Глава 10
1
И Ахаа́ву бѣ́ша се́дмьдесятъ сы́нове во самарі́и. И написа́ писа́ніє іиу́й и посла́ въ самарі́ю ко князе́мъ самарі́йскимъ и къ старѣ́йшинамъ и ко корми́телемъ сыно́въ Ахаа́влихъ, глаго́ля:
2
и ны́нѣ єгда́ пріи́детъ писа́ніє сіє́ къ ва́мъ, и съ ва́ми сы́нове господи́на ва́шего, и съ ва́ми колесни́цы и ко́ни, и гра́ды тве́рды и ору́жія:
3
и у́зрите блага́го и пра́ваго въ сынѣ́хъ господи́на ва́шего, и поста́вите єго́ на престо́лѣ отца́ єго́, и да вою́єте о до́мѣ господи́на ва́шего.
4
И убоя́шася зѣло́ и рѣ́ша: се́, два́ царя́ не возмого́ста ста́ти проти́ву лицу́ єго́, и ка́ко мы́ ста́немъ?
5
И посла́ша и́же надъ до́момъ и и́же надъ гра́домъ, и старѣ́йшины, и корми́теле ко іиу́ю, глаго́люще: о́троцы мы́ твои́, и єли́ка а́ще рече́ши къ на́мъ, сотвори́мъ: не воцари́мъ му́жа, благо́є предъ очи́ма твои́ма сотвори́мъ.
6
И написа́ къ ни́мъ іиу́й писа́ніє второ́є, глаго́ля: а́ще вы́ мои́ и гла́са моєго́ вы́ послу́шаєте, возми́те главы́ муже́й сыно́въ господи́на ва́шего и принеси́те ко мнѣ́, я́коже ча́съ у́тро, во Ієзрає́ль. И бѣ́ сыно́въ царе́выхъ се́дмьдесятъ муже́й, сі́и нача́лницы гра́да вскорми́ша и́хъ.
7
И бы́сть єгда́ пріи́де къ ни́мъ писа́ніє, и взя́ша сы́ны царе́вы и закла́ша и́хъ се́дмьдесятъ муже́й, и возложи́ша главы́ и́хъ въ ко́шницы и посла́ша и́хъ къ нему́ во Ієзрає́ль.
8
И пріи́де вѣ́стникъ, и возвѣсти́ єму́, глаго́ля: принесо́ша главы́ сыно́въ царе́выхъ. И рече́: положи́те я́ въ два́ холма́ при вратѣ́хъ гра́да до зау́тра.
9
И бы́сть зау́тра, и изы́де и ста́ во вратѣ́хъ гра́да, и рече́ ко всѣ́мъ лю́демъ: пра́ведни вы́: се́, а́зъ є́смь, обрати́хся на господи́на моєго́ и уби́хъ єго́: и кто́ порази́ всѣ́хъ си́хъ?
10
ви́дите у́бо, я́ко не паде́тъ от глаго́ла Госпо́дня на зе́млю, єго́же глаго́ла Госпо́дь на до́мъ Ахаа́вль: и Госпо́дь сотвори́, єли́ка глаго́ла руко́ю раба́ своєго́ иліи́.
11
И изби́ іиу́й всѣ́хъ оста́вшихся въ дому́ Ахаа́вли во Ієзрає́ли, и вся́ вельмо́жы єго́, и зна́ємыя єго́, и жерцы́ єго́, я́ко не оста́тися єго́ оста́нку.
12
И воста́ и и́де въ самарі́ю са́мъ, въ веѳака́дъ па́стырскій при пути́.
13
И іиу́й обрѣ́те бра́тію Охозі́и царя́ Іу́дина и рече́: кто́ вы́? И рѣ́ша: бра́тія Охозі́ины мы́, и снидо́хомъ поздра́вити сы́ны царе́вы и сы́ны облада́ющія.
14
И рече́: поими́те я́ жи́вы. И взя́ша и́хъ живы́хъ, и закла́ша и́хъ въ веѳакадѣ́, четы́редесять два́ му́жа: и не оста́ви му́жа от ни́хъ.
15
И и́де отту́ду, и обрѣ́те Іонада́ва сы́на риха́вля на пути́ во срѣ́теніє себѣ́, и благослови́ єго́. И рече́ къ нему́ іиу́й: а́ще є́сть се́рдце твоє́ съ се́рдцемъ мои́мъ пра́во, я́коже се́рдце моє́ съ се́рдцемъ твои́мъ? И рече́ Іонада́въ: є́сть. И рече́ іиу́й: и а́ще є́сть, да́ждь ру́ку твою́. И даде́ ру́ку свою́. И возведе́ єго́ къ себѣ́ на колесни́цу
16
и рече́ къ нему́: гряди́ со мно́ю и ви́ждь, внегда́ ревнова́ти мнѣ́ по Го́сподѣ Савао́ѳѣ. И посади́ єго́ на колесни́цу свою́.
17
И вни́де въ самарі́ю, и изби́ всѣ́хъ оста́вшихся Ахаа́влихъ въ самарі́и, до́ндеже истреби́ти єму́ по глаго́лу Госпо́дню, єго́же глаго́ла ко иліи́.
