|
Глава 18
|
Глава́ и҃і
|
|
1
|
1
|
|
И бы́сть сло́во Госпо́дне ко мнѣ́ глаго́ля:
|
И҆ бы́сть сло́во гдⷭ҇не ко мнѣ̀ гл҃ѧ:
|
|
2
|
2
|
|
сы́не человѣ́чь, что́ ва́мъ при́тча сія́ на земли́ Ізра́илевѣ, глаго́лющымъ: отцы́ ядо́ша те́рпкоє, а зубо́мъ ча́дъ и́хъ оско́мины бы́ша?
|
сы́не человѣ́чь, что̀ ва́мъ при́тча сїѧ̀ на землѝ і҆и҃левѣ, глаго́лющымъ: ѻ҆тцы̀ ꙗ҆до́ша те́рпкое, а҆ зꙋбѡ́мъ ча̑дъ и҆́хъ ѻ҆скѡ́мины бы́ша;
|
|
3
|
3
|
|
Живу́ а́зъ, глаго́летъ Адонаі́ Госпо́дь, а́ще бу́детъ єще́ глаго́лема при́тча сія́ во Ізра́или.
|
Живꙋ̀ а҆́зъ, гл҃етъ а҆дѡнаі̀ гдⷭ҇ь, а҆́ще бꙋ́детъ є҆щѐ глаго́лема при́тча сїѧ̀ во і҆и҃ли.
|
|
4
|
4
|
|
Я́ко вся́ ду́шы моя́ су́ть, я́коже душа́ о́тча, та́ко и душа́ сыно́вня, моя́ су́ть: душа́, я́же согрѣши́тъ, та́ у́мретъ, и зоба́вшаго па́родки зу́бы оско́минны бу́дутъ.
|
Ꙗ҆́кѡ всѧ̑ дꙋ́шы моѧ̑ сꙋ́ть, ꙗ҆́коже дꙋша̀ ѻ҆́тча, та́кѡ и҆ дꙋша̀ сыно́внѧ, моѧ̑ сꙋ́ть: дꙋша̀, ꙗ҆́же согрѣши́тъ, та̀ оу҆́мретъ, и҆ зоба́вшагѡ па́родки зꙋ́бы ѻ҆скѡ́минны бꙋ́дꙋтъ.
|
|
5
|
5
|
|
Человѣ́къ же, и́же є́сть пра́веденъ, творя́й су́дъ и пра́вду,
|
Человѣ́къ же, и҆́же є҆́сть првⷣнъ, творѧ́й сꙋ́дъ и҆ пра́вдꙋ,
|
|
6
|
6
|
|
на гора́хъ не снѣ́сть и оче́съ свои́хъ не воздви́гнетъ на кумі́ры до́му Ізра́илева, и жены́ бли́жняго своєго́ не оскверна́витъ и къ женѣ́ въ мѣ́сячныхъ су́щей не прибли́жится,
|
на гора́хъ не снѣ́сть и҆ ѻ҆че́съ свои́хъ не воздви́гнетъ на кꙋмі́ры до́мꙋ і҆и҃лева, и҆ жены̀ бли́жнѧгѡ своегѡ̀ не ѡ҆скверна́витъ и҆ къ женѣ̀ въ мѣ́сѧчныхъ сꙋ́щей не прибли́житсѧ,
|
|
7
|
7
|
|
и человѣ́ку не наси́льствуєтъ, зало́гъ должнику́ отда́стъ и хище́ніємъ не восхи́титъ, хлѣ́бъ сво́й а́лчному да́стъ и нага́го облече́тъ въ ри́зу,
|
и҆ человѣ́кꙋ не наси́льствꙋетъ, зало́гъ должникꙋ̀ ѿда́стъ и҆ хище́нїемъ не восхи́титъ, хлѣ́бъ сво́й а҆́лчномꙋ да́стъ и҆ нага́го ѡ҆блече́тъ въ ри́зꙋ,
|
|
8
|
8
|
|
и сребра́ своєго́ въ ли́хву не да́стъ и прибы́тка не во́зметъ, и от непра́вды отврати́тъ ру́ку свою́ и су́дъ сотвори́тъ между́ му́жемъ и бли́жнимъ свои́мъ,
|
и҆ сребра̀ своегѡ̀ въ ли́хвꙋ не да́стъ и҆ прибы́тка не во́зметъ, и҆ ѿ непра́вды ѿврати́тъ рꙋ́кꙋ свою̀ и҆ сꙋ́дъ сотвори́тъ междꙋ̀ мꙋ́жемъ и҆ бли́жнимъ свои́мъ,
|
|
9
|
9
|
|
и въ за́повѣдехъ мои́хъ ходи́лъ и оправда́нія моя́ снабдѣ́лъ, є́же твори́ти та́: пра́веденъ се́й є́сть, жи́знію жи́ти и́мать, глаго́летъ Адонаі́ Госпо́дь.
