Взбра́нной Воєво́ді, Пречи́стой і Богообра́дованной Ді́ві Богоро́диці, огнезра́чния іко́ни своєя́ явле́нієм обра́довавшей Це́рков Христо́ву і є́ю от о́гненнаго запале́нія защища́ющей ві̑рния, похва́льноє возглаша́єм пі́ніє. Ти же, о Богомати, Купино́ Неопали́мая імену́ємая на́ми, я́ко іму́щая держа́ву непобіди́мую і милос́ердіє мно́гоє, ускори́ на по́мощ к нам, тре́бующим Твоєго́ заступле́нія, і от вся́ких бід свободи́ зову́щих Ті:

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

А́нгелов Цари́це і всея́ тва́рі Влади́чице, Госпоже́ Богоро́дице, от А́нгельських лико́в горі́ приє́млющая хвале́бноє пі́ніє, сподо́би і нас, земни́х і пе́рстних^*, возноси́ти к Тебі́ гла́си хвали́ благодаре́нія за премно́гую ми́лость Твою́ к ро́ду челові́чеському. І а́ще недосто́йни єсьми́ пі́ти Тя по достоя́нію, оба́че Ти, я́ко блага́я, не возгнуша́йся на́ших недовлі́ющих похва́л, і я́ко Син Твой дві ле́пті вдови́ці ми́лостивно прия́т, та́ко любоблагоутро́бно усли́ши нас, со умиле́нієм к Тебі́ вопію́щих:

Ра́дуйся, огнь Божества́ во чре́ві Твоє́м неопа́льно носи́вшая; ра́дуйся, Спаси́теля па́дшему челові́честву ро́ждшая.

Ра́дуйся, си́лу а́дову пречеcтни́м Рождество́м Твої́м упраздни́вшая; ра́дуйся, Ада́ма і Є́ву дре́вняго прокля́тія свободи́вшая.

Ра́дуйся, вочелові́ченію Єди́наго от Тро́йці непоро́чно послужи́вшая; ра́дуйся, Творця́ Небесе́ і землі́ безсі́менно воплоти́вшая.

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

Ви́дя Моїсе́й на Сина́ї купину́ огне́м горі́вшую і не сгора́вшую, ужасе́ся, і се бисть глас к нему́ Боже́ственний от купини́: іззу́й сапо́г от ногу́ твоє́ю, мі́сто бо, на не́мже ти стої́ши, земля́ свята́я єсть. Сего́ послу́шая, і ми смире́ннії та́їнство воплоще́нія Бо́га Сло́ва от Пречи́стия Ді́ви, чу́дом Неопали́мия Купини́ прообразова́нноє, іспові́дуєм і со стра́хом покланяємся мі́сту явле́нія Бо́жия, зову́ще Зижди́телю вся́чеських: Аллилу́я.

Ра́зум челові́чеський не мо́жеть пости́гнути та́їнство смотре́нія Бо́жия, от сложе́нія ми́ра іскупле́ніє па́дшаго челові́чества предопреділи́вшаго в сові́ті Предві́чнім Триіпоста́снаго Божества́, оба́че Ду́хом Святи́м вдохнове́ннії святі́ї Бо́жії проро́ци іздале́че предзря́ще чу́до чуде́с, я́ко Творе́ць ра́бій зрак восприї́меть, спасти́ хотя́ ді́ло рук Свої́х от поги́белі ві́чния, возвіща́ху проо́брази і проро́честви нело́жними, іму́щеє соверши́тися іскупле́ніє ро́да челові́ча обітова́нним Іскупи́телем. Єму́же Ти, Всечи́стая, плоть взаймода́вши, сподо́билася єси́ би́ти Ма́терію Го́спода Твоєго́, внуша́ющаго нам вопи́ти к Тебі́:

Ра́дуйся, Огнезра́чная Пала́то на херуви́міх Сідя́щаго; ра́дуйся, Світоно́сная Ло́жнице серафи́ми Повеліва́ющаго.

Ра́дуйся, О́дре Царя́ вели́каго верху́ гори́ небе́сния; ра́дуйся, Престо́ле Одушевле́нний Облада́ющаго го́рними і до́льними.

