Возбра́нний от Царя́ сил, Го́спода Ісу́са, воєво́до і чудотво́рче преди́вний, преподо́бне о́тче Се́ргіє! Прославля́юще просла́вльшаго тя сла́ви Го́спода, благода́рственноє пі́ніє воспіва́єм ті, і́бо моли́твами твої́ми от прило́гов і ско́рбних обстоя́ній нас при́сно ізбавля́єши, я́ко імі́я дерзнове́ніє ко Го́споду, от вся́ких нас бід свободи́, да зове́м ті:

Ра́дуйся, Се́ргіє, ско́рий помо́щниче і пресла́вний чудотво́рче.

А́нгелов Творе́ць, предуві́дівий, по самовла́стному чи́стаго се́рдця твоєго́ ізволе́нію, всеусе́рдствующеє Єго́ во́лі ісполне́ніє, єще́ во чре́ві ма́терні трикра́тним возглаше́нієм, показа́ тя ми́ру і́стиннаго служи́теля би́ти Святи́я Тро́йці, і научи́ всіх вопи́ти тебі́ си́це:

Ра́дуйся, я́ко пре́жде вік і́маши ві́рний раб Христо́в би́ти предусмо́тренний; ра́дуйся, во о́ноже вре́м'я во блаже́нноє і небе́сноє жили́ще предуста́вленний.

Ра́дуйся, от чре́ва ма́терня на слу́жбу Небе́снаго Царя́, я́ко во́їн хотя́щий ві́рен Єму́ би́ти, призва́нний; ра́дуйся, я́ко благода́тію Бо́жиєю оправда́нний.

Ра́дуйся, ти бо єси́ по всей вселе́нній просла́вленний; ра́дуйся, трикра́тним твої́м во чре́ві возглаше́нієм роди́телей і всіх сли́шащих удиви́вий.

Ра́дуйся, по рожде́нії своє́м по́стноє і́ночеськоє житіє́ показа́вий; ра́дуйся, от сосця́ ма́терня воздержа́ніє чу́дноє яви́вий.

Ра́дуйся, я́ко в сре́ду і пято́к млека́ ніка́коже вкуси́вий; ра́дуйся, роди́телей благи́х до́брий і ізбра́нний пло́де.

Ра́дуйся, ра́дости скорб'я́щим і ми́лости с ві́рою у тебе́ прося́щим пода́телю; ра́дуйся, печа́лей злих во вся́ких приключе́ніїх отгони́телю.

Ра́дуйся, Се́ргіє, ско́рий помо́щниче і пресла́вний чудотво́рче.

Ви́дящи вся страни́ да́нною тебі́, преподо́бне о́тче Се́ргіє, благода́тію Бо́жиєю, с ві́рою тебі́ приходя́щим, і ско́роє вспоможе́ніє, і при́сноє пресла́вноє чуде́с творе́ніє, удивля́ються. І ми всі веселя́щеся, я́ко імі́єм такова́го ми́лостиваго помо́щника, Просла́вльшаго тя прославля́юще, і тя, блага́го раба́ і ві́рнаго слугу́ Госпо́дня восхваля́юще, вопіє́м Єму́: Аллилу́я.

Ра́зум, єще́ су́щу ті во чре́ві ма́терні, Святу́ю Тро́йцю просла́вити Ісу́с Христо́с дарова́вий, і ві́ру крі́пкую, наде́жду несумні́нную, любо́в і́стинную к Нему́ імі́ти утверди́вий, сподо́би тя во і́м'я Святи́я Тро́йці пресла́вний храм і оби́тель чу́дную устро́їти, і во о́ну мно́жество і́нок собра́ти. Сего́ ра́ди ві́рнії научи́шася воспіва́ти тебі́ та́ко:

Ра́дуйся, честно́є Пресвяти́я Тро́йці носи́ло і похвале́ніє; ра́дуйся, до́брі ста́до, тобо́ю со́бранноє, во спасе́ніє наставля́вий.

Ра́дуйся, честни́й о́бразе а́гнцем і па́стирем; ра́дуйся, пра́вило ві́ри і о́бразе кро́тости духо́вния.

