Во і́м'я Отця́, і Си́на, і Свята́го Ду́ха. Амі́нь.

Го́споди Ісу́се Христе́, Си́не Бо́жий, моли́тв ра́ди Пречи́стия Твоєя́ Ма́тере і всіх святи́х поми́луй нас. Амі́нь.

Сла́ва Тебі́, Бо́же наш, сла́ва Тебі́.

Царю́ Небе́сний, Уті́шителю, Ду́ше і́стини, І́же везді́ сий і вся ісполня́яй, Сокро́вище благи́х і жи́зні Пода́телю, прийди́ і всели́ся в ни, і очи́сти ни от вся́кия скве́рни, і спаси́, Бла́же, ду́ші на́ша.

Святи́й Бо́же, Святи́й Крі́пкий, Святи́й Безсме́ртний, поми́луй нас. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Пресвята́я Тро́йце, поми́луй нас: Го́споди, очи́сти гріхи́ на́ша; Влади́ко, прости́ беззако́нія на́ша; Святи́й, посіти́ і ісціли́ не́мощі на́ша і́мене Твоєго́ ра́ди.

Го́споди, поми́луй. [Тричі]

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

О́тче наш, І́же єси́ на Небесі́х, да святи́ться і́м'я Твоє́, да при́йдеть Ца́рствіє Твоє́, да бу́деть во́ля Твоя́, я́ко на Небесі́ і на землі́. Хліб наш насу́щний даждь нам днесь; і оста́ви нам до́лги на́ша, я́коже і ми оставля́єм должнико́м на́шим; і не введи́ нас во іскуше́ніє, но ізба́ви нас от лука́ваго.

Поми́луй нас, Го́споди, поми́луй нас; вся́каго бо отві́та недоумі́юще, сію́ Ті моли́тву я́ко Влади́ці грі́шнії прино́сим: поми́луй нас.

Сла́ва Отцю́, і Си́ну, і Свято́му Ду́ху.

Го́споди, поми́луй нас, на Тя бо упова́хом; не прогні́вайся на ни зіло́, ніже́ пом'яни́ беззако́ній на́ших, но при́зри і ни́ні я́ко Благоутро́бен, і ізба́ви ни от враг на́ших; Ти бо єси́ Бог наш, і ми, лю́діє Твої́, всі діла́ руку́ Твоє́ю, і і́м'я Твоє́ призива́єм.

І ни́ні, і при́сно, і во ві́ки віко́в. Амі́нь.

Милос́ердія две́рі отве́рзи нам, благослове́нная Богоро́дице, наді́ющіїся на Тя да не поги́бнем, но да ізба́вимся Тобо́ю от бід. Ти бо єси́ спасе́ніє ро́да христия́нськаго.

Го́споди, поми́луй. [12 разів]

Бо́же ві́чний і Царю́ вся́каго созда́нія, сподо́бивий м'я да́же в час сей доспі́ти, прости́ мі гріхи́, я́же сотвори́х в сей день ді́лом, сло́вом і помишле́нієм, і очи́сти, Го́споди, смире́нную мою́ ду́шу от вся́кия скве́рни пло́ті і ду́ха. І даждь мі, Го́споди, в нощі́ сей сон прейти́ в ми́рі, да воста́в от смире́ннаго мі ло́жа, благоугожду́ пресвято́му і́мені Твоєму́ во вся дні живота́ моєго́ і поперу́ борю́щия м'я враги́ плотські́я і безпло́тния. І ізба́ви м'я, Го́споди, от помишле́ній су́єтних, оскверня́ющих м'я, і по́хотей лука́вих. Я́ко Твоє́ єсть Ца́рство, і си́ла, і сла́ва, Отця́, і Си́на, і Свята́го Ду́ха, ни́ні, і при́сно, і во ві́ки віко́в. Амі́нь.

