Благодарю́ Тя, Го́споди Бо́же мой, я́ко не отри́нул м'я єси́ грі́шнаго, но о́бщника м'я би́ти святи́нь Твої́х сподо́бил єси́. Благодарю́ Тя, я́ко мене́ недосто́йнаго причасти́тися Пречи́стих Твої́х і Небе́сних Даро́в сподо́бил єси́. Но, Влади́ко Человіколю́бче, нас ра́ди уме́рий же і воскреси́й і дарова́вий нам Стра́шная сія́ і Животворя́щая Та́їнства во благодія́ніє і освяще́ніє душ і тіле́с на́ших, даждь би́ти сим і мні во ісціле́ніє душі́ же і ті́ла, во отгна́ніє вся́каго сопроти́внаго, в просвіще́ніє о́чію се́рдця моєго́, в мир душе́вних мої́х сил, в ві́ру непости́дну, в любо́в нелицемі́рну, во ісполне́ніє прему́дрости, в соблюде́ніє за́повідей Твої́х, в приложе́ніє Боже́ственния Твоєя́ благода́ті і Твоєго́ Ца́рствія присвоє́ніє; да во святи́ні Твоє́й ті́ми сохраня́єм, Твою́ благода́ть помина́ю всегда́, і не ктому́ себі́ живу́, но Тебі́, на́шему Влади́ці і Благоді́телю. І та́ко, сего́ житія́ ізше́д о наде́жді живота́ ві́чнаго, в присносу́щний дости́гну поко́й, іді́же пра́зднующих глас непреста́нний і безконе́чная сла́дость зря́щих Твоєго́ лиця́ добро́ту неізрече́нную. Ти бо єси́ і́стинноє жела́ніє і неізрече́нноє весе́ліє лю́б’ящих Тя, Христе́ Бо́же наш, і Тя поє́ть вся твар во ві́ки. Амі́нь.

Влади́ко Христе́ Бо́же, Царю́ віко́в і Соді́телю всіх, благодарю́ Тя о всіх, я́же мі єси́ по́дал благи́х, і о причаще́нії Пречи́стих і Животворя́щих Твої́х Та́їнств. Молю́ у́бо Тя, Бла́же і Человіколю́бче, сохрани́ м'я под кро́вом Твої́м і в сі́ні крилу́ Твоє́ю; і да́руй мі чи́стою со́вістію да́же до послі́дняго моєго́ іздиха́нія досто́йно причаща́тися святи́нь Твої́х во оставле́ніє гріхо́в і в жизнь ві́чную. Ти бо єси́ Хліб Живо́тний, Істо́чник святи́ні, Пода́тель благи́х, і Тебі́ сла́ву возсила́єм со Отце́м і Святи́м Ду́хом, ни́ні, і при́сно, і во ві́ки віко́в. Амі́нь.

Да́вий пи́щу мні плоть Твою́ во́лею, огнь сий і опаля́яй недосто́йния, да не опали́ши мене́, Соді́телю мой; па́че же пройди́ во у́ди моя́, во вся соста́ви, во утро́бу, в се́рдце. Попали́ те́рніє всіх мої́х прегріше́ній. Ду́шу очи́сти, освяти́ помишле́нія. Соста́ви утверди́ с костьми́ вку́пі. Чувств просвіти́ просту́ю п’ятери́цю. Всего́ м'я спригвозди́ стра́ху Твоєму́. При́сно покри́й, соблюди́ же і сохрани́ м'я от вся́каго ді́ла і сло́ва душетлі́ннаго. Очи́сти, і оми́й, і украси́ м'я, удобри́, вразуми́ і просвіти́ м'я. Покажи́ м'я Твоє́ селе́ніє єди́наго Ду́ха, і не ктому́ селе́ніє гріха́. Да я́ко Твоєго́ до́му вхо́дом причаще́нія, я́ко огня́ мене́ біжи́ть всяк злоді́й, вся́ка страсть. Моли́твенники Тебі́ приношу́ вся святи́я, чинонача́лія же безпло́тних, Предте́чу Твоєго́, прему́дрия Апо́столи, к сим же Твою́ нескве́рную чи́стую Ма́тер, ї́хже мольби́, Благоутро́бне, прийми́, Христе́ мой, і си́ном сві́та соді́лай Твоєго́ служи́теля. Ти бо єси́ освяще́ніє і Єди́ний на́ших, Бла́же, душ і сві́тлость; і Тебі́ ліпоподо́бно, я́ко Бо́гу і Влади́ці, сла́ву всі возсила́єм на всяк день.