Ра́дуйся, святи́ням чи́стоє і непоро́чноє жили́ще; ра́дуйся, єще́ в жи́зні сподо́бивийся ви́діти Пресвяту́ю Богоро́дицю со двіма́ апо́столома.

Ра́дуйся, удосто́ївийся во вре́м'я соверше́нія літургі́и сослуже́нія а́нгельськаго; ра́дуйся, во святу́ю літургі́ю в благода́ті Бо́жієй весь, а́ки во огні́, стоя́щий.

Ра́дуйся, о́ним Боже́ственним огне́м, в поти́р вше́дшим, причасти́вийся; ра́дуйся, досто́їн би́вий а́нгельськаго собесі́дованія.

Ра́дуйся, преіспо́лненний вся́кия благости́ні; ра́дуйся, чистоти́ душе́вния і тіле́сния усе́рдний храни́телю.

Ра́дуйся, Се́ргіє, ско́рий помо́щниче і пресла́вний чудотво́рче.

Си́лою, да́нною ті сви́ше, бу́дущая, я́ко настоя́щая, созерца́я, возвіща́л єси́ пра́вду Єва́нгельськую, ю́же всім бли́жнім і да́льним пропові́дал єси́, да Христу́ ві́рнії служи́теліє яв'я́ться, Єму́же і ти со тща́нієм мно́гим чрез все житіє́ твоє́ послужи́, оби́тель во і́м'я Пресвяти́я Тро́йці созида́я, Є́йже ми ни́ні сла́дці вопіє́м: Аллилу́я.

Іму́ще помишле́ніє роди́теліє твої́ і лю́діє о трикра́тнім твоє́м во чре́ві ма́тернем в це́ркві глаше́нії і уди́вльшеся, разумі́ша ні́что пресла́вноє і чу́дноє би́ти; і по сих уві́дівше твоє́ ра́достноє рожде́ніє, ра́довахуся і ра́достная тебі́ приноша́ху, глаго́люще:

Ра́дуйся, отроча́ добродуше́вноє і благонаде́жноє; ра́дуйся, ді́тище, вся́кия благода́ті Бо́жия іспо́лненноє.

Ра́дуйся, пречу́дноє в младе́нчестві по́стничество нам явля́яй; ра́дуйся, о́ним мно́гих приводя́й во удивле́ніє і увеселя́яй.

Ра́дуйся, я́ко с тобо́ю всегда́ бі благода́ть Госпо́дня; ра́дуйся, от ю́ности твоєя́ всім се́рдцем і ми́слію Бо́га возлюби́вий.

Ра́дуйся, кро́тость, смире́ніє і бді́ніє імі́вий; ра́дуйся, вся ми́ра сего́ кра́сная, я́ко ско́ро ісчеза́ющая, презрі́вий.

Ра́дуйся, вся плотські́я по́хоті Бо́га ра́ди умертви́вий; ра́дуйся, многообра́зния ко́зні лука́ваго си́лою Бо́жиєю побіди́вий.

Ра́дуйся, мно́гія лю́ди от гріхо́внаго путі́ ко Го́споду обрати́вий і спаси́й; ра́дуйся, я́ко тобо́ю сла́достей духо́вних ісполня́ємся.

Ра́дуйся, Се́ргіє, ско́рий помо́щниче і пресла́вний чудотво́рче.

Бу́ри житія́ ми́ра сего́, при́сно вну́тренніми і вні́шніми злострада́нії волну́ющагося, преподо́бне о́тче Се́ргіє, ізба́вився, прише́л єси́ во приста́нище нем'яте́жноє небе́сноє, на міста́ зла́чна і прохла́дна, іді́же пото́ци сла́дости неісповіди́мия, пи́ща сла́ви Бо́жия нетлі́нная, пі́нія і гла́си пра́зднующих. Та́мо почива́єши і весели́шися, со всі́ми а́нгельськими си́лами поя́ Бо́гу: Аллилу́я.