Вседержи́телю, Сло́во О́тчеє, Сам соверше́н сий, Ісу́се Христе́, мно́гаго ра́ди милосе́рдія Твоєго́ нікогда́же отлуча́йся мене́, раба́ Твоєго́, но всегда́ во мні почива́й. Ісу́се, до́брий Па́стирю Твої́х ове́ць, не преда́ждь мене́ крамолі́ змії́ні і жела́нію сатанину́ не оста́ви мене́, я́ко сі́м'я тлі во мні єсть. Ти у́бо, Го́споди Бо́же покланя́ємий, Царю́ Святи́й, Ісу́се Христе́, сп'я́ща м'я сохрани́ немерца́ющим сві́том, Ду́хом Твої́м Святи́м, І́мже освяти́л єси́ Твоя́ ученики́. Даждь, Го́споди, і мні, недосто́йному рабу́ Твоєму́, спасе́ніє Твоє́ на ло́жі моє́м: просвіти́ ум мой сві́том ра́зума свята́го Єва́нгелія Твоєго́, ду́шу любо́вію Креста́ Твоєго́, се́рдце чистото́ю словесе́ Твоєго́, ті́ло моє́ Твоє́ю стра́стію безстра́стною, мисль мою́ Твої́м смире́нієм сохрани́ і воздви́гни м'я во вре́м'я подо́бно на Твоє́ славосло́віє. Я́ко препросла́влен єси́ со Безнача́льним Твої́м Отце́м і с Пресвяти́м Ду́хом во ві́ки. Амі́нь.

Го́споди, Царю́ Небе́сний, Уті́шителю, Ду́ше і́стини, умилосе́рдися і поми́луй м'я, грі́шнаго раба́ Твоєго́, і отпусти́ мі, недосто́йному, і прости́ вся, єли́ка Ті согріши́х днесь я́ко челові́к, па́че же і не я́ко челові́к, но і горі́є скота́: во́льния моя́ гріхи́ і нево́льния, ві́домия і неві́домия, я́же от ю́ности і от нау́ки зли, і я́же суть от на́гльства і уни́нія. А́ще і́менем Твої́м кля́хся, іли́ поху́лих є в помишле́нії моє́м; іли́ кого́ укори́х, іли́ оклевета́х кого́ гні́вом мої́м, іли́ опеча́лих; іли́ о чем прогні́вахся, іли́ солга́х, іли́ безго́дно спах; іли́ нищ при́йде ко мні, і презрі́х єго́; іли́ бра́та моєго́ опеча́лих, іли́ сва́дих^*, іли́ кого́ осуди́х; іли́ развелича́хся, іли́ разгорді́хся, іли́ разгні́вахся; іли́ стоя́щу мі на моли́тві, ум мой о лука́вствії ми́ра сего́ подви́жеся; іли́ развраще́ніє поми́слих, іли́ об'ядо́хся, іли́ опи́хся^*, іли́ без ума́ смія́хся; іли́ лука́воє поми́слих, іли́ добро́ту чужду́ю ви́дів, і то́ю уя́звлен бих се́рдцем; іли́ неподо́бная глаго́лах, іли́ гріху́ бра́та моєго́ посмія́хся, моя́ же суть безчи́сленная согріше́нія; іли́ о моли́тві неради́х, іли́ і́но что соді́ях лука́воє, не по́мню, та бо вся і бо́льша сих соді́ях. Поми́луй м'я, Тво́рче мой Влади́ко, уни́лаго і недосто́йнаго раба́ Твоєго́; і оста́ви мі, і отпусти́, і прости́ м'я, я́ко Благ і Человіколю́бець; да с ми́ром ля́гу, усну́ і почи́ю, блу́дний, грі́шний і окая́нний аз; і поклоню́ся, і воспою́, і просла́влю пречестно́є і́м'я Твоє́, со Отце́м, і Єдиноро́дним Єго́ Си́ном, ни́ні, і при́сно, і во ві́ки. Амі́нь.