Ра́дуйся, Киво́те Освяще́нний Божества́, Свята́я святи́х бо́льший; ра́дуйся, Ста́мно Всезлата́я, в Не́йже ма́нна спаси́тельная угото́вася Плоть і Кров Боже́ственнаго А́гнця.

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

Си́лою Всеви́шняго ді́йствуя, Влади́чице Преблага́я, си́лу єстества́ о́гненнаго укроща́єши свято́ю іко́ною Твоє́ю і мно́га чудеса́ є́ю содіва́єши во вселе́нній. Ті́мже род христия́нський ублажа́єть Тя гла́си хвале́бними і в біда́х внеза́пних, найпа́че же во вре́м'я о́гненнаго запале́нія к Тебі́ моли́твенно притека́єть, приє́мля по́мощ от Тебе́ благовре́менну. Сего́ ра́ди благода́рственно вопіє́м просла́вльшему Тя Царю́ Сла́ви, Христу́: Аллилу́я.

Імі́я любо́в ве́лію к лю́дем іскупле́нним Чеcтно́ю Кро́вію Си́на Твоєго́ і Бо́га, Богома́ти Пречи́стая, прия́ла єси́ от Него́ власть стро́їти і покрива́ти род христия́нський. Ти бо грі́шником єси́ спору́чниця покая́нія їх пред Творце́м, ненаде́жним Наде́ждо спасе́нія, бі́дствующим По́моще ско́рая, поги́бшим Взиска́ніє держа́вноє і всему ми́ру Покро́в. Тебі́, Милос́ердой і Благолюби́вой засту́пниці на́шей, за любо́в любо́вію воздава́я, смиренному́дренно глаго́лем:

Ра́дуйся, Ра́досте Всеми́рная, є́юже сле́зи оте́млються от оче́с стра́ждущих і скорб’я́щих; ра́дуйся, Прибі́жище Благооти́шноє, в не́мже спаса́ються обурева́ємії бу́рею страсте́й жите́йськаго мо́ря.

Ра́дуйся, Утоли́тельнице Всемогу́щая пра́ведно дви́жимаго на нас гні́ва Бо́жия; ра́дуйся, пла́мень огня́ угаша́ющая росо́ю моли́тв Твої́х у Престо́ла Вседержи́теля.

Ра́дуйся, от гро́ма і мо́лнії соблюда́ющая предста́тельством Твої́м Небе́сним; ра́дуйся, по́мощ Твою́ святу́ю благовре́менно подаю́щая вся́кой душі́, ві́рно Тебі́ моля́щейся.

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

Бу́ря о́гненная єгда́ на́йдеть на нас внеза́пно і пла́мень гра́ди і ве́сі на́ша оби́меть, тогда́, Госпоже́ Всеми́лостивая, ускори́ на по́мощ к нам безпомо́щним і іко́ною Твоє́ю честно́ю защити́ і ізба́ви нас от о́гненнаго наказа́нія, єго́же сотвори́хомся досто́йнії гріх ра́ди на́ших. Тебе́ бо грі́шнії і́мами Засту́пницю непости́дную, на Тя упова́ніє на́ше возлага́єм і, прославля́я си́лу моли́тв Твої́х, Ро́ждшемуся от Тебе́ Спа́су ми́ра зове́м: Аллилу́я.

Сли́шим і ви́дим чудеса́ ве́лія от іко́ни Твоєя́ бива́ємия, Цари́це на́ша Всеблага́я, ю́же дарова́ла єси́ нам во утіше́ніє і защи́ту в несча́стіях: се бо і всепояда́ющий огнь ізнемога́єть в си́лі своє́й пред си́лою благода́тною Твоєго́ Пречи́стаго о́браза, я́коже мно́гажди ви́діхом і іспита́хом, неопали́мою купино́ю Тя імену́я в ізображе́нії сего́ Твоєго́ о́браза, і пред ним Тебі́ воспіва́я гла́си хвале́бними си́це:

Ра́дуйся, Моли́твеннице Неусипа́ющая ко Христу́ Бо́гу, на ми́лость к нам Єго́ преклоня́ющая; ра́дуйся, ка́ру Бо́жию за беззако́нія на́ша от глав на́ших отводя́щая.

