Глава 13
1
Въ лѣ́то два́десять тре́тіє Іоа́са сы́на Охозі́ина царя́ Іу́дина ца́рствова Іоаха́зъ сы́нъ іиу́євъ надъ Ізра́илемъ въ самарі́и седмьна́десять лѣ́тъ,
2
и сотвори́ лука́воє предъ очи́ма Госпо́днима, и и́де вслѣ́дъ грѣхо́въ ієровоа́ма сы́на нава́това, и́же въ грѣ́хъ введе́ Ізра́иля и не оста́ся зло́бы тоя́.
3
И разгнѣ́вася Госпо́дь гнѣ́вомъ на Ізра́иля, и вдаде́ и́хъ въ ру́цѣ азаи́лу царю́ Си́рску и въ ру́цѣ сы́на Аде́ра, сы́на азаи́лева, во вся́ дни́.
4
И помоли́ся Іоаха́зъ лицу́ Госпо́дню, и услы́ша єго́ Госпо́дь, я́ко ви́дѣ ско́рбь Ізра́илеву, поне́же оскорби́ и́хъ ца́рь Си́рскій.
5
И даде́ Госпо́дь спасе́ніє Ізра́илю, и избы́ша от руку́ Си́рску: и всели́шася сы́нове Ізра́илевы въ селе́нія своя́ я́коже и вчера́ и тре́тіяго дне́:
6
оба́че не отступи́ша от грѣхо́въ до́му ієровоа́ма сы́на нава́това, и́же въ грѣ́хъ введе́ Ізра́иля, въ не́мъ ходя́ху: и дубра́ва стоя́ше въ самарі́и.
7
я́ко не оста́шася Іоаха́зу лю́діє, но то́кмо пятьдеся́тъ ко́нникъ, и де́сять колесни́цъ, и де́сять ты́сящъ пѣшце́въ, я́ко изгуби́лъ и́хъ ца́рь Си́рскій, и положи́ я́ я́ко пра́хъ на попра́ніє.
8
И про́чая слове́съ Іоаха́зовыхъ, и вся́ єли́ка сотвори́, и си́лы єго́, не сія́ ли пи́сана въ кни́зѣ слове́съ дні́й царе́й Ізра́илевыхъ?
9
И у́спе Іоаха́зъ со отцы́ свои́ми, и погребо́ша єго́ въ самарі́и: и воцари́ся Іоа́съ сы́нъ єго́ вмѣ́сто єго́.
10
Въ лѣ́то три́десять седмо́є Іоа́са царя́ Іу́дина ца́рствова Іоа́съ сы́нъ Іоаха́зовъ надъ Ізра́илемъ въ самарі́и шестьна́десять лѣ́тъ,
11
и сотвори́ лука́воє предъ очи́ма Госпо́днима: не отступи́ от всѣ́хъ грѣхо́въ ієровоа́ма сы́на нава́това, и́же въ грѣ́хъ введе́ Ізра́иля, въ то́мъ хожда́ше.
12
И про́чая слове́съ Іоа́совыхъ и вся́ єли́ка сотвори́, и си́лы єго́, я́же сотвори́ со Амессі́ємъ царе́мъ Іу́динымъ, не сія́ ли пи́сана въ кни́зѣ слове́съ дні́й царе́й Ізра́илевыхъ?
13
И у́спе Іоа́съ со отцы́ свои́ми, ієровоа́мъ же сѣ́де на престо́лѣ єго́: и погребе́нъ бы́сть Іоа́съ въ самарі́и съ царми́ Ізра́илевыми.
14
И Єліссе́й разболѣ́ся болѣ́знію своє́ю, от нея́же у́мре. И пріи́де къ нему́ Іоа́съ ца́рь Ізра́илевъ, и пла́кася надъ лице́мъ єго́, и рече́: о́тче, о́тче, колесни́ца Ізра́илева и ко́ни єго́.
15
И рече́ єму́ Єліссе́й возми́ лу́къ и стрѣ́лы. И взя́ къ себѣ́ лу́къ и стрѣ́лы.
16
И рече́ царю́: возложи́ ру́ку свою́ на лу́къ. И возложи́ Іоа́съ ру́ку свою́ на лу́къ, и Єліссе́й возложи́ ру́ки своя́ на ру́ки царе́вы,
17
и рече́: отве́рзи окно́ є́же на восто́къ. И отве́рзе. И рече́ Єліссе́й: стрѣли́. И стрѣли́ [ца́рь]. И рече́ Єліссе́й: стрѣла́ спасе́нія Госпо́дня и стрѣла́ спасе́нія на сирі́ю, и побѣди́ши сирі́ю во Афе́кѣ да́же до сконча́нія.
18
И рече́ єму́ Єліссе́й: возми́ лу́къ. И взя́. И рече́ царю́ Ізра́илеву: уда́ри на зе́млю. И уда́ри ца́рь три́жды, и ста́.
19
И оскорбѣ́ человѣ́къ Бо́жій о не́мъ и рече́: а́ще бы уда́рилъ єси́ пяти́щи или́ шести́щи, тогда́ бы єси́ порази́лъ сирі́ю до сконча́нія, ны́нѣ же побѣди́ши сирі́ю три́жды.
20
И у́мре Єліссе́й, и погребо́ша єго́. Во́ини же Моа́вли пріидо́ша въ зе́млю настава́ющу лѣ́ту тому́.
21
И бы́сть и́мъ погреба́ющимъ му́жа, и се́, ви́дѣша во́иновъ, и поверго́ша му́жа во гро́бѣ Єліссе́овѣ: [и впаде́ тѣ́ло человѣ́ка ме́ртва,] и прикосну́ся косте́мъ Єліссе́овымъ, и оживе́ и воста́ на но́ги своя́.
22
Азаи́лъ же оскорбля́ше Ізра́иля во вся́ дни́ Іоаха́зовы.
23
И поми́лова я́ Госпо́дь, и уще́дри я́, и призрѣ́ на ня́ завѣ́та ра́ди своєго́, и́же со Авраа́момъ и Ісаа́комъ и Іа́ковомъ, и не восхотѣ́ Госпо́дь потреби́ти и́хъ, ниже́ отве́рже и́хъ от лица́ своєго́.
24
И у́мре азаи́лъ ца́рь Си́рскій, и воцари́ся Аде́ръ сы́нъ єго́ вмѣ́сто єго́.
25
И возврати́ся Іоа́съ сы́нъ Іоаха́зовъ, и взя́ гра́ды от руки́ Аде́ра сы́на азаи́лева, и́хже взя́ от руку́ Іоаха́за отца́ єго́ въ бра́ни: три́жды побѣди́ єго́ Іоа́съ, и возврати́ гра́ды Ізра́илевы.