Что Ті принесу́, іли́ что Ті возда́м, великодарови́тий Безсме́ртний Царю́, ще́дре і Человіколю́бче Го́споди, я́ко ліня́щася мене́ на Твоє́ угожде́ніє і нічто́же бла́го сотво́рша, приве́л єси́ на коне́ць мимоше́дшаго дне сего́, обраще́ніє і спасе́ніє душі́ моє́й стро́я? Ми́лостив мі бу́ди грі́шному і обнаже́нному вся́каго ді́ла бла́га, возста́ви па́дшую мою́ ду́шу, оскверни́вшуюся в безмі́рних согріше́ніїх, і отими́ от мене́ весь по́мисл лука́вий ви́димаго сего́ житія́. Прости́ моя́ согріше́нія, єди́не Безгрі́шне, я́же Ті согріши́х в сей день, ві́дінієм і неві́дінієм, сло́вом, і ді́лом, і помишле́нієм, і всі́ми мої́ми чу́встви. Ти Сам, покрива́я, сохрани́ м'я от вся́каго сопроти́внаго обстоя́нія Боже́ственною Твоє́ю вла́стію, і неізрече́нним человіколю́бієм, і си́лою. Очи́сти, Бо́же, очи́сти мно́жество гріхо́в мої́х. Благоволи́, Го́споди, ізба́вити м'я от сі́ті лука́ваго, і спаси́ стра́стную мою́ ду́шу, і осіни́ м'я сві́том лиця́ Твоєго́, єгда́ при́йдеши во сла́ві; і неосужде́нна ни́ні сном усну́ти сотвори́, і без мечта́нія^*; і несмуще́н по́мисл раба́ Твоєго́ соблюди́, і всю сатанину́ ді́тель отжени́ от мене́; і просвіти́ мі разу́мния о́чі серде́чния, да не усну́ в смерть. І посли́ мі А́нгела ми́рна, храни́теля і наста́вника душі́ і ті́лу моєму́, да ізба́вить м'я от враг мої́х; да воста́в со одра́ моєго́, принесу́ Ті благода́рственния мольби́. Єй, Го́споди, усли́ши м'я, грі́шнаго і убо́гаго раба́ Твоєго́, ізволе́нієм і со́вістію; да́руй мі воста́вшу словесе́м Твої́м поучи́тися і уни́ніє бісо́вськоє дале́че от мене́ отгна́но би́ти сотвори́ Твої́ми А́нгели; да благословлю́ і́м'я Твоє́ свято́є, і просла́влю, і сла́влю Пречи́стую Богоро́дицю Марі́ю, Ю́же дал єси́ нам, грі́шним, заступле́ніє, і прийми́ Сію́ моля́щуюся за ни; вім бо, я́ко подража́єть Твоє́ человіколю́біє і моля́щися не престає́ть. Тоя́^* заступле́нієм, і Честна́го Креста́ зна́менієм, і всіх святи́х Твої́х ра́ди, убо́гую ду́шу мою́ соблюди́, Ісу́се Христе́, Бо́же наш; я́ко Свят єси́ і препросла́влен во ві́ки. Амі́нь.

Го́споди Бо́же наш, є́же согріши́х во дні сем сло́вом, ді́лом і помишле́нієм, я́ко Благ і Человіколю́бець, прости́ мі. Ми́рен сон і безм'яте́жен да́руй мі, А́нгела Твоєго́ храни́теля посли́, покрива́юща і соблюда́юща м'я от вся́каго зла; я́ко Ти єси́ Храни́тель душа́м і тілесе́м на́шим, і Тебі́ сла́ву возсила́єм, Отцю́, і Си́ну, і Свято́му Ду́ху, ни́ні, і при́сно, і во ві́ки віко́в. Амі́нь.

Го́споди Бо́же наш, в Него́же ві́ровахом, і Єго́же і́м'я па́че вся́каго і́мене призива́єм, даждь нам, ко сну отходя́щим, осла́бу душі́ і ті́лу, і соблюди́ нас от вся́каго мечта́нія і те́мния сла́сти кромі́^*; уста́ви стремле́ніє страсте́й, угаси́ разжже́нія воста́нія тіле́снаго. Даждь нам цілому́дренні пожи́ти ді́ли і словеси́; да доброді́тельноє жи́тельство восприє́млюще, обітова́нних не отпаде́м благи́х Твої́х, я́ко благослове́н єси́ во ві́ки. Амі́нь.

