Глава 22
1
Сы́нъ осми́ лѣ́тъ бѣ́ Іосі́а, єгда́ нача́ ца́рствовати, и три́десять єди́но лѣ́то ца́рствова во Ієрусали́мѣ. И́мя же ма́тери єго́ Ієдіда́, дщи́ єде́єва, от Васуро́ѳа.
2
И сотвори́ пра́воє предъ очи́ма Госпо́днима, и хожда́ше во всѣ́хъ путе́хъ даві́да отца́ своєго́, не соврати́ся ни на де́сно, ни на шу́єє.
3
И бы́сть во осмоєна́десять лѣ́то ца́рства Іосі́ина, въ седмы́й ме́сяцъ, посла́ ца́рь Сафа́на, сы́на єзелі́ина, сы́на Месолла́мля, книго́чію до́му Госпо́дня, глаго́ля:
4
взы́ди къ хелкі́и жерцу́ вели́кому и запечатлѣ́й сребро́ внесе́ноє въ до́мъ Госпо́день, є́же собра́ша стрегу́щіи вра́тъ от люді́й,
5
и да даду́тъ є́ въ ру́ки творя́щихъ дѣла́ приста́вникомъ въ хра́мѣ Госпо́дни: да дадя́тъ є́ творя́щымъ дѣла́ въ дому́ Госпо́дни, є́же подкрѣпля́ти разсѣ́лины хра́ма,
6
древодѣ́лемъ и каменосѣ́чцемъ и покупа́ющымъ древа́ и ка́меніє те́саноє на утвержде́ніє разсѣ́линъ хра́ма.
7
Оба́че не сочисля́ху и́хъ о сребре́ дає́мѣмъ и́мъ, я́ко вѣ́рно ті́и творя́ху.
8
И рече́ хелкі́а жре́цъ вели́кій ко Сафа́ну книго́чію: кни́гу зако́на [Бо́жія] обрѣто́хъ въ дому́ Госпо́дни. И даде́ хелкі́а кни́гу Сафа́ну, и прочте́ ю́.
9
И вни́де въ до́мъ Госпо́день ко царю́ Іосі́и, и возвѣсти́ царю́ сло́во и рече́: слія́ша раби́ твои́ сребро́ обрѣ́тшеєся въ дому́ Госпо́дни, и да́ша є́ приста́вницы въ ру́ки творя́щымъ дѣла́ въ хра́мѣ Госпо́дни.
10
И рече́ Сафа́нъ книго́чія къ царю́, глаго́ля кни́гу зако́на даде́ ми́ хелкі́а жре́цъ. И прочте́ ю́ Сафа́нъ предъ царе́мъ.
11
И бы́сть я́ко услы́ша ца́рь словеса́ кни́ги зако́нныя, и раздра́ ри́зы своя́,
12
и заповѣ́да ца́рь хелкі́и жрецу́ и Ахіка́му сы́ну Сафа́ню, и Ахово́ру сы́ну Міхе́ину и Сафа́ну книго́чію и Асаі́ю рабу́ царе́ву, глаго́ля:
13
пріиди́те, испроси́те Го́спода о мнѣ́ и о всѣ́хъ лю́дехъ и о все́мъ Іу́дѣ, и о словесѣ́хъ кни́ги обрѣ́тшіяся сея́, я́ко вели́къ гнѣ́въ Госпо́день разжже́ный на на́съ, поне́же не послу́шаша отцы́ на́ши слове́съ кни́ги сея́, є́же твори́ти по всѣ́мъ напи́саннымъ на ны́.
14
И и́де хелкі́а жре́цъ и Ахіка́мъ, и Ахово́ръ и Сафа́нъ и Асаі́асъ ко о́лда́мѣ проро́чицѣ, женѣ́ сели́ма сы́на Ѳеку́єва, сы́на Ара́са ризохрани́теля: и сія́ живя́ше во Ієрусали́мѣ въ Масе́нѣ: и глаго́лаша къ не́й по сему́.
15
И рече́ и́мъ: си́це глаго́летъ Госпо́дь Бо́гъ Ізра́илевъ: рцы́те му́жеви посла́вшему вы́ ко мнѣ́:
16
та́ко глаго́летъ Госпо́дь: се́, а́зъ наведу́ зла́я на мѣ́сто сіє́ и на живу́щыя въ не́мъ, вся́ словеса́ кни́жная, я́же прочте́ ца́рь Іу́динъ:
17
поне́же оста́виша мя́ и кадя́ху бого́мъ други́мъ, я́ко да прогнѣ́ваютъ мя́ дѣлесы́ ру́къ свои́хъ, и разжже́тся я́рость моя́ на мѣ́сто сіє́ и не уга́снетъ:
18
и ко царю́ Іу́дину посла́вшему ва́съ вопроси́ти Го́спода, си́це рцы́те єму́: та́ко глаго́летъ Госпо́дь Бо́гъ Ізра́илевъ: словеса́, я́же слы́шалъ єси́,
19
за сія́, я́ко умягчи́ся се́рдце твоє́ и смири́лся єси́ предъ лице́мъ Госпо́днимъ, услы́шавъ єли́ка глаго́лахъ на мѣ́сто сіє́ и на живу́щыя въ не́мъ, є́же бы́ти въ погубле́ніє и въ прокля́тіє, и раздра́лъ єси́ ри́зы твоя́, и пла́кался предо мно́ю, и а́зъ у́бо услы́шахъ, глаго́летъ Госпо́дь:
20
сего́ ра́ди а́зъ приложу́ тя́ ко отце́мъ твои́мъ, и собере́шися во гро́бъ тво́й въ ми́рѣ, и не у́зриши очи́ма твои́ма всѣ́хъ злы́хъ, я́же а́зъ и́мамъ навести́ на мѣ́сто сіє́ и на живу́щыя въ не́мъ.
