Кафизма 13
Псалом 91
1Псало́м пі́сні, в день субо́тний, 91.2Благо єсть іспові́датися Го́сподеві і пі́ти і́мені Твоєму́, Ви́шній;3возвіща́ти зау́тра ми́лость Твою́ і і́стину Твою́ на вся́ку нощ,4в десятостру́ннім псалти́рі с пі́снію в гу́слех.5Я́ко возвесели́л м'я єси́, Го́споди, в творе́нії Твоє́м, і в ді́ліх руку́ Твоє́ю возра́дуюся.6Я́ко возвели́чишася діла́ Твоя́, Го́споди; зіло́ углуби́шася помишле́нія Твоя́.7Муж безу́мен не позна́єть, і неразуми́в не разумі́єть сих.8Внегда́ прозябо́ща грі́шници я́ко трава́, і пронико́ша всі ді́лающії беззако́ніє, я́ко да потреб'я́ться в вік ві́ка;9Ти же Ви́шній во вік, Го́споди.10Я́ко се вразі́ Твої́, Го́споди, я́ко се вразі́ Твої́ поги́бнуть і рази́дуться всі ді́лающії беззако́ніє.11І вознесе́ться я́ко єдиноро́га рог мой, і ста́рость моя́ в єле́ї масти́ті;12і воззрі́ о́ко моє́ на враги́ моя́, і востаю́щия на м'я лука́внующия усли́шить у́хо моє́.13Пра́ведник, я́ко фі́ніx процвіте́ть, я́ко кедр, і́же в Лива́ні, умно́житься.14Насажде́ні в дому́ Госпо́дні во дво́ріх Бо́га на́шего процвіту́ть;15єще́ умно́жаться в ста́рості масти́ті, і благоприє́млюще бу́дуть.16Да возвістя́ть, я́ко прав Госпо́дь Бог наш, і ність непра́вди в Нем.
Псалом 92
В день предсубо́тний, внегда́ насели́ся земля́, хвала́ пі́сні Дави́ду, 92.1Госпо́дь воцари́ся, в лі́поту облече́ся; облече́ся Госпо́дь в си́лу і препоя́сася; і́бо утверди́ вселе́нную, я́же не подви́житься.2Гото́в престо́л Твой отто́лі; от ві́ка Ти єси́.3Воздвиго́ша рі́ки, Го́споди, воздвиго́ша рі́ки гла́си своя́;4во́зьмуть рі́ки сотре́нія своя́, от гласо́в вод мно́гих.5Ди́вни висоти́ морські́я; ди́вен в висо́ких Госпо́дь.6Свиді́нія Твоя́ уві́ришася зіло́. До́му Твоєму́ подоба́єть святи́ня, Го́споди, в долготу́ дній.
Псалом 93
Псало́м Дави́ду, в четве́ртий субо́ти, 93.1Бог отмще́ній Госпо́дь, Бог отмще́ній не обину́лся єсть.2Вознеси́ся, судя́й землі́, возда́ждь воздая́ніє го́рдим.3Доко́лі грі́шници, Го́споди, доко́лі грі́шници восхва́ляться?4Провіща́ють і возглаго́лють непра́вду, возглаго́лють всі ді́лающії беззако́ніє?5Лю́ди Твоя́, Го́споди, смири́ша, і достоя́ніє Твоє́ озло́биша:6вдови́цю і си́ра умори́ша, і прише́лця уби́ша,7і рі́ша: не у́зрить Госпо́дь, ніже́ уразумі́єть Бог Іа́ковль.8Разумі́йте же, безу́мнії в лю́дех, і бу́її ні́когда, умудрі́теся;9насажде́й у́хо, не сли́шить ли? Іли́ созда́вий о́ко, не сматря́єть ли?10Наказу́яй язи́ки, не обличи́ть ли, уча́й челові́ка ра́зуму?11Госпо́дь вість помишле́нія челові́чеськая, я́ко суть су́єтна.12Блаже́н челові́к, єго́же а́ще нака́жеши, Го́споди, і от зако́на Твоєго́ научи́ши єго́;13укроти́ти єго́ от дній лю́тих, до́ндеже ізри́ється грі́шному я́ма.14Я́ко не отри́неть Госпо́дь люді́й Свої́х, і достоя́нія Своєго́ не оста́вить;15до́ндеже пра́вда обрати́ться на суд, і держа́щіїся єя́ всі пра́вії