́нії святи́х Бо́жиїх Церкве́й і соєдине́нії всіх Го́споду помо́лимся.

[якщо в храмі: О святі́м хра́мі сем, і с ві́рою, благогові́нієм і стра́хом Божиїм входя́щих вонь Го́споду помо́лимся.]

О господи́­ні і отці́ на́шем Блаже́ннійшем Митрополи́ті [ім'я], і о господи́ні на́шем високопреосвяще́ннійшем митрополи́ті [або: архієпи́скопі, або: преосвяще́ннійшем єпи́скопі] [ім'я], честні́м пресви́терстві, во Христі́ дия́констві, о всем при́чті і лю́дех Го́споду помо́лимся.

О богохрани́мій страні́ на́шей Украї́ні, власті́х і во́їнстві єя́ Го́споду помо́лимся.

О є́же пособи́ти і покори́ти под но́зі на́ша вся́каго врага́ і супоста́та, Го́споду помо́лимся.

О гра́ді сем, [якщо за містом: О мі́сті сем], вся́ком гра́ді, страні́ і ві́рою живу́щих в них Го́споду помо́лимся.

О благорастворе́нії возду́хов, о ізоби́лії плодо́в земни́х і вре́меніх ми́рних Го́споду помо́лимся.

О пла́вающих, путеше́ствующих, неду́гующих, стра́ждущих, пліне́нних і о спасе́нії їх Го́споду помо́лимся.

О є́же прости́ти вся́коє прегріше́ніє во́льноє і нево́льноє рабо́в Свої́х, ізра́ненних на по́лі бра́ні во́їнов [або: раба́ Своєго́, ізра́неннаго на по́лі бра́ні во́їна] [імена], і ми́лостиву би́ти їм [або: єму́], Го́споду помо́лимся.

О є́же благосердія ра́ди ми́лости Своєя́, гріх ю́ности і неві́дінія їх [або: єго́] не пом'яну́ти, но ми́лостивно здра́віє їм [або: єму́] дарова́ти, Го́споду помо́лимся.

О є́же не презрі́ти прилі́жная моле́нія рабо́в Свої́х, [або: раба́ Своєго́], на́ми ни́ні моля́щихся [або: моля́щагося]: но ми́лостивно усли́шати, і благоуві́тливу, і благопреміни́тельну, і человіколюби́ву їм [або: єму́] би́ти і здра́віє пода́ти, Го́споду помо́лимся.

О є́же, я́коже іногда́ разсла́бленнаго сло́вом Бо́же́ственния Своєя́ благода́ті, ско́ро неду́гующих рабо́в Свої́х [або: неду́гующаго раба́ Своєго́] от одра́ болі́зні воздви́гнути, і здра́вих [або: здра́ва] сотвори́ти, Го́споду помо́лимся.

О є́же посіти́ти їх [або: єго́] посіще́нієм Святаго Своєго́ Ду́ха, і ісціли́ти всяк неду́г, і вся́ку болі́знь в них [або: в нем] гніздя́щуюся, Го́споду помо́лимся.

О є́же ми́лостивно, я́коже ханане́їн усли́шати глас, моли́тви нас, недосто́йних рабо́в Свої́х, к Нему́ вопію́щих, і я́коже тоя́ дщер, поми́ловати і ісціли́ти больни́х рабо́в Свої́х, [або: больна́го раба́ Своєго́], [імена], Го́споду помо́лимся.

О ізба́витися нам от вся́кия ско́рби, гні́ва і ну́жди, Го́споду помо́лимся.

Заступи́, спаси́, поми́луй і сохрани́ нас, Бо́же, Твоє́ю благода́тію.

Пресвяту́ю, Пречи́стую, Преблагослове́нную, Сла́вную Влади́чицю на́шу Богоро́дицю, і Присноді́ву Марі́ю со всі́ми святи́ми пом'яну́вше, са́мі себе́ і друг дру́га, і весь живо́т наш Христу́ Бо́гу предаді́м.

Хор: Тебі́ Го́споди.

