Кафизма 1
Псалом 1
Псало́м Дави́ду, 1.1Блаже́н муж, і́же не і́де на сові́т нечести́вих, і на путі́ грі́шних не ста, і на сіда́лищі губи́телей не сі́де;2но в зако́ні Госпо́дні во́ля єго́, і в зако́ні Єго́ поучи́ться день і нощ.3І бу́деть я́ко дре́во насажде́нноє при ісхо́дищих вод, є́же плод свой дасть во вре́м'я своє́, і лист єго́ не отпаде́ть, і вся, єли́ка а́ще твори́ть, успі́єть.4Не та́ко нечести́вії, не та́ко: но я́ко прах, єго́же возмета́єть вітр от лиця́ землі́.5Сего́ ра́ди не воскре́снуть нечести́вії на суд, ніже́ грі́шници в сові́т пра́ведних.6Я́ко вість Госпо́дь путь пра́ведних, і путь нечести́вих поги́бнеть.
Псалом 2
Псало́м Дави́ду, 2.1Вску́ю шата́шася язи́ци, і лю́діє поучи́шася тще́тним?2Предста́ша ца́ріє зе́мстії, і кня́зі собра́шася вку́пі на Го́спода і на Христа́ Єго́.3Расто́ргнем* у́зи їх і отве́ржем* от нас і́го їх.4Живи́й на небесі́х посміє́ться їм, і Госпо́дь поруга́ється їм.5Тогда́ возглаго́леть к ним гні́вом Свої́м і я́ростію Своє́ю см'яте́ть я;6Аз же поста́влен єсьм Цар от Него́ над Сіо́ном, горо́ю свято́ю Єго́,7возвіща́яй повелі́ніє Госпо́днє. Госпо́дь рече́ ко Мні: Син Мой єси́ Ти, Аз днесь роди́х Тя;8проси́ от Мене́, і дам Ті язи́ки достоя́ніє Твоє́, і одержа́ніє Твоє́ конці́ землі́;9упасе́ши я жезло́м желі́зним, я́ко сосу́ди скуде́льничі сокруши́ши я.10І ни́ні, ца́ріє, разумі́йте, накажі́теся* всі судя́щії землі́.11Рабо́тайте Го́сподеві со стра́хом і ра́дуйтеся Єму́ со тре́петом.12Приймі́те наказа́ніє, да не когда́ прогні́вається Госпо́дь, і поги́бнете от путі́ пра́веднаго, єгда́ возгори́ться вско́рі я́рость Єго́; блаже́нні всі наді́ющіїся Нань.
Псалом 3
1Псало́м Дави́ду, внегда́ отбіга́ше от лиця́ Авессало́ма, си́на своєго́, 3.2Го́споди, что ся умно́жиша стужа́ющії мі? Мно́зі востаю́ть на м'я,3мно́зі глаго́лють душі́ моє́й: ність спаcе́нія єму́ в Бо́зі єго́.4Ти же, Го́споди, засту́пник мой єси́, сла́ва моя́, і вознося́й главу́ мою́.5Гла́сом мої́м ко Го́споду воззва́х, і усли́ша м'я от гори́ святи́я Своєя́.6Аз усну́х, і спах, воста́х, я́ко Госпо́дь засту́пить м'я.7Не убою́ся от тем люді́й, о́крест напа́дающих на м'я.8Воскресни́, Го́споди, спаси́ м'я, Бо́же мой: я́ко Ти порази́л єси́ вся вражду́ющия мі всу́є, зу́би грі́шников сокруши́л єси́.9Госпо́днє єсть спасе́ніє, і на лю́дех Твої́х благослове́ніє Твоє́.Сла́ва:
Псалом 4
1В коне́ць, в пі́снех, псало́м Дави́ду, 4.2Внегда́ призва́ти мі, усли́ша м'я Бог пра́вди моєя́; в ско́рбі распространи́л м'я єси́; уще́дри м'я і усли́ши моли́тву мою́.3Си́нове челові́честії, доко́лі тяжкосе́рдії? Вску́ю лю́бите суєту́ і і́щете лжі?4І уві́дите, я́ко удиви́ Госпо́дь преподо́бнаго Своєго́. Госпо́дь усли́шить м'я, внегда́ воззва́ти мі к Нему́.5Гні́вайтеся, і не согріша́йте, я́же глаго́лете в сердця́х ва́ших, на ло́жах ва́ших умилі́теся;6пожрі́те же́ртву пра́вди і упова́йте на Го́спода.7Мно́зі глаго́лють: кто яви́ть нам блага́я? Зна́менася на нас світ лиця́ Твоєго́, Го́споди.8Дал єси́ весе́ліє в се́рдці моє́м; от плода́ пшени́ці, вина́ і єле́я своєго́ умно́жишася;9в ми́рі вку́пі усну́ і почи́ю, я́ко Ти, Го́споди, єди́наго на упова́нії всели́л м'я єси́.