се́рдцем.16Кто воста́неть мі на лука́внующия? Іли́ кто спредста́неть мі на ді́лающия беззако́ніє?17А́ще не Госпо́дь помо́гл би мі, вма́лі всели́лася би во ад душа́ моя́.18А́ще глаго́лах: подви́жеся нога́ моя́, ми́лость Твоя́, Го́споди, помога́ше мі:19по мно́жеству болі́зней мої́х в се́рдці моє́м, утіше́нія Твоя́ возвесели́ша ду́шу мою́.20Да не пребу́деть Тебі́ престо́л беззако́нія, созида́яй труд на повелі́ніє.21Улов'я́ть на ду́шу пра́ведничу, і кров непови́нную осу́дять.22І бисть мні Госпо́дь в прибі́жище, і Бог мой в по́мощ упова́нія моєго́;23і возда́сть їм Госпо́дь беззако́ніє їх, і по лука́вствію їх погуби́ть я Госпо́дь Бог наш.Сла́ва:
Псалом 94
Хвала́ пі́сні Дави́ду, не надпи́сан у євре́й, 94.1Прийді́те, возра́дуємся Го́сподеві, воскли́кнем Бо́гу Спаси́телю на́шему;2предвари́м лице́ Єго́ во іспові́данії, і во псалмі́х воскли́кнем Єму́;3я́ко Бог ве́лій Госпо́дь, і Цар ве́лій по всей землі́;4я́ко в руці́ Єго́ всі конці́ землі́, і висоти́ гор Того́ суть.5Я́ко Того́ єсть мо́ре, і Той сотвори́ є, і су́шу ру́ці Єго́ созда́сті.6Прийді́те, поклоні́мся і припаде́м Єму́, і воспла́чемся пред Го́сподем сотво́ршим нас;7я́ко Той єсть Бог наш, і ми лю́діє па́житі Єго́ і о́вці руки́ Єго́. Днесь а́ще глас Єго́ усли́шіте,8не ожесточі́те серде́ць ва́ших, я́ко в прогні́ванії, по дні іскуше́нія в пусти́ні;9в о́ньже* іскуси́ша М'я отці́ ва́ші, іскуси́ша М'я, і ви́діша діла́ Моя́.10Чети́редесять літ негодова́х ро́да того́, і ріх: при́сно заблужда́ють се́рдцем, ті́ї же не позна́ша путі́й Мої́х;11я́ко кля́хся во гні́ві Моє́м, а́ще вни́дуть в поко́й Мой.
Псалом 95
Хвала́ пі́сні Дави́ду, внегда́ дом созида́шеся по пліне́нії, не надпи́сан у євре́й, 95.1Воспо́йте Го́сподеві піснь но́ву, воспо́йте Го́сподеві вся земля́;2воспо́йте Го́сподеві, благослові́те і́м'я Єго́; благовісті́те день от дне спасе́ніє Єго́.3Возвісті́те во язи́ціх сла́ву Єго́, во всіх лю́дех чудеса́ Єго́.4Я́ко ве́лій Госпо́дь і хва́лен зіло́, стра́шен єсть над всі́ми бо́ги.5Я́ко всі бо́зі — язи́к бі́сове; Госпо́дь же небеса́ сотвори́.6Іспові́даніє і красота́ пред Ним, святи́ня і великолі́піє во святи́лі Єго́.7Принесі́те Го́сподеві, оте́чествія язи́к, принесі́те Го́сподеві сла́ву і честь.8принесі́те Го́сподеві сла́ву і́мені Єго́; возмі́те же́ртви і вході́те во двори́ Єго́.9Поклоні́теся Го́сподеві во дворі́ святі́м Єго́. Да подви́житься от лиця́ Єго́ вся земля́.10Рці́те во язи́ціх, я́ко Госпо́дь воцари́ся; і́бо іспра́ви вселе́нную, я́же не подви́житься; су́дить лю́дем пра́востію.11Да возвеселя́ться небеса́, і ра́дується земля́; да подви́житься мо́ре і ісполне́ніє єго́;12возра́дуються поля́ і вся я́же на них; тогда́ возра́дуються вся древа́ дубра́вная13от лиця́ Госпо́дня, я́ко гряде́ть, я́ко гряде́ть суди́ти землі́; суди́ти вселе́нній в пра́вду і лю́дем і́стиною Своє́ю.
