Кафизма 20
Псалом 143
Псало́м Дави́ду, к Голіа́фу, 143.1Благоcлове́н Госпо́дь Бог мой, науча́яй ру́ці мої́ на ополче́ніє, пе́рсти моя́ на брань.2Ми́лость моя́ і прибі́жище моє́, Засту́пник мой і Ізба́витель мой, Защи́титель мой, і на Него́ упова́х; повину́яй лю́ди моя́ под м'я.3Го́споди, что єсть челові́к, я́ко позна́лся єси́ єму́? Іли́ син челові́ч, я́ко вміня́єши єго́?4Челові́к суєті́ уподо́бися; дні́є єго́ — я́ко сінь прехо́дять.5Го́споди, преклони́ небеса́ і сни́ди; косни́ся гора́м — і воздим'я́ться;6блесни́ мо́лнію — і разжене́ши я; посли́ стрі́ли Твоя́ — і см'яте́ши я.7Посли́ ру́ку Твою́ с висоти́, ізми́ м'я і ізба́ви м'я от вод мно́гих, із руки́ сино́в чужди́х,8ї́хже уста́ глаго́лаша суєту́, і десни́ця їх — десни́ця непра́вди.9Бо́же, піснь но́ву воспою́ Тебі́, во псалти́рі десятостру́ннім пою́ Тебі́;10даю́щему спасе́ніє царе́м, ізбавля́ющему Дави́да, раба́ Своєго́, от меча́ лю́та.11Ізба́ви м'я і ізми́ м'я із руки́ сино́в чужди́х, ї́хже уста́ глаго́лаша суєту́, і десни́ця їх — десни́ця непра́вди;12ї́хже си́нове їх — я́ко новосажде́нія водруже́ная в ю́ності своє́й, дще́рі їх удо́брени, преукра́шени, я́ко подо́біє хра́ма;13храни́лища їх іспо́лнена, отрига́ющая от сего́ в сіє́; о́вці їх многопло́дни, мно́жащияся во ісхо́дищих свої́х; воло́ве їх то́лсті;14ність паде́нія опло́ту, ніже́ прохо́да, ніже́ во́пля в сто́гнах їх.15Ублажи́ша лю́ди, ї́мже сія́ суть; блаже́нні лю́діє, ї́мже Госпо́дь Бог їх.
Псалом 144
Хвала́ Дави́ду, 144.1Вознесу́ Тя, Бо́же мой, Царю́ мой, і благословлю́ і́м'я Твоє́ в вік і в вік ві́ка.2На всяк день благословлю́ Тя, і восхвалю́ і́м'я Твоє́ в вік і в вік ві́ка.3Ве́лій Госпо́дь і хва́лен зіло́, і вели́чію Єго́ ність конця́.4Род і род восхва́лять діла́ Твоя́ і си́лу Твою́ возвістя́ть;5великолі́піє сла́ви святи́ні Твоєя́ возглаго́лють і чудеса́ Твоя́ пові́дять;6і си́лу стра́шних Твої́х реку́ть і вели́чіє Твоє́ пові́дять;7па́м'ять мно́жества бла́гости Твоєя́ отри́гнуть і пра́вдою Твоє́ю возра́дуються.8Щедр і ми́лостив Госпо́дь, долготерпіли́в і многоми́лостив.9Благ Госпо́дь вся́чеським, і щедро́ти Єго́ на всіх ді́ліх Єго́.10Да іспові́дяться Тебі́, Го́споди, вся діла́ Твоя́, і преподо́бнії Твої́ да благослов'я́ть Тя;11сла́ву Ца́рствія Твоєго́ реку́ть і си́лу Твою́ возглаго́лють,12сказа́ти синово́м челові́чеським си́лу Твою́ і сла́ву великолі́пія Ца́рствія Твоєго́.13Ца́рство Твоє́ — Ца́рство всіх віко́в, і влади́чество