Глава 3
1
И Іора́мъ сы́нъ Ахаа́вовъ воцари́ся надъ Ізра́илемъ въ самарі́и, въ лѣ́то осмоєна́десять Іосафа́та царя́ Іу́дина, и ца́рствова лѣ́тъ двана́десять,
2
и сотвори́ лука́воє предъ очи́ма Госпо́днима: оба́че не я́коже оте́цъ єго́ и не я́коже ма́ти єго́: и разруши́ ка́пища Ваа́лова, я́же сотвори́ оте́цъ єго́:
3
оба́че ко грѣху́ ієровоа́ма сы́на нава́това, и́же введе́ во грѣ́хъ Ізра́иля, прилѣпи́ся и не отступи́ от него́.
4
И моса́ ца́рь Моа́вль бѣ́ ноки́дъ и дая́ше да́нь царю́ Ізра́илеву, сто́ ты́сящъ а́гнцевъ и сто́ ты́сящъ овно́въ съ руна́ми.
5
И бы́сть по уме́ртвіи Ахаа́вли и отве́ржеся ца́рь Моа́вль царя́ Ізра́илева.
6
И изы́де ца́рь Іора́мъ во дни́ о́ны от самарі́и и согля́да Ізра́иля,
7
и и́де, и посла́ ко Іосафа́ту царю́ Іу́дину, глаго́ля: ца́рь Моа́вль отве́ржеся мене́: и́деши ли со мно́ю на бра́нь на Моа́ва? И рече́: взы́ду: си́це мнѣ́, я́коже и тебѣ́: я́коже лю́діє мои́, лю́діє твои́: я́коже ко́ни мои́, ко́ни твои́.
8
И рече́: кі́имъ путе́мъ взы́демъ? И рече́: путе́мъ пусты́ни Єдо́мскія.
9
И и́де ца́рь Ізра́илевъ и ца́рь Іу́динъ и ца́рь Єдо́мль, и идо́ша путе́мъ се́дмь дні́й: и не бѣ́ полку́ воды́ и ското́мъ су́щымъ съ ни́ми.
10
И рече́ отроко́мъ свои́мъ ца́рь Ізра́илевъ: О, я́ко созва́ Госпо́дь три́ сія́ цари́ иду́щыя преда́ти и́хъ въ ру́цѣ Моа́вли.
11
И рече́ Іосафа́тъ къ нему́ ца́рь Іу́динъ: є́сть ли здѣ́ проро́къ Госпо́день, и вопро́симъ Го́спода и́мъ? и отвѣща́ єди́нъ о́трокъ царя́ Ізра́илева и рече́: здѣ́ є́сть Єліссе́й сы́нъ Сафа́товъ, и́же возлива́ше во́ду на ру́цѣ иліинѣ́.
12
И рече́ Іосафа́тъ: є́сть съ ни́мъ глаго́лъ Госпо́день. И сни́де къ нему́ ца́рь Ізра́илевъ и Іосафа́тъ ца́рь Іу́динъ и ца́рь Єдо́мль.
13
И рече́ Єліссе́й ко царю́ Ізра́илеву: что́ мнѣ́ и тебѣ́? иди́ ко проро́комъ отца́ твоєго́ и ко проро́комъ ма́тере твоєя́. И рече́ єму́ ца́рь Ізра́илевъ: єда́ созва́ Госпо́дь три́ цари́, є́же преда́ти я́ въ ру́цѣ Моа́вли?
14
И рече́ Єліссе́й: жи́въ Госпо́дь си́лъ єму́же предстою́ предъ ни́мъ, я́ко а́ще бы́хъ не лице́ Іосафа́та царя́ Іу́дина а́зъ прія́лъ, то́ воззрѣ́лъ ли бы́хъ на тя́, и ви́дѣлъ ли бы́хъ тя́?
15
и ны́нѣ приведи́ ми пѣвца́. И бы́сть єгда́ воспѣва́ше пѣве́цъ, и бы́сть на не́мъ рука́ Госпо́дня,
16
и рече́: та́ко глаго́летъ Госпо́дь: сотвори́те пото́къ се́й рва́ми рва́ми,
17
я́ко та́ко глаго́летъ Госпо́дь: не у́зрите ду́ха, и ниже́ уви́дите дождя́: и пото́къ се́й напо́лнится воды́, и піє́те вы́ и стяжа́нія ва́ша и ско́ти ва́ши:
18
и ле́гко сіє́ предъ очи́ма Госпо́днима, и преда́мъ Моа́ва въ ру́ки ва́шя,
19
и порази́те вся́къ гра́дъ тве́рдъ, и вся́ко дре́во бла́го низложите́, и вся́къ исто́чникъ воды́ заградите́, и вся́ку ча́сть бла́гу разбієте́ ка́меніємъ.
20
И бы́сть зау́тра восходя́щей же́ртвѣ, и се́, во́ды идя́ху путе́мъ Єдо́мскимъ, и испо́лнися воды́ земля́.
21
И вси́ Моави́тяне услы́шаша, я́ко взыдо́ша три́ царя́ бра́тися съ ни́ми. И возопи́ша отвсю́ду препоя́санніи ору́жіємъ и рѣ́ша: о́хъ: и ста́ша у предѣ́ла.
22
И ура́ниша зау́тра, и со́лнце возсія́ на во́ды: и ви́дѣ Моа́въ сопроти́въ во́ды че́рмны я́ко кро́вь,
23
и рече́: кро́вь сія́ є́сть от ору́жія: и би́шася ца́ріє, и уби́ му́жъ и́скренняго своєго́: и ны́нѣ [гряди́] на коры́сти, Моа́ве.
24
И внидо́ша въ по́лкъ Ізра́илевъ, Ізра́илтяне же воста́ша. и изби́ша Моа́влянъ: и побѣго́ша от лица́ и́хъ: и внидо́ша входя́ще и бію́ще Моа́ва,
25
и гра́ды разби́ша, и вся́ку ча́сть бла́гу наверго́ша му́жіє ка́меніємъ, и напо́лниша ю́, и вся́къ исто́чникъ загради́ша, и вся́ко дре́во бла́го изсѣко́ша, доне́лѣже оста́виша ка́меніє стѣ́нъ разбіє́но: и обступи́ша пра́щницы и разби́ша єго́.
26
И ви́дѣ ца́рь Моа́вль, я́ко укрѣпи́ся надъ ни́мъ бра́нь, и взя́ съ собо́ю се́дмь со́тъ муже́й со обнаже́ннымъ ору́жіємъ, є́же просѣщи́ся ко царю́ Єдо́мску: и не возмого́ша.
27
И поя́тъ сы́на своєго́ пе́рвенца, єго́же воцари́ вмѣ́сто себе́, и вознесе́ єго́ во всесожже́ніє на стѣнѣ́: и бы́сть раска́яніє вели́коє во Ізра́или: и отступи́ша от него́ и возврати́шася въ зе́млю свою́.