Ті́ло Твоє́ Свято́є, Го́споди Ісу́се Христе́, Бо́же наш, да бу́деть мі в живо́т ві́чний, і Кров Твоя́ Честна́я во оставле́ніє гріхо́в; бу́ди же мі благодаре́ніє сіє́ в ра́дость, здра́віє і весе́ліє; в стра́шноє же і второ́є прише́ствіє Твоє́ сподо́би м'я, грі́шнаго, ста́ти одесну́ю сла́ви Твоєя́, моли́твами Пречи́стия Твоєя́ Ма́тере і всіх святи́х.

Пресвята́я Влади́чице Богоро́дице, сві́те помраче́нния моєя́ душі́, наде́ждо, покро́ве, прибі́жище, утіше́ніє, ра́дованіє моє́, благодарю́ Тя, я́ко сподо́била м'я єси́ недосто́йнаго прича́стника би́ти Пречи́стаго Ті́ла і Честни́я Кро́ве Си́на Твоєго́. Но Ро́ждшая і́стинний Світ, просвіти́ моя́ у́мния о́чі се́рдця; Я́же істо́чник безсме́ртія ро́ждшая, оживотвори́ м'я умерщвле́ннаго гріхо́м; Я́же ми́лостиваго Бо́га любоблагоутро́бная Ма́ти, поми́луй м'я і даждь мі умиле́ніє, і сокруше́ніє в се́рдці моє́м, і смире́ніє в ми́слех мої́х, і воззва́ніє в пліне́ніїх помишле́ній мої́х; і сподо́би м'я до послі́дняго іздиха́нія неосужде́нно прийма́ти Пречи́стих Та́їн освяще́ніє во ісціле́ніє душі́ же і ті́ла, і пода́ждь мі сле́зи покая́нія і іспові́данія, во є́же пі́ти і сла́вити Тя во вся дні живота́ моєго́, я́ко благослове́нна і препросла́влена єси́ во ві́ки. Амі́нь.

Ни́ні отпуща́єши раба́ Твоєго́, Влади́ко, по глаго́лу Твоєму́, с ми́ром, я́ко ви́діста о́чі мої́ спасе́ніє Твоє́, є́же єси́ угото́вал пред лице́м всіх люде́й, світ во открове́ніє язи́ков і сла́ву люде́й Твої́х, Ізра́їля.

Святи́й Бо́же, Святи́й Крі́пкий, Святи́й Безсме́ртний, поми́луй нас. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Пресвята́я Тро́йце, поми́луй нас: Го́споди, очи́сти гріхи́ на́ша; Влади́ко, прости́ беззако́нія на́ша; Святи́й, посіти́ і ісціли́ не́мощі на́ша і́мене Твоєго́ ра́ди.

Го́споди, поми́луй. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

О́тче наш, І́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́ і на землі́. Хліб наш насу́щний даждь нам днесь; і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.

Уст Твої́х я́коже сві́тлость огня́ возсія́вши благода́ть, вселе́нную просвіти́; не сребролю́бія ми́рові сокро́вища сниска́, висоту́ нам смиреному́дрія показа́. Но Твої́ми словеси́ наказу́я, о́тче Іоа́нне Златоу́сте, моли́ Сло́ва, Христа́ Бо́га, спасти́ся душа́м на́шим.

Сла́ва Отцю́, і Си́ну, і Свято́му Ду́ху.