Сли́шаша, преподо́бне о́тче Се́ргіє, бли́жнії і да́льнії ангелоподо́бноє твоє́ житіє́ і благода́ті чуде́с струю́ ви́ну теку́щую, я́ко моли́твою твоє́ю прокаже́ннії очища́ються, сліпі́ї прозира́ють, хромі́ї хо́дять і разнообра́зних неду́г с ві́рою притека́ющії здра́віє улуча́ють, сих ізба́вльшеся, вопія́ху к тебі́ такова́я:

Ра́дуйся, мирова́рнице, на вся неду́ги врачева́ніє подава́ющая; ра́дуйся, безме́здно па́че єстества́ врачу́ скороми́лостивий.

Ра́дуйся, ми́лости превели́кия і ско́рбним сострада́нія сокро́вище; ра́дуйся, всеусе́рднаго о лю́дех промишле́нія прия́телище.

Ра́дуйся, ду́шу свою́ за челові́ки положи́ти гото́вий; ра́дуйся, увеселе́ніє і отра́до к тебі́ прибіга́ющим.

Ра́дуйся, мертвеця́ пресла́вно моли́твою твоє́ю оживи́вий; ра́дуйся, оскуді́ніє монасти́рськоє в пи́щі іспо́лнивий.

Ра́дуйся, на сухо́м мі́сті пото́к во́дний тещи́ у Бо́га іспроси́вий; ра́дуйся, я́ко та́яжде вода́, моли́твою твоє́ю ісціля́ющи неду́ги, чудоді́йствуєть.

Ра́дуйся, чуде́с пучи́но, Бо́гом ізлія́нная; ра́дуйся, жела́ємих благ прише́дшим к тебі́ пода́телю.

Ра́дуйся, Се́ргіє, ско́рий помо́щниче і пресла́вний чудотво́рче.

Боготе́чная пресві́тлая звізда́ яви́лся єси́, преподо́бне о́тче Се́ргіє, не́бо церко́вноє украша́яй і всіх блудя́щих по мо́рю стра́стнаго житія́ сего́ да́нною тебі́ от Со́лнця Пра́вди Христа́ Ісу́са, і́стиннаго Бо́га, благода́тію озаря́яй, мрак печа́лей і мглу неду́г і скорбе́й прогоня́яй, наставля́єши всіх к тебі́ с ві́рою притека́ющих на путь спасе́нний, к ві́чному Небе́сному Оте́честву веду́щий, пою́щих Бо́гу: Аллилу́я.

Ви́дів преподо́бний Се́ргій, я́ко в ми́рі сем вся́чеськая суєта́ і тлі́нію прича́стна, потща́ся вседу́шно Преві́чному Бо́гу благоугоди́ти, і воі́стину не вотще́ потруди́ся: преміни́ бо тлі́нная на нетлі́нная, найпа́че же предстоя́нія сподо́бися у стра́шнаго Престо́ла Влади́чня в сла́ві ві́чній. Ті́мже вопіє́м єму́:

Ра́дуйся, я́ко іді́же Христо́с в тілесі́, та́можде і ти пребива́єши; ра́дуйся, та́мо, я́ко в зерца́лі, в Бо́зі вся Єму́ любе́зная созерца́єши.

Ра́дуйся, созерца́я в Нем моля́щихся ті о по́мощі, моли́твою твоє́ю їм поле́зноє хода́тайствуєши; ра́дуйся, ско́рий помо́щниче призива́ющим тя правосла́вним.

Ра́дуйся, моли́твою твоє́ю ві́рним побі́ди на проти́вния подава́яй; ра́дуйся, скорб'я́щим скоропредста́тельний уті́шителю.

Ра́дуйся, не́мощей тіле́сних і душе́вних немздоприє́мний ісціли́телю; ра́дуйся, мно́гая чудеса́ благода́тію Ду́ха Свята́го содіва́яй.

Ра́дуйся, хроми́м хожде́ніє і сліпи́м прозрі́ніє подава́яй; ра́дуйся, гро́зде ви́нний, пита́ющий нас і веселя́щий.

Ра́дуйся, розго́ Христа́ лози́ і́стинния, мног плод в посо́біє правосла́вним творя́щая; ра́дуйся, благи́й ра́бе і ві́рний, і до́брий ді́лателю виногра́да Христо́ва.