Псалом 5
1О наслі́дствующем, псало́м Дави́ду, 5.2Глаго́ли моя́ внуши́, Го́споди, разумі́й зва́ніє моє́.3Воньми́ гла́су моле́нія моєго́, Царю́ мой і Бо́же мой, я́ко к Тебі́ помолю́ся, Го́споди.4Зау́тра усли́ши глас мой, зау́тра предста́ну Ті, і у́зриши м'я;5я́ко Бог не хотя́й беззако́нія Ти єси́, не присели́ться к Тебі́ лука́внуяй,6ніже́ пребу́дуть беззако́нници пред очи́ма Твої́ма; возненави́діл єси́ вся ді́лающия беззако́ніє,7погуби́ши вся глаго́лющия лжу; му́жа крове́й і льсти́ва гнуша́ється Госпо́дь.8Аз же мно́жеством ми́лости Твоєя́ вни́ду в дом Твой, поклоню́ся ко хра́му свято́му Твоєму́, в стра́сі Твоє́м.9Го́споди, наста́ви м'я пра́вдою Твоє́ю, враг мої́х ра́ди іспра́ви пред Тобо́ю путь мой.10Я́ко ність во усті́х їх і́стини, се́рдце їх су́єтно, гроб отве́рст горта́нь їх, язи́ки свої́ми льща́ху.11Суди́ їм, Бо́же, да отпаду́ть от ми́слей свої́х; по мно́жеству нече́стія їх ізри́ни я, я́ко преогорчи́ша Тя, Го́споди.12І да возвеселя́ться всі упова́ющії на Тя, во вік возра́дуються, і всели́шися в них, і похва́ляться о Тебі́ лю́б'ящії і́м'я Твоє́.13Я́ко Ти благослови́ши пра́ведника, Го́споди, я́ко ору́жієм благоволе́нія вінча́л єси́ нас.
Псалом 6
1В коне́ць, в пі́снех о осьмі́м, псало́м Дави́ду, 6.2Го́споди, да не я́ростію Твоє́ю обличи́ши мене́, ніже́ гні́вом Твої́м нака́жеши мене́.3Поми́луй м'я, Го́споди, я́ко не́мощен єсьм; ізціли́ м'я, Го́споди, я́ко см'ято́шася ко́сті моя́,4і душа́ моя́ см'яте́ся зіло́; і Ти, Го́споди, доко́лі?5Обрати́ся, Го́споди, ізба́ви ду́шу мою́, спаси́ м'я ра́ди ми́лости Твоєя́;6я́ко ність в сме́рті помина́яй Тебе́, во а́ді же кто іспові́сться Тебі́?7Утруди́хся воздиха́нієм мої́м, ізми́ю на вся́ку нощ ло́же моє́, слеза́ми мої́ми посте́лю мою́ омочу́.8См'яте́ся от я́рости о́ко моє́, обетша́х во всіх вразі́х мої́х.9Отступі́те от мене́, всі ді́лающії беззако́ніє, я́ко усли́ша Госпо́дь глас пла́ча моєго́,10усли́ша Госпо́дь моле́ніє моє́, Госпо́дь моли́тву мою́ прия́т.11Да постидя́ться і см'яту́ться всі вразі́ мої́, да возвратя́ться і устидя́ться зіло́ вско́рі.Сла́ва:
Псалом 7
1Псало́м Дави́ду, єго́же воспі́т Го́сподеві о словесі́х Хусі́євих, си́на Іємені́їна, 7.2Го́споди Бо́же мой, на Тя упова́х, спаси́ м'я от всіх гоня́щих м'я і ізба́ви м'я;3да не когда́ похи́тить, я́ко лев, ду́шу мою́, не су́щу ізбавля́ющу, ніже́ спаса́ющу.4Го́споди Бо́же мой, а́ще сотвори́х сіє́, а́ще єсть непра́вда в руку́ моє́ю,5а́ще возда́х воздаю́щим мі зла, да отпаду́ у́бо от враг мої́х тощ;6да пожене́ть у́бо враг ду́шу мою́, і да пости́гнеть, і попере́ть в зе́млю живо́т мой, і сла́ву мою́ в персть всели́ть.7Воскресни́, Го́споди, гні́вом Твої́м, вознеси́ся в конця́х враг Твої́х, і воста́ни, Го́споди Бо́же мой, повелі́нієм, і́мже запові́дал єси́,8і сонм люді́й оби́деть Тя, і о том на висоту́ обрати́ся.9Госпо́дь су́дить лю́дем; суди́ мі, Го́споди, по пра́вді моє́й і по незло́бі моє́й на м'я.10Да сконча́ється зло́ба грі́шних, і іспра́виши пра́веднаго, іспита́яй сердця́ і утро́би, Бо́же, пра́ведно.11По́мощ моя́ от Бо́га, спаса́ющаго пра́вия се́рдцем.12Бог суди́тель пра́веден, і крі́пок, і долготерпіли́в, і не гнів наводя́й на всяк день.13А́ще не обратите́ся, ору́жіє своє́ очи́стить, лук Свой напряже́, і угото́ва ї,14і в нем угото́ва сосу́ди сме́ртния, стрі́ли Своя́ сгара́ємим соді́ла.15Се, болі́ непра́вдою, зача́т болі́знь і роди́ беззако́ніє;16ров ізри́ і іскопа́ ї, і паде́ть в я́му, ю́же соді́ла.17Обрати́ться болі́знь єго́ на главу́ єго́, і на верх єго́ непра́вда єго́ сни́деть.18Іспові́мся Го́сподеві по пра́вді Єго́ і пою́ і́мені Го́спода Ви́шняго.