|
и҆ въ за́повѣдехъ мои́хъ ходи́лъ и҆ ѡ҆правда̑нїѧ моѧ̑ снабдѣ́лъ, є҆́же твори́ти та̑: првⷣнъ се́й є҆́сть, жи́знїю жи́ти и҆́мать, гл҃етъ а҆дѡнаі̀ гдⷭ҇ь.
|
|
10
|
10
|
|
И а́ще роди́тъ сы́на губи́теля, пролива́ющаго кро́вь и творя́ща грѣхи́,
|
И҆ а҆́ще роди́тъ сы́на гꙋби́телѧ, пролива́ющаго кро́вь и҆ творѧ́ща грѣхѝ,
|
|
11
|
11
|
|
въ пу́ть отца́ своєго́ пра́веднаго не ходи́лъ, но и на гора́хъ пожре́, и жену́ бли́жняго своєго́ оскверна́вилъ,
|
въ пꙋ́ть ѻ҆тца̀ своегѡ̀ првⷣнагѡ не ходи́лъ, но и҆ на гора́хъ пожрѐ, и҆ женꙋ̀ бли́жнѧгѡ своегѡ̀ ѡ҆скверна́вилъ,
|
|
12
|
12
|
|
и убо́гаго и ни́щаго преоби́дѣ, и хище́ніємъ восхи́тилъ и зало́га не отда́лъ, и къ кумі́ромъ положи́ о́чи свои́, беззако́нія сотвори́,
|
и҆ оу҆бо́гаго и҆ ни́щаго преѡби́дѣ, и҆ хище́нїемъ восхи́тилъ и҆ зало́га не ѿда́лъ, и҆ къ кꙋмі́рѡмъ положѝ ѻ҆́чи своѝ, беззакѡ́нїѧ сотворѝ,
|
|
13
|
13
|
|
съ ли́хвою даде́ и съ примноже́ніємъ прія́лъ, се́й жи́знію не поживе́тъ: вся́ сія́ беззако́нія сотвори́, сме́ртію у́мретъ, кро́вь єго́ на не́мъ бу́детъ.
|
съ ли́хвою дадѐ и҆ съ примноже́нїемъ прїѧ́лъ, се́й жи́знїю не поживе́тъ: всѧ̑ сїѧ̑ беззакѡ́нїѧ сотворѝ, сме́ртїю оу҆́мретъ, кро́вь є҆гѡ̀ на не́мъ бꙋ́детъ.
|
|
14
|
14
|
|
А́ще же роди́тъ сы́на, о́нъ же уви́дитъ вся́ грѣхи́ отца́ своєго́, я́же сотвори́лъ є́сть, и убои́тся и не сотвори́тъ по ни́мъ,
|
А҆́ще же роди́тъ сы́на, ѻ҆́нъ же оу҆ви́дитъ всѧ̑ грѣхѝ ѻ҆тца̀ своегѡ̀, ꙗ҆̀же сотвори́лъ є҆́сть, и҆ оу҆бои́тсѧ и҆ не сотвори́тъ по ни̑мъ,
|
|
15
|
15
|
|
на гора́хъ не снѣ́сть и оче́съ свои́хъ не положи́тъ къ кумі́ромъ до́му Ізра́илева, и жены́ по́друга своєго́ не оскверна́витъ
|
на гора́хъ не снѣ́сть и҆ ѻ҆че́съ свои́хъ не положи́тъ къ кꙋмі́рѡмъ до́мꙋ і҆и҃лева, и҆ жены̀ по́дрꙋга своегѡ̀ не ѡ҆скверна́витъ
|
|
16
|
16
|
|
и человѣ́ка не наси́льствуєтъ, и зало́га не удержи́тъ и хище́ніємъ не восхи́титъ, хлѣ́бъ сво́й а́лчному да́стъ и на́га одѣ́єтъ ри́зою,
|
и҆ человѣ́ка не наси́льствꙋетъ, и҆ зало́га не оу҆держи́тъ и҆ хище́нїемъ не восхи́титъ, хлѣ́бъ сво́й а҆́лчномꙋ да́стъ и҆ на́га ѡ҆дѣ́етъ ри́зою,
|
|
17
|
17
|
|
и от непра́вды отврати́тъ ру́ку свою́, ли́хвы и примноже́нія не во́зметъ, пра́вду сотвори́тъ и въ за́повѣдехъ мои́хъ ходи́ти бу́детъ: не сконча́єтся въ непра́вдахъ отца́ своєго́, [но] жи́знь поживе́тъ.