Ра́дуйся, Се́ргіє, ско́рий помо́щниче і пресла́вний чудотво́рче.

Пропові́дуєм, богому́дре Се́ргіє, труди́ твоя́ і болі́зні, бді́ніє же і сухояде́ніє, ра́ди душе́внаго твоєго́ спаcе́нія под'я́тия, єго́же ра́ди просла́ви тя Госпо́дь сла́вою Своє́ю Боже́ственною. Ті́мже, я́ко рай насажде́нний, в Це́ркві яви́лся єси́, іму́щей дре́во жи́зні Самаго́ Го́спода, от Него́же вкуси́вшії вся ско́ро ги́бнущая в ми́рі сем презира́ють і ра́достно в прекра́сний виногра́д ви́шній вхо́дять, іді́же ти, предстоя́ Єму́, вопіє́ши: Аллилу́я.

Возсія́ Це́ркві і пра́во в Бо́га ві́рующим просвіще́ніє соверше́нних твої́х доброді́телей, преподо́бне о́тче Се́ргіє, о ни́хже благодаря́ще Отця́ Небе́снаго, да́вшаго тебі́ толи́кую благода́ть вели́чія Своєго́, к тебі́, я́ко к те́плому о нас моли́твеннику, ра́достная воспіва́єм та́ко:

Ра́дуйся, а́нгельськоє житіє́ нам явля́яй; ра́дуйся, стра́сті гріхо́вния уставля́яй.

Ра́дуйся, о́бразе і́стиннаго смире́нія; ра́дуйся, зерца́ло соверше́ннаго терпі́нія.

Ра́дуйся, наста́вниче вели́кий спасе́нію; ра́дуйся, приводя́й грі́шних ко ісправле́нію.

Ра́дуйся, ізві́стний ісполни́телю за́повідей Христо́вих; ра́дуйся, ду́ш немощни́х ісціле́ніє.

Ра́дуйся, ми́лостиню твори́ти науча́яй; ра́дуйся, ри́зи і бра́шна немощни́м подава́ти повеліва́яй.

Ра́дуйся, пусти́нниче, мирську́ю честь і бога́тство возненави́дівий; ра́дуйся, по́стниче, от ю́ности Бо́гу послужи́вий.

Ра́дуйся, Се́ргіє, ско́рий помо́щниче і пресла́вний чудотво́рче.

Хотя́ ізбра́н дом Ду́ху Свято́му себе́ сотвори́ти, потща́лся єси́ ті́сним і приско́рбним путе́м, веду́щим в жизнь ві́чную, взем на ра́мо своє́ Крест Христо́в, ше́ствовати, є́же благода́тію Бо́жиєю от ю́ности твоєя́ непоро́чно в творе́ніїх за́повідей Госпо́дніх соверши́в, дости́гл єси́ угото́ваннаго тебі́ в небе́сном всевесе́лом пребива́нії воздая́нія, і та́мо благода́рственно поє́ши Бо́гу: Аллилу́я.

Но́вую благода́ть показа́ всіх Творе́ць і Влади́ка тебі́, богому́дре Се́ргіє: а́ще бо і у́мерл єси́ на землі́ пло́тію, но душе́ю в ви́шнім селе́нії всегда́ жив сий, мно́гая і пресла́вная чудеса́ в ми́рі живу́щим лю́дем ді́йствуєши, і те́плим твої́м хода́тайством посо́бствуєши, вопію́щим к тебі́ такова́я:

Ра́дуйся, ді́вственниче душе́ю і ті́лом; ра́дуйся, і́ноком наста́вниче преди́вний.

Ра́дуйся, ду́ш на́ших ра́дованіє; ра́дуйся, би́строє ни́щим усли́шаніє.

Ра́дуйся, скорб'я́щим прия́тноє попече́ніє; ра́дуйся, чистоти́ усе́рдний храни́телю.

Ра́дуйся, ненаде́жним наді́яніє; ра́дуйся, скорб'я́щим увеселе́ніє.