Псалом 96
Псало́м Дави́ду, єгда́ земля́ єго́ устроя́шеся, не надпи́сан у євре́й, 96.1Госпо́дь воцари́ся, да ра́дується земля́, да веселя́ться о́строві мно́зі.2О́блак і мрак о́крест Єго́; пра́вда і судьба́ — ісправле́ніє Престо́ла Єго́.3Огнь пред Ним преди́деть і попали́ть о́крест враги́ Єго́.4Освіти́ша мо́лнія Єго́ вселе́нную; ви́ді і подви́жеся земля́.5Го́ри, я́ко воск, раста́яша от лиця́ Госпо́дня, от лиця́ Го́спода всея́ землі́.6Возвісти́ша небеса́ пра́вду Єго́, і ви́діша всі лю́діє сла́ву Єго́.7Да постидя́ться всі кла́няющіїся істука́нним, хва́лящіїся о і́доліх свої́х; поклоні́теся Єму́, всі а́нгели Єго́.8Сли́ша і возвесели́ся Сіо́н, і возра́довашася дще́рі іуде́йськия, суде́б ра́ди Твої́х, Го́споди;9я́ко Ти Госпо́дь Ви́шній над все́ю земле́ю, зіло́ превозне́слся єси́ над всі́ми бо́ги.10Лю́б'ящії Го́спода, ненави́діте зла́я; храни́ть Госпо́дь ду́ші преподо́бних Свої́х, із руки́ грі́шничі ізба́вить я.11Світ возсія́ пра́веднику, і пра́вим се́рдцем весе́ліє.12Веселі́теся, пра́веднії, о Го́споді, і іспові́дайте па́м'ять святи́ні Єго́.Сла́ва:
Псалом 97
Псало́м Дави́ду, 97.1Воспо́йте Го́сподеві піснь но́ву, я́ко ди́вна сотвори́ Госпо́дь; спасе́ Єго́ десни́ця Єго́ і ми́шця свята́я Єго́.2Сказа́ Госпо́дь спасе́ніє Своє́, пред язи́ки откри́ пра́вду Свою́.3Пом'яну́ ми́лость Свою́ Іа́кову і і́стину Свою́ до́му Ізра́їлеву; ви́діша всі конці́ землі́ спасе́ніє Бо́га на́шего.4Воскли́кніте Бо́гові, вся земля́, воспо́йте і ра́дуйтеся і по́йте.5По́йте Го́сподеві в гу́слех, в гу́слех і гла́сі псало́мсті,6в труба́х ко́ваних і гла́сом труби́ ро́жани; вострубі́те пред Царе́м Го́сподем.7Да подви́житься мо́ре і ісполне́ніє єго́, вселе́нная і всі живу́щії на ней.8Рі́ки воспле́щуть руко́ю вку́пі, го́ри возра́дуються9от лиця́ Госпо́дня, я́ко гряде́ть, я́ко і́деть суди́ти землі́; суди́ти вселе́нній в пра́вду, і лю́дем пра́востію.
Псалом 98
Псало́м Дави́ду, 98.1Госпо́дь воцари́ся — да гні́ваються лю́діє; сідя́й на херуви́міх — да подви́житься земля́.2Госпо́дь в Сіо́ні вели́к і висо́к єсть над всі́ми людьми́.3Да іспові́дяться і́мені Твоєму́ вели́кому, я́ко стра́шно і свя́то єсть.4І честь царе́ва суд лю́бить; Ти угото́вал єси́ правоти́, суд і пра́вду во Іа́кові Ти сотвори́л єси́.5Возносі́те Го́спода Бо́га на́шего і покланя́йтеся подно́жію но́гу Єго́, я́ко свя́то єсть.6Моїсе́й і Ааро́н во ієре́ех Єго́, і Самуї́л в призива́ющих і́м'я Єго́; призива́ху Го́спода, і Той послу́шаше їх.7В столпі́ о́блачні глаго́лаше к ним, я́ко храня́ху свиді́нія Єго́ і повелі́нія Єго́, я́же даде́ їм.8Го́споди Бо́же наш, Ти послу́шал єси́ їх; Бо́же, Ти ми́лостив бива́л єси́ їм і мща́я на вся начина́нія їх.9Возносі́те Го́спода Бо́га на́шего і покланя́йтеся в горі́ святі́й Єго́; я́ко Свят Госпо́дь Бог наш.