Твоє́ во вся́ком ро́ді і ро́ді. Ві́рен Госпо́дь во всіх словесі́х Свої́х і преподо́бен во всіх ді́ліх Свої́х.14Утвержда́єть Госпо́дь вся низпа́дающия і возставля́єть вся низве́рженния.15О́чі всіх на Тя упова́ють, і Ти дає́ши їм пи́щу во благовре́менії;16отверза́єши Ти ру́ку Твою́ і ісполня́єши вся́коє живо́тно благоволе́нія.17Пра́веден Госпо́дь во всіх путе́х Свої́х і преподо́бен во всіх ді́ліх Свої́х.18Близ Госпо́дь всім призива́ющим Єго́, всім призива́ющим Єго́ во і́стині;19во́лю боя́щихся Єго́ сотвори́ть, і моли́тву їх усли́шить, і спасе́ть я.20Храни́ть Госпо́дь вся лю́б'ящия Єго́, і вся грі́шники потреби́ть.21Хвалу́ Госпо́дню возглаго́лють уста́ моя́; і да благослови́ть вся́ка плоть і́м'я свято́є Єго́ в вік і в вік ві́ка.Сла́ва:
Псалом 145
Аллилу́я, Агге́я і Заха́рії, 145.1Хвали́, душе́ моя́, Го́спода;2восхвалю́ Го́спода в животі́ моє́м, пою́ Бо́гу моєму́, до́ндеже єсьм.3Не наді́йтеся на кня́зі, на си́ни челові́чеськія, в ни́хже ність спаcе́нія.4Ізи́деть дух єго́, і возврати́ться в зе́млю свою́; в той день поги́бнуть вся помишле́нія єго́.5Блаже́н, єму́же Бог Іа́ковль помо́щник єго́, упова́ніє єго́ на Го́спода Бо́га своєго́,6сотво́ршаго не́бо і зе́млю, мо́ре і вся, я́же в них; храня́щаго і́стину в вік,7творя́щаго суд оби́димим, даю́щаго пи́щу а́лчущим. Госпо́дь ріши́ть окова́нния;8Госпо́дь умудря́єть сліпці́; Госпо́дь возво́дить низве́рженния; Госпо́дь лю́бить пра́ведники.9Госпо́дь храни́ть прише́лці, си́ра і вдову́ при́йметь, і путь грі́шних погуби́ть.10Воцари́ться Госпо́дь во вік, Бог Твой, Сіо́не, в род і род.
Псалом 146
Аллилу́я, 146.1Хвалі́те Го́спода, я́ко благ псало́м; Бо́гові на́шему да услади́ться хвале́ніє.2Зи́ждай Ієрусали́ма Госпо́дь; разсі́янія Ізра́їлєва собере́ть;3ізціля́яй сокруше́нния се́рдцем і об'язу́яй сокруше́нія їх;4ізчита́яй мно́жество звізд, і всім їм імена́ нарица́яй.5Ве́лій Госпо́дь наш, і ве́лія крі́пость Єго́, і ра́зума Єго́ ність числа́.6Приє́мляй кро́ткия Госпо́дь, смиря́яй же грі́шники до землі́.7Начні́те Го́сподеві во іспові́данії, по́йте Бо́гові на́шему в гу́слех;8одіва́ющему не́бо о́блаки, уготовля́ющему землі́ дождь; прозяба́ющему на гора́х траву́ і злак на слу́жбу челові́ком;9даю́щему ското́м пи́щу їх і птенце́м вра́новим, призива́ющим Єго́.10Не в си́лі ко́нстій восхо́щеть, ніже́ в ли́стіх му́жеських благоволи́ть;11благоволи́ть Госпо́дь в боя́щихся Єго́ і во упова́ющих на ми́лость Єго́.
Псалом 147
Аллилу́я, Агге́я і Заха́рії, 147.1Похвали́, Ієрусали́ме, Го́спода, хвали́ Бо́га Твоєго́, Сіо́не;2я́ко укріпи́ вереї́ врат Твої́х, благослови́ си́ни Твоя́ в Тебі́.3Полага́яй преді́ли Твоя́ мир, і ту́ка пшени́чна насища́яй Тя;4посила́яй сло́во Своє́ землі́, до ско́рости тече́ть сло́во Єго́,5даю́щаго сніг Свой, я́ко во́лну*, мглу — я́ко пе́пел посипа́ющаго,6мета́ющаго го́лоть* Свой, я́ко хлі́би; проти́ву лиця́ мра́за* Єго́ кто постої́ть?7По́слеть сло́во Своє́, і іста́єть я; дхнеть дух Єго́, і потеку́ть во́ди.8Возвіща́яй сло́во Своє́ Іа́кову, оправда́нія і судьби́ Своя́ Ізра́їлеві;9не сотвори́ та́ко вся́кому язи́ку, і судьби́ Своя́ не яви́ їм.Сла́ва:
Псалом 148
Аллилу́я, Агге́я і Заха́рії, 148.1Хвалі́те Го́спода с небе́с, хвалі́те Єго́ в ви́шніх.2Хвалі́те Єго́ всі а́нгели Єго́; хвалі́те Єго́, вся си́ли Єго́.3Хвалі́те Єго́, со́лнце і луна́; хвалі́те Єго́ вся зві́зди і світ.4Хвалі́те Єго́, небеса́ небе́с, і вода́, я́же преви́ше небе́с.5Да восхва́лять і́м'я Госпо́днє; я́ко Той рече́ — і би́ша; Той повелі́ — і созда́шася.6Поста́ви я в вік і в вік ві́ка; повелі́ніє положи́, і не ми́мо і́деть.7Хвалі́те Го́спода от землі́, змі́єве і вся бе́здни;8огнь, град, сніг, го́лоть, дух бу́рен, творя́щая сло́во Єго́;9го́ри і всі хо́лми, древа́ плодоно́сна і всі ке́дри;10зві́ріє і всі ско́ти, га́ди і пти́ці перна́ти;11ца́ріє зе́мстії і всі лю́діє, кня́зі і всі судії́ зе́мстії;12ю́ноші і ді́ви, ста́рці с ю́нотами.13Да восхва́лять і́м'я Госпо́днє; я́ко вознесе́ся і́м'я Того́ Єди́наго, іспові́даніє Єго́ на землі́ і на небесі́.14І вознесе́ть рог люді́й Свої́х; піснь всім преподо́бним Єго́, синово́м Ізра́їлевим, лю́дем приближа́ющимся Єму́.
Псалом 149
Аллилу́я, 149.1Воспо́йте Го́сподеві піснь но́ву; хвале́ніє Єго́ в це́ркві преподо́бних.2Да возвесели́ться Ізра́їль о сотво́ршем Єго́, і си́нове Сіо́ні возра́дуються о Царі́ своє́м.3Да восхва́лять і́м'я Єго́ в ли́ці, в тимпа́ні і псалти́рі да пою́ть Єму́.4Я́ко благоволи́ть Госпо́дь в лю́дех Свої́х, і вознесе́ть кро́ткия во спасе́ніє.5Восхва́ляться преподо́бнії во сла́ві і возра́дуються на ло́жах свої́х.6Возноше́нія Бо́жия в горта́ні їх, і мечі́ обою́ду остри́ в рука́х їх;7сотвори́ти отмще́ніє во язи́ціх, обличе́нія в лю́дех;8св'яза́ти царі́ їх пу́ти, і сла́вния їх ручни́ми око́ви желі́зними;9сотвори́ти в них суд напи́сан. Сла́ва сія́ бу́деть всім преподо́бним Єго́.
Псалом 150
Аллилу́я, 150.1Хвалі́те Бо́га во святи́х Єго́, хвалі́те Єго́ во утверже́нії си́ли Єго́;2хвалі́те Єго́ на си́лах* Єго́, хвалі́те єго́ по мно́жеству вели́чествія Єго́;3хвалі́те Єго́ во гла́сі тру́бнім, хвалі́те Єго́ во псалти́рі і гу́слех;4хвалі́те Єго́ в тимпа́ні і ли́ці, хвалі́те Єго́ во стру́нах і орга́ні;5хвалі́те Єго́ в кимва́ліх доброгла́сних, хвалі́те Єго́ в кимва́ліх восклица́нія.6Вся́коє диха́ніє да хва́лить Го́спода.Сла́ва:
Псалом 151
Сей псало́м осо́б пи́сан, Дави́дов, і вні числа́ 150 псалмо́в, внегда́ єдинобо́рствоваше на Голіа́фа1Мал біх в бра́тії моє́й і ю́нший в дому́ отця́ моєго́; пасо́х о́вці отця́ моєго́.2Ру́ці мої́ сотвори́сті орга́н, і пе́рсти мої́ соста́виша псалти́р.3І кто возвісти́ть Го́сподеві моєму́? Сам Госпо́дь, Сам усли́шить;4Сам посла́ а́нгела Своєго́, і взят м'я от ове́ць отця́ моєго́, і пома́за м'я єле́єм пома́занія Своєго́.5Бра́тія моя́ добрі́ і вели́ці; і не благоволи́ в них Госпо́дь.6Ізидо́х в срі́теніє іноплеме́ннику, і прокля́т м'я і́доли свої́ми.7Аз же істо́ргнув меч от него́, обезгла́вих єго́ і от'я́х поноше́ніє от сино́в Ізра́їлевих.
Після 20-ї кафизми, Трисвято́є. І по О́тче наш: тропарі, глас 8:
Ісполне́ніє всіх благи́х Ти єси́, Христе́ мой, іспо́лни ра́дости і весе́лія ду́шу мою́ і спаси́ м'я, я́ко єди́н многоми́лостив.
Сла́ва: А́ще і согріши́х, Христе́ Спа́се мой, пред Тобо́ю, іно́го Бо́га ра́зві Тебе́ не вім; дерза́ю же на Твоє́ благоутро́біє; обраща́ющагося прийми́ м'я, Благоутро́бне О́тче, і Си́не Єдоноро́дне, і Ду́ше Святи́й, я́ко блу́днаго си́на, і спаси́ м'я.
І ни́ні: Іно́го прибі́жища і те́плаго предста́тельства, ра́зві Тебе́ не вім; я́ко дерзнове́ніє іму́щи ко із Тебе́ Рожде́нному, Влади́чице, помози́, і спаси́ м'я, раба́ Твоєго́.
Го́споди поми́луй, 40 разів. І молитва:
Го́споди Ісу́се Христе́, Бо́же мой, поми́луй м'я, грі́шнаго, і прости́ мі, недосто́йному рабу́ Твоєму́, єли́ка Ті согріши́х чрез все живота́ моєго́ вре́м'я і да́же до днесь, і а́ще что я́ко челові́к согріши́х, во́льная моя́ прегріше́нія і нево́льная, ді́лом і сло́вом, я́же умо́м і ми́слію, я́же от совосхище́нія і невнима́нія, і мно́гия моєя́ лі́ности і небреже́нія. А́ще же і́менем Твої́м кля́хся, а́ще же лжекля́хся, іли́ ху́лих ми́слію, іли́ кого́ укори́х, іли́ оклевета́х, іли́ опеча́лих, іли́ в ні́чесом прогні́вах, іли́ окрадо́х, іли́ блу́дствовах, іли́ солга́х, іли́ та́йно ядо́х; іли́ друг дости́же ко мні, і презрі́х єго́, іли́ бра́та оскорби́х і преогорчи́х; іли́ стоя́щу мі на моли́тві і псалмопі́нії ум мой лука́вий на лука́вая обхожда́ше; іли́ па́че лі́паго наслади́хся, іли́ безу́мно смія́хся, іли́ кощу́нно глаго́лах, іли́ тщесла́вихся, іли́ горди́хся, іли́ добро́ту су́єтную ви́діх і от нея́ прельсти́хся, іли́ нелі́пая мні поглуми́хся; а́ще в чесо́м о моли́тві моє́й не ради́х; іли́ за́повідей духо́внаго моєго́ отця́ не сохрани́х, іли́ праздносло́вих, іли́ і́но что лука́воє сотвори́х; сія́ бо вся і в'я́щшая сих соді́ях, ї́хже ніже́ по́мню; поми́луй, Го́споди, і прости́ мі вся, да в ми́рі усну́ і почи́ю, поя́, і благослов'я́, і сла́в'я Тя, со Безнача́льним Твої́м Отце́м, і с Пресвяти́м, і Благи́м, і Животворя́щим Твої́м Ду́хом, ни́ні, і при́сно, і во ві́ки віко́в, амі́нь.
