Глава 14
1
Въ лѣ́то второ́є Іоа́са сы́на Іоаха́за царя́ Ізра́илева, и воцари́ся Амессі́а сы́нъ Іоа́совъ, ца́рь Іу́динъ:
2
сы́нъ два́десяти пяти́ лѣ́тъ бѣ́, внегда́ ца́рствовати єму́ и два́десять пя́ть лѣ́тъ ца́рствова во Ієрусали́мѣ. И́мя же ма́тере єго́ Іоаді́на от Ієрусали́ма.
3
И сотвори́ пра́воє предъ очи́ма Госпо́днима, оба́че не я́коже даві́дъ оте́цъ єго́: по всѣ́мъ, єли́ка сотвори́ оте́цъ єго́ Іоа́съ, сотвори́,
4
то́кмо высо́кихъ не разруши́: єще́ лю́діє жря́ху и кадя́ху на высо́кихъ.
5
И бы́сть єгда́ утверди́ся ца́рство въ руку єго́, и изби́ рабы́ своя́ уби́вшыя отца́ єго́:
6
сыно́въ же убі́йцъ тѣ́хъ не изби́, я́коже пи́сано въ кни́зѣ зако́на Моисе́ова, я́коже заповѣ́да Госпо́дь, глаго́ля: да не умира́ютъ отцы́ за сы́ны, и сы́нове да не умира́ютъ за отцы́, но то́кмо кі́йждо за своя́ грѣхи́ да у́мретъ.
7
Се́й порази́ Єдо́ма въ геме́лѣ де́сять ты́сящъ и взя́ ка́мень на бра́ни, и нарече́ и́мя єму́ Ієѳои́лъ до дне́шняго дне́.
8
Тогда́ посла́ Амессі́а послы́ ко Іоа́су сы́ну Іоаха́за сы́на іиу́а царя́ Ізра́илева, глаго́ля: пріиди́, да ви́димся въ лице́.
9
И посла́ Іоа́съ ца́рь Ізра́илевъ ко Амессі́и царю Іу́дину, глаго́ля: те́рнъ, и́же въ Ліва́нѣ, посла́ къ ке́дрови су́щему въ Ліва́нѣ, глаго́ля: да́ждь дще́рь твою́ сы́ну моєму́ въ жену́: и пріидо́ша звѣ́ріє лу́жніи, и́же въ Ліва́нѣ, и попра́ша те́рніє:
10
побива́я порази́лъ єси́ Ідуме́ю, и вознесе́ тя́ се́рдце твоє́, просла́вися сѣдя́ въ дому́ твоє́мъ, и почто́ любопри́шися въ зло́бѣ твоє́й? и паде́ши ты́, и Іу́да съ тобо́ю.
11
И не послу́ша Амессі́а. И взы́де Іоа́съ ца́рь Ізра́илевъ, и ви́дѣстася лице́мъ то́й и Амессі́а ца́рь Іу́динъ въ веѳсами́сѣ Іу́динѣ.
12
И паде́ Іу́да предъ лице́мъ Ізра́илевымъ, и побѣже́ кі́йждо въ до́мы своя́.
13
И Амессі́ю сы́на Іоа́сова, сы́на Охозі́и, царя́ Іу́дина, я́тъ Іоа́съ сы́нъ Іоаха́зовъ ца́рь Ізра́илевъ въ веѳсами́сѣ: и пріи́де во Ієрусали́мъ, и разби́ стѣ́ну Ієрусали́му от вра́тъ Єфре́млихъ до вра́тъ уго́лныхъ, на четы́реста лако́тъ:
14
и взя́ сребро́ и зла́то, и вся́ сосу́ды обрѣ́теныя въ дому́ Госпо́дни и въ сокро́вищахъ до́му царе́ва, и сы́ны смѣси́вшихся, и возврати́ся въ самарі́ю.
15
И про́чая слове́съ Іоа́совыхъ, єли́ка сотвори́ въ си́лѣ своє́й, я́коже бра́ся со Амессі́єю царе́мъ Іу́динымъ, не сія́ ли пи́сана въ кни́зѣ слове́съ дні́й царе́й Ізра́илевыхъ?
16
И у́спе Іоа́съ со отцы́ свои́ми и погребе́нъ бы́сть въ самарі́и съ цари́ Ізра́илевыми. И воцари́ся ієровоа́мъ сы́нъ єго́ вмѣ́сто єго́.
17
И поживе́ Амессі́а сы́нъ Іоа́совъ, ца́рь Іу́динъ, по уме́ртвіи Іоа́са сы́на Іоаха́за царя́ Ізра́илева пятьна́десять лѣ́тъ.
18
И про́чая слове́съ Амессі́євыхъ, и вся́ єли́ка сотвори́, не сія́ ли пи́сана въ кни́зѣ слове́съ дні́й царе́й Іу́диныхъ?
19
И воста́ша на него́ полки́ во Ієрусали́мѣ: и убѣже́ въ лахі́сы, и посла́ша вслѣ́дъ єго́ въ лахі́сы, и уби́ша єго́ ту́:
20
и взя́ша єго́ на ко́ни, и погребе́нъ бы́сть со отцы́ свои́ми во Ієрусали́мѣ во гра́дѣ даві́довѣ.
21
И поя́ша вси́ лю́діє Іу́дины азарі́ю, и то́й сы́нъ шести́надесяти лѣ́тъ, и поста́виша єго́ царе́мъ вмѣ́сто отца́ єго́ Амессі́и:
22
то́й созда́ Єло́ѳъ, и возврати́ єго́ Іу́дѣ по уме́ртвіи царя́ со отцы́ єго́.
23
Въ лѣ́то пятоєна́десять Амессі́и сы́на Іоа́са царя́ Іу́дина, ца́рствова ієровоа́мъ сы́нъ Іоа́совъ надъ Ізра́илемъ въ самарі́и четы́редесять и єди́но лѣ́то,
24
и сотвори́ лука́воє предъ Го́сподемъ: не отступи́ от всѣ́хъ грѣхо́въ ієровоа́ма сы́на нава́това, и́же въ грѣ́хъ введе́ Ізра́иля:
25
то́й приврати́ предѣ́лъ Ізра́илевъ от вхо́да Єма́ѳова да́же и до мо́ря Арави́тскаго, по глаго́лу Го́спода Бо́га Ізра́илева, єго́же глаго́ла руко́ю раба́ своєго́ Іо́ны, сы́на Амаѳі́ина, проро́ка, и́же от геѳахове́ра,
26
я́ко ви́дѣ Госпо́дь смире́ніє Ізра́илево го́рько зѣло́, и ма́ло содержи́мыхъ, и ума́ленныхъ, и оста́вленыхъ, и не бѣ́ помога́ющаго и́мъ.
27
И не глаго́ла Госпо́дь искорени́ти сѣ́мене Ізра́илева подъ небесе́мъ: и спасе́ я́ руко́ю ієровоа́ма сы́на Іоа́сова.
28
И про́чая слове́съ ієровоа́мовыхъ, и вся́ єли́ка сотвори́, и си́лы єго́, єли́ка повоєва́, и ка́ко возврати́ Дама́скъ и Єма́ѳъ Іу́дѣ во Ізра́или, не сія́ ли пи́сана въ кни́зѣ слове́съ дні́й царе́й Ізра́илевыхъ?
29
И у́спе ієровоа́мъ со отцы́ свои́ми, со цари́ Ізра́илевыми: и воцари́ся Заха́ріа сы́нъ єго́ вмѣ́сто єго́.