[1] Го́споди, не лиши́ мене́ небе́сних Твої́х благ. [2] Го́споди, ізба́ви м'я ві́чних мук. [3] Го́споди, умо́м ли іли́ помишле́нієм, сло́вом іли́ ді́лом согріши́х, прости́ м'я. [4] Го́споди, ізба́ви м'я вся́каго неві́дінія, і забве́нія, і малоду́шія, і окамене́ннаго нечу́вствія. [5] Го́споди, ізба́ви м'я от вся́каго іскуше́нія. [6] Го́споди, просвіти́ моє́ се́рдце, є́же помрачи́ лука́воє похоті́ніє. [7] Го́споди, аз я́ко челові́к согріши́х, Ти же я́ко Бог щедр, поми́луй м'я, ви́дя не́мощ душі́ моєя́. [8] Го́споди, посли́ благода́ть Твою́ в по́мощ мні, да просла́влю і́м'я Твоє́ свято́є. [9] Го́споди Ісу́се Христе́, напиши́ м'я, раба́ Твоєго́, в кни́зі живо́тній і да́руй мі коне́ць благи́й. [10] Го́споди Бо́же мой, а́ще і нічто́же бла́го сотвори́х пред Тобо́ю, но даждь мі по благода́ті Твоє́й положи́ти нача́ло благо́є. [11] Го́споди, окропи́ в се́рдці моє́м ро́су благода́ті Твоєя́. [12] Го́споди небесе́ і землі́, пом'яни́ м'я, грі́шнаго раба́ Твоєго́, сту́днаго і нечи́стаго, во Ца́рствії Твоє́м. Амі́нь.

[1] Го́споди, в покая́нії прийми́ м'я. [2] Го́споди, не оста́ви мене́. [3] Го́споди, не введи́ мене́ в напа́сть. [4] Го́споди, даждь мі мисль бла́гу. [5] Го́споди, даждь мі сле́зи, і па́м'ять сме́ртную, і умиле́ніє. [6] Го́споди, даждь мі по́мисл іспові́данія гріхо́в мої́х. [7] Го́споди, даждь мі смире́ніє, цілому́дріє і послуша́ніє. [8] Го́споди, даждь мі терпі́ніє, великоду́шіє і кро́тость. [9] Го́споди, всели́ в м'я ко́рень благи́х, страх Твой в се́рдце моє́. [10] Го́споди, сподо́би м'я люби́ти Тя от всея́ душі́ моєя́ і помишле́нія, і твори́ти во всем во́лю Твою́. [11] Го́споди, покри́й м'я от челові́к ні́которих, і бісо́в, і страсте́й, і от вся́кия іни́я неподо́бния ве́щі. [12] Го́споди, ві́си, я́ко твори́ши, я́коже Ти во́лиши, да бу́деть во́ля Твоя́ і во мні, грі́шнім; я́ко благослове́н єси́ во ві́ки. Амі́нь.

Го́споди Ісу́се Христе́, Си́не Бо́жий, ра́ди Честні́йшия Ма́тере Твоєя́, і безпло́тних Твої́х А́нгел, Проро́ка же і Предте́чі і Крести́теля Твоєго́, богоглаго́ливих же Апо́стол, сві́тлих і добропобі́дних му́ченик, преподо́бних і богоно́сних оте́ць, і всіх святи́х моли́твами ізба́ви м'я настоя́щаго обстоя́нія бісо́вськаго. Єй, Го́споди мой і Тво́рче, не хотя́й сме́рти грі́шнаго, но я́коже обрати́тися і жи́ву би́ти єму́, даждь і мні обраще́ніє окая́нному і недосто́йному; ізми́ м'я от уст па́губнаго змі́я, зія́ющаго пожре́ти м'я і свести́ во ад жи́ва. Єй, Го́споди мой, утіше́ніє моє́, І́же мене́ ра́ди окая́ннаго в тлі́нную плоть оболки́йся, істо́ргни м'я от окая́нства і утіше́ніє пода́ждь душі́ моє́й окая́нній. Всади́ в се́рдце моє́ твори́ти Твоя́ повелі́нія, і оста́вити лука́вая дія́нія, і получи́ти блаже́нства Твоя́; на Тя бо, Го́споди, упова́х, спаси́ м'я.