Ра́дуйся, ри́зою Твоє́ю честно́ю от вся́ких несча́стій нас сохраня́ющая; ра́дуйся, Ма́терним покро́вом щедро́т Твої́х жили́ща на́ша от огня́ і гро́ма соблюда́ющая.

Ра́дуйся, Всеми́лостивая Усли́шательнице гла́сов на́ших моле́бних в ско́рбі і обстоя́нії; ра́дуйся, Держа́вная Скоропомо́щнице на́ша во дні тя́жких іспита́ній.

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

Боготе́чная звізда́, іко́на Твоя́ всечестна́я, Богоро́дице Ді́во, во всім ми́рі чуде́с мно́жеством благода́тно сія́єть і просвіща́єть ду́ші і сердця́ челові́чеськія к позна́нію ве́лія Твоєго́ милосе́рдія, і́мже род христия́нський покрива́єши і заступа́єши, я́ко Ма́ти благосе́рдая. О сем ра́дующеся, благодари́м Христа́ Бо́га, Тебе́, Ма́тер Свою́ по пло́ті, і нам в Ма́тер по ду́ху дарова́вшаго і зове́м Єму́ во умиле́нії глубо́цім: Аллилу́я.

Ви́дим іко́ну Твою́, Влади́чице, я́ко воі́стинну Купину́ Неопали́мую, во огні́ несгора́ющую, і прису́тствієм свої́м жили́ща челові́чеськия в пла́мені несгора́ємими соді́ловающую: Тебі́ бо даде́ся благода́ть сви́ше, си́лу єстества́ о́гненнаго укроща́ти, огнь Божества́ во чре́ві Твоє́м неопа́льно вмісти́вшей. Сея́ же благода́ті і о́браз подо́бія Твоєго́ прича́стен показа́ся, ті́мже от ві́рних Неопали́мою Купино́ю найменова́ся, єго́же ми честву́єм благолі́пно, і Тебі́ хвале́бно вопіє́м:

Ра́дуйся, Свіще́ Неугаси́мая, в моли́твах за нас у Престо́ла Госпо́дня присногоря́щая; ра́дуйся, огне́м любве́ Бо́жия і на́ша хла́дная сердця́ воспламеня́ющая.

Ра́дуйся, сі́нію моли́тв Твої́х зной страсте́й на́ших прохлажда́ющая; ра́дуйся, в час ско́рби і недоумі́нія по́мисли душеполе́зния нам низпосила́ющая.

Ра́дуйся, во вре́м'я безпомо́щія на́шего, єгда́ бі́дствуєм і не і́мами помога́ющаго, на по́мощ к нам ускоря́ющая; ра́дуйся, в годи́ну несча́стій внеза́пних держа́вною руко́ю Твоє́ю от поги́белі нас ісхища́ющая.

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

Пропові́дуєть Це́рков Христо́ва чудеса́ Твоя́, Богороди́тельнице, я́же па́че піска́ морська́го і звізд небе́сних мно́жає суть: от восто́ка бо і до за́пада хва́льно і́м'я Твоє́ чудеси́, і ність гра́да іли́ страни́, іді́же не соверши́ся Тобо́ю ді́йство си́ли Бо́жия во ізбавле́ніє і спасе́ніє, просвіще́ніє і ісціле́ніє люде́й христоімени́тих. Найпа́че же чрез іко́ни Твоя́ святи́я оби́кла єси́ чудотвори́ти, ізлива́я от них струї́ ми́лости і щедро́т бі́дствующему і боля́щему челові́честву. Сего́ ра́ди славосло́вим Тя гла́си пі́сней духо́вних і вопіє́м Си́ну Твоєму́ і Бо́гу на́шему: Аллилу́я.

Возсія́ла єси́ в світоли́тії Боже́ственния сла́ви, Ді́во Богоотрокови́це, Младе́нця Предві́чнаго, Го́спода Ісу́са Христа́ на руку́ Твоє́ю держа́щи, і лико́м сил а́нгельських окружа́єма, я́коже Тя ви́дим на іко́ні ізображе́нную, Моїсе́йськую Неопали́мую Купину́ та́їнственно пронарече́нную, от нея́же да́ри благода́тния ві́рним да́руєши, от огня́ і гро́ма спаса́єши, неду́жния врачу́єши, скорб'я́щия утіша́єши і всім вся блага́я і душеполе́зная низпосила́єши, во є́же пі́ти Тебі́ гла́си немо́лчними си́це:

Ра́дуйся, о Не́йже ра́дується і торжеству́єть А́нгельський собо́р і челові́чеський род; ра́дуйся, єя́же сла́ва превосхо́дить похвали́ земни́я і небе́сния.

