Псалом 117
Аллилу́я, 117.
1
Іспові́дайтеся Го́сподеві, я́ко благ, я́ко во вік ми́лость Єго́.
2
Да рече́ть у́бо дом Ізра́їлев: я́ко благ, я́ко в вік ми́лость Єго́.
3
Да рече́ть у́бо дом Ааро́нь: я́ко благ, я́ко в вік ми́лость Єго́.
4
Да реку́ть у́бо всі боя́щіїся Го́спода: я́ко благ, я́ко в вік ми́лость Єго́.
5
От ско́рби призва́х Го́спода, і усли́ша м'я в простра́нство.
6
Госпо́дь мні Помо́щник, і не убою́ся; что сотвори́ть мні челові́к?
7
Госпо́дь мні Помо́щник, і аз воззрю́ на враги́ моя́.
8
Благо єсть наді́ятися на Го́спода, не́жели наді́ятися на челові́ка;
9
бла́го єсть упова́ти на Го́спода, не́жели упова́ти на кня́зі.
10
Всі язи́ци обидо́ша м'я, і і́менем Госпо́днім противля́хся їм;
11
Обише́дше обидо́ша м'я, і і́менем Госпо́днім противля́хся їм.
12
обидо́ша м'я, я́ко пче́ли сот, і разгорі́шася, я́ко огнь в те́рнії; і і́менем Госпо́днім противля́хся їм.
13
Отринове́н преврати́хся па́сти, і Госпо́дь прия́т м'я.
14
Крі́пость моя́ і пі́ніє моє́ — Госпо́дь, і бисть мі во спасе́ніє.
15
Глас ра́дости і спасе́нія в селе́ніїх пра́ведних; десни́ця Госпо́дня сотвори́ си́лу.
16
Десни́ця Госпо́дня вознесе́ м'я, десни́ця Госпо́дня сотвори́ си́лу.
17
Не умру́, но жив бу́ду і пові́м діла́ Госпо́дня.
18
Наказу́я наказа́ м'я Госпо́дь, сме́рті же не предаде́ м'я.
19
Отве́рзіте мні врата́ пра́вди; вшед в ня, іспові́мся Го́сподеві.
20
Сія́ врата́ Госпо́дня; пра́веднії вни́дуть в ня.
21
Іспові́мся Тебі́, я́ко усли́шал м'я єси́ і бил єси́ мні во спасе́ніє.
22
Ка́мень, єго́же небрего́ша зи́ждущії, сей бисть во главу́ у́гла.
23
От Го́спода бисть сей, і єсть ди́вен во очесі́х на́ших.
24
Сей день, єго́же сотвори́ Госпо́дь, возра́дуємся і возвеселі́мся в онь.
25
О, Го́споди, спаси́ же, о, Го́споди, поспіши́ же.
26
Благослове́н Гряди́й во і́м'я Госпо́днє; благослови́хом ви із до́му Госпо́дня.
27
Бог Госпо́дь, і яви́ся нам; соста́віте пра́здник во учаща́ющих до рог олтаре́вих.
28
Бог мой єси́ Ти, і іспові́мся Тебі́; Бог мой єси́ Ти, і вознесу́ Тя; іспові́мся Тебі́, я́ко усли́шал м'я єси́ і бил єси́ мні во спасе́ніє.
29
Іспові́дайтеся Го́сподеві, я́ко благ, я́ко во вік ми́лость Єго́.
Сла́ва:
