Блаженні, глас 6
Во Ца́рствії Твоє́м, / єгда́ при́йдеши пом'яни́ нас Го́споди.
Блаже́нні ни́щії ду́хом, / я́ко тіх єсть Ца́рство Небе́сноє.
Блаже́нні пла́чущії, / я́ко ті́ї уті́шаться.
Блаже́нні кро́тції, / я́ко ті́ї наслі́дять зе́млю.
Блаже́нні а́лчущії, і жа́ждущії пра́вди, / я́ко ті́ї наси́тяться.
Блаже́нні ми́лостивії, / я́ко ті́ї поми́ловані бу́дуть.
Разбо́йника рая́, Христе́, жи́теля, / на кресті́ Тебі́ возопи́вша, пом'яни́ м'я, / предсоді́ял єси́ покая́нієм єго́, / і мене́ сподо́би, недосто́йнаго.
Блаже́нні чи́стії се́рдцем, / я́ко ті́ї Бо́га у́зрять.
Живото́м господствуяй і сме́ртію, / во дво́ріх святи́х упоко́й, / єго́же прия́л єси́ от привре́менних; / і пом'яни́ м'я, єгда́ при́йдеши во Ца́рствії Твоє́м.
Блаже́нні миротво́рці, / я́ко ті́ї си́нове Бо́жії нареку́ться.
Душа́ми влади́чествуяй і тілеса́ми, / Єго́же в руці́ диха́ніє на́ше, / оскорбля́ємих утіше́ніє, / упоко́й во страні́ пра́ведних, / єго́же преста́вил єси́, раба́ Твоєго́.
Блаже́нні ізгна́ні пра́вди ра́ди, / я́ко тіх єсть Ца́рство Небе́сноє.
Христо́с Тя упоко́їть во страні́ живу́щих, / і врата́ ра́йськая да отве́рзеть Ті, / і Ца́рствія пока́жеть жи́теля, / і оставле́ніє Тебі́ дасть, / о ни́хже согріши́л єси́ в житії́, христолю́бче.
Блаже́нні єсте́, єгда́ поно́сять вам, / і ізжену́ть, і реку́ть всяк зол глаго́л, на ви лжу́ще Мене́ ра́ди.
Ізи́дем і у́зрим во гробі́х, / я́ко на́гі ко́сті челові́к, / черве́й снідь, і смрад, / і позна́єм что бога́тство, добро́та, крі́пость, благолі́піє.
Ра́дуйтеся і веселі́теся, / я́ко мзда ва́ша мно́га на Небесі́х.
Усли́шим, что зове́ть Вседержи́тель: / уви́ і́щущим зрі́ти стра́шний день Госпо́день! / Сей бо єсть тьма, / огне́м бо іскуша́ються вся́чеськая".
Сла́ва: Безнача́льним і рожде́нієм же і происхожде́нієм, / Отцю́ покланя́юся роди́вшему, / Си́на сла́влю рожде́ннаго, / пою́ сопросія́вшаго Отцю́ же і Си́ну, Ду́ха Свята́го.
І ни́ні, Богородичний: Ка́ко от сосцю́ Твоє́ю млеко́ то́чиши, Ді́во*, / ка́ко пита́єши пита́теля тва́рі? / Я́коже вість, істочи́вий во́ду от ка́мене, / жи́ли во́дния жа́ждущим лю́дем, я́коже писа́ся.