Ра́дуйся, от го́рних висо́т всю вселе́нную Ма́тернею любо́вію Твоє́ю назира́ющая; ра́дуйся, юдо́ль земну́ю многоско́рбную благодія́нії Твої́ми посіща́ющая.

Ра́дуйся, неісче́тною благости́нею Твоє́ю не оставля́ющая са́мих презрі́нних і отве́рженних; ра́дуйся, сердобо́лієм Твої́м от ро́ва поги́бельнаго ісхища́ющая безнаде́жних.

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

Хотя́ Госпо́дь яви́ти любо́в Свою́ к лю́дем, іскупле́нним Єго́ Кро́вію, дарова́ нам в покро́в і защи́ту Ма́тер Свою́ Пренепоро́чную, і Сію́ сотвори́ прибі́жище благооти́шноє вся́кой душі́ христия́нстій, скорб'я́щей і озло́бленній, по́мощі і ми́лости тре́бующей. Ві́дуще у́бо о такові́м милос́ердом служе́нії Твоє́м ро́ду челові́чеському, Влади́чице Всеблага́я, к Тебі́ о́чі на́ші в ско́рбіх возво́дим, і ру́ці моле́бно простира́єм, утіше́нія от Тебе́ єди́ния прося́ще, да спасе́ши нас предста́тельством Твої́м от скорбе́й вре́менних і ві́чних і сподо́биши на землі́ живи́х, в ра́дості святи́х пі́ти Бо́гу: Аллилу́я.

Ди́вно просла́вила єси́ чудеси́ іко́ну Твою́ святу́ю Неопали́мою Купино́ю імену́ємую, Богоро́дице Ді́во, є́юже гра́ди і ве́сі от запале́нія о́гненнаго і молнієно́снаго гро́ма соблюда́єши і до́ми ві́рних благословля́єши, в ни́хже честву́ється благогові́йно пречи́стаго ли́ка Твоєго́ подо́біє. Сего́ ра́ди я́ко дар многоці́нен, о́браз Твой благода́тний ра́достно приє́млем, достодо́лжним поклоне́нієм почита́єм, і Тя по до́лгу ублажа́єм благохвале́нії си́ми:

Ра́дуйся, Алава́стре врачева́нія, на всяк неду́г врачевство́ содержа́щий; ра́дуйся, Мирополо́жнице благоуха́нія Христо́ва, облагоуха́вшая па́дшеє челові́чество.

Ра́дуйся, у́зи гріхо́вния разріша́ющая ка́ющимся грі́шником; ра́дуйся, плени́ці страсте́й сокруша́ющая подвиза́ющимся о чистоті́.

Ра́дуйся, дів Младопита́тельнице і ма́терей ти́хоє Весе́ліє; ра́дуйся, вдов Засту́пнице і сиро́т благосе́рдоє Призрі́ніє.

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

Стра́нно єсть ви́діти, я́ко іко́на Твоя́, Влади́чице, на дсці напи́санная і по єстеству́ своєму́ о́гненному ді́йству подве́рженная, си́лу пачеєсте́ственную явля́єть і прису́тствієм свої́м си́лу огня́ укроща́єть. В сем познава́я си́лу Бо́жию і Твої́х моли́тв ді́йство, велича́єм возвели́чившаго Тя Зижди́теля, вся́чеських Бо́га, во отра́ду і утіше́ніє нам дарова́вшаго о́браз Твой чудотво́рний і сим спаса́ющаго нас от о́гненнаго запале́нія, да при́сно зове́м Єму́ благода́рственно і хвале́бно: Аллилу́я.

Весь мир христия́нський сла́вить і́м'я Твоє́, Преблагослове́нная Марі́є Богоро́дице, і вся́кому ві́рному сла́достно і уті́шительно єсть взира́ти на Пречи́стаго ли́ка Твоєго́ подо́біє, і́мже оби́кла єси́ явля́ти мно́гая і пресла́вная чудеса́. Се і ми, смире́ннії, Твою́ святу́ю іко́ну ви́дяще, благолі́пно єй покланя́ємся і с любо́вію ю лобиза́єм, ча́юще от нея́ по́мощі і заступле́нія Твоєго́ держа́внаго, найпа́че же во вре́м'я безпомо́щія на́шего, єгда́ гріх ра́ди на́ших о́гненноє запале́ніє на ни на́йдеть внеза́пно, да спаса́ємі Тобо́ю от поги́бельнаго пла́мене благода́рними усти́ Тебі́ вопіє́м:

Ра́дуйся, нерукотворе́нная ски́ніє Бо́га Сло́ва, Херуви́ми превиша́ющая і Серафи́ми превосходя́щая святи́нею і чистото́ю; ра́дуйся, О́блаче ле́гкий Со́лнця Пра́вди, І́мже Небе́сний к земни́м при́йде, да на не́бо с Собо́ю нас возведе́ть.

Ра́дуйся, ра́йськія две́рі отве́рзшая па́дшему челові́честву Рождество́м Твої́м Святи́м; ра́дуйся, не́бо і зе́млю воєди́но совоку́пльшая, во є́же пі́ти Тебі́ і Ро́ждшемуся от Тебе́ немо́лчния хвали́.

Ра́дуйся, Боже́ственний Істо́чниче, во́ду жи́зні істочи́вий, от него́же пію́щії ктому́ не умира́ють; ра́дуйся, гро́здіє спасе́нія возрасти́вшая Благослове́нная Лозо́, вино́ безсме́ртія іска́пающий челові́ком.

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

Вся́ку похвалу́ превосхо́дить сла́ва Твоя́, Преблагослове́нная і Препросла́вленная Ма́ти Го́спода на́шего: недоуміва́ють бо і у́ми безпло́тнії пі́ти Тя по достоя́нію, па́че же нам, земни́м і пе́рстним, сіє́ неудо́бно єсть, оба́че любо́вію к Тебі́ побіжда́ємі, дерза́єм приноси́ти Тебі́ поси́льноє пі́ніє хвали́ і благодаре́нія, за премно́гую ми́лость Твою́ к ро́ду челові́чеському, єго́же возлюби́ла єси́ і єму́же благотвори́ти не престає́ши, подвиза́я всяк во́зраст ві́рних взива́ти ро́ждшемуся от Тебе́ Спа́су Христу́: Аллилу́я.

Ві́тiії^* челові́честії ізнемога́ють пости́гнути ве́лію та́йну Твоєго́ Присноді́вства, Богороди́тельнице, ю́же утаї́ Госпо́дь от прему́дрих ві́ка сего́, і ві́рою откри́ смире́нним і благогові́йним, питли́ваго іспита́нія чу́ждим, от ни́хже правосла́вно і несумні́нно до Рождества́, і в Рождестві́, і по Рождестві́ Ді́ва пропові́дуєшися. Прийми́ у́бо, о Ма́ти і Ді́во, і на́ше о сем іспові́даніє вседуше́вноє і укріпи́ нас послі́довати Тебі́ житіє́м непоро́чним і серде́чною чистото́ю, да возмо́жем благоуго́дно воспіва́ти Тебі́ пі́сні сицеви́я:

Ра́дуйся, Кри́не^* Білосні́жний ді́вства і чистоти́, неувяда́ємо цвіту́щий горі́; ра́дуйся, к ді́вству і чи́стоті́ неви́димо руково́дствующая живу́щих до́лі.

Ра́дуйся, ма́терство і ді́вство в Себі́ чу́дно сочета́вшая; ра́дуйся, во обою́ непоро́чно і свято себе́ соблю́дшая.

Ра́дуйся, і́ночеських лико́в предводи́тельнице в ді́встві Богоуго́днім; ра́дуйся, ді́вственних полко́в нача́льнице в чи́стоті́ душі́ і ті́ла.