К Тебі́, Пречи́стій Бо́жієй Ма́тері, аз окая́нний припа́дая молю́ся: ві́си, Цари́це, я́ко безпреста́ні согріша́ю і прогнівля́ю Си́на Твоєго́ і Бо́га моєго́. І мно́гажди а́ще ка́юся, лож пред Бо́гом обріта́юся^*, і ка́юся трепе́ща: не уже́ли Госпо́дь порази́ть м'я? І по часі́ па́ки та́яжде творю́. Ві́дущи сія́, Влади́чице моя́ Госпоже́ Богоро́дице, молю́, да поми́луєши, да укріпи́ши і блага́я твори́ти да пода́си мі. Ві́си бо, Влади́чице моя́ Богоро́дице, я́ко отню́д і́мам в нена́висті зла́я моя́ діла́ і все́ю ми́слію люблю́ зако́н Бо́га моєго́; но не вім, Госпоже́ Пречи́стая, отку́ду я́же ненави́жду, та і люблю́, а блага́я преступа́ю. Не попуща́й, Пречи́стая, во́лі моє́й соверша́тися, не уго́дна бо єсть, но да бу́деть во́ля Си́на Твоєго́ і Бо́га моєго́, да м'я спасе́ть, і вразуми́ть, і пода́сть благода́ть Свята́го Ду́ха, да бих аз отсе́лі преста́л скверноді́йства і про́чеє пожи́л бих в повелі́нії Си́на Твоєго́, Єму́же подоба́єть вся́кая сла́ва, честь і держа́ва, со Безнача́льним Єго́ Отце́м, і Пресвяти́м, і Благи́м, і Животворя́щим Єго́ Ду́хом, ни́ні, і при́сно, і во ві́ки віко́в. Амі́нь.

Блага́го Царя́ Блага́я Ма́ти, Пречи́стая і Благослове́нная Богоро́дице Марі́є, ми́лость Си́на Твоєго́ і Бо́га на́шего ізли́й^* на стра́стную мою́ ду́шу і Твої́ми моли́твами наста́ви м'я на дія́нія блага́я; да про́чеє вре́м'я живота́ моєго́ без поро́ка прейду́ і Тобо́ю рай да обря́щу, Богоро́дице Ді́во, єди́на Чи́стая і Благослове́нная.

А́нгеле Христо́в, храни́телю мой святи́й і покрови́телю душі́ і ті́ла моєго́, вся мі прости́, єли́ка согріши́х во дне́шній день, і от вся́каго лука́вствія проти́внаго мі врага́ ізба́ви м'я, да ні в ко́ємже грісі́ прогні́ваю Бо́га моєго́; но моли́ за м'я, грі́шнаго і недосто́йнаго раба́, я́ко да досто́йна м'я пока́жеши бла́гості і ми́лості Всесвяти́я Тро́йці, і Ма́тере Го́спода моєго́ Ісу́са Христа́, і всіх святи́х. Амі́нь.

Взбра́нной^* Воєво́ді побіди́тельная, я́ко ізба́вльшеся от злих, благода́рственная воспису́єм Ті, раби́ Твої́, Богоро́дице; но я́ко іму́щая держа́ву непобіди́мую, от вся́ких нас бід свободи́, да зове́м Ті: Ра́дуйся, Неві́сто Неневі́стная.

Пресла́вная Присноді́во, Ма́ти Христа́ Бо́га, принеси́ на́шу моли́тву Си́ну Твоєму́ і Бо́гу на́шему, да спасе́ть Тобо́ю ду́ші на́ша.

Все упова́ніє моє́ на Тя возлага́ю, Ма́ти Бо́жия, сохрани́ м'я под кро́вом Твої́м.

Богоро́дице Ді́во, не пре́зри мене́, грі́шнаго, тре́бующа Твоєя́ по́мощі і Твоєго́ заступле́нія; на Тя бо упова́ душа́ моя́, і поми́луй м'я.

Упова́ніє моє́ Оте́ць, прибі́жище моє́ Син, покро́в мой Дух Святи́й: Тро́йце Свята́я, сла́ва Тебі́.

Досто́йно єсть я́ко воі́стину блажи́ти Тя, Богоро́дицю, Присноблаже́нную і Пренепоро́чную і Ма́тер Бо́га на́шего. Честні́йшую Херуви́м і сла́внійшую без сравне́нія Серафи́м, без істлі́нія Бо́га Сло́ва ро́ждшую, су́щую Богоро́дицю Тя велича́єм.

