Глава 35
1
И бы́сть сло́во Госпо́дне ко мнѣ́ глаго́ля:
2
сы́не человѣ́чь, обрати́ лице́ твоє́ къ горѣ́ сеі́ръ и прорцы́ на ню́ и рцы́ є́й:
3
сія́ глаго́летъ Адонаі́ Госпо́дь: се́, а́зъ на тя́, горо́ сеі́ръ, и простру́ ру́ку мою́ на тя́ и поста́влю тя́ пу́сту, и опустѣ́єши,
4
и во градѣ́хъ твои́хъ пусты́ню сотворю́, и ты́ въ пусты́ню бу́деши, и уразумѣ́єши, я́ко а́зъ є́смь Госпо́дь.
5
Поне́же бы́сть въ тебѣ́ вражда́ вѣ́чная, и присѣдѣ́ла єси́ до́му Ізра́илеву лука́вствомъ, руко́ю враго́въ съ мече́мъ во вре́мя печа́ли и́хъ и во вре́мя непра́вды, на послѣ́докъ:
6
сего́ ра́ди живу́ а́зъ, глаго́летъ Адонаі́ Госпо́дь, поне́же въ кро́ви согрѣши́ла єси́, и кро́вь пожене́тъ тя́, кро́вь возненави́дѣла єси́, и кро́вь иждене́тъ тя́.
7
И поста́влю го́ру сеі́ръ пу́сту и опустѣ́вшу, и погублю́ от нея́ человѣ́ки и скоты́, [и приходя́ша и отходя́ща:]
8
и напо́лню я́звеными твои́ми хо́лмы твоя́ и де́бри твоя́, и на всѣ́хъ по́лехъ твои́хъ я́звеніи мече́мъ паду́тъ въ тебѣ́:
9
и пу́сту во вѣ́къ поста́влю тя́, и гра́ди твои́ не населя́тся ктому́, и уразумѣ́єши, я́ко а́зъ є́смь Госпо́дь.
10
Поне́же рекла́ єси́: о́ба язы́ка и о́бѣ странѣ́ мои́ бу́дутъ, и возму́ и́хъ въ наслѣ́діє, а Госпо́дь та́мо є́сть:
11
сего́ ра́ди живу́ а́зъ, глаго́летъ Адонаі́ Госпо́дь, и сотворю́ тебѣ́ по враждѣ́ твоє́й и по ре́вности твоє́й, ю́же сотвори́ла єси́ от ненавидѣ́нія къ ни́мъ, и позна́нъ бу́ду тобо́ю, єгда́ и́мамъ тебе́ суди́ти, и уразумѣ́єши, я́ко а́зъ є́смь Госпо́дь.
12
Слы́шахъ гла́съ всѣ́хъ хуле́ній твои́хъ, я́же глаго́лала єси́: го́ры Ізра́илевы пу́сты даны́ на́мъ во снѣ́дь:
13
и велерѣ́чила єси́ на мя́ усты́ твои́ми и умно́жила на мя́ словеса́, а́зъ же услы́шахъ.
14
Сего́ ра́ди та́ко глаго́летъ Адонаі́ Госпо́дь: во весе́ліи всея́ земли́ пу́сту тя́ сотворю́:
15
я́коже пора́довалася єси́ о наслѣ́дій до́му Ізра́илева, я́ко поги́бе, та́ко сотворю́ тебѣ́: пуста́ бу́деши, горо́ сеі́ръ, и вся́ Ідуме́а потреби́тся, и увѣ́дятъ, я́ко а́зъ є́смь Госпо́дь Бо́гъ и́хъ.