Ра́дуйся, дре́во чудото́чноє рая́ Ісу́сова; ра́дуйся, кри́не ра́йськаго прозябе́нія.

Ра́дуйся, ми́ро Христо́ва благоуха́нія; ра́дуйся, я́ко тобо́ю прино́ситься ра́дованіє.

Ра́дуйся, Се́ргіє, ско́рий помо́щниче і пресла́вний чудотво́рче.

Стра́нноє і пресла́вноє чу́до явля́ється притека́ющим к тебі́, богому́дре Се́ргіє: і́бо да́нною тебі́ с ві́рою прося́щим Бо́жиєю благода́тією неме́дленно от вся́ких многообра́зних тіле́сних і душе́вних скорбе́й ісціля́єши, от бід ізбавля́єши, от напа́стей охраня́єши, і всім вся́ко благополе́зноє проше́ніє ісполня́єши, і вопіє́ши Бо́гу: Аллилу́я.

Весь єси́, преподо́бне о́тче Се́ргіє, в ви́шніх, но і ни́жніх не оставля́єши: при́сно со Христо́м Царе́м Ві́чним ца́рствуєши і нас, грі́шних і недосто́йних, пред Ним воспомина́єши, моля́ся о спасе́нії на́шем. Ті́мже от усе́рдія на́шего вопіє́м к тебі́ си́це:

Ра́дуйся, оста́вльшій імі́ніє і возлюби́вий нищету́ Христо́ву; ра́дуйся, дости́гшій к неістощи́мому бога́тству.

Ра́дуйся, Ду́ху Свято́му подклони́вшийся со вся́ким смире́нієм; ра́дуйся, во́їне Христо́в непобіди́мий я́вльшийся.

Ра́дуйся, крило́ма богоми́слія сі́ті вра́жія сокруши́вий; ра́дуйся, смире́нієм возвиша́ємий, в ві́чния кро́ви возлеті́вший.

Ра́дуйся, просвіще́нний внутр благода́тію; ра́дуйся, істреби́вший страсте́й мглу душевре́дную.

Ра́дуйся, в по́двизіх дневни́х і нощни́х тече́ніє соверши́вий; ра́дуйся, в невече́рнім дні Ца́рствія Бо́жия при́сно почива́яй.

Ра́дуйся, та́мо сніде́нія пи́щі разу́мния сподо́бльшийся; ра́дуйся, я́ко того́ блаже́нства от Бо́га ві́чно удосто́ївийся.

Ра́дуйся, Се́ргіє, ско́рий помо́щниче і пресла́вний чудотво́рче.

Вся́коє єстество́ а́нгельськоє удиви́ся вели́кому сви́ше тебі́ дарова́нію, я́ко на землі́ невеще́ственноє житіє́ показа́л єси́, і во пло́ті, а́ки безпло́тен, яви́лся єси́. Сего́ ра́ди мно́гих чуде́с творе́нія от Го́спода приє́м, чи́стою і боголюбе́зною душе́ю твоє́ю Того́ бла́гостію к Небе́сним причте́н єси́ си́лам, в Небесі́х ни́ні поє́ши всеси́льному Бо́гу: Аллилу́я.

Віті́я многовіща́нния недоумі́ють досто́йно сла́вити тя, досто́йний вся́кия сла́ви, сла́вне преподо́бне о́тче Се́ргіє, і́бо пачеєсте́ственная мно́гая пресла́вная чудоді́йствія, єще́ жив сущь, показа́л єси́, но і по сме́рті та́я благода́тію Бо́жиєю твори́ти не престає́ши. Ми же, любо́вію понужда́єми, дерза́єм пі́ти тебі́ си́це:

Ра́дуйся, земни́й а́нгеле і небе́сний челові́че; ра́дуйся, во пло́ті живи́й духо́вно, на землі́ небе́сно.

Ра́дуйся, в челові́честві пребива́яй а́нгельськи, в ми́рі премі́рно; ра́дуйся, душе́внима свої́ма очи́ма ви́ну Го́спода созерца́вий.

Ра́дуйся, пред лице́м Бо́жиїм, я́ко раб пред Го́сподем, ходи́вий; ра́дуйся, пред О́ним, я́ко син пред Отце́м, я́ко учени́к пред Учи́телем, ше́ствовавий.