Сла́ва Отцю́, і Си́ну, і Свято́му Ду́ху, і ни́ні, і при́сно, і во ві́ки віко́в. Амі́нь.

Го́споди, поми́луй. [Тричі]

Го́споди Ісу́се Христе́, Си́не Бо́жий, моли́тв ра́ди Пречи́стия Твоєя́ Ма́тере, преподо́бних і богоно́сних оте́ць на́ших і всіх святи́х поми́луй нас. Амі́нь.

Вказуючи на постіль свою, промовляй:

Влади́ко Человіколю́бче, не уже́ли мні одр сей гроб бу́деть іли́ єще́ окая́нную мою́ ду́шу просвіти́ши днем? Се мі гроб предлежи́ть, се мі смерть предстої́ть. Суда́ Твоєго́, Го́споди, бою́ся, і му́ки безконе́чния, зло́є же творя́ не престаю́; Тебе́, Го́спода Бо́га моєго́, всегда́ прогнівля́ю, і Пречи́стую Твою́ Ма́тер, і вся небе́сния си́ли, і свята́го А́нгела храни́теля моєго́. Вім у́бо, Го́споди, я́ко недосто́їн єсьм человіколю́бія Твоєго́, но досто́їн єсьм вся́каго осужде́нія і му́ки. Но, Го́споди, іли́ хощу́, іли́ не хощу́, спаси́ м'я. А́ще бо пра́ведника спасе́ши, нічто́же ве́ліє, і а́ще чи́стаго поми́луєши, нічто́же ди́вно: досто́йнії бо суть ми́лости Твоєя́. Но на мні, грі́шнім, удиви́ ми́лость Твою́, о сем яви́ человіколю́біє Твоє́, да не одолі́єть моя́ зло́ба Твоє́й неізглаго́ланній бла́гості і милос́ердію, і я́коже хо́щеши, устро́й о мні вещ.

Просвіти́ о́чі мої́, Христе́ Бо́же, да не когда́ усну́ в смерть, да не когда́ рече́ть враг мой: укріпи́хся на него́.

Сла́ва Отцю́, і Си́ну, і Свято́му Ду́ху.

Засту́пник душі́ моєя́ бу́ди, Бо́же, я́ко посреді́ хожду́ сіте́й мно́гих; ізба́ви м'я от них і спаси́ м'я, Бла́же, я́ко Человіколю́бець.

І ни́ні, і при́сно, і во ві́ки віко́в. Амі́нь.

Пресла́вную Бо́жию Ма́тер і святи́х А́нгел святі́йшую, немо́лчно воспої́м се́рдцем і усти́, Богоро́дицю сію́ іспові́дающе, я́ко воі́стину ро́ждшую нам Бо́га воплоще́нна і моля́щуюся непреста́нно о душа́х на́ших.

Також, поцілувавши хрест свій, осіняй себе хрестом і постіль свою від голови до ніг, а також усі чотири сторони світу, читаючи:

Да воскре́снеть Бог і расточа́ться вразі́ Єго́, і да біжа́ть от лиця́ Єго́ ненави́дящії Єго́. Я́ко ісчеза́єть дим, да ісче́знуть; я́ко та́єть воск от лиця́ огня́, та́ко да поги́бнуть бі́си от лиця́ лю́б’ящих Бо́га, і зна́менующихся кре́стним зна́менієм, і в весе́лії глаго́лющих: ра́дуйся, Пречестни́й і Животворя́щий Кре́сте Госпо́день, прогоня́яй бі́си си́лою на тебі́ проп'я́таго Го́спода на́шего Ісу́са Христа́, во ад сше́дшаго, і попра́вшаго си́лу дия́волю, і дарова́вшаго нам тебе́, Крест Свой Честни́й, на прогна́ніє вся́каго супоста́та. О Пречестни́й і Животворя́щий Кре́сте Госпо́день! Помога́й мі со Свято́ю Госпоже́ю Ді́вою Богоро́дицею і со всі́ми святи́ми во ві́ки. Амі́нь.