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

Спасе́ніє челові́чеськоє устроя́я Єди́н от Тро́йці воплоти́тися от Тебе́ ізво́ли, Богоневі́сто Влади́чице, єстество́ челові́чеськоє просла́вив сіді́нієм одесну́ю Отця́ на престо́лі Божества́, я́ко Син Єдиноро́дний, Тойже і Син Твой по пло́ті бисть, і Тебе́ с Собо́ю просла́ви сла́вою преви́шшею вся́кия сла́ви, єя́же добро́тою осіня́єма, не забива́єши ми́лостивно род челові́чеський, но моли́твенно предста́тельствуєши пред Творце́м в Тро́йці Єди́ним, о всіх ві́рно пою́щих Єму́ славосло́вія піснь: Аллилу́я.

Стіна́ єси́ ді́вственним лико́м і і́ночеським собо́ром, Богоро́дице Ді́во, і всім усе́рдно к Тебі́ в моли́твах притека́ющим, іко́ну же Твою́ святу́ю благогові́йно честву́ющим; Тебі́ бо єди́ній дарова́ся от Го́спода благода́ть всеми́рнаго заступле́нія, і ві́рних в ді́встві і чи́стоті́ утвержде́нія. Ті́мже непоро́чнаго житія́ рачи́теліє под Ма́терній покро́в Твой от бу́рі страсте́й прибіга́ють і благооти́шіє душе́вноє нахо́дять, согла́сно Тебі́ взива́я:

Ра́дуйся, і́ноков і і́нокинь благочести́вих ізря́дная Покрови́тельнице і те́плая к Бо́гу о них хода́тайце; ра́дуйся, та́йних среди́ ми́ра рабо́в Бо́жиїх всегда́шняя помо́щнице і в по́двизіх духо́вних руководи́тельнице.

Ра́дуйся, ю́них наста́внице цілому́дрія і воздержа́нія; ра́дуйся, ста́рцев благогові́йних упокоє́ніє і отра́до.

Ра́дуйся, до́ми і семе́йства християнськия осіня́ющая благи́м Твої́м покро́вом; ра́дуйся, всяк во́зраст ві́рних сподобля́ющая Твоєго́ благосе́рдаго попече́нія.

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

Пі́ніє хвале́бноє прино́сить Тебі́ немо́лчно Свята́я Христо́ва Це́рков, Всепі́тая Влади́чице, возвіща́я ми́лості Твоя́ і чудеса́, ї́миже обогати́ся вся вселе́нная. Воі́стину, кто бо я́коже Ти скоропослушли́ва єсть к моли́твенним проше́ніям на́шим? Но і са́мия проше́нія оби́кла єси́ предваря́ти, ми́луя і ущедря́я тре́бующих по́мощі Твоєя́ святи́я, єя́же не лиши́ і нас, смире́нних, в час сей пою́щих во сла́ву і́мене Твоєго́, і вопію́щих Бо́гу: Аллилу́я.

Світоза́рная Твоя́ іко́на, Богома́ти Пречи́стая, просвіща́єть потемне́нния гріхми́ ду́ші на́ша сія́нієм Бо́же́ственних чуде́с, в ни́хже познае́м Бо́жия всемогу́щества си́лу і Твоє́ милосе́рдіє неісче́тноє, при́сно гото́воє спосо́бствовати нам в покая́нії і обраще́нії от злих діл на путь спасе́нія. Мо́лим у́бо Тебе́, Всеблага́я, не оста́ви нас заблужда́ти в де́бріх гріхо́в і страсте́й, но приведи́ к ти́хому приста́нищу благоче́стнаго і Богоуго́днаго житія́, да возмо́жем досто́йно приноси́ти Тебі́ сія́ пі́сненния да́ри:

Ра́дуйся, враги́ на́ша неви́димия запина́ющая бо́дренною Твоє́ю моли́твою; ра́дуйся, сим не попуска́ющая облада́ти на́ми наси́лієм сме́ртнаго сего́ тілесе́.

Ра́дуйся, я́ко бі́си і́мені Твоєго́ свята́го боя́ться і трепе́щуть; ра́дуйся, я́ко іко́на Твоя́ честна́я вся́ку си́лу дия́волю прису́тствієм свої́м прогоня́єть.