Ра́дуйся, я́ко во́їн пред Воєво́дою гото́в сий вся повелі́нная Ім твори́ти; ра́дуйся, до́брий ста́да своєго́ і́ночествующих наста́вниче і прави́телю.

Ра́дуйся, ше́ствовавий от си́ли в си́лу, до́ндеже яви́ся тебі́ Бог бого́в в Сіо́ні; ра́дуйся, Єди́наго Го́спода возлюби́вий і к Нему́ очеса́ своя́ ви́ну імі́вий.

Ра́дуйся, во вся дні живота́ своєго́ Єго́ іска́вий і в Нем намі́реніє полага́вий; ра́дуйся, нічесого́ на Небесі́ і на землі́, ра́зві Христа́ Ісу́са, ви́діти жела́вий.

Ра́дуйся, Се́ргіє, ско́рий помо́щниче і пресла́вний чудотво́рче.

Спасти́ хотя́ ду́шу твою́, в ю́ності во́зраста своєго́ отре́клся єси́ во́лі своєя́ і во зна́м'я отсіче́нія єя́ постри́гл єси́ власи́ глави́ своєя́, і бил єси́ мона́х, покори́вий себе́ во́лі Бо́жієй. Вся́чеськая же приключе́нія благода́рно, я́ко ві́рний раб от Го́спода прийма́л єси́, Єму́же на Небесі́х предстоя́, ни́ні вопіє́ши: Аллилу́я.

Стіна́ єси́ всім челові́ком, к заступле́нію твоєму́ прибіга́ющим, преподо́бне богому́дре Се́ргіє. Ті́мже і нам, к тебі́ приходя́щим і ми́лостиваго твоєго́ во вся́ких ну́ждах заступле́нія у Царя́ Небе́снаго прося́щим, бу́ди стіна́ крі́пкая і огражде́ніє непреобори́моє, от вся́ких нас бід і напа́стей застіня́я і огражда́я, за є́же ми вопіє́м тебі́ такова́я:

Ра́дуйся, во́їне Царя́ Небе́снаго, не об'яза́вийся ку́плями жите́йськими, да Єму́ уго́ден бу́деши; ра́дуйся, не восхоті́вий двіма́ господи́нома, Бо́гу і ми́ру, рабо́тати, но Єди́ному Бо́гу то́чію.

Ра́дуйся, от ю́ности на ті́ло своє́, на мир сей і дия́вола вооружи́вийся; ра́дуйся, посто́м, покло́ни, стоя́нієм на моли́тві, бді́нієм умертви́вий плоть свою́.

Ра́дуйся, умертви́вий о́ную пре́жді, не́жели она́ жива́ страсте́м бя́ше; ра́дуйся, ме́ртву соді́явий горта́нь проти́ву прийма́нія сласте́й.

Ра́дуйся, мертв сотвори́вий язи́к проти́ву глаго́ланія скве́рних, клеве́тних і ло́жних; ра́дуйся, ме́ртви устро́ївий ушеса́ проти́ву сли́шанія душевре́дних.

Ра́дуйся, ме́ртви соді́явий ру́ці проти́ву грабле́нія і вся́ких зол творе́нія; ра́дуйся, ме́ртво сотвори́вий чре́во проти́ву об'яде́нія і пія́нства.

Ра́дуйся, ме́ртва соді́лавий труда́ми чре́сла своя́ проти́ву нечистоти́; ра́дуйся, ме́ртви сотвори́вий но́зі проти́ву тече́нія в путь грі́шников і на сові́т нечести́вих.

Ра́дуйся, Се́ргіє, ско́рий помо́щниче і пресла́вний чудотво́рче.

