Бо́же Святи́й, І́же во святи́х почива́яй, І́же трисвяти́м гла́сом от серафи́мов воспіва́ємий, і от херуви́мов славосло́вимий, і от вся́кия небе́сния си́ли^* покланя́ємий. І́же от небитія́ во є́же би́ти приведи́й вся́чеськая, созда́вий челові́ка по о́бразу Твоєму́ і по подо́бію, і вся́ким Твої́м дарова́нієм украси́вий. Дая́й прося́щему прему́дрость і ра́зум, і не презира́яй согріша́ющаго, но полага́яй на спасе́ніє покая́ніє. Сподо́бивий нас, смире́нних і недосто́йних раб Твої́х, і в час сей ста́ти пред сла́вою свята́го Твоєго́ же́ртвенника і до́лжноє Тебі́ поклоне́ніє і славосло́віє приноси́ти. Сам, Влади́ко, прийми́ і от уст нас, грі́шних, трисвяту́ю піснь і посіти́ ни бла́гостію Твоє́ю: прости́ нам вся́коє согріше́ніє, во́льноє же і нево́льноє, освяти́ на́ша ду́ші і тілеса́, і даждь нам в преподо́бії служи́ти Тебі́ вся дні живота́ на́шего, моли́твами святи́я Богоро́диці і всіх святи́х, от ві́ка Тебі́ благоугоди́вших.