Ра́дуйся, подви́жников благоче́стія укріпля́ющая в бра́ні духо́вной со врага́ми спасе́нія челові́чеськаго; ра́дуйся, в час кончи́ни помога́ющая любо́в і ві́ру к Тебі́ іму́щим.

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

Благода́ті Бо́жия прича́стну іспові́дуєм Твою́ святу́ю іко́ну, Богоблагода́тная Ді́во, і сві́тло торжеству́єм пра́здник єя́ явле́нія; во о́бразі бо Неопали́мия Купини́ сія́ я́вльшися, то́жде і ді́йство показу́єть свої́ми чудеси́, от о́гненнаго пла́мене сохраня́я і соблюда́я жили́ща на́ша свої́м прису́тствієм. Сію́ у́бо, я́ко щит і забра́ло, іму́ще, Тебе́, помо́щницю на́шу держа́вную хвала́ми пі́сненними ублажа́єм і Ро́ждшемуся от Тебе́ Спаси́телю на́шему вопіє́м: Аллилу́я.

Поє́м Тя, Богороди́тельнице, єди́ну Наде́жду і Упова́ніє на́ше, іспові́дуєм ми́лості Твоя́ і не таї́м чуде́с Твої́х, прославля́єм неісче́тную бла́гость Твою́ к ро́ду христия́нському, благословля́єм і́м'я Твоє́ свято́є, є́же воі́стину ми́ро ізлія́нноє єсть лю́б’ящим Тя, благоуха́нієм духо́вним ісполня́ющеє благочести́вия ду́ші. Облагоуха́й у́бо і нас, Влади́чице, смердя́щих страстьми́ гріхо́вними, і сподо́би чи́стим се́рдцем і нескве́рними усти́ взива́ти к Тебі́:

Ра́дуйся, ми́ро істоча́ющая сла́достноє і душеспаси́тельноє, і́мже умаща́ються сердця́ боголюби́вая; ра́дуйся, неду́ги душе́вния і тіле́сния врачу́ющая єди́ним прикоснове́нієм к іко́ні Твоє́й святі́й.

Ра́дуйся, Води́тельнице Блага́я, на путь богоугожде́нія і спасе́нія направля́ющая ка́ющихся грі́шников; ра́дуйся, лі́ствицею доброді́телей возводя́щая подви́жников Христо́вих ко врата́м Ца́рствія Небе́снаго.

Ра́дуйся, смире́нних і терпіли́вих страда́льцев вінча́ющая утіше́нієм благода́тним; ра́дуйся, ізгна́нних і гони́мих безви́нно, услажда́ющая предвкуше́нієм блаже́нства ра́йськаго.

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

О, Всепі́тая Ма́ти, ро́ждшая всіх святи́х Святі́йшеє Сло́во і Неопали́мою Купино́ю імену́ємая от нас недосто́йних, воньми́ гла́су моле́ній і пі́ній на́ших, пред свято́ю іко́ною Твоє́ю усе́рдно Тебі́ возноси́мому, і те́плою моли́твою Твоє́ю ко Го́споду огня́ вре́меннаго і ві́чнаго ізба́ви нас, хва́лящих і́м'я Твоє́ і прославля́ющих чудеса́ Твоя́, Си́ну же Твоєму́ і Бо́гу на́шему вопію́щих: Аллилу́я.

Цей кондак читається тричі. Після цього знову читаються 1-й ікос і 1-й кондак.

А́нгелов Цари́це і всея́ тва́рі Влади́чице, Госпоже́ Богоро́дице, от А́нгельських лико́в горі́ приє́млющая хвале́бноє пі́ніє, сподо́би і нас, земни́х і пе́рстних, возноси́ти к Тебі́ гла́си хвали́ благодаре́нія за премно́гую ми́лость Твою́ к ро́ду челові́чеському. І а́ще недосто́йни єсьми́ пі́ти Тя по достоя́нію, оба́че Ти, я́ко блага́я, не возгнуша́йся на́ших недовлі́ющих похва́л, і я́ко Син Твой дві ле́пті вдови́ці ми́лостивно прия́т, та́ко любоблагоутро́бно усли́ши нас, со умиле́нієм к Тебі́ вопію́щих:

Ра́дуйся, огнь Божества́ во чре́ві Твоє́м неопа́льно носи́вшая; ра́дуйся, Спаси́теля па́дшему челові́честву ро́ждшая.