Пі́ніє благода́рственноє благотвори́телю Христу́ Ісу́су, тя, преподо́бне о́тче, прославля́юще, всі правосла́внії взива́ють, я́ко дарова́л ті мно́гих чуде́с си́лу творе́нія: сліпи́я просвіща́ти, прокаже́нния очища́ти, больни́я врачева́ти, бі́сния от де́монськаго друче́нія свобожда́ти, толи́ко си́льні, я́коже і не у приведе́нним к тебі́ би́вшим бі́сним, єще́ на путі́ де́мони от них отбіга́ху, і ктому́ не возвраща́хуся, боя́щеся в тебі́ си́ли Бо́жия, ю́же ви́ну в Небесі́х прославля́я, вопіє́ши Бо́гу: Аллилу́я.

Світоза́рноє світи́ло во всей вселе́нній благода́тію немерца́ющаго Со́лнця, Христа́ Ісу́са, просвіща́ющею возсія́вшеє, зрим тя, богому́дре о́тче: с невеще́ственними бо в ви́шніх предстоя́ Престо́лу Тро́йці Пресвяти́я, ра́дости превели́кия іспо́лнен єси́ і Боже́ственними луча́ми Трисо́лнечнаго Сві́та осіява́єм, облиста́єши ві́рних, вопію́щих к тебі́ такова́я:

Ра́дуйся, возше́дий на го́ру превисо́ку доброді́телей Боже́ственних; ра́дуйся, я́ко от тоя́ удо́б возше́л єси́ на го́ру небе́сную.

Ра́дуйся, я́ко от оби́телі земни́я во оби́тель небе́сную водвори́лся єси́; ра́дуйся, я́ко восходя́ та́мо душе́ю, нас заступле́нія своєго́ не оста́вил єси́.

Ра́дуйся, я́ко моли́твою твоє́ю ісціліва́ють вся́кия ско́рбі і болі́зні; ра́дуйся, я́ко святости і пра́вености твоєя́ де́мони трепе́щуть.

Ра́дуйся, я́ко в печа́лі су́щим подає́ши духо́вноє увеселе́ніє; ра́дуйся, душе́ю востекі́й в Сіо́н го́рній, к Царю́ Небе́сному.

Ра́дуйся, я́ко та́мо предстоя́, о всіх нас к Нему́ те́плі хода́тайствуєши; ра́дуйся, я́ко благоутро́біє Єго́ о всіх чту́щих па́м'ять твою́ умилостивля́єши.

Ра́дуйся, христоімени́тим отгна́ніє бісо́вських прило́гов моли́твою твоє́ю содіва́ющий; ра́дуйся, всім правові́рним вся́коє проше́ніє, во їх по́льзу ісполня́ющий.

Ра́дуйся, Се́ргіє, ско́рий помо́щниче і пресла́вний чудотво́рче.

Благода́ть, да́нную ті от Бо́га, сві́дуще, тебе́, при́снаго на́шего ми́лостиваго отця́, прилі́жно про́сим: проли́й ни́ні те́плую моли́тву о нас, грі́шних, ко Го́споду, я́ко да презрі́в вся на́ша согріше́нія, Це́рков Свою́ Святу́ю от ра́спрей і раско́лов непози́блему да сохрани́ть, оби́ліє вся́ких плодо́в землі́ да да́руєть і вся правосла́вния христия́ни да спасе́ть і поми́луєть, Чесого́ от Него́ твої́ми моли́твами улуче́нія ожида́юще, вопіє́м Єму́: Аллилу́я.

Пою́ще ди́внаго во святи́х Свої́х Царя́ Небе́снаго, просла́вльшаго тя, ві́рнаго Своєго́ раба́, преподо́бнаго отця́ Се́ргія, ми́лостивоє твоє́, ско́роє нам во вся́ких ну́ждах і печа́лех поможе́ніє прославля́єм, і́бо в тебі́ в Тро́йці прославля́ємий Бог наш пресла́вним мно́гим чудоді́йствієм ди́вно просла́вися, о чесо́м удивля́ющеся вопіє́м к тебі́ си́це:

Ра́дуйся, великосла́вний наш засту́пниче, о́тче Се́ргіє; ра́дуйся, соверше́нний в доброді́телех челові́че.

Ра́дуйся, ди́вний подража́телю соверше́нства Отця́ на́шего Небе́снаго; ра́дуйся, преблаги́й і до́брий наста́вниче і́ноков.

