Петра́ от уз і темни́ці ізведи́й і невре́дна Це́ркві Твоє́й предста́вивий, Христе́, і рабо́в Твої́х пліне́нних, [імена], в заточе́нії су́щих, неізрече́нним Про́мислом Твої́м свободи́, мо́лимся Тебі́, Всеми́лостивий Спа́се, усли́ши і поми́луй.
Ізбавля́яй при́сно, Го́споди, все упова́ніє на Тя єди́наго возлага́ющих, при́зри ми́лостивно на скорб на́шу, і пліне́нних рабо́в Твої́х, [імена], от уз, бід і заточе́нія, я́ко Всеси́лен, ізба́ви, прилі́жно мо́лимся Тебі́, ско́ро усли́ши і, я́ко щедр, поми́луй.
Крі́пкою Твоє́ю руко́ю род челові́чеський спаса́яй, Го́споди, і любо́вію Твоє́ю вся ко бла́гу направля́яй, Засту́пник і Помо́щник крі́пок бу́ди рабо́м Твої́м пліненним, [імена], на всеси́льную по́мощ Твою́ упова́ющих, мо́лимся Тебі́, Всеси́льне Го́споди, усли́ши і ско́ро поми́луй.
Го́споди Ісу́се Христе́, Бо́же наш, і́стинную свобо́ду позна́вшим Тя дарова́вий, свята́го апо́стола Петра́ от уз і темни́ці без вся́каго вреда́ свободи́вий, смире́нно мо́лим Тя: рабо́в Твої́х пліне́нних, [імена], в заточе́нії су́щих, си́лою Твоє́ю укріпи́. Се́рдце му́жественноє, по́мощ і заступле́ніє Твоє́ їм да́руй, і неізрече́нним Твої́м Про́мислом от пліне́нія свободи́. Помо́щник крі́пок бу́ди їм і нам, все упова́ніє своє́ на Тя возлага́ющим і Твоєя́ всеси́льная по́мощі ві́рно ча́ющим.
Ти бо єси́ крі́пость, і ізбавле́ніє, і мир наш, і Тебі́ сла́ву возсила́єм со Безнача́льним Твої́м Отце́м, і Пресвяти́м, і Благи́м, і Животворя́щим Твої́м Ду́хом, ни́ні, і при́сно, і во ві́ки віко́в.