Возгла́с: Я́ко Бог ми́лости, щедро́т і человіколю́бія єси́, і Тебі́ сла́ву возсила́єм, Отцю́, і Си́ну, і Свято́му Ду́ху, ни́ні, і при́сно, і во ві́ки віко́в.

Хор: Амі́нь.

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Аллилу́я, аллилу́я, аллилу́я, сла́ва Тебі́, Бо́же. [Тричі]

Диякон: Бог Госпо́дь і яви́ся нам, благослове́н Гряди́й во і́м'я Госпо́днє.

Хор співає Бог Госпо́дь: на кожен стих.

Стих: Іспові́дайтеся Го́сподеві, я́ко благ, я́ко во вік ми́лость Єго́.

Стих: Обише́дше обидо́ша м'я, і і́менем Госпо́днім противля́хся їм.

Стих: Не умру́, но жив бу́ду, і пові́м діла́ Госпо́дня.

Стих: Ка́мень єго́же небрего́ша зи́ждущії, сей бисть во главу́ у́гла: от Го́спода бисть сей і єсть ди́вен во очесі́х на́ших.

Ско́рий в заступле́нії єди́н сий Христе́, / ско́роє сви́ше покажи́ посіще́ніє стра́ждущим рабо́м Твої́м, [або стра́ждущему рабу́ Твоєму́], / і ізба́ви от неду́г і го́рких болі́зней, / і воздви́гни є́же пі́ти Тя, і сла́вити непреста́нно, / моли́твами Богоро́диці, єди́не Человіколю́бче.

На одрі́ болі́зні лежа́щих, [або: лежа́щаго], / і сме́ртною ра́ною уя́звленних, [або: уя́звленнаго], / я́коже іногда́ воздви́гл єси́, Спа́се, Петро́ву те́щу, / і разсла́бленнаго на одрі́ носи́маго; / си́це і ни́ні, Милосе́рде, / стра́ждущих, [або: стра́ждущаго], посіти́ і ісціли́; / Ти бо єди́н єси́ неду́ги і болі́зні ро́да на́шего понеси́й, / і вся моги́й я́ко Многоми́лостив.

Поми́луй м'я, Го́споди, я́ко не́мощен єсьм, / ісціли́ м'я, я́ко см'ято́шася ко́сті моя́.

Стих: Я́ко ність во сме́рті помина́яй Тебе́.

Бра́тіє, о́браз приймі́те злострада́нія і долготерпі́нія проро́ки, і́же глаго́лаша і́менем Госпо́днім. Се, блажи́м терп'я́щия: терпі́ніє І́овле сли́шасте, і кончи́ну Госпо́дню ви́дісте, я́ко многоми́лостив єсть Госпо́дь і щедр. Пре́жде же всіх, бра́тіє моя́, не клені́теся ні не́бом, ні земле́ю, ні іно́ю ко́єю кля́твою, бу́ди же вам є́же єй, єй, і є́же ні, ні: да не в лицемі́ріє впаде́те. Злостра́ждеть ли кто в вас, да моли́тву ді́єть. Благоду́шствуєть ли кто, да поє́ть. Боли́ть ли кто в вас, да призове́ть пресві́тери церко́вния, і да моли́тву сотворя́ть над ним, пома́завше єго́ єле́ем во і́м'я Госпо́днє, і моли́тва ві́ри спасе́ть боля́щаго, і воздви́гнеть єго́ Госпо́дь, і а́ще гріхи́ бу́деть сотвори́л, отпу́стяться єму́. Іспові́дайте у́бо друг дру́гу согріше́нія, і молі́теся друг за дру́га, я́ко да ісцілі́єте, мно́го бо мо́жеть моли́тва пра́веднаго поспішеству́єма.

Аллилу́я, глас 7: Го́споди, да не я́ростію Твоє́ю обличи́ши мене́.

Стих: Спаси́ м'я ра́ди ми́лости Твоєя́.

Диякон: Прему́дрость, про́сти, усли́шим свята́го Єва́нгелія.

Священник: Мир всім.

Хор: І ду́хові твоєму́.

