Молитви за померлих без покаяння, преподобному Паїсію Великому

Боже́ственною любо́вію от ю́ности распаля́єм, преподо́бне, вся кра́сная я́же в ми́рі возненави́ді, Христа́ Єди́наго возлюби́л єси́. Сего́ ра́ди в пусти́ню всели́ся, іді́же сподо́бися Боже́ственаго посіще́нія, Єго́же неудо́б зрі́ти і а́нгельськима очи́ма, паде́ поклони́ся. Вели́кий же Дарода́тель, я́ко Человіколю́бець, рече́ к тебі́: не ужаса́йся, возлю́бленний Мой, діла́ твоя́ уго́дна Мні. Се даю́ тебі́ дар: о ко́єм ли́бо грі́шниці помо́лишися, отпу́стяться єму́ грісі́. Ти же в чистоті́ се́рдця твоєго́ возгорі́ся, приє́м во́ду і прикосну́ся Неприкоснове́нному, уми́ но́зі Єго́. І во́ду пив, да́ром чуде́с обогати́ся, грі́шники от му́ки моли́твою своє́ю ізбавля́ти, боля́щия ісціля́ти, о преподо́бне о́тче Паї́сіє, і бісо́в от челові́к отгоня́ти, і́бо от сих грі́шников пе́рвий єсьм аз. Молю́ тя, да умо́лиши І́же тебі́ обітова́, да дасть мі вре́м'я покая́нія, і прости́ть моє́ согріше́ніє, я́ко Благи́й і Человіколю́бець, да со всі́ми і аз воспою́ єму́: аллилу́я.

Жите́йських молв оста́вль, безмо́лвноє житіє́ возлюби́л єси́, Крести́телю подо́б'яся все́ми о́брази, с ни́мже тя почита́єм, о́тче отце́в Паї́сіє.

Страсте́й побіди́теля, душа́м помо́щника, о всіх моле́бника, всім спасе́нія хода́тая і наста́вника, із глубини́ се́рдця воздиха́я, усе́рдно і пла́менно мо́лим тя, Паї́сіє Преподо́бне! Внемли́ і помози́ нам, не отри́нь і не пре́зри нас, но а́біє усли́ши в смире́нії се́рдця притека́ющих к тебі́. Ти, преподо́бне, к спасе́нію бли́жніх прилі́жно стреми́лся і мно́гих грі́шников к сві́ту спасе́нія приве́л єси́. По́двиги чрезмі́рнії успокоє́нієм счита́л по себі́, пречу́дне, і, любо́вію ко Го́споду всегда́ горя́, явле́нія Христа́ Спа́са сподо́бился єси́, і Єму́, за люде́й Уме́ршему, любо́вію подража́я, і об отре́кшихся от Христа́ моли́лся єси́. Усли́ши нас, Паї́сіє прехва́льне, і́бо недосто́йні єсьми́ моли́тися о дарова́нії нам вели́кой ми́лости Госпо́дней, поне́же грі́шні єсьми́, і уста́ оскверне́нния і сердця́ отягоще́нния і́мем, і под бре́менем прегріше́ній стра́ждем, і не достига́єть моли́тва на́ша до Го́спода. Сего́ ра́ди помоли́ся за нас мольбо́ю твоє́ю крі́пкою і богоприя́тною, святи́й Паї́сіє, да ізба́влені бу́дуть сконча́вшіїся без покая́нія сро́дники, бли́жнії і зна́ємії на́ші от му́ки ві́чния, і моли́тву твою́ во благоволе́нії при́йметь Спас наш і милосе́рдіє Своє́ вмі́сто до́брих діл їх дасть їм, свободи́ть їх, ві́руєм, от страда́ній і всели́ть в селе́ніях пра́ведних, і нас в покая́нії сконча́тися удосто́їть, да просла́вим вку́пі всесвято́є і великолі́поє і́м'я Отця́, і Си́на, і Свята́го Ду́ха, во ві́ки віко́в. Амі́нь.