Ра́дуйся, о́бразі пустинножи́телей і устрої́телю о́бщаго житія́; ра́дуйся, всіх правосла́вних ско́рий помо́щниче і засту́пниче.

Ра́дуйся, Царя́ Небе́снаго і Бо́га ізві́стний умилостиви́телю; ра́дуйся, мно́гажди заступле́нієм твої́м проше́нія предваря́яй.

Ра́дуйся, покро́ве, Бо́гом зда́нний, і́мже покрива́ються мно́зі; ра́дуйся, ліни́вих подви́гнувий твої́ми христоподража́тельними нра́ви.

Ра́дуйся, доброзра́чноє сві́та єва́нгельськаго всесві́тлоє сія́ніє; ра́дуйся, Трисо́лнечнаго Святи́я Тро́йці сві́та ви́ну просвіща́ющеє озаре́ніє.

Ра́дуйся, Се́ргіє, ско́рий помо́щниче і пресла́вний чудотво́рче.

О чудотво́рче пресла́вний і засту́пниче всім нам во вся́ких біда́х і ско́рбіх ско́рий і пречу́дний, богому́дре о́тче Се́ргіє! Ни́нішнєє на́ше прийми́ приноше́ніє і богоприя́тним твої́м хода́тайством умоли́ Го́спода сил си́лу сви́ше Того́ благода́тію очи́стившимся, от геє́нни ізба́витися, і гряду́щая в Небесі́х блага́я улучи́ти, вопію́щим Єму́: Аллилу́я.

Цей кондак співається тричі.

А́нгелов Творе́ць, предуві́дівий, по самовла́стному чи́стаго се́рдця твоєго́ ізволе́нію, всеусе́рдствующеє Єго́ во́лі ісполне́ніє, єще́ во чре́ві ма́терні трикра́тним возглаше́нієм, показа́ тя ми́ру і́стиннаго служи́теля би́ти Святи́я Тро́йці, і научи́ всіх вопи́ти тебі́ си́це:

Ра́дуйся, я́ко пре́жде вік і́маши ві́рний раб Христо́в би́ти предусмо́тренний; ра́дуйся, во о́ноже вре́м'я во блаже́нноє і небе́сноє жили́ще предуста́вленний.

Ра́дуйся, от чре́ва ма́терня на слу́жбу Небе́снаго Царя́, я́ко во́їн хотя́щий ві́рен Єму́ би́ти, призва́нний; ра́дуйся, я́ко благода́тію Бо́жиєю оправда́нний.

Ра́дуйся, ти бо єси́ по всей вселе́нній просла́вленний; ра́дуйся, трикра́тним твої́м во чре́ві возглаше́нієм роди́телей і всіх сли́шащих удиви́вий.

Ра́дуйся, по рожде́нії своє́м по́стноє і́ночеськоє житіє́ показа́вий; ра́дуйся, от сосця́ ма́терня воздержа́ніє чу́дноє яви́вий.

Ра́дуйся, я́ко в сре́ду і пято́к млека́ ніка́коже вкуси́вий; ра́дуйся, роди́телей благи́х до́брий і ізбра́нний пло́де.

Ра́дуйся, ра́дости скорб'я́щим і ми́лости с ві́рою у тебе́ прося́щим пода́телю; ра́дуйся, печа́лей злих во вся́ких приключе́ніїх отгони́телю.

Ра́дуйся, Се́ргіє, ско́рий помо́щниче і пресла́вний чудотво́рче.

Возбра́нний от Царя́ сил, Го́спода Ісу́са, воєво́до і чудотво́рче преди́вний, преподо́бне о́тче Се́ргіє! Прославля́юще просла́вльшаго тя сла́ви Го́спода, благода́рственноє пі́ніє воспіва́єм ті, і́бо моли́твами твої́ми от прило́гов і ско́рбних обстоя́ній нас при́сно ізбавля́єши, я́ко імі́я дерзнове́ніє ко Го́споду, от вся́ких нас бід свободи́, да зове́м ті:

Ра́дуйся, Се́ргіє, ско́рий помо́щниче і пресла́вний чудотво́рче.