Священник: От Матфе́я свята́го Єва́нгелія чте́ніє.

Хор: Сла́ва Тебі́, Го́споди, сла́ва Тебі́.

Диякон: Во́ньмем.

Во вре́м'я о́но, вше́дшу Ісу́су в Капернау́м, приступи́ к Нему́ со́тник, моля́ Єго́ і глаго́ля: Го́споди, о́трок мой лежи́ть в дому́ осла́блен, лю́ті стражда́. І глаго́ла єму́ Ісу́с: Аз прише́д ісцілю́ Єго́. І отвіща́в со́тник, рече́ Єму́: Го́споди, нісьм досто́їн, да под кров мой вни́деши: но то́кмо рци сло́во, і ісцілі́єть о́трок мой. І́бо аз челові́к єсьм под вла́стію, іми́й под собо́ю во́їни. І глаго́лю сему́: іди́, і і́деть, і друго́му: прийди́, і при́йдить. І рабу́ моєму́: сотвори́ сіє́, і сотвори́ть. Сли́шав же Ісу́с, удиви́ся, і рече́ гряду́щим по Нем: амі́нь глаго́лю вам, ні во Ізра́їлі толи́ки ві́ри обріто́х. Глаго́лю же вам, я́ко мно́зі от восто́к і за́пад при́йдуть і возля́гуть со Авраа́мом і Ісаа́ком і Іа́ковом во Ца́рствії Небе́снім. Си́нове же ца́рствія ізгна́ни бу́дуть во тьму кромі́шнюю: ту бу́деть плач і скре́жет зубо́м. І рече́ Ісу́с со́тнику: іди́, і я́коже ві́ровал єси́, бу́ди тебі́. І ісцілі́ о́трок єго́ в той час.

Хор: Сла́ва Тебі́, Го́споди, сла́ва Тебі́.

Поми́луй нас, Бо́же, по вели́цій ми́лості Твоє́й, мо́лим Ті ся, усли́ши і поми́луй.

Хор: Го́споди, поми́луй. [Тричі на кожне прохання.]

Єще́ мо́лимся о господи́ні і отці́ на́шем, Блаже́ннійшем Митрополи́ті [ім'я], і о господи́ні на́шем високопреосвяще́ннійшем митрополи́ті [або: архієпи́скопі, або: преосвяще́ннійшем єпи́скопі] [ім'я], і о всей во Христі́ бра́тії на́шей.

Єще́ мо́лимся о богохрани́мій страні́ на́шей Украї́ні, власті́х і во́їнстві єя́, да ти́хоє і безмо́лвноє житіє́ поживе́м во вся́ком благоче́стії і чистоті́.

Врачу́ душ і тіле́с, со умиле́нієм в се́рдці сокруше́нном к Тебі́ припа́даєм і стеня́ще вопіє́м Ті: ісціли́ болі́зні, уврачу́й стра́сті душ і тіле́с рабо́в Твої́х, ізра́ненних на по́лі бра́ні во́їнов [або: душі́ і ті́ла раба́ Твоєго́, ізра́неннаго на по́лі бра́ні во́їна], [імена] і прости́ їм, [або: єму́], я́ко благосе́рд, вся прегріше́нія, во́льная і нево́льная, і ско́ро воздви́гни от одра́ болі́зні, мо́лим Ті ся, усли́ши і поми́луй.

Не хотя́й сме́рти грі́шних, но є́же обрати́тися і живи́м їм би́ти, пощади́ і поми́луй рабо́в Твої́х, ізра́ненних на по́лі бра́ні во́їнов [або: раба́ Твоєго́, ізра́неннаго на по́лі бра́ні во́їна] [імена], Ми́лостиве; запрети́ болі́зні, отста́ви всю страсть, і весь неду́г, і простри́ крі́пкую Твою́ ру́ку, і я́коже Іаї́рову дщер от одра́ болі́зні воздви́гни, і здра́вих [або: здра́ва] сотвори́, мо́лим Ті ся усли́ши і поми́луй.