Псалом 99
Псало́м Дави́ду во іспові́даніє, 99.1Воскли́кніте Бо́гові, вся земля́;2рабо́тайте Го́сподеві в весе́лії, вни́діте пред Ним в ра́дості.3Уві́діте, я́ко Госпо́дь — Той єсть Бог наш; Той сотвори́ нас, а не ми; ми же лю́діє Єго́ і о́вці па́житі Єго́.4Вни́діте во врата́ Єго́ во іспові́данії, во двори́ Єго́ в пі́ніїх; іспові́дайтеся Єму́, хвалі́те і́м'я Єго́.5Я́ко Благ Госпо́дь, в вік ми́лость Єго́, і да́же до ро́да і ро́да і́стина Єго́.
Псалом 100
Псало́м Дави́ду, 100.1Ми́лость і суд воспою́ Тебі́, Го́споди;2пою́ і разумі́ю в путі́ непоро́чні; когда́ при́йдеши ко мні? Прехожда́х в незло́бії се́рдця моєго́ посреді́ до́му моєго́.3Не предлага́х пред очи́ма мої́ма вещ законопресту́пную; творя́щия преступле́ніє возненави́діх;4не прильпе́ мні се́рдце стропти́во; уклоня́ющагося от мене́ лука́ваго не позна́х.5Оклевета́ющаго тай і́скренняго своєго́, cего́ ізгоня́х; го́рдим о́ком і неси́тим се́рдцем, с сим не ядя́х.6О́чі мої́ на ві́рния землі́, посажда́ти я со мно́ю; ходя́й по путі́ непоро́чну, сей мі служа́ше.7Не живя́ше посреді́ до́му моєго́ творя́й горди́ню; глаго́ляй непра́ведная не ісправля́ше пред очи́ма мої́ма.8Воу́трія ізбива́х вся грі́шния землі́, є́же потреби́ти от гра́да Госпо́дня вся ді́лающия беззако́ніє.Сла́ва:
Після 13-ї кафизми, Трисвято́є. І по О́тче наш: тропарі, глас 8:
О́ком благоутро́бним, Го́споди, виждь моє́ смире́ніє, я́ко пома́лі жизнь моя́ іждива́ється, і от діл ність мні спасе́нія. Сего́ ра́ди молю́ся: о́ком благоутро́бним, Го́споди, виждь моє́ смире́ніє, і спаси́ м'я.
Сла́ва: Я́ко Судії́ предстоя́щу, попеци́ся душе́, і стра́шнаго дне час помишля́й; суд бо неми́лостив єсть не сотво́ршим ми́лости. Возопи́й у́бо Христу́ Бо́гу; Сердцеві́дче, согріши́х, пре́жде да́же не осу́диши, поми́луй м'я.
І ни́ні: Стра́шнаго Твоєго́ і гро́знаго і неуми́тнаго Суда́, Христе́, во умі́ приє́м день і час трепе́щу, я́ко злоді́й, студа́ діла́ і дія́нія імі́я лю́тая, я́же єди́н аз соді́ях прилі́жно. Ті́мже стра́хом припа́даю Тебі́, вопія́ болі́зненно: моли́твами Ро́ждшия Тя, Многоми́лостиве, спаси́ м'я.
Го́споди поми́луй, 40 разів. І молитва:
Го́споди Святи́й, І́же в ви́шніх живи́й і всеви́дящим Твої́м о́ком призира́яй на всю твар, Тебі́ приклони́хом ви́ю душі́ і тілесе́, і Тебі́ мо́лимся, Святи́й святи́х: простри́ ру́ку Твою́ неви́димую от Свята́го жили́ща Твоєго́ і благослови́ вся ни. І а́ще что к Тебі́ согріши́хом во́лею і нево́лею, я́ко Благ і Человіколю́бець Бог прости́, да́руяй нам і ми́рная блага́я Твоя́. Твоє́ бо єсть є́же ми́ловати і спаса́ти, Бо́же наш, і Тебі́ сла́ву возсила́єм, Отцю́, і Си́ну, і Свято́му Ду́ху, ни́ні, і при́сно, і во ві́ки віко́в, амі́нь.