18
И собра́ іиу́й вся́ лю́ди и рече́ къ ни́мъ: Ахаа́въ порабо́та Ваа́лу ма́ло, іиу́й же порабо́таєтъ єму́ мно́го:
19
и ны́нѣ вся́ проро́ки Ваа́ловы, вся́ рабы́ єго́ и жерцы́ єго́ призови́те ко мнѣ́, му́жъ да не потаи́тся, я́ко же́ртва вели́ка Ваа́лу: и вся́къ и́же потаи́тся, не бу́детъ жи́въ. И іиу́й сотвори́ ле́стію, да погуби́тъ рабы́ Ваа́ловы.
20
И рече́ іиу́й: освяти́те же́ртву Ваа́лу и служе́ніє. И проповѣ́даша.
21
И посла́ іиу́й во ве́сь Ізра́иль и рече́, глаго́ля: и ны́нѣ вси́ раби́ Ваа́ловы, и вси́ жерцы́ єго́, и вси́ проро́цы єго́, да никто́же оста́нется, я́ко же́ртву вели́ку творю́: и́же оста́нется, не бу́детъ жи́въ и пріидо́ша вси́ раби́ Ваа́ловы, и вси́ жерцы́ єго́, и вси́ проро́цы єго́: не оста́ся му́жъ, и́же не пріи́де: и внидо́ша во хра́мъ Ваа́ловъ, и напо́лнися хра́мъ Ваа́ловъ от кра́я да кра́я.
22
И рече́ іиу́й къ су́щымъ надъ до́момъ оде́ждъ: изнеси́те оде́жды всѣ́мъ рабо́мъ Ваа́ловымъ. И изнесе́ и́мъ ризохрани́тель.
23
И вни́де іиу́й и Іонада́въ сы́нъ риха́вль въ хра́мину Ваа́лову и рече́ рабо́мъ Ваа́ловымъ: испыта́йте и ви́дите, а́ще є́сть съ ва́ми от рабо́въ Госпо́днихъ, и вы́шлите всѣ́хъ рабо́въ Госпо́днихъ обрѣ́тшихся та́мо. И бы́сть я́коже глаго́ла іиу́й, я́ко не бѣ́ от рабо́въ Госпо́днихъ, но то́кмо єди́ни раби́ Ваа́ловы.
24
И вни́де сотвори́ти же́ртвы и всесожже́нія и іиу́й поста́ви себѣ́ внѣ́ о́смьдесятъ муже́й и рече́: му́жъ и́же а́ще уго́нзетъ от муже́й, и́хже а́зъ извожду́ въ ру́ки ва́шя, душа́ єго́ вмѣ́сто души́ єго́.
25
И бы́сть єгда́ сконча́ творя́й всесожже́нія, и рече́ іиу́й предтеку́щымъ и тріста́томъ: вше́дше избі́йте и́хъ, да не изы́детъ от ни́хъ му́жъ. И изби́ша и́хъ о́стріємъ меча́ и поверго́ша предтеку́щіи и тріста́ты, и идо́ша да́же до гра́да хра́ма Ваа́лова:
26
и изнесо́ша кумі́ръ Ваа́ловъ и сожго́ша єго́:
27
и разби́ша кумі́ры Ваа́ловы, и низверго́ша до́мъ Ваа́ловъ, и опредѣли́ша єго́ на Афедро́нъ да́же до дне́ сего́.
28
И погуби́ іиу́й хра́мъ Ваа́ловъ от Ізра́иля.
29
Оба́че от грѣхо́въ ієровоа́ма сы́на нава́това, и́же введе́ въ грѣ́хъ Ізра́иля, не отступи́ іиу́й от послѣ́дованія и́хъ: ю́ницы златы́я, я́же въ Веѳи́ли и въ да́нѣ.
30
И рече́ Госпо́дь ко іиу́ю: за сія́, єли́ка ублажи́лъ єси́ сотвори́ти пра́воє предъ очи́ма мои́ма, и вся́ єли́ка по се́рдцу моєму́ сотвори́лъ єси́ до́му Ахаа́влю, сы́нове твои́ до четве́ртаго ро́да ся́дутъ на престо́лѣ во Ізра́или.
31
И іиу́й не сохрани́ ходи́ти въ зако́нѣ Госпо́дни все́мъ се́рдцемъ свои́мъ: не отступи от грѣхо́въ ієровоа́ма сы́на нава́това, и́же въ грѣ́хъ введе́ Ізра́иля.
32
Во дни́ о́ны нача́ Госпо́дь посѣца́ти во Ізра́или: и порази́ и́хъ азаи́лъ во всѣ́хъ предѣ́лѣхъ Ізра́илевыхъ,
33
от Іорда́на на восто́къ со́лнца, всю́ зе́млю Галаа́дску и гадді́иску, и Руви́мову и Манассі́ину, от Арои́ра, и́же є́сть при у́стіи пото́ка Арно́нска, и Галаа́дъ и Васа́нъ.
34
И про́чая слове́съ іиу́євыхъ, и вся́ я́же сотвори́, и вся́ си́ла єго́, и совѣща́нія, я́же совеща́, не се́ ли, сія́ напи́сана въ кни́зѣ слове́съ дні́й царе́й Ізра́илевыхъ?
35
И у́спе іиу́й со отцы́ свои́ми, и погребо́ша єго́ въ самарі́и. И воцари́ся Іоаха́зъ сы́нъ єго́ вмѣ́сто єго́.
36
И дні́й бя́ше, въ ня́же іиу́й ца́рствова надъ Ізра́илемъ въ самарі́и, два́десять о́смь лѣ́тъ.