Огненную болі́знь Петро́вой те́щі прикоснове́нієм Твої́м ісціли́вий, і ни́ні лю́ті стра́ждущих рабо́в Твої́х, ізра́ненних на по́лі бра́ні во́їнов [або: лю́ті стра́ждущаго раба́ Твоєго́, ізра́неннаго на по́лі бра́ні во́їна], [імена], болі́знь благосе́рдієм Твої́м ісціли́, здра́віє їм [або: єму́] ско́ро подава́я, прилі́жно мо́лим Ті ся, Істо́чниче цільба́м, усли́ши і поми́луй.

Єзекі́їни сле́зи, Манассі́їно і ніневи́тян покая́ніє, і Дави́дово іспові́даніє приє́мий і ско́ро тіх поми́ловавий; і на́ша во умиле́нії приноси́мия Ті мольби́ прийми́, всеблаги́й Царю́, і я́ко щедр поми́луй лю́ті боля́щих рабо́в Твої́х, [або: боля́щаго раба́ Твоєго́] здра́віє їм [або: єму́] да́руя, со слеза́ми мо́лим Ті ся, Істо́чниче жи́зні і безсме́ртія, усли́ши і ско́ро поми́луй.

Єще́ мо́лимся за всю бра́тію і за вся христия́ни.

Возгла́с: Усли́ши ни, Бо́же Спаси́телю наш, упова́ніє всіх конце́в землі́, і су́щих в мо́рі дале́че, і ми́лостив, ми́лостив бу́ди, Влади́ко, о грісі́х на́ших і поми́луй ни. Ми́лостив бо і Человіколю́бець Бог єси́, і Тебі́ сла́ву возсила́єм, Отцю́, і Си́ну, і Свято́му Ду́ху, ни́ні і при́сно, і во ві́ки віко́в.

Хор: Амі́нь.

Бо́же си́льний і ми́лостивий, вся стро́яй на спасе́ніє ро́да на́шего, при́зри, смире́нно мо́лим Тя, на смире́нную мольбу́ на́шу, і ми́лостивно посіти́ раба́ Твоєго́, ізра́неннаго на по́лі бра́ні во́їна [або: раб Твої́х, ізра́ненних на по́лі бра́ні во́їнов] [ім'я], нарица́ющаго [або: нарица́ющих] і́м'я Христа́ Твоєго́, і отпусти́ і прости́ єму́ [або: їм] вся согріше́нія во́льная і нево́льная, ї́миже Твою́ благода́ть прогні́ва (-ша), і Твою́ я́рость раздражи́ (-ша): всяк же неду́г єго́ [або: їх] тіле́сний ісціли́, і вся́коє наше́ствіє неприя́зненноє дале́че от Него́ [або: от них] сотвори́: воздви́гни єго́ [або: їх] от одра́ болі́зненнаго, і да́руй єго́ здра́ва [або: їх здра́вих] душе́ю і ті́лом Це́ркві Твоє́й святі́й, до́брими ді́ли, і словеси́ благи́ми сла́в'яща [або: сла́в’ящих] со всі́ми ві́рними Твої́ми і́м'я Христа́ Твоєго́: с Ни́мже благослове́н єси́ с Пресвяти́м, і Благи́м, і Животворя́щим Твої́м Духом, ни́ні, і при́сно, і во ві́ки віко́в.

Хор: Амі́нь.

Диякон: Прему́дрость.

Священник: Пресвята́я Богоро́дице, спаси́ нас.

Хор: Честні́йшую Херуви́м і сла́внійшую без сравне́нія Серафи́м, без істлі́нія Бо́га Сло́ва ро́ждшую, су́щую Богоро́дицю Тя велича́єм.

Священник: Сла́ва Тебі́, Христе́ Бо́же, упова́ніє на́ше, сла́ва Тебі́.

Хор: Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Го́споди, поми́луй. [Тричі]

Благослови́.

Го́споди Ісу́се Христе́, Си́не Бо́жий, моли́тв ра́ди Пречи́стия Твоєя́ Ма́тере, преподо́бних і богоно́сних оте́ць на́ших і всіх святи́х, поми́луй нас. Амі́нь.