|
и҆ ѿ непра́вды ѿврати́тъ рꙋ́кꙋ свою̀, ли́хвы и҆ примноже́нїѧ не во́зметъ, пра́вдꙋ сотвори́тъ и҆ въ за́повѣдехъ мои́хъ ходи́ти бꙋ́детъ: не сконча́етсѧ въ непра́вдахъ ѻ҆тца̀ своегѡ̀, (но) жи́знь поживе́тъ.
|
|
18
|
18
|
|
Оте́цъ же єго́ а́ще ско́рбію оскорби́тъ и хище́ніємъ восхи́титъ, сопроти́вная сотвори́тъ посредѣ́ люді́й мои́хъ, и у́мретъ въ непра́вдахъ свои́хъ.
|
Ѻ҆те́цъ же є҆гѡ̀ а҆́ще ско́рбїю ѡ҆скорби́тъ и҆ хище́нїемъ восхи́титъ, сопроти̑внаѧ сотвори́тъ посредѣ̀ люді́й мои́хъ, и҆ оу҆́мретъ въ непра́вдахъ свои́хъ.
|
|
19
|
19
|
|
И рече́те: что́ я́ко не взя́ сы́нъ непра́вды отца́ своєго́? Поне́же сы́нъ пра́вду и ми́лость сотвори́, вся́ зако́ны моя́ соблюде́ и сотвори́ я́, жи́знію поживе́тъ.
|
И҆ рече́те: что̀ ꙗ҆́кѡ не взѧ̀ сы́нъ непра́вды ѻ҆тца̀ своегѡ̀; Поне́же сы́нъ пра́вдꙋ и҆ ми́лость сотворѝ, всѧ̑ зако́ны моѧ̑ соблюдѐ и҆ сотворѝ ѧ҆̀, жи́знїю поживе́тъ.
|
|
20
|
20
|
|
Душа́ же согрѣша́ющая, та́ у́мретъ: сы́нъ не во́зметъ непра́вды отца́ своєго́, и оте́цъ не во́зметъ непра́вды сы́на своєго́: пра́вда пра́веднаго на не́мъ бу́детъ, и беззако́ніє беззако́нника на не́мъ бу́детъ.
|
Дꙋша́ же согрѣша́ющаѧ, та̀ оу҆́мретъ: сы́нъ не во́зметъ непра́вды ѻ҆тца̀ своегѡ̀, и҆ ѻ҆те́цъ не во́зметъ непра́вды сы́на своегѡ̀: пра́вда првⷣнагѡ на не́мъ бꙋ́детъ, и҆ беззако́нїе беззако́нника на не́мъ бꙋ́детъ.
|
|
21
|
21
|
|
И беззако́нникъ а́ще обрати́тся от всѣ́хъ беззако́ній свои́хъ, я́же сотвори́лъ, и сохрани́тъ вся́ за́повѣди моя́ и сотвори́тъ су́дъ и пра́вду и ми́лость, жи́знію поживе́тъ и не у́мретъ:
|
И҆ беззако́нникъ а҆́ще ѡ҆брати́тсѧ ѿ всѣ́хъ беззако́нїй свои́хъ, ꙗ҆̀же сотвори́лъ, и҆ сохрани́тъ всѧ̑ за́пѡвѣди моѧ̑ и҆ сотвори́тъ сꙋ́дъ и҆ пра́вдꙋ и҆ ми́лость, жи́знїю поживе́тъ и҆ не оу҆́мретъ:
|
|
22
|
22
|
|
вся́ согрѣше́нія єго́, єли́ка сотвори́лъ, не помяну́тся єму́: но въ пра́вдѣ своє́й, ю́же сотвори́лъ, жи́въ бу́детъ.