Псалом 8
1В коне́ць, о точи́ліх, псало́м Дави́ду, 8.2Го́споди Госпо́дь наш, я́ко чу́дно і́м'я Твоє́ по всей землі́, я́ко взя́тся великолі́піє Твоє́ преви́ше небе́с.3Із уст младе́нець і ссу́щих соверши́л єси́ хвалу́, враг Твої́х ра́ди, є́же разруши́ти врага́ і ме́стника.4Я́ко узрю́ небеса́, діла́ перст Твої́х, луну́ і зві́зди, я́же Ти основа́л єси́;5что єсть челові́к, я́ко по́мниши єго́? іли́ син челові́ч, я́ко посіща́єши єго́?6Ума́лил єси́ єго́ ма́лим чим от а́нгел, сла́вою і че́стію вінча́л єси́ єго́;7і поста́вил єси́ єго́ над ді́ли руку́ Твоє́ю, вся покори́л єси́ под но́зі єго́;8о́вці і воли́ вся, єще́ же і скоти́ польські́я,9пти́ці небе́сния і ри́би морські́я, преходя́щия стезі́ морські́я.10Го́споди Госпо́дь наш, я́ко чу́дно і́м'я Твоє́ по всей землі́.Сла́ва:
Після 1-ї кафизми Трисвято́є; і по О́тче наш: тропарі, глас 1:
В беззако́ніїх зача́вся аз, блу́дний, не дерза́ю взира́ти на висоту́ небе́сную, но дерза́я на человіколю́біє Твоє́, зову́: Бо́же, очи́сти м'я, грі́шнаго, і спаси́ м'я.
А́ще пра́ведник єдва́ спаса́ється, аз гді явлю́ся грі́шний? Тяготи́ і зно́я дневна́го не понесо́х, но с нає́мники єдинонадеся́таго часа́ сопричти́ м'я, Бо́же, і спаси́ м'я.
Сла́ва: Об'я́тія О́тча отве́рсти мі потщи́ся, блу́дно моє́ іжди́х житіє́, на бога́тство неіждива́ємоє взира́яй щедро́т Твої́х, Спа́се; ни́ні обнища́вшеє моє́ да не пре́зриши се́рдце, Тебі́ бо, Го́споди, умиле́нієм зову́: согріши́х на не́бо і пред Тобо́ю.
І ни́ні: Упова́ніє христия́н, Пресвята́я Ді́во, Єго́же родила́ єси́ Бо́га па́че ума́ же і сло́ва, непреста́нно моли́ с го́рними си́лами да́ти оставле́ніє гріхо́в нам всім і ісправле́ніє житія́, ві́рою і любо́вію при́сно Тя чту́щим.
Влади́ко Вседержи́телю, непостижи́ме, Нача́ло сві́та і преу́мная Си́ло, І́же іпоста́снаго Сло́ва Оте́ць, і Єдиноси́льнаго Твоєго́ Ду́ха іспусти́тель; милосе́рдния ра́ди ми́лости і неізрече́нния бла́гости, не презрі́вий челові́чеськаго єстества́, тьмо́ю гріха́ содержи́маго, но Боже́ственними сві́ти свяще́нних Твої́х уче́ній, Зако́ном і проро́ки світи́вий ми́ру, посліди́ же нам Того́ Єдиноро́днаго Твоєго́ Си́на благоволи́вий пло́тію возсія́ти і ко осія́нію нас Твоєго́ просвіще́нія наста́вити; да бу́дуть у́ші Твої́ вне́млющі гла́су моле́нія на́шего, і да́руй нам, Бо́же, во бді́нном і тре́звенном се́рдці всю настоя́щаго житія́ нощ прейти́, ожида́ющим прише́ствія Си́на Твоєго́ і Бо́га на́шего, Судії́ всіх, да не возлежа́ще і сп'я́ще, но бо́дрствующе і воздви́жені в ді́ланіє за́повідей Твої́х обря́щемся, і в ра́дость Єго́ совни́дем, іді́же пра́зднующих глас непреста́нний і неізрече́нная сла́дость зря́щих Твоєго́ лиця́ добро́ту неізглаго́ланную. Я́ко Благ і Человіколю́бець Бог єси́, і Тебі́ сла́ву возсила́єм, Отцю́, і Си́ну, і Свято́му Ду́ху, ни́ні, і при́сно, і во ві́ки віко́в, амі́нь.