От Небе́с прия́л єси́ Боже́ственную благода́ть і твої́ма устна́ма вся учи́ши покланя́тися в Тро́йці Єди́ному Бо́гу, Іоа́нне Златоу́сте всеблаже́нне, преподо́бне, досто́йно хва́лим тя: єси́ бо наста́вник, я́ко Боже́ственная явля́я.

І ни́ні, і при́сно, і во ві́ки віко́в. Амі́нь.

Предста́тельство христия́н непости́дноє, хода́тайство ко Творцю́ непрело́жноє, не пре́зри грі́шних моле́ній гла́си, но предвари́, я́ко Блага́я, на по́мощ нас, ві́рно зову́щих Ті: ускори́ на моли́тву і потщи́ся на умоле́ніє, предста́тельствующи при́сно, Богоро́дице, чту́щих Тя.

Го́споди, поми́луй. [12 разів]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Честні́йшую херуви́м і сла́внійшую без сравне́нія серафи́м, без істлі́нія Бо́га Сло́ва ро́ждшую, су́щую Богоро́дицю Тя велича́єм.

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Го́споди, поми́луй. [Тричі]

Го́споди Ісу́се Христе́, Си́не Бо́жий, моли́тв ра́ди Пречи́стия Твоєя́ Ма́тере, преподо́бних і богоно́сних оте́ць на́ших і всіх святи́х поми́луй нас. Амі́нь.

Во всю зе́млю ізи́де віща́ніє твоє́, я́ко приє́мшую сло́во твоє́, і́мже боголі́пно научи́л єси́, єстество́ су́щих уясни́л єси́, челові́чеськія оби́чаї украси́л єси́. Ца́рськоє свяще́ніє, о́тче преподо́бне, моли́ Христа́ Бо́га спасти́ся душа́м на́шим.

Сла́ва Отцю́, і Си́ну, і Свято́му Ду́ху.

Яви́лся єси́ основа́ніє непоколеби́моє Це́ркве, подая́ всім некра́домоє госпо́дство челові́ком, запечатлі́я твої́ми велі́ньми, небоявле́нне Васи́ліє преподо́бне.

І ни́ні, і при́сно, і во ві́ки віко́в. Амі́нь.

Предста́тельство христия́н непости́дноє, хода́тайство ко Творцю́ непрело́жноє, не пре́зри грі́шних моле́ній гла́си, но предвари́, я́ко Блага́я, на по́мощ нас, ві́рно зову́щих Ті: ускори́ на моли́тву і потщи́ся на умоле́ніє, предста́тельствующи при́сно, Богоро́дице, чту́щих Тя.

І́же от Бо́га сви́ше Боже́ственную благода́ть восприє́м, сла́вне Григо́ріє, і того́ си́лою укріпля́єм, Єва́нгельськи ше́ствовати ізво́лил єси́. Отону́дуже^* у Христа́ возме́здіє трудо́в прия́л єси́, всеблаже́нне; Єго́же моли́, да спасе́ть ду́ші на́ша.

Сла́ва Отцю́, і Си́ну, і Свято́му Ду́ху.

Подобонача́льник показа́лся єси́ Нача́льника па́стирем Христа́, і́ноков чреди́, о́тче Григо́ріє, ко огра́ді небе́сній наставля́я і отту́ду научи́л єси́ ста́до Христо́во за́повідем Єго́; ни́ні же с ни́ми ра́дуєшися і лику́єши в небе́сних кро́віх.

І ни́ні, і при́сно, і во ві́ки віко́в. Амі́нь.

Предста́тельство христия́н непости́дноє, хода́тайство ко Творцю́ непрело́жноє, не пре́зри грі́шних моле́ній гла́си, но предвари́, я́ко Блага́я, на по́мощ нас, ві́рно зову́щих Ті: ускори́ на моли́тву і потщи́ся на умоле́ніє, предста́тельствующи при́сно, Богоро́дице, чту́щих Тя.