|
всѧ̑ согрѣшє́нїѧ є҆гѡ̀, є҆ли̑ка сотвори́лъ, не помѧнꙋ́тсѧ є҆мꙋ̀: но въ пра́вдѣ свое́й, ю҆́же сотвори́лъ, жи́въ бꙋ́детъ.
|
|
23
|
23
|
|
Єда́ хотѣ́ніємъ восхощу́ сме́рти грѣ́шника, глаго́летъ Адонаі́ Госпо́дь, а не є́же обрати́тися єму́ от пути́ зла́ и жи́ву бы́ти єму́?
|
Є҆да̀ хотѣ́нїемъ восхощꙋ̀ сме́рти грѣ́шника, гл҃етъ а҆дѡнаі̀ гдⷭ҇ь, а҆ не є҆́же ѡ҆брати́тисѧ є҆мꙋ̀ ѿ пꙋтѝ ѕла̀ и҆ жи́вꙋ бы́ти є҆мꙋ̀;
|
|
24
|
24
|
|
И а́ще соврати́тся пра́ведникъ от пра́вды своєя́ и сотвори́тъ непра́вду по всѣ́мъ беззако́ніємъ, я́же сотвори́лъ беззако́нникъ, вся́ пра́вды єго́, я́же сотвори́лъ є́сть, не помяну́тся: въ преступле́ніи своє́мъ, и́мже преступи́, и во грѣсѣ́хъ свои́хъ, и́миже согрѣши́, въ ни́хъ у́мретъ.
|
И҆ а҆́ще соврати́тсѧ првⷣникъ ѿ пра́вды своеѧ̀ и҆ сотвори́тъ непра́вдꙋ по всѣ̑мъ беззако́нїємъ, ꙗ҆̀же сотвори́лъ беззако́нникъ, всѧ̑ пра̑вды є҆гѡ̀, ꙗ҆̀же сотвори́лъ є҆́сть, не помѧнꙋ́тсѧ: въ престꙋпле́нїи свое́мъ, и҆́мже престꙋпѝ, и҆ во грѣсѣ́хъ свои́хъ, и҆́миже согрѣшѝ, въ ни́хъ оу҆́мретъ.
|
|
25
|
25
|
|
И реко́сте: не упра́вится пу́ть Госпо́день. Слы́шите у́бо, ве́сь до́мъ Ізра́илевъ, єда́ пу́ть мо́й не упра́вится? ва́шъ ли пу́ть у́бо упра́вится?
|
И҆ реко́сте: не оу҆пра́витсѧ пꙋ́ть гдⷭ҇ень. Слы́шите оу҆̀бо, ве́сь до́мъ і҆и҃левъ, є҆да̀ пꙋ́ть мо́й не оу҆пра́витсѧ; ва́шъ ли пꙋ́ть оу҆̀бо оу҆пра́витсѧ;
|
|
26
|
26
|
|
Єгда́ соврати́тся пра́ведникъ от пра́вды своєя́ и сотвори́тъ грѣ́хъ, и у́мретъ въ преступле́ніи, є́же сотвори́лъ, въ то́мъ у́мретъ.
|
Є҆гда̀ соврати́тсѧ првⷣникъ ѿ пра́вды своеѧ̀ и҆ сотвори́тъ грѣ́хъ, и҆ оу҆́мретъ въ престꙋпле́нїи, є҆́же сотвори́лъ, въ то́мъ оу҆́мретъ.