Ра́дуйся, си́лу а́дову пречеcтни́м Рождество́м Твої́м упраздни́вшая; ра́дуйся, Ада́ма і Є́ву дре́вняго прокля́тія свободи́вшая.

Ра́дуйся, вочелові́ченію Єди́наго от Тро́йці непоро́чно послужи́вшая; ра́дуйся, Творця́ Небесе́ і землі́ безсі́менно воплоти́вшая.

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

Взбра́нной Воєво́ді, Пречи́стой і Богообра́дованной Ді́ві Богоро́диці, огнезра́чния іко́ни своєя́ явле́нієм обра́довавшей Це́рков Христо́ву і є́ю от о́гненнаго запале́нія защища́ющей ві̑рния, похва́льноє возглаша́єм пі́ніє. Ти же, о Богомати, Купино́ Неопали́мая імену́ємая на́ми, я́ко іму́щая держа́ву непобіди́мую і милос́ердіє мно́гоє, ускори́ на по́мощ к нам, тре́бующим Твоєго́ заступле́нія, і от вся́ких бід свободи́ зову́щих Ті:

Ра́дуйся, Благода́тная, Купино́ Неопали́мая, о́гненнаго запале́нія нас ізбавля́ющая.

О, Пресвята́я і Преблагослове́нная Ма́ти сладча́йшаго Го́спода на́шего Ісу́са Христа́, припа́даєм і покланя́ємся Тебі́ пред свято́ю і пречестно́ю іко́ною Твоє́ю, є́юже ди́вная і пресла́вная чудеса́ содіва́єши, от о́гненнаго запале́нія і молнієно́снаго гро́ма жили́ща на́ша спаса́єши, неду́жния ісціля́єши і вся́ко благо́є проше́ніє на́ше во бла́го ісполня́єши. Смире́нно мо́лим Тя, всеси́льная ро́да на́шего Засту́пнице: сподо́би нас, немощни́х і грі́шних, Твоєго́ Ма́терняго уча́стія і благопопече́нія. Спаси́ і сохрани́, Влади́чице, под кро́вом ми́лости Твоєя́ богохрани́мую страну́ на́шу, вла́сті і во́їнство єя́, Це́рков святу́ю, храм сей, [або: оби́тель сію́], і вся ни припа́дающия к Тебі́ с ві́рою і любо́вію, і умиле́нно прося́щия со слеза́ми Твоєго́ заступле́нія. Єй, Госпоже́ Всеми́лостивая, умилосе́рдися на нас, обурева́ємих гріха́ми мно́гими і не іму́щих дерзнове́нія ко Христу́ Бо́гу проси́ти Єго́ о поми́лованії і проще́нії, но Тебі́ предлага́єм к Нему́ на умоле́ніє, Ма́тер Єго́ по пло́ті. Ти же, Всеблага́я, простри́ к Нему́ Богопри́їмнії ру́ці Твої́ і предста́тельствуй за нас пред бла́гостію Єго́, прося́ нам проще́нія прегріше́ній на́ших, благоче́стнаго ми́рнаго житія́, благи́я христия́нськия кончи́ни і до́браго отві́та на Стра́шнім Суді́ Єго́. Найпа́че же в час гро́знаго посіще́нія Бо́жия, єгда́ огне́м возгоря́ться до́ми на́ша іли́ молнієно́сним гро́мом устраша́ємі бу́дем, яви́ нам ми́лостивноє Твоє́ заступле́ніє і держа́вноє вспоможе́ніє, да спаса́ємі всеси́льними Твої́ми ко Го́споду моли́твами, вре́меннаго наказа́нія Бо́жия зді ізбі́гнем і ві́чноє блаже́нство ра́йськоє та́мо унаслі́дуєм, і со всі́ми святи́ми воспоє́м пречестно́є і великолі́поє і́м'я покланя́ємия Тро́йці, Отця́, і Си́на, і Свята́го Ду́ха, і Твоє́ ве́ліє к нам милосе́рдіє, во ві́ки віко́в. Амі́нь.