Огради́ м'я, Го́споди, си́лою Честна́го і Животворя́щаго Твоєго́ Креста́ і сохрани́ м'я от вся́каго зла.

Осла́би, оста́ви, прости́, Бо́же, прегріше́нія на́ша, во́льная і нево́льная, я́же в сло́ві і в ді́лі, я́же в ві́дінії і не в ві́дінії, я́же во дні і в нощі́, я́же во умі́ і в помишле́нії: вся нам прости́, я́ко Благ і Человіколю́бець.

Ненави́дящих і оби́дящих нас прости́, Го́споди Человіколю́бче. Благотворя́щим благосотвори́. Бра́тіям і сро́дником на́шим да́руй, я́же ко спасе́нію проше́нія і жизнь ві́чную. В не́мощех су́щия посіти́ і ісціле́ніє да́руй. Я́же в мо́рі упра́ви. Путеше́ствующим спутеше́ствуй. Христия́ном спобо́рствуй. Служа́щим і ми́лующим нас гріхо́в оставле́ніє да́руй. Запові́давших нам, недосто́йним, моли́тися о них поми́луй по вели́цій Твоє́й ми́лості. Пом'яни́, Го́споди, пре́жде усо́пших оте́ць і бра́тій на́ших і упоко́й їх, іді́же^* присіща́єть світ лиця́ Твоєго́. Пом'яни́, Го́споди, бра́тій на́ших пліне́нних і ізба́ви я от вся́каго обстоя́нія. Пом'яни́, Го́споди, плодонося́щих і доброді́лающих во святи́х Твої́х Це́рквах і даждь їм я́же ко спасе́нію проше́нія і жизнь ві́чную. Пом'яни́, Го́споди, і нас, смире́нних, і грі́шних, і недосто́йних раб Твої́х, і просвіти́ наш ум сві́том ра́зума Твоєго́, і наста́ви нас на стезю́ за́повідей Твої́х; моли́твами Пречи́стия Влади́чиці на́шея Богоро́диці і Присноді́ви Марі́ї, і всіх Твої́х святи́х, я́ко благослове́н єси́ во ві́ки віко́в. Амі́нь.

Іспові́даю Тебі́, Го́споду Бо́гу моєму́ і Творцю́, во Святі́й Тро́йці Єди́ному, сла́вимому і покланя́ємому, Отцю́, і Си́ну, і Свято́му Ду́ху, вся моя́ гріхи́, я́же соді́ях во вся дні живота́ моєго́, і на вся́кий час, і в настоя́щеє вре́м'я, і в преше́дшия дні і но́щі: ді́лом, сло́вом, помишле́нієм, об'яде́нієм, пія́нством^*, тайнояде́нієм^*, праздносло́вієм, уни́нієм, лі́ностію, прекосло́вієм, непослуша́нієм, оклевета́нієм, осужде́нієм, небреже́нієм, самолю́бієм, многостяжа́нієм, хище́нієм, неправдоглаго́ланієм, скверноприби́тчеством^*, мшелої́мством^*, ревнова́нієм, за́вистію, гні́вом, пам'ятозло́бієм, не́навистію, лихої́мством^* і всі́ми мої́ми чу́встви: зрі́нієм, слу́хом, обоня́нієм, вку́сом, осяза́нієм і про́чими мої́ми гріхи́, душе́вними вку́пі і тіле́сними, ї́миже Тебе́, Бо́га моєго́ і Творця́, прогні́вах і бли́жняго моєго́ онепра́вдовах. О сих жалі́я, ви́нна себе́ Тебі́, Бо́гу моєму́, представля́ю і імі́ю во́лю ка́ятися; то́чію^*, Го́споди Бо́же мой, помози́ мі, со слеза́ми смире́нно молю́ Тя. Преше́дшая же согріше́нія моя́ милосе́рдієм Твої́м прости́ мі і разріши́ от всіх сих, я́же ізглаго́лах пред Тобо́ю, я́ко Благ і Человіколю́бець.

В ру́ці Твої́, Го́споди Ісу́се Христе́, Бо́же мой, предаю́ дух мой: Ти же м'я благослови́, Ти м'я поми́луй і живо́т ві́чний да́руй мі. Амі́нь.