|
|
27
|
27
|
|
И єгда́ обрати́тся беззако́нникъ от беззако́нія своєго́, є́же сотвори́лъ, и сотвори́тъ су́дъ и пра́вду, то́й ду́шу свою́ снабдѣ́лъ є́сть:
|
И҆ є҆гда̀ ѡ҆брати́тсѧ беззако́нникъ ѿ беззако́нїѧ своегѡ̀, є҆́же сотвори́лъ, и҆ сотвори́тъ сꙋ́дъ и҆ пра́вдꙋ, то́й дꙋ́шꙋ свою̀ снабдѣ́лъ є҆́сть:
|
|
28
|
28
|
|
и ви́дѣ и обрати́ся от всѣ́хъ беззако́ній свои́хъ, я́же сотвори́, жи́знію поживе́тъ и не у́мретъ.
|
и҆ ви́дѣ и҆ ѡ҆брати́сѧ ѿ всѣ́хъ беззако́нїй свои́хъ, ꙗ҆̀же сотворѝ, жи́знїю поживе́тъ и҆ не оу҆́мретъ.
|
|
29
|
29
|
|
И глаго́летъ до́мъ Ізра́илевъ: упра́вится пу́ть Госпо́день. Єда́ пу́ть мо́й не управля́єтся? о, до́ме Ізра́илевъ, у́бо ва́шъ ли пу́ть управля́єтся?
|
И҆ глаго́летъ до́мъ і҆и҃левъ: оу҆пра́витсѧ пꙋ́ть гдⷭ҇ень. Є҆да̀ пꙋ́ть мо́й не оу҆правлѧ́етсѧ; ѽ, до́ме і҆и҃левъ, оу҆̀бо ва́шъ ли пꙋ́ть оу҆правлѧ́етсѧ;
|
|
30
|
30
|
|
[Сего́ ра́ди] кому́ждо по пути́ єго́ сужду́ ва́мъ, до́ме Ізра́илевъ, глаго́летъ Адонаі́ Госпо́дь: обрати́теся и отве́ржитеся от всѣ́хъ нече́стій ва́шихъ, и не бу́дутъ ва́мъ непра́вды въ муче́ніє:
|
(Сегѡ̀ ра́ди) комꙋ́ждо по пꙋтѝ є҆гѡ̀ сꙋждꙋ̀ ва́мъ, до́ме і҆и҃левъ, гл҃етъ а҆дѡнаі̀ гдⷭ҇ь: ѡ҆брати́тесѧ и҆ ѿве́ржитесѧ ѿ всѣ́хъ нече́стїй ва́шихъ, и҆ не бꙋ́дꙋтъ ва́мъ непра̑вды въ мꙋче́нїе:
|
|
31
|
31
|
|
отве́ржите от себе́ вся́ нече́стія ва́ша, и́миже нече́ствовасте ко мнѣ́, и сотвори́те себѣ́ се́рдце но́во и ду́хъ но́въ, и сотвори́те вся́ за́повѣди моя́: и вску́ю умира́єте, до́ме Ізра́илевъ? глаго́летъ Госпо́дь.
|
ѿве́ржите ѿ себє̀ всѧ̑ нечє́стїѧ ва̑ша, и҆́миже нече́ствовасте ко мнѣ̀, и҆ сотвори́те себѣ̀ се́рдце но́во и҆ дꙋ́хъ но́въ, и҆ сотвори́те всѧ̑ за́пѡвѣди моѧ̑: и҆ вскꙋ́ю оу҆мира́ете, до́ме і҆и҃левъ; гл҃етъ гдⷭ҇ь.
|
|
32
|
32
|
|
Поне́же не хощу́ сме́рти грѣ́шника умира́ющаго, глаго́летъ Адонаі́ Госпо́дь, но є́же обрати́тися єму́ от пути́ своєго́ и жи́ти души́ єго́, глаго́летъ Адонаі́ Госпо́дь: обрати́теся у́бо, и жи́ви бу́дете.
|
Поне́же не хощꙋ̀ сме́рти грѣ́шника оу҆мира́ющагѡ, гл҃етъ а҆дѡнаі̀ гдⷭ҇ь, но є҆́же ѡ҆брати́тисѧ є҆мꙋ̀ ѿ пꙋтѝ своегѡ̀ и҆ жи́ти дꙋшѝ є҆гѡ̀, гл҃етъ а҆дѡнаі̀ гдⷭ҇ь: ѡ҆брати́тесѧ оу҆̀бо, и҆ жи́ви бꙋ́дете.
|
